गणेशस्तोत्रम् (सङ्कलित) Shriganeshastotram (3)

सङ्कलितश्रीगणेशाय नमः ।अथ गणेशस्तोत्रप्रारम्भः ॥ॐ बिभ्रदक्षिणहस्तपद्मयुगले दन्ताक्षसूत्रे शुभेवामे मोदकपूर्णपात्रपरशू नागोपवीती त्रिदृक् ।श्रीमान्सिंहयुगासनः श्रुतियुगे शङ्खौ वहन्मौलिमान्दिश्यादीश्वरपुत्र एष भगवाँल्लम्बोदरः शर्म नः ॥ १॥

saṅkalitaśrīgaṇeśāya namaḥ |atha gaṇeśastotraprārambhaḥ ||oṃ bibhradakṣiṇahastapadmayugale dantākṣasūtre śubhevāme modakapūrṇapātraparaśū nāgopavītī tridṛk |śrīmānsiṃhayugāsanaḥ śrutiyuge śaṅkhau vahanmaulimāndiśyādīśvaraputra eṣa bhagavām̐llambodaraḥ śarma naḥ || 1||

गणानामधिपश्चण्डो गजवक्त्रस्त्रिलोचनः ।प्रसन्नो भवतां नित्यं वर दाता विनायकः ॥ २॥

gaṇānāmadhipaścaṇḍo gajavaktrastrilocanaḥ |prasanno bhavatāṃ nityaṃ vara dātā vināyakaḥ || 2||

सुमुखश्चैकदन्तश्च कपिलो गजकर्णकः ।लम्बोदरश्च विकटो विघ्नराजो गणाधिपः ॥ ३॥

sumukhaścaikadantaśca kapilo gajakarṇakaḥ |lambodaraśca vikaṭo vighnarājo gaṇādhipaḥ || 3||

धूम्रकेतुर्गणाध्यक्षो भालचन्द्रो गजाननः ।द्वादशैतानि नामानि गणेशस्य महात्मनः ॥ ४॥

dhūmraketurgaṇādhyakṣo bhālacandro gajānanaḥ |dvādaśaitāni nāmāni gaṇeśasya mahātmanaḥ || 4||

यः पठेच्छृणुयाद्वापि सर्वविघ्नहराणि वै ।विद्यारम्भे विवाहे च प्रवेशे निर्गमे तथा ॥ ५॥

yaḥ paṭhecchṛṇuyādvāpi sarvavighnaharāṇi vai |vidyārambhe vivāhe ca praveśe nirgame tathā || 5||

सङ्ग्रामे सङ्कटे चैव विघ्नस्तस्य न जायते ।मुख्यद्वादश नामानि गणेशस्य समाहितः ॥ ६॥

saṅgrāme saṅkaṭe caiva vighnastasya na jāyate |mukhyadvādaśa nāmāni gaṇeśasya samāhitaḥ || 6||

यः पठेत्तु शिवोक्तानि स लभेत्सिद्धिमुत्तमाम् ।प्रथमं वक्रतुण्डं तु चैकदन्तं द्वितीयकम् ॥ ७॥

yaḥ paṭhettu śivoktāni sa labhetsiddhimuttamām |prathamaṃ vakratuṇḍaṃ tu caikadantaṃ dvitīyakam || 7||

तृतीयं कृष्णपिङ्गं तु चतुर्थं तु कपर्दिनम् ।लम्बोदरं पञ्चमं तु षष्ठं विकटमेव च ॥ ८॥

tṛtīyaṃ kṛṣṇapiṅgaṃ tu caturthaṃ tu kapardinam |lambodaraṃ pañcamaṃ tu ṣaṣṭhaṃ vikaṭameva ca || 8||

सप्तमं विघ्नराजेन्द्रं धूम्रवर्णं तथाष्टमम् ।नवमं भालचन्द्रं तु दशमं तु विनायकम् ॥ ९॥

saptamaṃ vighnarājendraṃ dhūmravarṇaṃ tathāṣṭamam |navamaṃ bhālacandraṃ tu daśamaṃ tu vināyakam || 9||

एकादशं गणपतिं द्वादशं मन्त्रनायकम् ।पठते शृणुते यस्तु गणेशस्तवमुत्तमम् ॥ १०॥

ekādaśaṃ gaṇapatiṃ dvādaśaṃ mantranāyakam |paṭhate śṛṇute yastu gaṇeśastavamuttamam || 10||

विद्यार्थी लभते विद्यां पुत्रार्थी पुत्रमुत्तमम् ।भार्यार्थी लभते भार्या मोक्षार्थी परमं पदम् ॥ ११॥

vidyārthī labhate vidyāṃ putrārthī putramuttamam |bhāryārthī labhate bhāryā mokṣārthī paramaṃ padam || 11||

इति गणेशस्तोत्रम् ॥

iti gaṇeśastotram ||