शिवलिङ्गप्रतिष्ठामाहात्म्यम् ईश्वरप्रोक्तं Ishvaraproktam Shivalingapratishthamahatmyam

(शिवरहस्यान्तर्गते महादेवाख्ये)शिवगौरीसंवादेश्रीमहादेव उवाच ।शृणु पद्मपलशाक्षि प्रतिष्ठाविधिमुत्तमम् ।शिवलिङ्गस्य मे देवि जङ्गमस्थावरस्य च ॥ ८॥

(śivarahasyāntargate mahādevākhye)śivagaurīsaṃvādeśrīmahādeva uvāca |śṛṇu padmapalaśākṣi pratiṣṭhāvidhimuttamam |śivaliṅgasya me devi jaṅgamasthāvarasya ca || 8||

शिवक्षेत्रे गिरौ नद्यां वने गङ्गातटे शुभे ।हिमालये च केदारे वाराणस्यां महेश्वरि ॥ ९॥

śivakṣetre girau nadyāṃ vane gaṅgātaṭe śubhe |himālaye ca kedāre vārāṇasyāṃ maheśvari || 9||

गङ्गादिसङ्गमे वापि वैद्यनाथे कुरुस्थले ।तथा भद्रवटे पुण्ये रुद्रकोटौ प्रभासके ॥ १०॥

gaṅgādisaṅgame vāpi vaidyanāthe kurusthale |tathā bhadravaṭe puṇye rudrakoṭau prabhāsake || 10||

पुष्करे च तथोङ्कारे लिङ्गं स्थाप्य सुपुण्यभाक् ।कृष्णवेण्याः पयोष्ण्याश्च गोदावर्या महेश्वरि ॥ ११॥

puṣkare ca tathoṅkāre liṅgaṃ sthāpya supuṇyabhāk |kṛṣṇaveṇyāḥ payoṣṇyāśca godāvaryā maheśvari || 11||

तुङ्गायाश्चाथ पम्पाया वेगवत्यास्तथा तटे ।क्षिप्राया नर्मदायाश्च गङ्गायमुनयोस्तटे ॥ १२॥

tuṅgāyāścātha pampāyā vegavatyāstathā taṭe |kṣiprāyā narmadāyāśca gaṅgāyamunayostaṭe || 12||

तटेषु भीमरथ्याश्च चर्मण्वत्या महेश्वरि ।कवेरजायास्तीरेषु क्षेत्रेष्वेतेषु शङ्करि ॥ १३॥

taṭeṣu bhīmarathyāśca carmaṇvatyā maheśvari |kaverajāyāstīreṣu kṣetreṣveteṣu śaṅkari || 13||

श्रीकण्ठे च तृणावर्ते मातृरत्नगिरौ तथा ।जम्बुकेशे पञ्चनदे कुम्भघोणेऽर्जुने तथा ॥ १४॥

śrīkaṇṭhe ca tṛṇāvarte mātṛratnagirau tathā |jambukeśe pañcanade kumbhaghoṇe'rjune tathā || 14||

श्वतारण्ये ब्रह्मवने पुण्ये छायावने शुभे ।तथा दभ्रसभायां वा वृद्धाद्रौ गोणगे तथा ॥ १५॥

śvatāraṇye brahmavane puṇye chāyāvane śubhe |tathā dabhrasabhāyāṃ vā vṛddhādrau goṇage tathā || 15||

लिङ्गप्रतिष्ठादेशाः स्युर्नदीक्षेत्राण्यमूनि मे ।पुण्यानि च प्रतिष्ठासु नवारण्यानि शङ्करि ॥ १६॥

liṅgapratiṣṭhādeśāḥ syurnadīkṣetrāṇyamūni me |puṇyāni ca pratiṣṭhāsu navāraṇyāni śaṅkari || 16||

नैमिशं दण्डकारण्यं ब्रह्मारण्यं महेश्वरि ।कुशारण्यं देववनं रुद्राण्यं बृहद्वनम् ॥ १७॥

naimiśaṃ daṇḍakāraṇyaṃ brahmāraṇyaṃ maheśvari |kuśāraṇyaṃ devavanaṃ rudrāṇyaṃ bṛhadvanam || 17||

कालञ्जरं पद्मवनं सप्तपर्योऽत्र पुण्यदाः ।प्रतिष्ठायां महादेवि शिवलिङ्गस्य सत्तमे ॥ १८॥

kālañjaraṃ padmavanaṃ saptaparyo'tra puṇyadāḥ |pratiṣṭhāyāṃ mahādevi śivaliṅgasya sattame || 18||

अयोध्या मधुरा माया काशी काञ्ची अवन्तिका ।पुरी द्वारवती देवि प्रतिष्ठासु महाफलाः ॥ १९॥

ayodhyā madhurā māyā kāśī kāñcī avantikā |purī dvāravatī devi pratiṣṭhāsu mahāphalāḥ || 19||

कुलाचलेष्वपीशीनी प्रतिष्ठा सुमहाफला ।निषधः कुमुदो विन्ध्यः पारियात्रश्च नीलकः ॥ २०॥

kulācaleṣvapīśīnī pratiṣṭhā sumahāphalā |niṣadhaḥ kumudo vindhyaḥ pāriyātraśca nīlakaḥ || 20||

मेरुदर्दरकैलासौ दक्षिणे हेमकूटकः ।कुलाचलेष्वथैतेषु स्थाप्य लिङ्गं महाफलम् ॥ २१॥

merudardarakailāsau dakṣiṇe hemakūṭakaḥ |kulācaleṣvathaiteṣu sthāpya liṅgaṃ mahāphalam || 21||

महाकैलासमौलौ तु शिवलिङ्गप्रतिष्ठितिः ।दुर्लभा सर्वदेवानां मनुष्याणां तु किं पुनः ॥ २२॥

mahākailāsamaulau tu śivaliṅgapratiṣṭhitiḥ |durlabhā sarvadevānāṃ manuṣyāṇāṃ tu kiṃ punaḥ || 22||

सर्वक्षेत्रनदीतीरवनपर्वतमौलितः ।विशिष्टाऽत्र महादेवि कोटिकोटिगुणाधिका ॥ २३॥

sarvakṣetranadītīravanaparvatamaulitaḥ |viśiṣṭā'tra mahādevi koṭikoṭiguṇādhikā || 23||

स्वायम्भुवं तथा दैवमार्षं मानुषमेव च ।स्वायम्भुवस्य लिङ्गस्य परितः क्रोशमेव हि ॥ २४॥

svāyambhuvaṃ tathā daivamārṣaṃ mānuṣameva ca |svāyambhuvasya liṅgasya paritaḥ krośameva hi || 24||

तत्र वासो विशिष्टानां भवतीत्येव मे मनः ।तत्रैव मरणाज्जन्तोः शिवलोको न संशयः ॥ २५॥

tatra vāso viśiṣṭānāṃ bhavatītyeva me manaḥ |tatraiva maraṇājjantoḥ śivaloko na saṃśayaḥ || 25||

देवेचापि तदर्धंस्यात्परिमाणं च मानुषे ।बाणं स्वयम्भुतुल्यं स्यात्क्षेत्रमानं सदैव हि ॥ २६॥

devecāpi tadardhaṃsyātparimāṇaṃ ca mānuṣe |bāṇaṃ svayambhutulyaṃ syātkṣetramānaṃ sadaiva hi || 26||

क्षेत्रे लिङ्गस्थापनाच्च पुण्यं नद्यास्तटे शतम् ।वनेषु स्थापितं तस्मात्ततोऽपि गिरिमौलिगम् ॥ २७॥

kṣetre liṅgasthāpanācca puṇyaṃ nadyāstaṭe śatam |vaneṣu sthāpitaṃ tasmāttato'pi girimauligam || 27||

नवधातुजलिङ्गानि समुत्कृष्टानि शङ्करि ।नवरत्नोद्भवान्येव महोत्कृष्टानि शैलजे ॥ २८॥

navadhātujaliṅgāni samutkṛṣṭāni śaṅkari |navaratnodbhavānyeva mahotkṛṣṭāni śailaje || 28||

ततो रसेन्द्रकलितं बाणलिङ्गं ततोऽधिकम् ।न प्रतिष्ठा न च स्पर्शो बाणलिङ्गेषु विद्यते ॥ २९॥

tato rasendrakalitaṃ bāṇaliṅgaṃ tato'dhikam |na pratiṣṭhā na ca sparśo bāṇaliṅgeṣu vidyate || 29||

सपीठमस्त्वपीठं वा बाणलिङ्गं प्रपूजयेत् ।बाणलिङ्गं तु शूद्रेण यदि देवि प्रतिष्ठितम् ॥ ३०॥

sapīṭhamastvapīṭhaṃ vā bāṇaliṅgaṃ prapūjayet |bāṇaliṅgaṃ tu śūdreṇa yadi devi pratiṣṭhitam || 30||

सर्वेषां दर्शनार्चासु अधिकारो भविष्यति ।केवलं स्याच्छिलालिङ्गं न दृश्यं सर्वथा द्विजैः ॥ ३१॥

sarveṣāṃ darśanārcāsu adhikāro bhaviṣyati |kevalaṃ syācchilāliṅgaṃ na dṛśyaṃ sarvathā dvijaiḥ || 31||

सर्वथामरकतं लिङ्गं न कार्यं रत्नवर्जितम् ।धातुजं चाङ्गुलैः षड्भिःस्फाटिकं स्याद्यथोचितम् ॥ ३२॥

sarvathāmarakataṃ liṅgaṃ na kāryaṃ ratnavarjitam |dhātujaṃ cāṅgulaiḥ ṣaḍbhiḥsphāṭikaṃ syādyathocitam || 32||

वितस्तिमात्रं मृल्लिङ्गं कार्यं वै सर्वदा शिवे ।ततो न्यूनं हरेदायुर्बाणं प्रादेशसंमितम् ॥ ३३॥

vitastimātraṃ mṛlliṅgaṃ kāryaṃ vai sarvadā śive |tato nyūnaṃ haredāyurbāṇaṃ prādeśasaṃmitam || 33||

गृहस्थैश्च गृहे पूज्यं स्थावरेषु ततोऽधिकम् ।लिङ्गमस्तकविस्तारो लिङ्गोच्छायसमः शिवे ॥ ३४॥

gṛhasthaiśca gṛhe pūjyaṃ sthāvareṣu tato'dhikam |liṅgamastakavistāro liṅgocchāyasamaḥ śive || 34||

वेधा च तद्द्विगुणिता तद्वत्पीठमुमे स्थितम् ।गोमुखी तद्द्विगुणिता पञ्चसूत्रं विदुःशिवे ॥ ३५॥

vedhā ca taddviguṇitā tadvatpīṭhamume sthitam |gomukhī taddviguṇitā pañcasūtraṃ viduḥśive || 35||

पञ्चपातकनाशाय पञ्चसूत्रं विदुःसदा ।न्यूनाधिके हरेदायुः कीर्त्यारोग्यविनाशनम् ॥ ३६॥

pañcapātakanāśāya pañcasūtraṃ viduḥsadā |nyūnādhike haredāyuḥ kīrtyārogyavināśanam || 36||

सर्वद्रव्यकृतं लिङ्गं पञ्चसूत्रं प्रशस्यते ।नैवायं नियमो देवि स्वयम्भूतेऽथ शस्यते ॥ ३७॥

sarvadravyakṛtaṃ liṅgaṃ pañcasūtraṃ praśasyate |naivāyaṃ niyamo devi svayambhūte'tha śasyate || 37||

अरत्निमात्रादूर्ध्वं यत्स्थावरं लिङ्गमेव हि ।न स्थाप्यं तद्गृहे गौरि स्थाप्यं तच्च शिवालये ॥ ३८॥

aratnimātrādūrdhvaṃ yatsthāvaraṃ liṅgameva hi |na sthāpyaṃ tadgṛhe gauri sthāpyaṃ tacca śivālaye || 38||

प्रतिमा वा महेशस्य देवतानां महेश्वरि ।वितस्तिमात्रादूर्ध्वं चेन्नार्च्याऽसौ वै गृहे सदा ॥ ३९॥

pratimā vā maheśasya devatānāṃ maheśvari |vitastimātrādūrdhvaṃ cennārcyā'sau vai gṛhe sadā || 39||

मृद्धातुनिर्मिता वा स्यात् पाषाणप्रभवाऽथवा ।प्रतिष्ठाप्यार्चयेत्सा तु तदूर्ध्वा स्याच्छिवालये ॥ ४०॥

mṛddhātunirmitā vā syāt pāṣāṇaprabhavā'thavā |pratiṣṭhāpyārcayetsā tu tadūrdhvā syācchivālaye || 40||

मूर्तयोऽष्टौ महेशस्य पञ्चविंशत्परीमिताः ।समाकारा स्य(स्व)नेत्रान्ताः प्रतिष्ठाप्य गणो भवेत् ॥ ४१॥

mūrtayo'ṣṭau maheśasya pañcaviṃśatparīmitāḥ |samākārā sya(sva)netrāntāḥ pratiṣṭhāpya gaṇo bhavet || 41||

गृहे शिवालये वापि मूर्तयोऽमी(मूः) महेशितुः ।उमासहायो नृत्तेशो दक्षिणामूर्तिरेव वा ॥ ४२॥

gṛhe śivālaye vāpi mūrtayo'mī(mūḥ) maheśituḥ |umāsahāyo nṛtteśo dakṣiṇāmūrtireva vā || 42||

कङ्कालो लिङ्गभागस्थस्तथा शूलधरोहरः ।चन्द्रचूडो वृषाङ्कस्थोऽप्यर्धनारीश्वरः शिवे ॥ ४३॥

kaṅkālo liṅgabhāgasthastathā śūladharoharaḥ |candracūḍo vṛṣāṅkastho'pyardhanārīśvaraḥ śive || 43||

कपालपाणिर्वरदो विष्णवे ब्रह्मणे शिवे ।दिगम्बरः कालनाशो गजचर्मपरीवृतः ॥ ४४॥

kapālapāṇirvarado viṣṇave brahmaṇe śive |digambaraḥ kālanāśo gajacarmaparīvṛtaḥ || 44||

कैलासवासोऽघोरात्मा सद्योजातोऽथपूरुषः(तत्पूरुषः) ।वामदेवस्तथेशानस्त्रिपुरान्तकरो हरः ॥ ४५॥

kailāsavāso'ghorātmā sadyojāto'thapūruṣaḥ(tatpūruṣaḥ) |vāmadevastatheśānastripurāntakaro haraḥ || 45||

एताश्चान्याश्च यो मूर्तीः प्रतिष्ठाप्यार्चयेच्छिवे ।धातुजानां च लिङ्गानां प्रतिमानामपीश्वरि ॥ ४६॥

etāścānyāśca yo mūrtīḥ pratiṣṭhāpyārcayecchive |dhātujānāṃ ca liṅgānāṃ pratimānāmapīśvari || 46||

चराणां चास्थिराणां च शतवर्षात्प्रतिष्ठितिः ।वैदिकी चागमी याञ्च प्रतिष्ठा द्विविधा शिवे ॥ ४७॥

carāṇāṃ cāsthirāṇāṃ ca śatavarṣātpratiṣṭhitiḥ |vaidikī cāgamī yāñca pratiṣṭhā dvividhā śive || 47||

खण्डस्फुटितदग्धेषु पाषण्डपतितान्त्यजैः ।शूद्रैः स्पृष्टे प्रतिष्ठा स्यात् पुनः संस्कारपूर्वकम् ॥ ४८॥

khaṇḍasphuṭitadagdheṣu pāṣaṇḍapatitāntyajaiḥ |śūdraiḥ spṛṣṭe pratiṣṭhā syāt punaḥ saṃskārapūrvakam || 48||

अन्त्यजोपहतानां तु परित्यागो जले भुवि ।चराणां स्थावराणां वा तथा स्वायम्भुवेऽपि वा ॥ ४९॥

antyajopahatānāṃ tu parityāgo jale bhuvi |carāṇāṃ sthāvarāṇāṃ vā tathā svāyambhuve'pi vā || 49||

स्वायम्भुवीयलिङ्गस्य शकलं वेदिकास्वपि ।अष्टबन्धकद्रव्येण योज्य बध्वा प्रतिष्ठितिः ॥ ५०॥

svāyambhuvīyaliṅgasya śakalaṃ vedikāsvapi |aṣṭabandhakadravyeṇa yojya badhvā pratiṣṭhitiḥ || 50||

आगामी चागमीयानां तुलो चन्द्र विभूषिते ।वसन्तोऽथ ऋतुर्देवि वार्षिकः शशिरोधकः ॥ ५२॥

āgāmī cāgamīyānāṃ tulo candra vibhūṣite |vasanto'tha ṛturdevi vārṣikaḥ śaśirodhakaḥ || 52||

उत्तराशागते भानौ लिङ्गं स्थाप्यार्चयेच्छिवे ।माघफाल्गुनवैशाखे ज्येष्ठ आषाढ एव च ॥ ५३॥

uttarāśāgate bhānau liṅgaṃ sthāpyārcayecchive |māghaphālgunavaiśākhe jyeṣṭha āṣāḍha eva ca || 53||

मासेषु शुक्ल पक्षेषु लिङ्गस्थापनमुत्तमम् ।अष्टम्यां वा चतुर्दश्यां पर्वणोर्वा महेश्वरि ॥ ५४॥

māseṣu śukla pakṣeṣu liṅgasthāpanamuttamam |aṣṭamyāṃ vā caturdaśyāṃ parvaṇorvā maheśvari || 54||

सोमवारेऽथवा भद्रे रविभौमबुधेष्वपि ।स्थिरप्रतिष्ठा च स्थिरर्थं च चरे वरम् ॥ ५५॥

somavāre'thavā bhadre ravibhaumabudheṣvapi |sthirapratiṣṭhā ca sthirarthaṃ ca care varam || 55||

शान्तैर्द्विजवरैर्देवि शिवभक्तैर्जितेन्द्रियैः ।शतावरैः स्थावरेषु ऋत्विजः परिकीर्तिताः ॥ ५६॥

śāntairdvijavarairdevi śivabhaktairjitendriyaiḥ |śatāvaraiḥ sthāvareṣu ṛtvijaḥ parikīrtitāḥ || 56||

दश त्रयो वा विप्रेन्द्राः शिवभक्ताः सुवाससः ।भस्मरुद्राक्षसम्पन्नास्त्रिपुण्ड्रपरिमण्डिताः ॥ ५७॥

daśa trayo vā viprendrāḥ śivabhaktāḥ suvāsasaḥ |bhasmarudrākṣasampannāstripuṇḍraparimaṇḍitāḥ || 57||

चरलिङ्गप्रतिष्ठायां वरणीया द्विजोत्तमाः ।ब्रह्मा सदस्याश्चाचार्यो मधुपर्केण पूजिताः ॥ ५८॥

caraliṅgapratiṣṭhāyāṃ varaṇīyā dvijottamāḥ |brahmā sadasyāścācāryo madhuparkeṇa pūjitāḥ || 58||

वासोभिरहतैश्चैव गोभिः पूज्या यथाबलम् ।वस्त्रालङ्करणै रत्नैर्धनैर्धान्यैर्गृहैरपि ॥ ५९॥

vāsobhirahataiścaiva gobhiḥ pūjyā yathābalam |vastrālaṅkaraṇai ratnairdhanairdhānyairgṛhairapi || 59||

पूजनीयाः प्रतिष्ठादौ ब्रह्मणा वेदपारगाः ।धान्याधिवासः कर्तव्यो जलवासश्च शङ्करि ॥ ६०॥

pūjanīyāḥ pratiṣṭhādau brahmaṇā vedapāragāḥ |dhānyādhivāsaḥ kartavyo jalavāsaśca śaṅkari || 60||

प्रतिमायाश्च लिङ्गस्य कर्तव्योऽथ विजानता ।द्रोणत्रयं धान्यमिति जलकुम्भं सपल्लवम् ॥ ६१॥

pratimāyāśca liṅgasya kartavyo'tha vijānatā |droṇatrayaṃ dhānyamiti jalakumbhaṃ sapallavam || 61||

नदीनदाहृतैस्तोयैर्वापीकूपाहृतैस्तथा ।नवधान्यानि वासांसि समाहृत्य द्विजैः सह ॥ ६२॥

nadīnadāhṛtaistoyairvāpīkūpāhṛtaistathā |navadhānyāni vāsāṃsi samāhṛtya dvijaiḥ saha || 62||

तथैवौषधयः पुण्या विष्णुक्रान्तापमार्गकाः ।दर्भाग्राश्च तथा दूर्वा यवाग्राण्यथ मेण्डि(थि)काः ॥ ६३॥

tathaivauṣadhayaḥ puṇyā viṣṇukrāntāpamārgakāḥ |darbhāgrāśca tathā dūrvā yavāgrāṇyatha meṇḍi(thi)kāḥ || 63||

पल्लवाः स्युरुमे पञ्च कल्कान्यपि सुमध्यमे ।समाहृत्य शुभे देशे गोमयेनोपलेपिते ॥ ६४॥

pallavāḥ syurume pañca kalkānyapi sumadhyame |samāhṛtya śubhe deśe gomayenopalepite || 64||

रङ्गवल्यादिशोभाढ्ये मण्डपे पुष्पमण्डिते ।गणेशमादौ सम्पूज्य नान्दीश्राद्धं विधाय च ॥ ६५॥

raṅgavalyādiśobhāḍhye maṇḍape puṣpamaṇḍite |gaṇeśamādau sampūjya nāndīśrāddhaṃ vidhāya ca || 65||

ततः प्रतिसरं कृत्वा ब्राह्मणाननुमन्त्र्य च ।पल्या सह समासीन अरजे वाससी दधत् ॥ ६६॥

tataḥ pratisaraṃ kṛtvā brāhmaṇānanumantrya ca |palyā saha samāsīna araje vāsasī dadhat || 66||

सङ्कल्प्य वरयेद्विद्वान् आचार्यं च सदस्यकम् ।ब्रह्माणं च प्रतिष्ठाप्य दिनत्रयेमथेश्वरि ॥ ६७॥

saṅkalpya varayedvidvān ācāryaṃ ca sadasyakam |brahmāṇaṃ ca pratiṣṭhāpya dinatrayematheśvari || 67||

बोधायनोक्तविधिना प्रतिष्ठाप्य महेश्वरम् ।हावयेत्पायसैर्विद्वान् चरुणा सधृतेन वा ॥ ६८॥

bodhāyanoktavidhinā pratiṣṭhāpya maheśvaram |hāvayetpāyasairvidvān caruṇā sadhṛtena vā || 68||

स्वस्वशाखोक्तमार्गेण प्रतिष्ठाप्य हुताशनम् ।कुम्भाभिषेकं कृत्वैव मूलेन प्रणवेन वा ॥ ६९॥

svasvaśākhoktamārgeṇa pratiṣṭhāpya hutāśanam |kumbhābhiṣekaṃ kṛtvaiva mūlena praṇavena vā || 69||

नेत्रोन्मीलनवर्जं च लिङ्गे च प्रतिमास्वपि ।कुर्यान्नेत्रोन्मीलनादि प्रतिमास्वपि शङ्करि ॥ ७०॥

netronmīlanavarjaṃ ca liṅge ca pratimāsvapi |kuryānnetronmīlanādi pratimāsvapi śaṅkari || 70||

महाभिषेकविधिना पूजयेल्लिङ्गमैश्वरम् ।पञ्चामृतैः पञ्चगव्यैस्तथा फलरसैरपि ॥ ७१॥

mahābhiṣekavidhinā pūjayelliṅgamaiśvaram |pañcāmṛtaiḥ pañcagavyaistathā phalarasairapi || 71||

श्रीरुद्रेणाभिषेकोऽत्र कर्तव्यश्चमकैरपि ।वस्त्रैर्गन्धैश्च धूपैश्च दीपनैवेद्यकल्पनैः ॥ ७२॥

śrīrudreṇābhiṣeko'tra kartavyaścamakairapi |vastrairgandhaiśca dhūpaiśca dīpanaivedyakalpanaiḥ || 72||

ताम्बूलनीराजनतः पूजयेच्छत्रचामरैः ।प्रदक्ष्णानमस्कारैः संस्तुवीत महेश्वरम् ॥ ७३॥

tāmbūlanīrājanataḥ pūjayecchatracāmaraiḥ |pradakṣṇānamaskāraiḥ saṃstuvīta maheśvaram || 73||

नमस्ते देवदेवाय शिवायाकाशमूर्तये ।भवाय भव्यरूपाय हरभूम्यात्मने नमः ॥ ७४॥

namaste devadevāya śivāyākāśamūrtaye |bhavāya bhavyarūpāya harabhūmyātmane namaḥ || 74||

व्यक्ताव्यक्ताय सोमाय जलरूपाय ते नमः ।उग्राय भीमरूपाय वायुमूर्त्यात्मने नमः ॥ ७५॥

vyaktāvyaktāya somāya jalarūpāya te namaḥ |ugrāya bhīmarūpāya vāyumūrtyātmane namaḥ || 75||

व्योमकेशाय नित्याय तेजोमूर्त्यात्मने नमः ।एवं संस्तुत्य देवेशि प्रार्थयेच्छङ्करे क्षमाम् ॥ ७६॥

vyomakeśāya nityāya tejomūrtyātmane namaḥ |evaṃ saṃstutya deveśi prārthayecchaṅkare kṣamām || 76||

जानताऽजानता वापि प्रतिष्ठा या मया कृता ॥ ७७॥

jānatā'jānatā vāpi pratiṣṭhā yā mayā kṛtā || 77||

तां क्षमस्व महादेव लिङ्गेऽस्मिन् सुस्थिरो भव ।ततोऽर्चयेद्गन्धपुष्पैर्धनैर्गोभिः प्रपूजयेत् ॥ ७८॥

tāṃ kṣamasva mahādeva liṅge'smin susthiro bhava |tato'rcayedgandhapuṣpairdhanairgobhiḥ prapūjayet || 78||

आचार्यं ऋत्विजश्चैव दीनाऽनाथान् द्विजोत्तमान् ।भोजयेच्छिवभक्तांश्च दक्षिणाभिः प्रतोषयेत् ॥ ७९॥

ācāryaṃ ṛtvijaścaiva dīnā'nāthān dvijottamān |bhojayecchivabhaktāṃśca dakṣiṇābhiḥ pratoṣayet || 79||

॥ इति शिवरहस्यान्तर्गते ईश्वरप्रोक्तं शिवलिङ्गप्रतिष्ठामाहात्म्यं सम्पूर्णम् ॥॥ श्रीशिवरहस्यम् । महादेवाख्यः एकादशमांशः । अध्यायः ५ शिवलिङ्गप्रतिष्ठाविधिः । ८७९॥

|| iti śivarahasyāntargate īśvaraproktaṃ śivaliṅgapratiṣṭhāmāhātmyaṃ sampūrṇam |||| śrīśivarahasyam | mahādevākhyaḥ ekādaśamāṃśaḥ | adhyāyaḥ 5 śivaliṅgapratiṣṭhāvidhiḥ | 879||

– ॥ श्रीशिवरहस्यम् ।महादेवाख्यः एकादशमांशः ।अध्यायः ५ शिवलिन्गप्रतिष्ठाविधिः ।८-७९॥

– || śrīśivarahasyam |mahādevākhyaḥ ekādaśamāṃśaḥ |adhyāyaḥ 5 śivalingapratiṣṭhāvidhiḥ | 8-79||