शिवलिङ्गपूजाकथनम् Ishvaraproktam Shivalingapujakathanam

(शिवरहस्यान्तर्गते ईश्वराख्ये)शिवगौरीसंवादेदेव्युवाच ।देव देव महादेव कैलासशिखरप्रिय ॥ २॥

(śivarahasyāntargate īśvarākhye)śivagaurīsaṃvādedevyuvāca |deva deva mahādeva kailāsaśikharapriya || 2||

तव प्रियकराणीह कानि लिङ्गानि शङ्कर ।तेषामुत्कर्षतः शम्भो पूजां चैवाधिकारिताम् ॥ ३॥

tava priyakarāṇīha kāni liṅgāni śaṅkara |teṣāmutkarṣataḥ śambho pūjāṃ caivādhikāritām || 3||

वद लिङ्गानि कानि स्युस्तव पूजाविधौ शिव ।ईश्वर उवाच ।शृणु पद्मपलाशाक्षि गिरिजे विरजेऽमले ॥ ४॥

vada liṅgāni kāni syustava pūjāvidhau śiva |īśvara uvāca |śṛṇu padmapalāśākṣi girije viraje'male || 4||

नित्ये नैमित्तिके काम्ये वक्ष्ये लिङ्गान्यनुक्रमात् ।तेषां पूजाविधिं चापि मानं लक्षणमीश्वरि ॥ ५॥

nitye naimittike kāmye vakṣye liṅgānyanukramāt |teṣāṃ pūjāvidhiṃ cāpi mānaṃ lakṣaṇamīśvari || 5||

पार्थिवात्तैजसं लिङ्गं वरिष्ठं परिकीर्तितम् ।तैजसाद्रत्नलिङ्गानि वरिष्ठान्यर्चनाविधौ ॥ ६॥

pārthivāttaijasaṃ liṅgaṃ variṣṭhaṃ parikīrtitam |taijasādratnaliṅgāni variṣṭhānyarcanāvidhau || 6||

चराचरविभागेन लिङ्गं द्वेधा विनिर्मितम् ।पाषाणं स्थावरं प्राहुर्बाणलिङ्गविवर्जितम् ॥ ७॥

carācaravibhāgena liṅgaṃ dvedhā vinirmitam |pāṣāṇaṃ sthāvaraṃ prāhurbāṇaliṅgavivarjitam || 7||

तत्स्थूलं स्थावरं प्राहुश्चरं तु चतुरङ्गुलम् ।सर्वाण्यपि च लिङ्गानि स्थूलान्येव प्रशस्यते ॥ ८॥

tatsthūlaṃ sthāvaraṃ prāhuścaraṃ tu caturaṅgulam |sarvāṇyapi ca liṅgāni sthūlānyeva praśasyate || 8||

रत्नानि सूक्ष्मलिङ्गानि प्रशस्तानि शुभानने ।सत्रासान्यपि लिङ्गानि शस्तानि मम पूजने ॥ ९॥

ratnāni sūkṣmaliṅgāni praśastāni śubhānane |satrāsānyapi liṅgāni śastāni mama pūjane || 9||

रत्नलिङ्गेषु देवेशि फलं वक्ष्येऽनुपूर्वशः ।आयुर्वृद्धिकरं हीरं रोगहृन्मौक्तिकोद्भवम् ॥ १०॥

ratnaliṅgeṣu deveśi phalaṃ vakṣye'nupūrvaśaḥ |āyurvṛddhikaraṃ hīraṃ rogahṛnmauktikodbhavam || 10||

सुखकृत्पुष्यरागोत्थं वैडूर्यं शत्रुनाशकम् ।पद्मरागं च लक्ष्मीदं इन्द्रनीलं यशःप्रदम् ॥ ११॥

sukhakṛtpuṣyarāgotthaṃ vaiḍūryaṃ śatrunāśakam |padmarāgaṃ ca lakṣmīdaṃ indranīlaṃ yaśaḥpradam || 11||

वैद्रुमं धनदं नित्यं गोमेदं पुत्रपौत्रदम् ।लिङ्गं मारकतं पुष्टौ स्फाटिकं सर्वकामदम् ॥ १२॥

vaidrumaṃ dhanadaṃ nityaṃ gomedaṃ putrapautradam |liṅgaṃ mārakataṃ puṣṭau sphāṭikaṃ sarvakāmadam || 12||

हेमजं मुक्तिदं देवि राजतं ज्ञानदं नृणाम् ।पूजयेत्ताम्रलिङ्गं तु पुष्टितुष्टिपशुप्रदम् ॥ १३॥

hemajaṃ muktidaṃ devi rājataṃ jñānadaṃ nṛṇām |pūjayettāmraliṅgaṃ tu puṣṭituṣṭipaśupradam || 13||

पुत्रदं पैत्तलं लिङ्गं कांस्यं कीर्तिप्रदं शिवे ।शत्रुमारणकामस्तु लिङ्गं लोहमयं जपेत् (यजेत्) ॥ १४॥

putradaṃ paittalaṃ liṅgaṃ kāṃsyaṃ kīrtipradaṃ śive |śatrumāraṇakāmastu liṅgaṃ lohamayaṃ japet (yajet) || 14||

तथा सीसमयं लिङ्गमायुष्कामो यजेत्सदा ।शिवे रसमये लिङ्गे सदा सन्निहितोऽस्म्यहम् ॥ १५॥

tathā sīsamayaṃ liṅgamāyuṣkāmo yajetsadā |śive rasamaye liṅge sadā sannihito'smyaham || 15||

तत्पूजया कोटिलिङ्गपूजा ह्यह्नैव लभ्यते ।न प्रतिष्ठादिसंस्कारस्तल्लिङ्गस्य महेश्वरि ॥ १६॥

tatpūjayā koṭiliṅgapūjā hyahnaiva labhyate |na pratiṣṭhādisaṃskārastalliṅgasya maheśvari || 16||

रत्नधातुजलिङ्गेषु शताब्दान्ते प्रतिष्ठितिः ।प्रतिमायां चित्रपटे तथादर्शे महेश्वरि ॥ १७॥

ratnadhātujaliṅgeṣu śatābdānte pratiṣṭhitiḥ |pratimāyāṃ citrapaṭe tathādarśe maheśvari || 17||

अयने पर्वयोर्देवि तत्र कुर्यात्प्रतिष्ठितिम् ।पार्थिवादीनि लिङ्गानि वक्ष्यामि परमेश्वरि ॥ १८॥

ayane parvayordevi tatra kuryātpratiṣṭhitim |pārthivādīni liṅgāni vakṣyāmi parameśvari || 18||

मृद्भवं दारुजं लिङ्गं सैकतं पिष्टनिर्मितम् ।गान्धं सौभाग्यदं विद्धि छन्नमायुर्विवर्धनम् ॥ १९॥

mṛdbhavaṃ dārujaṃ liṅgaṃ saikataṃ piṣṭanirmitam |gāndhaṃ saubhāgyadaṃ viddhi channamāyurvivardhanam || 19||

पौष्पं सर्वार्थदं देवि मानदं शृङ्ग निर्मितम् ।सेनापत्यप्रदं पुंसां नागदन्तमयं शिवे ॥ २०॥

pauṣpaṃ sarvārthadaṃ devi mānadaṃ śṛṅga nirmitam |senāpatyapradaṃ puṃsāṃ nāgadantamayaṃ śive || 20||

शालिपिष्टोद्भवं लिङ्गं पशुदं यवजं बलम् ।गोधूमजं वातहरं मौद्गं स्त्री माषजं सुखं (?) ॥ २१॥

śālipiṣṭodbhavaṃ liṅgaṃ paśudaṃ yavajaṃ balam |godhūmajaṃ vātaharaṃ maudgaṃ strī māṣajaṃ sukhaṃ (?) || 21||

तिलकल्कोद्भवं पुण्यं सिध्यर्थमघनाशनम् ।गौडं प्रीतिकरं पुंसां नवनीतं सुखप्रदम् ॥ २२॥

tilakalkodbhavaṃ puṇyaṃ sidhyarthamaghanāśanam |gauḍaṃ prītikaraṃ puṃsāṃ navanītaṃ sukhapradam || 22||

गोमयं रोगनाशाय भस्मोत्थं पापहृच्छिवे ।लवणं मैत्रदं देवि मूलजं शत्रुनाशनम् ॥ २३॥

gomayaṃ roganāśāya bhasmotthaṃ pāpahṛcchive |lavaṇaṃ maitradaṃ devi mūlajaṃ śatrunāśanam || 23||

वंशाङ्कुरोत्थं वंशादिवृद्धिप्रदमनुत्तमम् ।पुरक्षोभकरं पौरं रामठं कुष्ठनाशनम् ॥ २४॥

vaṃśāṅkurotthaṃ vaṃśādivṛddhipradamanuttamam |purakṣobhakaraṃ pauraṃ rāmaṭhaṃ kuṣṭhanāśanam || 24||

अस्थिजं मारणं प्रोक्तं केशजं भयदं त्वरेः ।कुङ्कुमं धनदं देवि हारिद्रं मङ्गलप्रदम् ॥ २५॥

asthijaṃ māraṇaṃ proktaṃ keśajaṃ bhayadaṃ tvareḥ |kuṅkumaṃ dhanadaṃ devi hāridraṃ maṅgalapradam || 25||

सौभाग्यदं च कर्पूरं कस्तूरीसम्भवं सुखम् ।यावत्कामं पूजयेत्तु लिङ्गान्येतानि सुन्दरि ॥ २६॥

saubhāgyadaṃ ca karpūraṃ kastūrīsambhavaṃ sukham |yāvatkāmaṃ pūjayettu liṅgānyetāni sundari || 26||

विधिः पार्थिवलिङ्गस्य समासान्न तु विस्तरात् ।मृल्लिङ्गार्चाविधिं वक्ष्ये शृणु देवि मयोदितम् ॥ २७॥

vidhiḥ pārthivaliṅgasya samāsānna tu vistarāt |mṛlliṅgārcāvidhiṃ vakṣye śṛṇu devi mayoditam || 27||

मृदाहारणसङ्घट्टप्रतिष्ठावानमीश्वर ।स्नपनं पूजनं चैव विसर्जनमतः परम् ॥ २८॥

mṛdāhāraṇasaṅghaṭṭapratiṣṭhāvānamīśvara |snapanaṃ pūjanaṃ caiva visarjanamataḥ param || 28||

हरः सोमेश्वरश्चैव शूलपाणिः पिनाकधृक् ।शिवः पशुपतिश्चैव महादेव इति प्रिये ॥ २९॥

haraḥ someśvaraścaiva śūlapāṇiḥ pinākadhṛk |śivaḥ paśupatiścaiva mahādeva iti priye || 29||

केचित्पञ्चोपचारांस्तु पञ्चब्रह्मादिभिः शिवे ।षडक्षरेणोपचारान् कुर्युर्देवि पृथक् पृथक् ॥ ३०॥

kecitpañcopacārāṃstu pañcabrahmādibhiḥ śive |ṣaḍakṣareṇopacārān kuryurdevi pṛthak pṛthak || 30||

प्रणवदिचतुर्थ्यन्तैर्नमोऽन्तैर्हरनामभिः ।सर्वमन्त्रमयश्चायमोङ्काराद्यैः षडक्षरैः ॥ ३१॥

praṇavadicaturthyantairnamo'ntairharanāmabhiḥ |sarvamantramayaścāyamoṅkārādyaiḥ ṣaḍakṣaraiḥ || 31||

यं यं काममभिध्यायेत्तत्तत्सङ्कल्प्य पूजयेत् ।यावत्कामसमाप्तिर्हि कुर्यान्मृल्लिङ्गपूजनम् ॥ ३२॥

yaṃ yaṃ kāmamabhidhyāyettattatsaṅkalpya pūjayet |yāvatkāmasamāptirhi kuryānmṛlliṅgapūjanam || 32||

ध्यानं तस्यैव विहितं पूजने परमेश्वरि ॥ ३३॥

dhyānaṃ tasyaiva vihitaṃ pūjane parameśvari || 33||

ध्यायेदेवं महेशं रजतगिरिवसं(चरं)चारुचन्द्रावतंसंरत्नाकल्पोज्ज्वलाङ्गं परशुमृगवराभीतिहस्तं प्रसन्नम् ।पद्मासीनं हि देव्या वृतममरवरैः पार्षदैस्त्वम्ब देवंविश्वेशं विश्ववन्द्यं निखिलभयहरं भावयेत्पञ्चवक्त्रम् ॥ ३४॥

dhyāyedevaṃ maheśaṃ rajatagirivasaṃ(caraṃ)cārucandrāvataṃsaṃratnākalpojjvalāṅgaṃ paraśumṛgavarābhītihastaṃ prasannam |padmāsīnaṃ hi devyā vṛtamamaravaraiḥ pārṣadaistvamba devaṃviśveśaṃ viśvavandyaṃ nikhilabhayaharaṃ bhāvayetpañcavaktram || 34||

पञ्चोपचारैः सम्पूज्य स्नानादीनि सुरेश्वरि ।मूर्तयोऽष्टौ शिवस्यैव पूजनीयाश्च दिक्क्रमात् ॥ ३५॥

pañcopacāraiḥ sampūjya snānādīni sureśvari |mūrtayo'ṣṭau śivasyaiva pūjanīyāśca dikkramāt || 35||

शर्वाय क्षितिरूपाय भवाय जलमूर्तये ।रुद्राय वह्निरूपाय वायवे चोग्रमूर्तये ॥ ३६॥

śarvāya kṣitirūpāya bhavāya jalamūrtaye |rudrāya vahnirūpāya vāyave cogramūrtaye || 36||

भीमायाकाशमूर्त्ये च यजेत पशुपाय च ।महादेवाय सोमाय सूर्यमूर्त्यात्मनेति दिक् ॥ ३७॥

bhīmāyākāśamūrtye ca yajeta paśupāya ca |mahādevāya somāya sūryamūrtyātmaneti dik || 37||

स्तुत्वा ध्यात्वा नमस्कृत्य पार्थिवं तद्विसर्जयेत् ।एवं पापहरं प्रोक्तं द्विलिङ्गं सर्वसिद्धिदम् ॥ ३८॥

stutvā dhyātvā namaskṛtya pārthivaṃ tadvisarjayet |evaṃ pāpaharaṃ proktaṃ dviliṅgaṃ sarvasiddhidam || 38||

त्रिलिङ्गं पूजयेन्नित्यं सर्वदं पार्थिवं शिवे ।लिङ्गानामयुतं पूज्यं महाराजभयापहम् ॥ ३९॥

triliṅgaṃ pūjayennityaṃ sarvadaṃ pārthivaṃ śive |liṅgānāmayutaṃ pūjyaṃ mahārājabhayāpaham || 39||

सहस्रमेकं लिङ्गानां पूज्यं रोगहरं शिवे ।सहस्राणि तथा पञ्च पुत्रदं पार्थिवार्चनम् ॥ ४०॥

sahasramekaṃ liṅgānāṃ pūjyaṃ rogaharaṃ śive |sahasrāṇi tathā pañca putradaṃ pārthivārcanam || 40||

कारागृहविमुक्त्यर्थं शतमष्टोत्तरं यजेत् ।लिङ्गानां पार्थिवानां तु लक्षं स्यान्मोक्षसिद्धिदम् ॥ ४१॥

kārāgṛhavimuktyarthaṃ śatamaṣṭottaraṃ yajet |liṅgānāṃ pārthivānāṃ tu lakṣaṃ syānmokṣasiddhidam || 41||

कोटिपार्थिवलिङ्गानां मुक्तिदं स्यान्न संशयः ।सर्वपार्थिवलिङ्गानां नित्यकाम्येष्वयं विधिः ॥ ४२॥

koṭipārthivaliṅgānāṃ muktidaṃ syānna saṃśayaḥ |sarvapārthivaliṅgānāṃ nityakāmyeṣvayaṃ vidhiḥ || 42||

मृल्लिङ्गं पार्थिवं लक्षं भुक्तिमुक्तिफलप्रदम् ।देशं कालं बलं ज्ञात्वा फलं चैव विशेषतः ॥ ४३॥

mṛlliṅgaṃ pārthivaṃ lakṣaṃ bhuktimuktiphalapradam |deśaṃ kālaṃ balaṃ jñātvā phalaṃ caiva viśeṣataḥ || 43||

विद्यार्थी लिङ्गसाहस्रं धनार्थी च तदर्धकम् ।पुत्रार्थीचार्धसाहस्रं कन्यार्थी च शतत्रयम् ॥ ४४॥

vidyārthī liṅgasāhasraṃ dhanārthī ca tadardhakam |putrārthīcārdhasāhasraṃ kanyārthī ca śatatrayam || 44||

विद्वान् लिङ्गायुतं कुर्यात्सर्वपापहरं परम् ।सुहृत्कामः सहस्रं तु धनार्थी च सहस्रकम् ॥ ४५॥

vidvān liṅgāyutaṃ kuryātsarvapāpaharaṃ param |suhṛtkāmaḥ sahasraṃ tu dhanārthī ca sahasrakam || 45||

मरणार्थी सप्तशतं मोहनार्थी शताष्टकम् ।उच्चाटनार्थी साहस्रं वश्यार्थी द्विसहस्रकम् ॥ ४६॥

maraṇārthī saptaśataṃ mohanārthī śatāṣṭakam |uccāṭanārthī sāhasraṃ vaśyārthī dvisahasrakam || 46||

दारिद्र्यनाशनार्थं तु पञ्चसाहस्रमीरितम् ।पार्थिवेन तु लिङ्गेन बहवः सिद्धिमागताः ॥ ४७॥

dāridryanāśanārthaṃ tu pañcasāhasramīritam |pārthivena tu liṅgena bahavaḥ siddhimāgatāḥ || 47||

तत्रापि पार्थिवं लिङ्गं क्षिप्रसिद्धिप्रदं शिवे ।कृते रत्नमयं लिङ्गं त्रेतायां हेमसम्भवम् ॥ ४८॥

tatrāpi pārthivaṃ liṅgaṃ kṣiprasiddhipradaṃ śive |kṛte ratnamayaṃ liṅgaṃ tretāyāṃ hemasambhavam || 48||

द्वापरे पारदं श्रेष्ठं पार्थिवं तु कलौ युगे ।रत्नधातुस्फटिकजपार्थिवे नैव चण्डभाक् ॥ ४९॥

dvāpare pāradaṃ śreṣṭhaṃ pārthivaṃ tu kalau yuge |ratnadhātusphaṭikajapārthive naiva caṇḍabhāk || 49||

नैवेद्यं चैव निर्माल्यं ग्राह्यमेव न संशयः ॥ ५०॥

naivedyaṃ caiva nirmālyaṃ grāhyameva na saṃśayaḥ || 50||

लिङ्गान्यमूनि किल शैलसुतेऽमलानितुङ्गानि पार्थिवसुधातुजतैजसानि ।सम्पूजितानि नियमेन फलेच्छुभिर्वानिष्काममुक्तिपरमाणि सदैव गौरि ॥ ५१॥

liṅgānyamūni kila śailasute'malānituṅgāni pārthivasudhātujataijasāni |sampūjitāni niyamena phalecchubhirvāniṣkāmamuktiparamāṇi sadaiva gauri || 51||

॥ इति शिवरहस्यान्तर्गते ईश्वरप्रोक्तं शिवलिङ्गपूजाकथनं सम्पूर्णम् ॥॥ श्रीशिवरहस्यम् । ईश्वराख्यः दशमांशः । अध्यायः ४३ लिङ्गपूजाकथनम् । २५१॥

|| iti śivarahasyāntargate īśvaraproktaṃ śivaliṅgapūjākathanaṃ sampūrṇam |||| śrīśivarahasyam | īśvarākhyaḥ daśamāṃśaḥ | adhyāyaḥ 43 liṅgapūjākathanam | 251||

– ॥ श्रीशिवरहस्यम् ।ईश्वराख्यः दशमांशः ।अध्यायः ४३ लिङ्गपूजाकथनम् ।२-५१॥

– || śrīśivarahasyam |īśvarākhyaḥ daśamāṃśaḥ |adhyāyaḥ 43 liṅgapūjākathanam | 2-51||