गणेशस्तोत्रम् (आदित्यपुराणान्तर्गतम्) Shriganeshastotram (2)

आदित्यपुराणान्तर्गतम्श्रीगणेशाय नमः ।सिन्दूरकुङ्कुमहुताशनविद्रुमार्करक्ताब्जदाडिमनिभाय चतुर्भुजाय ।हेरम्बभैरवगणेश्वरनायकायसर्वार्थसिद्धिफलदाय गणेश्वराय ॥ १॥

ādityapurāṇāntargatamśrīgaṇeśāya namaḥ |sindūrakuṅkumahutāśanavidrumārkaraktābjadāḍimanibhāya caturbhujāya |herambabhairavagaṇeśvaranāyakāyasarvārthasiddhiphaladāya gaṇeśvarāya || 1||

चिदचित्पदगम्भीरं गमागमपदोज्झितम् ।गहनाकाशसङ्काशं वन्दे देवं गणेश्वरम् ॥ २॥

cidacitpadagambhīraṃ gamāgamapadojjhitam |gahanākāśasaṅkāśaṃ vande devaṃ gaṇeśvaram || 2||

श्रीसनत्कुमार उवाच ।शङ्कराद्ब्रह्मणा प्राप्तं पद्मयोनेर्मया प्रभोः ।तदहं कीर्तयिष्यामि स्तोत्रं परमदुर्लभम् ॥ ३॥

śrīsanatkumāra uvāca |śaṅkarādbrahmaṇā prāptaṃ padmayonermayā prabhoḥ |tadahaṃ kīrtayiṣyāmi stotraṃ paramadurlabham || 3||

षष्ठ्यां चतुर्थ्यामष्टम्यां चतुर्दश्यां विशेषतः ।पूजयेच्च गणाध्यक्षं श्रद्धाभक्तिसमन्वितः ॥ ४॥

ṣaṣṭhyāṃ caturthyāmaṣṭamyāṃ caturdaśyāṃ viśeṣataḥ |pūjayecca gaṇādhyakṣaṃ śraddhābhaktisamanvitaḥ || 4||

अर्घैः पुष्पैस्तथा धूपैर्दीपैर्माल्यैश्च चामरैः ।वस्त्रैः कुण्डलकेयूरैर्मौलिभिश्च वितानकैः ॥ ५॥

arghaiḥ puṣpaistathā dhūpairdīpairmālyaiśca cāmaraiḥ |vastraiḥ kuṇḍalakeyūrairmaulibhiśca vitānakaiḥ || 5||

भक्ष्यैर्भोज्यैरपूपैश्च मत्स्यैर्मांसैश्च मोदकैः ।पानकैः फलमूलैश्च होमैर्मन्त्रादिभिस्तथा ॥ ६॥

bhakṣyairbhojyairapūpaiśca matsyairmāṃsaiśca modakaiḥ |pānakaiḥ phalamūlaiśca homairmantrādibhistathā || 6||

गङ्गाहृदे तु गाङ्गेयं श्रीशैले तु गणेश्वरम् ।वाराणस्यां गजवक्त्रं गयायां टङ्कधारिणम् ॥ ७॥

gaṅgāhṛde tu gāṅgeyaṃ śrīśaile tu gaṇeśvaram |vārāṇasyāṃ gajavaktraṃ gayāyāṃ ṭaṅkadhāriṇam || 7||

प्रयागे तु गणाध्यक्षं केदारे विकटाननम् ।लम्बोदरं कुरुक्षेत्रे नैमिषे च मदोत्कटम् ॥ ८॥

prayāge tu gaṇādhyakṣaṃ kedāre vikaṭānanam |lambodaraṃ kurukṣetre naimiṣe ca madotkaṭam || 8||

जम्बुकं दण्डकारण्ये लोकेशं हिमवद्गिरौ ।विश्वक्सेनं तु विन्ध्याद्रौ मलये हेमकुम्भकम् ॥ ९॥

jambukaṃ daṇḍakāraṇye lokeśaṃ himavadgirau |viśvaksenaṃ tu vindhyādrau malaye hemakumbhakam || 9||

नायकं पुष्करद्वीपे विघ्नेशं शल्मले स्थितम् ।इलावृते विश्वरूपं हरिवर्षे घटोदरम् ॥ १०॥

nāyakaṃ puṣkaradvīpe vighneśaṃ śalmale sthitam |ilāvṛte viśvarūpaṃ harivarṣe ghaṭodaram || 10||

त्रिनेत्रं सिंहलद्वीपे श्वेतद्वीपे तु वामनम् ।उज्जयिन्यां च लम्बोष्टं मालवे शूर्पकर्णकम् ॥ ११॥

trinetraṃ siṃhaladvīpe śvetadvīpe tu vāmanam |ujjayinyāṃ ca lamboṣṭaṃ mālave śūrpakarṇakam || 11||

सौराष्ट्रे वरदं देवं कश्मीरे भीमरूपिणम् ।सिन्धुसागरयोर्मध्ये स्थितं वै मन्त्रनायकम् ॥ १२॥

saurāṣṭre varadaṃ devaṃ kaśmīre bhīmarūpiṇam |sindhusāgarayormadhye sthitaṃ vai mantranāyakam || 12||

हर्यक्षं यक्षभवने हरियक्षाभिधं विभुम् ।पद्माभरणनामानं कैलासे परमेश्वरम् ॥ १३॥

haryakṣaṃ yakṣabhavane hariyakṣābhidhaṃ vibhum |padmābharaṇanāmānaṃ kailāse parameśvaram || 13||

महायोगं महेन्द्रे च सह्ये वाराहरूपिणम् ।महोदरं च लुम्पायां चम्पायां शिखिवाहनम् ॥ १४॥

mahāyogaṃ mahendre ca sahye vārāharūpiṇam |mahodaraṃ ca lumpāyāṃ campāyāṃ śikhivāhanam || 14||

पाशहस्तं त्रिकूटे च पूजयेत्सर्वसिद्धिदम् ।बलमग्निगुहायां च पाटले सिंहवाहनम् ॥ १५॥

pāśahastaṃ trikūṭe ca pūjayetsarvasiddhidam |balamagniguhāyāṃ ca pāṭale siṃhavāhanam || 15||

पौण्ड्रे रौद्रमुखं चापि कलापिग्रामके जयम् ।मेरुपृष्ठे कामरूपं नन्दनं नन्दने वने ॥ १६॥

pauṇḍre raudramukhaṃ cāpi kalāpigrāmake jayam |merupṛṣṭhe kāmarūpaṃ nandanaṃ nandane vane || 16||

विजयं वै गन्धवने देवदारुवने गणम् ।आर्तानां विघ्नहरणं गङ्गासागरसङ्गमे ॥ १७॥

vijayaṃ vai gandhavane devadāruvane gaṇam |ārtānāṃ vighnaharaṇaṃ gaṅgāsāgarasaṅgame || 17||

महापथे विरूपाक्षं चित्रकूटे मदोत्कटम् ।दुर्जयं यमुनातीरे स्तम्भनं गन्धमाधने ॥ १८॥

mahāpathe virūpākṣaṃ citrakūṭe madotkaṭam |durjayaṃ yamunātīre stambhanaṃ gandhamādhane || 18||

भद्रवटे चाम्बरीशं मोहनं हस्तिनापुरे ।किष्किन्दायामुग्रकेतुं लङ्कायां तु विभीषणम् ॥ १९॥

bhadravaṭe cāmbarīśaṃ mohanaṃ hastināpure |kiṣkindāyāmugraketuṃ laṅkāyāṃ tu vibhīṣaṇam || 19||

कलिङ्गे वरुणं चैव गान्धारे च मदोत्कटम् ।अश्वत्थं च तुरुष्केषु चीने शत्रुजयावहम् ॥ २०॥

kaliṅge varuṇaṃ caiva gāndhāre ca madotkaṭam |aśvatthaṃ ca turuṣkeṣu cīne śatrujayāvaham || 20||

वज्रहस्तं कोसलेषु दाक्षिणात्येषु लोहितम् ।शूलोद्धृतकरं चैव मध्यदेशे प्रकीर्तितम् ॥ २१॥

vajrahastaṃ kosaleṣu dākṣiṇātyeṣu lohitam |śūloddhṛtakaraṃ caiva madhyadeśe prakīrtitam || 21||

एकदंष्ट्रं पश्चिमाब्धौ पूर्वदेशे पराजितम् ।उत्तरे चारुवक्त्रं च वरिष्ठं त्रिपुरेषु च ॥ २२॥

ekadaṃṣṭraṃ paścimābdhau pūrvadeśe parājitam |uttare cāruvaktraṃ ca variṣṭhaṃ tripureṣu ca || 22||

सुवर्णगर्भं विघ्नेशं नदीनां सङ्गमे स्थितम् ।गिरिसन्धिषु विज्ञेयं हिरण्यकवचाभिधम् ॥ २३॥

suvarṇagarbhaṃ vighneśaṃ nadīnāṃ saṅgame sthitam |girisandhiṣu vijñeyaṃ hiraṇyakavacābhidham || 23||

सुमुखं नागरन्ध्रेषु नर्मदायां च षड्भुजम् ।महापुरे महामायां भद्रकर्णे ह्रदे शिवम् ॥ २४॥

sumukhaṃ nāgarandhreṣu narmadāyāṃ ca ṣaḍbhujam |mahāpure mahāmāyāṃ bhadrakarṇe hrade śivam || 24||

गोकर्णे गजकर्णं तु कान्यकुब्जे वराननम् ।पद्मासनं कामरूपे श्रीमुखं सर्वतः स्थितम् ॥ २५॥

gokarṇe gajakarṇaṃ tu kānyakubje varānanam |padmāsanaṃ kāmarūpe śrīmukhaṃ sarvataḥ sthitam || 25||

वेदवेदाङ्गशास्त्रेषु पूजयेद्ब्रह्मणस्पतिम् ।अष्टाषष्टिस्तु नामानि स्तुतान्यद्भुतकर्मणः ॥ २६॥

vedavedāṅgaśāstreṣu pūjayedbrahmaṇaspatim |aṣṭāṣaṣṭistu nāmāni stutānyadbhutakarmaṇaḥ || 26||

नित्यं प्रभातकाले तु चिन्तयेद्गणनायकम् ।एतत्स्तोत्रं पवित्रं च माङ्गल्यं पापनाशनम् ॥ २७॥

nityaṃ prabhātakāle tu cintayedgaṇanāyakam |etatstotraṃ pavitraṃ ca māṅgalyaṃ pāpanāśanam || 27||

शस्त्रखार्खोदवेतालयक्ष रक्षो भयापहम् ।चौरारण्यभयव्याघ्रव्याधिदुर्भिक्षनाशनम् ॥ २८॥

śastrakhārkhodavetālayakṣa rakṣo bhayāpaham |caurāraṇyabhayavyāghravyādhidurbhikṣanāśanam || 28||

कृत्यादिमायाशमनं सर्वशत्रुविमर्दनम् ।त्रिकालं यः पठेद्भक्त्या स भवेत्सर्वसिद्धिभाक् ॥ २९॥

kṛtyādimāyāśamanaṃ sarvaśatruvimardanam |trikālaṃ yaḥ paṭhedbhaktyā sa bhavetsarvasiddhibhāk || 29||

गणेश्वरप्रसादेन लभते शाङ्करं पदम् ॥ ३०॥

gaṇeśvaraprasādena labhate śāṅkaraṃ padam || 30||

इति आदित्यपुराणे गणेशस्तोत्रं सम्पूर्णम् ॥

iti ādityapurāṇe gaṇeśastotraṃ sampūrṇam ||