गणेशावतारस्तोत्रम् Shriganeshavatarastotram

श्री गणेशाय नमः ।आङ्गिरस उवाच ।अनन्ता अवताराश्च गणेशस्य महात्मनः ।न शक्यते कथां वक्तुं मया वर्षशतैरपि ॥ १॥

śrī gaṇeśāya namaḥ |āṅgirasa uvāca |anantā avatārāśca gaṇeśasya mahātmanaḥ |na śakyate kathāṃ vaktuṃ mayā varṣaśatairapi || 1||

संक्षेपेण प्रवक्ष्यामि मुख्यानां मुख्यतां गतान् ।अवतारांश्च तस्याष्टौ विख्यातान् ब्रह्मधारकान् ॥ २॥

saṃkṣepeṇa pravakṣyāmi mukhyānāṃ mukhyatāṃ gatān |avatārāṃśca tasyāṣṭau vikhyātān brahmadhārakān || 2||

वक्रतुण्डावतारश्च देहिनां ब्रह्मधारकः ।मत्सरासुरहन्ता स सिंहवाहनगः स्मृतः ॥ ३॥

vakratuṇḍāvatāraśca dehināṃ brahmadhārakaḥ |matsarāsurahantā sa siṃhavāhanagaḥ smṛtaḥ || 3||

एकदन्तावतारो वै देहिनां ब्रह्मधारकः ।मदासुरस्य हन्ता स आखुवाहनगः स्मृतः ॥ ४॥

ekadantāvatāro vai dehināṃ brahmadhārakaḥ |madāsurasya hantā sa ākhuvāhanagaḥ smṛtaḥ || 4||

महोदर इति ख्यातो ज्ञानब्रह्मप्रकाशकः ।मोहासुरस्य शत्रुर्वै आखुवाहनगः स्मृतः ॥ ५॥

mahodara iti khyāto jñānabrahmaprakāśakaḥ |mohāsurasya śatrurvai ākhuvāhanagaḥ smṛtaḥ || 5||

गजाननः स विज्ञेयः सांख्येभ्यः सिद्धिदायकः ।लोभासुरप्रहर्ता च मूषकगः प्रकीर्तितः ॥ ६॥

gajānanaḥ sa vijñeyaḥ sāṃkhyebhyaḥ siddhidāyakaḥ |lobhāsuraprahartā ca mūṣakagaḥ prakīrtitaḥ || 6||

लम्बोदरावतारो वै क्रोधसुरनिबर्हणः ।आखुगः शक्तिब्रह्मा सन् तस्य धारक उच्यते ॥ ७॥

lambodarāvatāro vai krodhasuranibarhaṇaḥ |ākhugaḥ śaktibrahmā san tasya dhāraka ucyate || 7||

विकटो नाम विख्यातः कामासुरप्रदाहकः ।मयूरवाहनश्चायं सौरमात्मधरः स्मृतः ॥ ८॥

vikaṭo nāma vikhyātaḥ kāmāsurapradāhakaḥ |mayūravāhanaścāyaṃ sauramātmadharaḥ smṛtaḥ || 8||

विघ्नराजावतारश्च शेषवाहन उच्यते ।ममासुरप्रहन्ता स विष्णुब्रह्मेति वाचकः ॥ ९॥

vighnarājāvatāraśca śeṣavāhana ucyate |mamāsuraprahantā sa viṣṇubrahmeti vācakaḥ || 9||

धूम्रवर्णावतारश्चाभिमानासुरनाशकः ।आखुवाहनतां प्राप्तः शिवात्मकः स उच्यते ॥ १०॥

dhūmravarṇāvatāraścābhimānāsuranāśakaḥ |ākhuvāhanatāṃ prāptaḥ śivātmakaḥ sa ucyate || 10||

एतेऽष्टौ ते मया प्रोक्ता गणेशांशा विनायकाः ।एषां भजनमात्रेण स्वस्वब्रह्मप्रधारकाः ॥ ११॥

ete'ṣṭau te mayā proktā gaṇeśāṃśā vināyakāḥ |eṣāṃ bhajanamātreṇa svasvabrahmapradhārakāḥ || 11||

स्वानन्दवासकारी स गणेशानः प्रकथ्यते ।स्वानन्दे योगिभिर्दृष्टो ब्रह्मणि नात्र संशयः ॥ १२॥

svānandavāsakārī sa gaṇeśānaḥ prakathyate |svānande yogibhirdṛṣṭo brahmaṇi nātra saṃśayaḥ || 12||

तस्यावताररूपाश्चाष्टौ विघ्नहरणाः स्मृताः ।स्वानन्दभजनेनैव लीलास्तत्र भवन्ति हि ॥ १३॥

tasyāvatārarūpāścāṣṭau vighnaharaṇāḥ smṛtāḥ |svānandabhajanenaiva līlāstatra bhavanti hi || 13||

माया तत्र स्वयं लीना भविष्यति सुपुत्रक ।संयोगे मौनभावश्च समाधिः प्राप्यते जनैः ॥ १४॥

māyā tatra svayaṃ līnā bhaviṣyati suputraka |saṃyoge maunabhāvaśca samādhiḥ prāpyate janaiḥ || 14||

अयोगे गणराजस्य भजने नैव सिद्ध्यति ।मायाभेदमयं ब्रह्म निवृत्तिः प्राप्यते परा ॥ १५॥

ayoge gaṇarājasya bhajane naiva siddhyati |māyābhedamayaṃ brahma nivṛttiḥ prāpyate parā || 15||

योगात्मकगणेशानो ब्रह्मणस्पतिवाचकः ।तत्र शान्तिः समाख्याता योगरूपा जनैः कृता ॥ १६॥

yogātmakagaṇeśāno brahmaṇaspativācakaḥ |tatra śāntiḥ samākhyātā yogarūpā janaiḥ kṛtā || 16||

नानाशान्तिप्रभेदश्च स्थाने स्थाने प्रकथ्यते ।शान्तीनां शान्तिरूपा सा योगशान्तिः प्रकीर्तिता ॥ १७॥

nānāśāntiprabhedaśca sthāne sthāne prakathyate |śāntīnāṃ śāntirūpā sā yogaśāntiḥ prakīrtitā || 17||

योगस्य योगता दृष्टा सर्वब्रह्म सुपुत्रक ।न योगात्परमं ब्रह्म ब्रह्मभूतेन लभ्यते ॥ १८॥

yogasya yogatā dṛṣṭā sarvabrahma suputraka |na yogātparamaṃ brahma brahmabhūtena labhyate || 18||

एतदेव परं गुह्यं कथितं वत्स तेऽलिखम् ।भज त्वं सर्वभावेन गणेशं ब्रह्मनायकम् ॥ १९॥

etadeva paraṃ guhyaṃ kathitaṃ vatsa te'likham |bhaja tvaṃ sarvabhāvena gaṇeśaṃ brahmanāyakam || 19||

पुत्रपौत्रादिप्रदं स्तोत्रमिदं शोकविनाशनम् ।धनधान्यसमृद्ध्यादिप्रदं भावि न संशयः ॥ २०॥

putrapautrādipradaṃ stotramidaṃ śokavināśanam |dhanadhānyasamṛddhyādipradaṃ bhāvi na saṃśayaḥ || 20||

धर्मार्थकाममोक्षाणां साधनं ब्रह्मदायकम् ।भक्तिदृढकरं चैव भविष्यति न संशयः ॥ २१॥

dharmārthakāmamokṣāṇāṃ sādhanaṃ brahmadāyakam |bhaktidṛḍhakaraṃ caiva bhaviṣyati na saṃśayaḥ || 21||

इति मुद्गलपुराणान्तर्गतं गणेशावतारस्तोत्रं सम्पूर्णम् ॥

iti mudgalapurāṇāntargataṃ gaṇeśāvatārastotraṃ sampūrṇam ||