आर्यताराष्टोत्तरशतनामस्तोत्रम् Aryatara Ashtottarashata Nama Stotram

ॐ नमः श्री आर्यतारायै ।श्रीमत्पोतलके रम्ये नानाधातुविराजिते ।नानाद्रुमलताकीर्णे नानापक्षिनिकूजिते ॥ १॥

oṃ namaḥ śrī āryatārāyai |śrīmatpotalake ramye nānādhātuvirājite |nānādrumalatākīrṇe nānāpakṣinikūjite || 1||

नानानिर्झरभाङ्कारैर्नानामृगसमाकुले ।नानाकुसुमजातीभिः समन्तादधिवासिते ॥ २॥

nānānirjharabhāṅkārairnānāmṛgasamākule |nānākusumajātībhiḥ samantādadhivāsite || 2||

नानाहृद्यफलोपेतषट्पदोद्गीतनिःस्वनैः ।किन्नरैर्मधुरोद्गीतैर्मत्तरवारणसङ्कुलैः ॥ ३॥

nānāhṛdyaphalopetaṣaṭpadodgītaniḥsvanaiḥ |kinnarairmadhurodgītairmattaravāraṇasaṅkulaiḥ || 3||

सिद्धविद्याधरगणैर्गन्धर्वैश्च निनादिते ।मुनिभिर्वीतरागैश्च सततं सुनिषेविते ॥ ४॥

siddhavidyādharagaṇairgandharvaiśca ninādite |munibhirvītarāgaiśca satataṃ suniṣevite || 4||

बोधिसत्त्वगणैश्चान्यैर्दशभूमीश्वरैरपि ।आर्यतारादिभिर्देवैर्विद्याराज्ञीसहस्रकैः ॥ ५॥

bodhisattvagaṇaiścānyairdaśabhūmīśvarairapi |āryatārādibhirdevairvidyārājñīsahasrakaiḥ || 5||

क्रोधराजगणैश्चान्यैर्हयग्रीवादिभिर्वृते ।सर्वसत्त्वहिते युक्तो भगवानवलोकितः ॥ ६॥

krodharājagaṇaiścānyairhayagrīvādibhirvṛte |sarvasattvahite yukto bhagavānavalokitaḥ || 6||

व्याजहार ततः श्रीमान् पद्मगर्भासने स्थितः ।महता तपसा युक्तो मैत्र्या च कृपयान्वितः ॥ ७॥

vyājahāra tataḥ śrīmān padmagarbhāsane sthitaḥ |mahatā tapasā yukto maitryā ca kṛpayānvitaḥ || 7||

धर्मं दिदेश तस्यां च महत्यां देवपर्षदि ।तत्रापविद्धमागम्य वज्रपाणिर्महाबलः ॥ ८॥

dharmaṃ dideśa tasyāṃ ca mahatyāṃ devaparṣadi |tatrāpaviddhamāgamya vajrapāṇirmahābalaḥ || 8||

परया कृपया युक्तः पप्रच्छ चावलोकितम् ।तस्करोरगसिंहोग्रगजव्याघ्रादिसङ्कुले ॥ ९॥

parayā kṛpayā yuktaḥ papraccha cāvalokitam |taskaroragasiṃhogragajavyāghrādisaṅkule || 9||

सीदन्त्यमी मुने सत्त्वा मग्नाः संसारसागरे ।बद्धाः सांसारिकैः पाशै रागद्वेषतमोमयैः ॥ १०॥

sīdantyamī mune sattvā magnāḥ saṃsārasāgare |baddhāḥ sāṃsārikaiḥ pāśai rāgadveṣatamomayaiḥ || 10||

मुच्यन्ते येन सत्त्वास्ते तन्मे ब्रूहि महामुने ।एवमुक्तो जगन्नाथः स श्रीमानवलोकितः ॥ ११॥

mucyante yena sattvāste tanme brūhi mahāmune |evamukto jagannāthaḥ sa śrīmānavalokitaḥ || 11||

उवाच मधुरां वाणीं वज्रपाणिं प्रबोधिनीम् ।शृणु गुह्यकराजेन्द्र अमिताभस्य तायणीः(णीम्) ॥ १२॥

uvāca madhurāṃ vāṇīṃ vajrapāṇiṃ prabodhinīm |śṛṇu guhyakarājendra amitābhasya tāyaṇīḥ(ṇīm) || 12||

प्रणिधानवशोत्पन्नां ममाज्ञां लोकमातरम् ।महाकरुणयोपेतां जगदुद्धरणोद्धृताम् ॥ १३॥

praṇidhānavaśotpannāṃ mamājñāṃ lokamātaram |mahākaruṇayopetāṃ jagaduddharaṇoddhṛtām || 13||

उदितादित्यसङ्काशां पुर्णेन्दुवदनप्रभाम् ।भाषयन्तीमिमां तारां सदेवासुरमानुषान् ॥ १४॥

uditādityasaṅkāśāṃ purṇenduvadanaprabhām |bhāṣayantīmimāṃ tārāṃ sadevāsuramānuṣān || 14||

कम्पयन्तीं च त्रीन् लोकान् त्रासयन्तीं यक्षराक्षसान् ।नीलोत्पलकरां देवीं मा भैर्मा भैरिति ब्रुवन् ॥ १५॥

kampayantīṃ ca trīn lokān trāsayantīṃ yakṣarākṣasān |nīlotpalakarāṃ devīṃ mā bhairmā bhairiti bruvan || 15||

जगत्संरक्षणार्थयाहमुत्पादिता जिनैः ।कान्तारे शस्त्रसम्पाते नानाभयसमाकुले ॥ १६॥

jagatsaṃrakṣaṇārthayāhamutpāditā jinaiḥ |kāntāre śastrasampāte nānābhayasamākule || 16||

स्मरणादेव नामानि सत्त्वान् रक्षाम्यहं सदा ।तारयिष्याम्यहं सत्त्वान् नानाभयमहार्णवात् ॥ १७॥

smaraṇādeva nāmāni sattvān rakṣāmyahaṃ sadā |tārayiṣyāmyahaṃ sattvān nānābhayamahārṇavāt || 17||

तेन तारेति मां लोके गायन्ति मुनिपुङ्गवाः ।कृताञ्जलिपुटो भूत्वा ततः सादरसाध्वसः ॥ १८॥

tena tāreti māṃ loke gāyanti munipuṅgavāḥ |kṛtāñjalipuṭo bhūtvā tataḥ sādarasādhvasaḥ || 18||

ज्वलयत्यन्तरिक्षे तामिदं वचनमब्रवीत् ।नामाष्टशतकं ब्रूहि यत्पुरा कीर्तितं जनैः ॥ १९॥

jvalayatyantarikṣe tāmidaṃ vacanamabravīt |nāmāṣṭaśatakaṃ brūhi yatpurā kīrtitaṃ janaiḥ || 19||

दशभूमीश्वरैर्नाथैर्बोधिसत्त्वैर्महर्द्धिकैः ।सर्वपापहरं पुण्यं माङ्गल्यं कीर्तिवर्द्धनम् ॥ २०॥

daśabhūmīśvarairnāthairbodhisattvairmaharddhikaiḥ |sarvapāpaharaṃ puṇyaṃ māṅgalyaṃ kīrtivarddhanam || 20||

धनधान्यकरं चैव आरोग्यं पुष्टिवर्धनम् ।आयुरारोग्यजनकं सर्वसत्त्वसुखावहम् ॥ २१॥

dhanadhānyakaraṃ caiva ārogyaṃ puṣṭivardhanam |āyurārogyajanakaṃ sarvasattvasukhāvaham || 21||

लक्ष्म्याः श्रियः स्थापकं च सर्वसत्त्वविवर्द्धनम् ।मैत्रीमालम्ब्य सत्त्वानां तत्कीर्तय महामुने ॥ २२॥

lakṣmyāḥ śriyaḥ sthāpakaṃ ca sarvasattvavivarddhanam |maitrīmālambya sattvānāṃ tatkīrtaya mahāmune || 22||

एवमुक्ते जगन्नाथः प्रहसन्नवलोकितः ।व्यवलोक्य दिशः सर्वा मैत्रीस्फरणया दृशा ॥ २३॥

evamukte jagannāthaḥ prahasannavalokitaḥ |vyavalokya diśaḥ sarvā maitrīspharaṇayā dṛśā || 23||

दक्षिणं करमुद्धृत्य पुण्यलक्षणमण्डितम् ।तमुवाच महाप्राज्ञः साधु साधु महातप ॥ २४॥

dakṣiṇaṃ karamuddhṛtya puṇyalakṣaṇamaṇḍitam |tamuvāca mahāprājñaḥ sādhu sādhu mahātapa || 24||

नामानि शृणु महाभाग सर्वसत्त्वैकवत्सरे ।यानि सङ्कीर्त्य मनुजा सम्पदा स्युर्धनेश्वराः ॥ २५॥

nāmāni śṛṇu mahābhāga sarvasattvaikavatsare |yāni saṅkīrtya manujā sampadā syurdhaneśvarāḥ || 25||

सर्वव्याधिविनिर्मुक्ताः सर्वैश्वर्यगुणान्विताः ।अकालमृत्युनिर्दग्धाश्च्युता यान्ति सुखावतीम् ॥ २६॥

sarvavyādhivinirmuktāḥ sarvaiśvaryaguṇānvitāḥ |akālamṛtyunirdagdhāścyutā yānti sukhāvatīm || 26||

तान्यहं संप्रवक्ष्यामि देवसङ्घाः शृणुत मे ।अनुमोदध्वमेतद्वा भविष्यध्वं सुनिर्वृताः ॥ २७॥

tānyahaṃ saṃpravakṣyāmi devasaṅghāḥ śṛṇuta me |anumodadhvametadvā bhaviṣyadhvaṃ sunirvṛtāḥ || 27||

ॐ लोचने सुलोचने तारे तारोद्भवे सर्वसत्त्वानुकम्पिनि सर्वसत्त्वतारिणिसहस्रभुजे सहस्रनेत्रे । ॐ नमो भगवते अवलोकय अवलोकय मांसर्वसत्त्वांश्च हुं हुं फट् फट् स्वाहा । ॐ शुद्धे विशुद्धे सुगतात्मजेमैत्रीहृदये निर्मले श्यामे श्यामरूपि महाप्राज्ञे प्रबलवरभूषिते ।अपराजिता महारौद्री विश्वरूपी महाबला । ॐ सुश्रिये ॥ २८॥

oṃ locane sulocane tāre tārodbhave sarvasattvānukampini sarvasattvatāriṇisahasrabhuje sahasranetre | oṃ namo bhagavate avalokaya avalokaya māṃsarvasattvāṃśca huṃ huṃ phaṭ phaṭ svāhā | oṃ śuddhe viśuddhe sugatātmajemaitrīhṛdaye nirmale śyāme śyāmarūpi mahāprājñe prabalavarabhūṣite |aparājitā mahāraudrī viśvarūpī mahābalā | oṃ suśriye || 28||

ॐ कल्याणी महातेजा लोकधात्री महायशाः ।सरस्वती विशालाक्षी प्रज्ञा श्रीर्बुद्धिवर्धिनी ॥ २९॥

oṃ kalyāṇī mahātejā lokadhātrī mahāyaśāḥ |sarasvatī viśālākṣī prajñā śrīrbuddhivardhinī || 29||

धृतिदा पुष्टिदा स्वाहा ॐकारा कामरूपिणी ।सर्वसत्त्वहितोद्युक्ता सङ्ग्रामोत्तारिणी जया ॥ ३०॥

dhṛtidā puṣṭidā svāhā oṃkārā kāmarūpiṇī |sarvasattvahitodyuktā saṅgrāmottāriṇī jayā || 30||

प्रज्ञापारमिता देवी आर्यतारा मनोरमा ।दुन्दुभी शङ्खिनी पूर्णा विद्याराज्ञी प्रियम्वदा ॥ ३१॥

prajñāpāramitā devī āryatārā manoramā |dundubhī śaṅkhinī pūrṇā vidyārājñī priyamvadā || 31||

चन्द्रानना महागौरी अजिता पीतवाससा ।महामाया महाश्वेता महाबलपराक्रमा ॥ ३२॥

candrānanā mahāgaurī ajitā pītavāsasā |mahāmāyā mahāśvetā mahābalaparākramā || 32||

महारौद्री महाचण्डी दुष्टसत्त्वनिषूदिनी ।प्रशान्ता शान्तरूपा च विजया ज्वलनप्रभा ॥ ३३॥

mahāraudrī mahācaṇḍī duṣṭasattvaniṣūdinī |praśāntā śāntarūpā ca vijayā jvalanaprabhā || 33||

विद्युन्मारी ध्वजी खङ्गी चक्री चापोद्यतायुधा ।जम्भनो स्तम्भनी काली कालरात्रिर्निशाचरी ॥ ३४॥

vidyunmārī dhvajī khaṅgī cakrī cāpodyatāyudhā |jambhano stambhanī kālī kālarātrirniśācarī || 34||

रक्षणी मोहनी शान्ता कान्तारी द्रावणी शुभा ।ब्रह्माणी वेदमाता च गुह्या च गुह्यवासिनी ॥ ३५॥

rakṣaṇī mohanī śāntā kāntārī drāvaṇī śubhā |brahmāṇī vedamātā ca guhyā ca guhyavāsinī || 35||

माङ्गल्या शाङ्करी सौम्या जातवेदा मनोजवा ।कपालिनी महावेगा सन्ध्या सत्याऽपराजिता ॥ ३६॥

māṅgalyā śāṅkarī saumyā jātavedā manojavā |kapālinī mahāvegā sandhyā satyā'parājitā || 36||

सार्थवाहकृपादृष्टिर्नष्टमार्गप्रदर्शिनी ।वरदा शासनी शास्त्री सुरूपाऽमृतविक्रमा ॥ ३७॥

sārthavāhakṛpādṛṣṭirnaṣṭamārgapradarśinī |varadā śāsanī śāstrī surūpā'mṛtavikramā || 37||

शर्वरी योगिनी सिद्धा चण्डारी(ली)अमृता ध्रुवा ।धन्या पुण्या महाभागा शुभगा प्रियदर्शना ॥ ३८॥

śarvarī yoginī siddhā caṇḍārī(lī)amṛtā dhruvā |dhanyā puṇyā mahābhāgā śubhagā priyadarśanā || 38||

कृतान्तत्रासिनी भीमा उग्रा उग्रमहातपा ।जगद्धिते सदोद्युक्ता शरण्या भक्तवत्सला ॥ ३९॥

kṛtāntatrāsinī bhīmā ugrā ugramahātapā |jagaddhite sadodyuktā śaraṇyā bhaktavatsalā || 39||

वागीश्वरी शिवा सूक्ष्मा नित्या सर्वक्रमानुगा ।सर्वार्थसाधनी भद्रा गोप्त्री धात्री धनप्रदा ॥ ४०॥

vāgīśvarī śivā sūkṣmā nityā sarvakramānugā |sarvārthasādhanī bhadrā goptrī dhātrī dhanapradā || 40||

अभया गौतमी पुण्या श्रीमल्लोकेश्वरात्मजा ॥ इति ॥ ७।(१०८)तारानामगुणानन्ता सर्वाशापरिपूरका ॥ ४१॥

abhayā gautamī puṇyā śrīmallokeśvarātmajā || iti || 7|(108)tārānāmaguṇānantā sarvāśāparipūrakā || 41||

ॐ तारे कृपावरे श्रीक्लेशश्रवणीये स्वाहा ।नाम्नामष्टोत्तरशतं ह्येतद्यत्कीर्तितं मया ।रहस्यभूतं गुह्यं च देवानामपि दुर्लभम् ॥ ४२॥

oṃ tāre kṛpāvare śrīkleśaśravaṇīye svāhā |nāmnāmaṣṭottaraśataṃ hyetadyatkīrtitaṃ mayā |rahasyabhūtaṃ guhyaṃ ca devānāmapi durlabham || 42||

सौभाग्यभोगकरणं सर्वकिल्विषनाशनम् ।सर्वव्याधिप्रशमनं सर्वसत्त्वसुखावहम् ॥ ४३॥

saubhāgyabhogakaraṇaṃ sarvakilviṣanāśanam |sarvavyādhipraśamanaṃ sarvasattvasukhāvaham || 43||

त्रिकालं यः पठेद्धीमान् शुचिस्थाने समाहितः ।सोऽचिरेणैव कालेन राज्यश्रियमवाप्नुयात् ॥ ४४॥

trikālaṃ yaḥ paṭheddhīmān śucisthāne samāhitaḥ |so'cireṇaiva kālena rājyaśriyamavāpnuyāt || 44||

दुःखी स्यात्तु सुखी नित्यं दरिद्रो धनवान् भवेत् ।पुत्रो भवेन्महाप्राज्ञो मेधावी च न संशयः ॥ ४५॥

duḥkhī syāttu sukhī nityaṃ daridro dhanavān bhavet |putro bhavenmahāprājño medhāvī ca na saṃśayaḥ || 45||

बन्धनान्मुच्यते बद्धो व्यवहारे जयोअ भवेत् ।शत्रवो मित्रतां यान्ति शृङ्गिणः शुनका अपि ॥ ४६॥

bandhanānmucyate baddho vyavahāre jayoa bhavet |śatravo mitratāṃ yānti śṛṅgiṇaḥ śunakā api || 46||

सङ्ग्रामे सङ्कटे दुर्गे नानाभयसमुच्छ्रिते ।स्मरणादेव नामानि सर्वान्भयानपोहति ॥ ४७॥

saṅgrāme saṅkaṭe durge nānābhayasamucchrite |smaraṇādeva nāmāni sarvānbhayānapohati || 47||

नाकालमृत्युर्भवति प्राप्नोति विपुलाशयम् ।मानुष्ये सफलं जन्म तस्यैकस्य महात्मनः ॥ ४८॥

nākālamṛtyurbhavati prāpnoti vipulāśayam |mānuṣye saphalaṃ janma tasyaikasya mahātmanaḥ || 48||

यश्चेदं प्रातरुत्थाय मानवः कीर्तयिष्यति ।स दीर्घकालमायुष्मान् श्रियं च लभते नरः ॥ ४९॥

yaścedaṃ prātarutthāya mānavaḥ kīrtayiṣyati |sa dīrghakālamāyuṣmān śriyaṃ ca labhate naraḥ || 49||

देवा नागास्तथा यक्षा गन्धर्वा कठपूतनाः ।पिशाचा राक्षसा भूता मातरो रौद्रतेजसाः ॥ ५०॥

devā nāgāstathā yakṣā gandharvā kaṭhapūtanāḥ |piśācā rākṣasā bhūtā mātaro raudratejasāḥ || 50||

डाकिन्यस्तारकाः प्रेताः स्कन्दोमाद्या महाग्रहाः ।छायापस्मारकाश्चैव खेटका खार्दकादयः ॥ ५१॥

ḍākinyastārakāḥ pretāḥ skandomādyā mahāgrahāḥ |chāyāpasmārakāścaiva kheṭakā khārdakādayaḥ || 51||

वेतालाश्चिञ्चका प्रेष्या ये चान्ये दुष्टचेतसः ।छायामपि न लङ्घन्ति किं पुनस्तस्य विग्रहम् ॥ ५२॥

vetālāściñcakā preṣyā ye cānye duṣṭacetasaḥ |chāyāmapi na laṅghanti kiṃ punastasya vigraham || 52||

दुष्टसत्त्वा न बाधन्ते व्याधयो नाक्रमन्ति च ।सर्वैश्वर्यगुणैर्युक्तो वंशवृद्धिश्च जायते ॥ ५३॥

duṣṭasattvā na bādhante vyādhayo nākramanti ca |sarvaiśvaryaguṇairyukto vaṃśavṛddhiśca jāyate || 53||

जातिस्मरो भवेद् धीमान् कुलीनः प्रियदर्शनः ।प्रीतिमांश्च महावाग्मी सर्वशास्त्रविशारदः ॥ ५४॥

jātismaro bhaved dhīmān kulīnaḥ priyadarśanaḥ |prītimāṃśca mahāvāgmī sarvaśāstraviśāradaḥ || 54||

कल्याणमित्रसंसेवी बोधिचित्तविभूषितः ।सदाऽविरहितो बुद्धैर्यत्र यत्रोपपद्यते ॥ ५५॥

kalyāṇamitrasaṃsevī bodhicittavibhūṣitaḥ |sadā'virahito buddhairyatra yatropapadyate || 55||

इति श्रीआर्यताराभट्टारिकाया नामाष्टोत्तरशतं बुद्धपरिभाषितं परिसम्पूर्णम् ॥

iti śrīāryatārābhaṭṭārikāyā nāmāṣṭottaraśataṃ buddhaparibhāṣitaṃ parisampūrṇam ||