शिवक्षेत्रप्रभावर्णनम् ईश्वरप्रोक्तं Ishvaraproktam Shivakshetraprabhavarnanam

(शिवरहस्यान्तर्गते महादेवाख्ये)शिवपार्वतीसंवादेईश्वर उवाच ।देवैश्च मुनिभिश्चैव सेवितानि विमुक्तये ।क्षेत्रे तीर्थानि पुण्यानि चित्तशुध्यर्थमादरात् ॥ १॥

(śivarahasyāntargate mahādevākhye)śivapārvatīsaṃvādeīśvara uvāca |devaiśca munibhiścaiva sevitāni vimuktaye |kṣetre tīrthāni puṇyāni cittaśudhyarthamādarāt || 1||

प्रकाश्यन्ते मया तानि शृणु पद्मसमानने ।रुद्रावतारस्थानानि शिवक्षेत्राणि दर्शयेत् ॥ २॥

prakāśyante mayā tāni śṛṇu padmasamānane |rudrāvatārasthānāni śivakṣetrāṇi darśayet || 2||

मृतानां तत्र रुद्रत्वं शिवक्षेत्रेषु देहिनाम् ।आधायाग्निं शिवक्षेत्रे सम्पूज्य परमेश्वरम् ॥ ३॥

mṛtānāṃ tatra rudratvaṃ śivakṣetreṣu dehinām |ādhāyāgniṃ śivakṣetre sampūjya parameśvaram || 3||

स्वदेहं पिण्डवद्वह्नौ जुह्वन् पञ्चाक्षरेण तु ।शिवक्षेत्रे महादेवि शिवसायुज्यमाप्नुयात् ॥ ४॥

svadehaṃ piṇḍavadvahnau juhvan pañcākṣareṇa tu |śivakṣetre mahādevi śivasāyujyamāpnuyāt || 4||

छित्वा पदद्वयं वापि शिवक्षेत्रेषु यो वसेत् ।स याति शिवतां देवि नात्र कार्या विचारणा ॥ ५॥

chitvā padadvayaṃ vāpi śivakṣetreṣu yo vaset |sa yāti śivatāṃ devi nātra kāryā vicāraṇā || 5||

क्षेत्राणां दर्शनं पुण्यं प्रवेशस्तच्छताधिकः ।तस्माच्छतगुणं पूजा जलस्नानं ततःपरम् ॥ ६॥

kṣetrāṇāṃ darśanaṃ puṇyaṃ praveśastacchatādhikaḥ |tasmācchataguṇaṃ pūjā jalasnānaṃ tataḥparam || 6||

क्षीरस्नानमतो देवि शताधिकमनुत्तमम् ।दध्ना सहस्रमाख्यातं मधुना तच्छताधिकम् ॥ ७॥

kṣīrasnānamato devi śatādhikamanuttamam |dadhnā sahasramākhyātaṃ madhunā tacchatādhikam || 7||

घृतस्नानेन चानन्त्यमुपवासेन सत्तमे ।तस्मात्कोटिगुणं देवि देहान्तं शिवसन्निधौ ॥ ८॥

ghṛtasnānena cānantyamupavāsena sattame |tasmātkoṭiguṇaṃ devi dehāntaṃ śivasannidhau || 8||

शिवक्षेत्रसमीपस्तथां नदीं वापि तटाककम् ।कूपवापिप्रशस्येत शिवतीर्थमिति स्मृतम् ॥ ९॥

śivakṣetrasamīpastathāṃ nadīṃ vāpi taṭākakam |kūpavāpipraśasyeta śivatīrthamiti smṛtam || 9||

स्नात्वा तेषु नरो भक्त्या नरकं नैव विन्दति ।शाम्भवान्भोजयेत्तत्र यथायोग्यं यथाबलम् ॥ १०॥

snātvā teṣu naro bhaktyā narakaṃ naiva vindati |śāmbhavānbhojayettatra yathāyogyaṃ yathābalam || 10||

श्रद्धया श्राद्धदानेन पितॄन् तारयते हि सः ।भस्मत्तिपुण्ड्ररुद्राक्षधृगेव निवसेच्छिवे ॥ ११॥

śraddhayā śrāddhadānena pitṝn tārayate hi saḥ |bhasmattipuṇḍrarudrākṣadhṛgeva nivasecchive || 11||

रुद्रपञ्चाक्षरपरो रुद्रलिङ्गार्चनप्रियः ।नियतो नियमोपेतः शान्तो दान्तः स्थिरासनः ॥ १२॥

rudrapañcākṣaraparo rudraliṅgārcanapriyaḥ |niyato niyamopetaḥ śānto dāntaḥ sthirāsanaḥ || 12||

उमाकान्तपदध्यायी नितान्तं मुक्त एव सः ।वस्त्रापदं रुद्रकोटिरविमुक्तं महाभयम् ॥ १३॥

umākāntapadadhyāyī nitāntaṃ mukta eva saḥ |vastrāpadaṃ rudrakoṭiravimuktaṃ mahābhayam || 13||

गोकर्णभद्रकर्णौ च स्वर्णाक्षं त्र्यक्षदीप्तिमत् ।स्थाण्वीश्वरं च विख्यातं त्रिषुलोकेषु विश्रुतम् ॥ १४॥

gokarṇabhadrakarṇau ca svarṇākṣaṃ tryakṣadīptimat |sthāṇvīśvaraṃ ca vikhyātaṃ triṣulokeṣu viśrutam || 14||

स्थानाष्टकमिदं देवि अष्टमूर्तिप्रियं परम् ।वस्त्रापदादि स्थाण्वन्तं शिवसायुज्यदायकम् ॥ १५॥

sthānāṣṭakamidaṃ devi aṣṭamūrtipriyaṃ param |vastrāpadādi sthāṇvantaṃ śivasāyujyadāyakam || 15||

छगण्डलो द्विरण्डश्च कामोदं माण्डलेश्वरम् ।कालञ्जरं शङ्कुकर्णं स्थलेशश्च जलेश्वरः ॥ १६॥

chagaṇḍalo dviraṇḍaśca kāmodaṃ māṇḍaleśvaram |kālañjaraṃ śaṅkukarṇaṃ sthaleśaśca jaleśvaraḥ || 16||

पवित्राष्टकमित्येतच्छैवं क्षेत्रं महाघभित् ।मृताः प्रयान्ति तत्रैव शिवस्य परमं पदम् ॥ १७॥

pavitrāṣṭakamityetacchaivaṃ kṣetraṃ mahāghabhit |mṛtāḥ prayānti tatraiva śivasya paramaṃ padam || 17||

पिण्डारकं कुरुक्षेत्रं तथा कनखलं शिवे ।विमलेशाट्टहासं च महाकालमहेन्द्रकम् ॥ १८॥

piṇḍārakaṃ kurukṣetraṃ tathā kanakhalaṃ śive |vimaleśāṭṭahāsaṃ ca mahākālamahendrakam || 18||

भीमेश्वराख्यं तत्पुण्यमेतद्गुह्याष्टकं शिवे ।मृताः प्रयान्ति गणतां पापाः पुण्या अपि स्थिरम् ॥ १९॥

bhīmeśvarākhyaṃ tatpuṇyametadguhyāṣṭakaṃ śive |mṛtāḥ prayānti gaṇatāṃ pāpāḥ puṇyā api sthiram || 19||

श्रीपर्वतो हरिश्चन्द्रः केदारो मन्त्रकेश्वरः ।ओङ्कारो भैरवेशश्च मध्यमेशः सितेश्वरम् ॥ २०॥

śrīparvato hariścandraḥ kedāro mantrakeśvaraḥ |oṅkāro bhairaveśaśca madhyameśaḥ siteśvaram || 20||

एतद्गुह्याष्टकं क्षेत्रं शिवसायुज्यदायकम् ।सन्तर्प्य च पितॄन् श्राद्धे प्रीणयेद्देवि शाम्भवान् ॥ २१॥

etadguhyāṣṭakaṃ kṣetraṃ śivasāyujyadāyakam |santarpya ca pitṝn śrāddhe prīṇayeddevi śāmbhavān || 21||

अमरेशं प्रभासं च नैमिशं पुष्करं तथा ।आपाटं पडिमण्डी च हरभूमिर्भवानकः ॥ २२॥

amareśaṃ prabhāsaṃ ca naimiśaṃ puṣkaraṃ tathā |āpāṭaṃ paḍimaṇḍī ca harabhūmirbhavānakaḥ || 22||

एतच्छैवाष्टकं क्षेत्रं शिवसायुज्यदायकम् ।लकुलीशः प्रवाजश्च करञ्ज त्र्यम्बकेश्वम् ॥ २३॥

etacchaivāṣṭakaṃ kṣetraṃ śivasāyujyadāyakam |lakulīśaḥ pravājaśca karañja tryambakeśvam || 23||

नागेश्वरं वैद्यनाथं सोमेशं घुसृणीश्वरम् ।क्षेत्राष्टकमिदं देवि मम प्रियकरं सदा ॥ २४॥

nāgeśvaraṃ vaidyanāthaṃ someśaṃ ghusṛṇīśvaram |kṣetrāṣṭakamidaṃ devi mama priyakaraṃ sadā || 24||

अत्र यान्ति मृताः सर्वे रुद्रस्य परमं पदम् ।पञ्चाष्टकमिदं ज्ञेयं शिवक्षेत्रं सलक्षणम् ॥ २५॥

atra yānti mṛtāḥ sarve rudrasya paramaṃ padam |pañcāṣṭakamidaṃ jñeyaṃ śivakṣetraṃ salakṣaṇam || 25||

यत्रैव भावसंसक्ता भावा यान्त्यपुनर्भवम् ।स्नानं दानं तथा श्राद्धं ये कुर्युश्चात्र भावतः ॥ २६॥

yatraiva bhāvasaṃsaktā bhāvā yāntyapunarbhavam |snānaṃ dānaṃ tathā śrāddhaṃ ye kuryuścātra bhāvataḥ || 26||

शिवावसथकूपाद्यं तदक्षय्यफलं भवेत् (व्रजेत्) । २७\।१॥॥ इति शिवरहस्यान्तर्गते ईश्वरप्रोक्तं शिवक्षेत्रप्रभावर्णनं सम्पूर्णम् ॥॥ श्रीशिवरहस्यम् । महादेवाख्यः एकादशमांशः । अध्यायः ४९ सर्वक्षेत्रप्रभावकथनम् । १२७\।१॥– ॥ श्रीशिवरहस्यम् । महादेवाख्यः एकादशमांशः । अध्यायः ४९ सर्वक्षेत्रप्रभावकथनम् । १-२७।१॥

śivāvasathakūpādyaṃ tadakṣayyaphalaṃ bhavet (vrajet) | 27\|1|||| iti śivarahasyāntargate īśvaraproktaṃ śivakṣetraprabhāvarṇanaṃ sampūrṇam |||| śrīśivarahasyam | mahādevākhyaḥ ekādaśamāṃśaḥ | adhyāyaḥ 49 sarvakṣetraprabhāvakathanam | 127\|1||– || śrīśivarahasyam | mahādevākhyaḥ ekādaśamāṃśaḥ | adhyāyaḥ 49 sarvakṣetraprabhāvakathanam | 1-27|1||