आर्याशतकम् अथवा शार्ङ्गोद्याननिवासिन्यम्ब स्तवः Arya Shatakam

शार्ङ्गोद्याननिवासिन्यम्ब स्तवः ।आर्यां परमैश्वर्यां धार्यां हृदये महद्भिरृषिवर्यैः ।मर्यादातीतगुणौदार्यां शम्भोः समाश्रये भार्याम् ॥ १॥

śārṅgodyānanivāsinyamba stavaḥ |āryāṃ paramaiśvaryāṃ dhāryāṃ hṛdaye mahadbhirṛṣivaryaiḥ |maryādātītaguṇaudāryāṃ śambhoḥ samāśraye bhāryām || 1||

गाङ्गेयसमाभाङ्गीं गङ्गारङ्गोत्तमाङ्गतन्वङ्गीम् ।शार्ङ्गोद्यानसुभङ्गीमङ्गीकुर्मोऽन्तरेण मातङ्गीम् ॥ २॥

gāṅgeyasamābhāṅgīṃ gaṅgāraṅgottamāṅgatanvaṅgīm |śārṅgodyānasubhaṅgīmaṅgīkurmo'ntareṇa mātaṅgīm || 2||

करुणार्द्रनयनकोणां तरुणाम्भोजन्मरम्यचरणयुगाम् ।हरिणाङ्कचूडरमणीमरुणाभां देवतां परामीडे ॥ ३॥

karuṇārdranayanakoṇāṃ taruṇāmbhojanmaramyacaraṇayugām |hariṇāṅkacūḍaramaṇīmaruṇābhāṃ devatāṃ parāmīḍe || 3||

निहतामरारिवर्गां निर्धूतनमज्जनारिपङ्वर्गाम् ।कलयेऽहं वनदुर्गां कारुण्यसुधार्द्रलोचनविसर्गाम् ॥ ४॥

nihatāmarārivargāṃ nirdhūtanamajjanāripaṅvargām |kalaye'haṃ vanadurgāṃ kāruṇyasudhārdralocanavisargām || 4||

कारुण्यपरमकोटीं कोटीराबद्धहिमकरवधूटीम् ।पाटीरसुरभिशार्टी गाढीकुर्मोऽन्तरुल्लसन्मकुटीम् ॥ ५॥

kāruṇyaparamakoṭīṃ koṭīrābaddhahimakaravadhūṭīm |pāṭīrasurabhiśārṭī gāḍhīkurmo'ntarullasanmakuṭīm || 5||

मन्दस्मितार्द्रवदनां मन्दारलतां पदारविन्दजुषाम् ।इन्दीवरदलनयनामिन्दुकलापीडसुन्दरी वन्दे ॥ ६॥

mandasmitārdravadanāṃ mandāralatāṃ padāravindajuṣām |indīvaradalanayanāmindukalāpīḍasundarī vande || 6||

दळितेन्दीवरनयनां गळितकलङ्कोडुराजसखवदनाम् ।अळिकळभविलसदळकामळिकाक्षप्रेयसीं भजे काळीम् ॥ ७॥

daḷitendīvaranayanāṃ gaḷitakalaṅkoḍurājasakhavadanām |aḷikaḷabhavilasadaḷakāmaḷikākṣapreyasīṃ bhaje kāḷīm || 7||

अम्बां जगदवलम्बां बिम्बाधरकान्तिविजितबन्धूकाम् ।लम्बाळकनिकुरुम्बां लम्बोदरमातरं समालम्बे ॥ ८॥

ambāṃ jagadavalambāṃ bimbādharakāntivijitabandhūkām |lambāḷakanikurumbāṃ lambodaramātaraṃ samālambe || 8||

सम्भाविताङ्घ्रिकमलां जम्भारिप्रमुखसर्वगीर्वाणैः ।अम्भोरुहदलनयनां शम्भोः सम्भोगसम्पदं वन्दे ॥ ९॥

sambhāvitāṅghrikamalāṃ jambhāripramukhasarvagīrvāṇaiḥ |ambhoruhadalanayanāṃ śambhoḥ sambhogasampadaṃ vande || 9||

करिकळभकुम्भविलसत्कुचकुम्भां सम्भ्रमत्कुसुम्भाभाम् ।अम्भोजासनविनतामम्भोजाताक्षसोदरीं वन्दे ॥ १०॥

karikaḷabhakumbhavilasatkucakumbhāṃ sambhramatkusumbhābhām |ambhojāsanavinatāmambhojātākṣasodarīṃ vande || 10||

आशासितफलदात्रीमाशापालाभिवन्दिताङ्घ्रियुगांनाशायाशेषविपद्राशीनामीशवल्लभां कलये ॥ ११॥

āśāsitaphaladātrīmāśāpālābhivanditāṅghriyugāṃnāśāyāśeṣavipadrāśīnāmīśavallabhāṃ kalaye || 11||

पङ्कजसम्भवविनतामङ्कविहीनेन्दुबिम्बसमवदनाम् ।कुङ्कुमसमानवर्णां शङ्करवरवर्णिनीं समालम्बे ॥ १२॥

paṅkajasambhavavinatāmaṅkavihīnendubimbasamavadanām |kuṅkumasamānavarṇāṃ śaṅkaravaravarṇinīṃ samālambe || 12||

कुलिशायुधमुखविनुता कलशाम्भोराशिशायिसहजाता ।कुलशैलवरतनूजा फलशालीदं तनोतु मे जन्म ॥ १३॥

kuliśāyudhamukhavinutā kalaśāmbhorāśiśāyisahajātā |kulaśailavaratanūjā phalaśālīdaṃ tanotu me janma || 13||

पार्वणसुधांशुमण्डलगर्वसमूलापहरणनिपुणमुखीम् ।पर्वतपरिवृढकन्यां सर्वजगन्नायिकामहं वन्दे ॥ १४॥

pārvaṇasudhāṃśumaṇḍalagarvasamūlāpaharaṇanipuṇamukhīm |parvataparivṛḍhakanyāṃ sarvajagannāyikāmahaṃ vande || 14||

संसारसागरतरीं पुंसां हंसातिशायिमृदुगमनाम् ।शंसन्मणिमञ्जीरां संसेवे सर्वमङ्गलां नित्याम् ॥ १५॥

saṃsārasāgaratarīṃ puṃsāṃ haṃsātiśāyimṛdugamanām |śaṃsanmaṇimañjīrāṃ saṃseve sarvamaṅgalāṃ nityām || 15||

एणाङ्ककलित चूळीं वाणीमाधुर्यनिर्जितमधूळीम् ।एणीसमाक्षिकेळीं प्रीणीमः प्रेक्ष्य गिरिशपुण्याळीम् ॥ १६॥

eṇāṅkakalita cūḷīṃ vāṇīmādhuryanirjitamadhūḷīm |eṇīsamākṣikeḷīṃ prīṇīmaḥ prekṣya giriśapuṇyāḷīm || 16||

कल्याणशैलनिलयां चिल्ल्याहितविश्वसृष्टिगुप्तिलयाम् ।कल्याणीं हरजायां तुल्यातीतां समाश्रये विजयाम् ॥ १७॥

kalyāṇaśailanilayāṃ cillyāhitaviśvasṛṣṭiguptilayām |kalyāṇīṃ harajāyāṃ tulyātītāṃ samāśraye vijayām || 17||

नळिनान्तर्दळनयना पुलिनाहङ्कारहारिपृथुजघना ।मलिनेतरमृदुवसना फलिनं कुर्यान्ममेप्सितमपर्णा ॥ १८॥

naḷināntardaḷanayanā pulināhaṅkārahāripṛthujaghanā |malinetaramṛduvasanā phalinaṃ kuryānmamepsitamaparṇā || 18||

धन्यां गिरिवरकन्यां मुरहरमान्यां भजाम्यसामान्याम् ।निहतासुरवरसैन्यामितराश्रयशून्यसज्जनशरण्याम् ॥ १९॥

dhanyāṃ girivarakanyāṃ muraharamānyāṃ bhajāmyasāmānyām |nihatāsuravarasainyāmitarāśrayaśūnyasajjanaśaraṇyām || 19||

काळीं कल्लोललसञ्चिल्लीयुगलीं मनोज्ञतनुवल्लीम् ।कचकलित चारुमल्लीं कलय शम्भोः शिरोलिपिमतल्लीम् ॥ २०॥

kāḷīṃ kallolalasañcillīyugalīṃ manojñatanuvallīm |kacakalita cārumallīṃ kalaya śambhoḥ śirolipimatallīm || 20||

कलये कुलगिरिपरिवृढकलिततपोदानराशिपरिपाकम् ।मौलिलसदिन्दुपाकं दलितवलारातिर्वैरिवरलोकम् ॥ २१॥

kalaye kulagiriparivṛḍhakalitatapodānarāśiparipākam |maulilasadindupākaṃ dalitavalārātirvairivaralokam || 21||

बालार्करुचिररत्नं हेलानिःशेषिताखिलसपत्नम् ।कलय चिन्तारलं कुलगिरिराजन्यजन्यसद्रत्नम् ॥ २२॥

bālārkaruciraratnaṃ helāniḥśeṣitākhilasapatnam |kalaya cintāralaṃ kulagirirājanyajanyasadratnam || 22||

बलिमथनघातृपूज्यं मलिनेतरचित्तवृत्तिहृद्योज्यम् ।कलये सुतरां प्राज्यं कालप्रध्वंसिसुकृतसाम्राज्यम् ॥ २३॥

balimathanaghātṛpūjyaṃ malinetaracittavṛttihṛdyojyam |kalaye sutarāṃ prājyaṃ kālapradhvaṃsisukṛtasāmrājyam || 23||

नवरविकिरणारुण्यं नतजनविश्रान्तपरमकारुण्यम् ।तुलितेतरलावण्यं कलये कैलासवासिनैपुण्यम् ॥ २४॥

navaravikiraṇāruṇyaṃ natajanaviśrāntaparamakāruṇyam |tulitetaralāvaṇyaṃ kalaye kailāsavāsinaipuṇyam || 24||

कलये निजपदभाजां सुलभां कळभापहासिकळगमनाम् ।अळिमास्वत्कबरीकां हरभार्यां मकुटशाभिशिशुभार्याम् ॥ २५॥ (शशिभार्याम्)

kalaye nijapadabhājāṃ sulabhāṃ kaḷabhāpahāsikaḷagamanām |aḷimāsvatkabarīkāṃ harabhāryāṃ makuṭaśābhiśiśubhāryām || 25|| (śaśibhāryām)

याने कळहंसमयीं भाने वालार्ककोटिकिरणमयीम् ।सञ्चिन्तये भवानीं सन्तानलतामभीष्टफलदाने ॥ २६॥

yāne kaḷahaṃsamayīṃ bhāne vālārkakoṭikiraṇamayīm |sañcintaye bhavānīṃ santānalatāmabhīṣṭaphaladāne || 26||

निखिलजगज्जनयित्रीं कुवलयसङ्कोचदानपटुनेत्रीम् ।कलये करुणापात्रीं कुलपर्वतराजजन्मफलदात्रीम् ॥ २७॥

nikhilajagajjanayitrīṃ kuvalayasaṅkocadānapaṭunetrīm |kalaye karuṇāpātrīṃ kulaparvatarājajanmaphaladātrīm || 27||

करुणासारनिधानं कनकसमाभिख्यमुख्यपरिधानम् ।कलयेतरां प्रधानं कण्ठेकालस्य भव्यमपदानम् ॥ २८॥

karuṇāsāranidhānaṃ kanakasamābhikhyamukhyaparidhānam |kalayetarāṃ pradhānaṃ kaṇṭhekālasya bhavyamapadānam || 28||

नेत्रे कारुण्यवतीमारुण्यवर्ती मनोज्ञतरगात्रे ।स्तोत्रे निजभक्तानामामोदवती भजामि हैमवतीम् ॥ २९॥

netre kāruṇyavatīmāruṇyavartī manojñataragātre |stotre nijabhaktānāmāmodavatī bhajāmi haimavatīm || 29||

नवमणिकुण्डलकर्णां नळिनासनवासवादिकृतवर्णाम् ।कमनीयहेमवर्णां करुणापूर्णां समाश्रयेऽपर्णाम् ॥ ३०॥

navamaṇikuṇḍalakarṇāṃ naḷināsanavāsavādikṛtavarṇām |kamanīyahemavarṇāṃ karuṇāpūrṇāṃ samāśraye'parṇām || 30||

आद्यामपि चानाद्यामनवद्यां श्रुतिशिरःशतैर्वेद्याम् ।स्वर्गापवर्गपद्यां हृद्याकारां स्मरामि सद्विद्याम् ॥ ३१॥

ādyāmapi cānādyāmanavadyāṃ śrutiśiraḥśatairvedyām |svargāpavargapadyāṃ hṛdyākārāṃ smarāmi sadvidyām || 31||

सम्भरितमूरिकरुणं जम्भरिपुप्रमुखसेव्यमृदुचरणम् ।सम्भावये पुराणं शम्भोस्सम्भोगयोग्यमाभरणम् ॥ ३२॥

sambharitamūrikaruṇaṃ jambharipupramukhasevyamṛducaraṇam |sambhāvaye purāṇaṃ śambhossambhogayogyamābharaṇam || 32||

चित्ररुचिनेत्रपाळीकेळीलाळित्यलाळितकपालिम् ।करुणाशालि विशालं कलये प्रालेयशैलपुण्यफलम् ॥ ३३॥

citrarucinetrapāḷīkeḷīlāḷityalāḷitakapālim |karuṇāśāli viśālaṃ kalaye prāleyaśailapuṇyaphalam || 33||

विमथितविबुधातङ्कां हिमकरमार्ताण्डकलितताटङ्काम ।मक्कुटालसन्मृगाङ्कां कलये विद्ध्वस्तभक्तहृत्पङ्काम् ॥ ३४॥

vimathitavibudhātaṅkāṃ himakaramārtāṇḍakalitatāṭaṅkāma |makkuṭālasanmṛgāṅkāṃ kalaye viddhvastabhaktahṛtpaṅkām || 34||

भुजधृतमणिमयवलयामलयां निर्धूतनम्रलोकभयाम् ।निरवधिदयाममेयां हरजायामाश्रय महामायाम् ॥ ३५॥

bhujadhṛtamaṇimayavalayāmalayāṃ nirdhūtanamralokabhayām |niravadhidayāmameyāṃ harajāyāmāśraya mahāmāyām || 35||

खद्योतितादिमोद्यत्प्रद्योतनकोटिविग्रहमयूखाम् ।मौलिधृतचन्द्रलेखां कलयेऽहं खण्डपरशुवृषरेखाम् ॥ ३६॥

khadyotitādimodyatpradyotanakoṭivigrahamayūkhām |maulidhṛtacandralekhāṃ kalaye'haṃ khaṇḍaparaśuvṛṣarekhām || 36||

सद्रक्षणास्तनिद्राविद्रावितरौद्रदैत्यवरवीरा ।भद्राणि मे प्रदेयाद्रुद्राणी शमयताच्च हृद्रोगान् ॥ ३७॥

sadrakṣaṇāstanidrāvidrāvitaraudradaityavaravīrā |bhadrāṇi me pradeyādrudrāṇī śamayatācca hṛdrogān || 37||

दुर्जनसज्जनशिक्षारक्षादक्षा चराचराध्यक्षा ।दाक्षायणीह रक्षेत् पक्षान्तर्क्षेशदानदक्षास्या ॥ ३८॥

durjanasajjanaśikṣārakṣādakṣā carācarādhyakṣā |dākṣāyaṇīha rakṣet pakṣāntarkṣeśadānadakṣāsyā || 38||

हरिविधिविहितादरणां हरिहयगोपारुणांशुकावरणाम् ।हरिदीशवन्द्यचरणां हरिणाक्षीं नौम्युमां वराभरणाम् ॥ ३९॥

harividhivihitādaraṇāṃ harihayagopāruṇāṃśukāvaraṇām |haridīśavandyacaraṇāṃ hariṇākṣīṃ naumyumāṃ varābharaṇām || 39||

कुण्डलमण्डितगण्डा खण्डितचण्डतरचण्डमुण्डबला ।शुण्डोपमोरुकाण्डा खण्डतान्मे भयानि चामुण्डा ॥ ४०॥

kuṇḍalamaṇḍitagaṇḍā khaṇḍitacaṇḍataracaṇḍamuṇḍabalā |śuṇḍopamorukāṇḍā khaṇḍatānme bhayāni cāmuṇḍā || 40||

आर्तार्तिहरणदीक्षा घात्राद्यैः कीर्तनीयगुणवार्ताकात्यायनीह रक्षेन्नेत्रान्तालोकलेशमात्रेण ॥ ४१॥

ārtārtiharaṇadīkṣā ghātrādyaiḥ kīrtanīyaguṇavārtākātyāyanīha rakṣennetrāntālokaleśamātreṇa || 41||

हारीभृताहीश्वरनारीं सैन्दर्यवारिनिधिलहरीम ।ऊरीकरोमि गौरीं नारीलोकाभिमानमूलहरीम् ॥ ४२॥

hārībhṛtāhīśvaranārīṃ saindaryavārinidhilaharīma |ūrīkaromi gaurīṃ nārīlokābhimānamūlaharīm || 42||

खर्वेतराणि भूयस्सर्वविनिन्द्यान्यशर्ममूलानि ।सर्वाणि शमयतान्मे शर्वाणी झटिति दुरितकर्माणि ॥ ४३॥

kharvetarāṇi bhūyassarvavinindyānyaśarmamūlāni |sarvāṇi śamayatānme śarvāṇī jhaṭiti duritakarmāṇi || 43||

पिष्टातिदुष्टलोका शिष्टैस्तोष्टूय्यमानगुणकाष्ठा ।इष्टा प्रियाष्टमूर्तेः कष्टावस्थां पिनष्टु मे हृष्टा ॥ ४४॥

piṣṭātiduṣṭalokā śiṣṭaistoṣṭūyyamānaguṇakāṣṭhā |iṣṭā priyāṣṭamūrteḥ kaṣṭāvasthāṃ pinaṣṭu me hṛṣṭā || 44||

निष्कासितारिसार्थं निर्मूलितसकलसज्ञ्जनानर्थम् ।सर्वागमपरमार्थं संसेवे शर्वभोगपरमार्थम् ॥ ४५॥

niṣkāsitārisārthaṃ nirmūlitasakalasajñjanānartham |sarvāgamaparamārthaṃ saṃseve śarvabhogaparamārtham || 45||

पदनखरुचि विभ्राजितसकलदिगन्तं सुमङ्गलोदन्तम् ।कलयेऽहमनाद्यन्तं श्रुतिसिद्धान्तं त्रिशूलिशुद्धान्तम् ॥ ४६॥

padanakharuci vibhrājitasakaladigantaṃ sumaṅgalodantam |kalaye'hamanādyantaṃ śrutisiddhāntaṃ triśūliśuddhāntam || 46||

निर्धूतनिखिलबाधं निर्जरवैरिप्रसारितक्रोधम् ।कलये निरवधिबोधं कालारातेः प्रधानमवरोधम् ॥ ४७॥

nirdhūtanikhilabādhaṃ nirjaravairiprasāritakrodham |kalaye niravadhibodhaṃ kālārāteḥ pradhānamavarodham || 47||

करुणासुधारसार्द्रा कमनीयरुचा निराकृतहरिद्रा ।पदकमलनमितरुद्रा रुद्राणी मे हिनस्तु दारिद्र्यम् ॥ ४८॥

karuṇāsudhārasārdrā kamanīyarucā nirākṛtaharidrā |padakamalanamitarudrā rudrāṇī me hinastu dāridryam || 48||

परिकलित हेमकाञ्ची करतलघृतचापबाणसृणिपाशा ।परिणतशरदिन्दुमुखी करिकुम्भक्कुचा विभातु गिरिशसखी ॥ ४९॥

parikalita hemakāñcī karatalaghṛtacāpabāṇasṛṇipāśā |pariṇataśaradindumukhī karikumbhakkucā vibhātu giriśasakhī || 49||

रात्रीसगोत्रगात्री रात्रीश हुताशसवितृनेत्री माम् ।धात्रीधरेन्द्रपुत्री पात्रीकुर्यात् कटाक्षमात्रस्य ॥। ५०॥

rātrīsagotragātrī rātrīśa hutāśasavitṛnetrī mām |dhātrīdharendraputrī pātrīkuryāt kaṭākṣamātrasya ||| 50||

मुष्णातु समुदितोदयदुष्णांशुसहस्रकोटिरोचिष्णुः ।कृष्णानुजान्तरुष्णं विष्णुविरिश्चादिपूजिताभीक्ष्णम् ॥ ५१॥

muṣṇātu samuditodayaduṣṇāṃśusahasrakoṭirociṣṇuḥ |kṛṣṇānujāntaruṣṇaṃ viṣṇuviriścādipūjitābhīkṣṇam || 51||

मुनिहृदयविहितलास्यं मुखरुचिरचितेन्दुमण्डलालस्यम् ।कलितानतजनदास्यं कलये कैलासनिलयसारस्यम् ॥ ५२॥

munihṛdayavihitalāsyaṃ mukharuciracitendumaṇḍalālasyam |kalitānatajanadāsyaṃ kalaye kailāsanilayasārasyam || 52||

कनकमयकुण्डलाङ्गदकाञ्चीदामाभिरामतमसुषमा ।दिशतु मम लोकमाता सीमातीतामचञ्चलां लक्ष्मीम् ॥ ५३॥

kanakamayakuṇḍalāṅgadakāñcīdāmābhirāmatamasuṣamā |diśatu mama lokamātā sīmātītāmacañcalāṃ lakṣmīm || 53||

दुग्धहविर्मधुमद्यैश्चातुर्वण्येन तर्पिताध्यर्धम् ।सकलं परापरमयी सफलं कुर्यान्ममेप्सितं त्रिपुरा ॥ ५४॥

dugdhahavirmadhumadyaiścāturvaṇyena tarpitādhyardham |sakalaṃ parāparamayī saphalaṃ kuryānmamepsitaṃ tripurā || 54||

वलमथनकुवलयाक्षीं चिकुरभरभ्रमरमुखरचरणयुगाम् ।कुलशैलराजचेतःकुमुदशरच्चन्द्रचन्द्रिकां कलये ॥ ५५॥

valamathanakuvalayākṣīṃ cikurabharabhramaramukharacaraṇayugām |kulaśailarājacetaḥkumudaśaraccandracandrikāṃ kalaye || 55||

अन्धकपरिपन्थिमनःक्षीरधिमन्थानशैलपृथुलकुचाम् ।सिन्धुरपरिवृढबन्धुरमन्थरगमनां स्मरामि जगदम्बाम् ॥ ५६॥

andhakaparipanthimanaḥkṣīradhimanthānaśailapṛthulakucām |sindhuraparivṛḍhabandhuramantharagamanāṃ smarāmi jagadambām || 56||

परमेशचित्तमदगजनिगलायिततरलचिल्लियुगलं मे ।विदलयतु निखिलदैन्यं मदनमहावीरगर्वसर्वस्वम् ॥ ५७॥

parameśacittamadagajanigalāyitataralacilliyugalaṃ me |vidalayatu nikhiladainyaṃ madanamahāvīragarvasarvasvam || 57||

कलयतु विशदतराभा जपपटवरपुस्तकाभयाढ्यभुजा ।रसनाग्रं मम रङ्गं माध्वीमाधुर्यधुर्यभणितीनाम् ॥ ५८॥

kalayatu viśadatarābhā japapaṭavarapustakābhayāḍhyabhujā |rasanāgraṃ mama raṅgaṃ mādhvīmādhuryadhuryabhaṇitīnām || 58||

कारणभूता जगतः पालनसंहारकरणधौरेया ।व्रातं ममाशु विपदां माता लोकस्य सञ्जरीहर्तु ॥ ५९॥

kāraṇabhūtā jagataḥ pālanasaṃhārakaraṇadhaureyā |vrātaṃ mamāśu vipadāṃ mātā lokasya sañjarīhartu || 59||

वरिवसितटतपिनाकां निरुपमकारुण्यसम्पदतिरेकाम् ।कुलशिखरिवरपताकां कलये नमदमितविसरदवलोकाम् ॥ ६०॥

varivasitaṭatapinākāṃ nirupamakāruṇyasampadatirekām |kulaśikharivarapatākāṃ kalaye namadamitavisaradavalokām || 60||

प्रालेयजालशीतलशैलकुलोत्तंसचारुकलिके ! माम् ।कालं निरस्य कारुण्यालोकनलेशभाजनं कुर्याः ॥ ६१॥

prāleyajālaśītalaśailakulottaṃsacārukalike ! mām |kālaṃ nirasya kāruṇyālokanaleśabhājanaṃ kuryāḥ || 61||

कैलासशैलनिलयनकारुण्यकटाक्षमूलिके ! तुभ्यम् ।कलयामि नमोवाकं करुणां कुरु कालयापनमपास्य ॥ ६२॥

kailāsaśailanilayanakāruṇyakaṭākṣamūlike ! tubhyam |kalayāmi namovākaṃ karuṇāṃ kuru kālayāpanamapāsya || 62||

दरदलितनीलकुवलयदलकुलविलसद्विलोचनद्वन्द्वाम् ।कलये विषमविलोचननयनचकोरेन्दुकौमुदीं हृदये ॥ ६३॥

daradalitanīlakuvalayadalakulavilasadvilocanadvandvām |kalaye viṣamavilocananayanacakorendukaumudīṃ hṛdaye || 63||

परमशिवचिचधैर्यक्षितिधरसन्दलनशातशतकोटिः ।वैरिगिरिपटलिकां मे वलरिपुसम्भाविता विदारयतात् ॥ ६४॥

paramaśivacicadhairyakṣitidharasandalanaśātaśatakoṭiḥ |vairigiripaṭalikāṃ me valaripusambhāvitā vidārayatāt || 64||

प्रसरतु ममान्तरङ्गे प्रतिपदभोग्या भिषक्तमस्य सदा ।भवरोगभीतसेव्या दिव्यौषधिका तुषारगिरिजन्या ॥ ६५।

prasaratu mamāntaraṅge pratipadabhogyā bhiṣaktamasya sadā |bhavarogabhītasevyā divyauṣadhikā tuṣāragirijanyā || 65|

तुहिनगिरिकीर्तिसम्पच्चरणसरोजातयुगळवरघृळिः ।भुवनतलपावनी मे विमलीकुर्यान्मनोमणीमुकुरम् ॥ ६६॥

tuhinagirikīrtisampaccaraṇasarojātayugaḷavaraghṛḷiḥ |bhuvanatalapāvanī me vimalīkuryānmanomaṇīmukuram || 66||

वलमथनविटपिसुरभिलनवसुमपरीहासिचिकुरसौरभ्याम् ।स्मरदहनभाग्यसीमां निरतिशयानन्दकन्दलीं वन्दे ॥ ६७॥

valamathanaviṭapisurabhilanavasumaparīhāsicikurasaurabhyām |smaradahanabhāgyasīmāṃ niratiśayānandakandalīṃ vande || 67||

कालिन्दीजलवेणीमालिन्यविधानधीरतरवेणीम् ।मकरन्दमधुरवाणीमाणिक्यमणीं स्मरामि शर्वाणीम् ॥ ६८॥

kālindījalaveṇīmālinyavidhānadhīrataraveṇīm |makarandamadhuravāṇīmāṇikyamaṇīṃ smarāmi śarvāṇīm || 68||

लोलम्बडिम्भसंहतिसम्भ्रमसन्दायिविसरदलकभराम् ।निटिलतलविजितवैधवकुटिलकलां सर्वमङ्गलां कलये ॥ ६९॥

lolambaḍimbhasaṃhatisambhramasandāyivisaradalakabharām |niṭilatalavijitavaidhavakuṭilakalāṃ sarvamaṅgalāṃ kalaye || 69||

कारुण्यसरससागरमृदुलहरीपरिणतोल्लसच्चिल्लीम् ।फुल्लेन्दीवरसोदरसुन्दरनयनां स्मरामि चिल्लहरीम् ॥ ७०॥

kāruṇyasarasasāgaramṛdulaharīpariṇatollasaccillīm |phullendīvarasodarasundaranayanāṃ smarāmi cillaharīm || 70||

करुणासुधाम्बुधाराशिशिरतरोदारकोमलकटाक्षाम् ।नासाग्रकलितमणिमयभूषणसारां परां कलां कलये ॥ ७१॥

karuṇāsudhāmbudhārāśiśiratarodārakomalakaṭākṣām |nāsāgrakalitamaṇimayabhūṣaṇasārāṃ parāṃ kalāṃ kalaye || 71||

गण्डतलमुकुरबिम्बितकुण्डलितार्केन्दुमण्डलां कलये ।खण्डपरशूर्जिततपोमण्डलसाम्राज्यपरमसीमानम् ॥ ७२॥

gaṇḍatalamukurabimbitakuṇḍalitārkendumaṇḍalāṃ kalaye |khaṇḍaparaśūrjitatapomaṇḍalasāmrājyaparamasīmānam || 72||

विशदतरदशनदीधितिनिन्दितकुन्देन्दुचातुरीलहरीम् ।शिशिरकरशकलशेखररोषग्रीष्मोष्मचन्द्रिकां वन्दे ॥ ७३॥

viśadataradaśanadīdhitininditakundenducāturīlaharīm |śiśirakaraśakalaśekhararoṣagrīṣmoṣmacandrikāṃ vande || 73||

अरुणांशुदशनवसनज्योतिष्प्रसरातिशोणितदिगन्ताम् ।शितिकण्ठेनातर्पणसरसास्वादितामृताधरां कलये ॥ ७४॥

aruṇāṃśudaśanavasanajyotiṣprasarātiśoṇitadigantām |śitikaṇṭhenātarpaṇasarasāsvāditāmṛtādharāṃ kalaye || 74||

शारदपार्वणहिमकिरणाशासितदास्यसुन्दरतरास्याम् ।कलयामि कुलगिरीश्वरविरचितपरमशिवचरणवरिवस्याम् ॥ ७५॥

śāradapārvaṇahimakiraṇāśāsitadāsyasundaratarāsyām |kalayāmi kulagirīśvaraviracitaparamaśivacaraṇavarivasyām || 75||

अतिलळितगळतलाश्रितघवळतरोदारहारिमणिहाराम् ।कलयामि निटिललोचननयनालीचन्दनादिगुलिकालीम् ॥ ७६॥

atilaḷitagaḷatalāśritaghavaḷatarodārahārimaṇihārām |kalayāmi niṭilalocananayanālīcandanādigulikālīm || 76||

करिकुम्भकनककलशाड़म्बरसम्बाधिसाधुकुचकुम्भाम् ।स्मरमथनचित्तशमधनतास्कर्यकलां कृपाकुलां कलये ॥ ७७॥

karikumbhakanakakalaśāड़mbarasambādhisādhukucakumbhām |smaramathanacittaśamadhanatāskaryakalāṃ kṛpākulāṃ kalaye || 77||

शम्भुकृतसुकृतसम्पत्सम्भृतसौवर्णकुम्भकुचकुम्भाम् ।निटिलनयनपरिकाङ्क्षितदृढपरिरम्भां स्मरामि जगदम्बाम् ॥ ७८॥

śambhukṛtasukṛtasampatsambhṛtasauvarṇakumbhakucakumbhām |niṭilanayanaparikāṅkṣitadṛḍhaparirambhāṃ smarāmi jagadambām || 78||

रुचिरतरकनकवल्लीसाष्टाङ्गप्रणतभुजततिमतल्लीम् ।अमरपरिपन्थिवर्गप्रतिभयतरकाळरात्रिमाकलये ॥ ७९॥

ruciratarakanakavallīsāṣṭāṅgapraṇatabhujatatimatallīm |amaraparipanthivargapratibhayatarakāḷarātrimākalaye || 79||

आनीलरोमवल्लीक्षुल्लीकृतवनपिपीलिकावलिकाम् ।क्षोणीधरेश्वरयशश्चन्द्रमसः पूर्णिमामुमां प्रणुमः ॥ ८०॥

ānīlaromavallīkṣullīkṛtavanapipīlikāvalikām |kṣoṇīdhareśvarayaśaścandramasaḥ pūrṇimāmumāṃ praṇumaḥ || 80||

शोणनदावर्तरुचिश्रेणीभयदायिनिम्नशुभनाभीम् ।सायन्तनघनपटलीशोभनवसनां स्मरामि हरसेनाम् ॥ ८१॥

śoṇanadāvartaruciśreṇībhayadāyinimnaśubhanābhīm |sāyantanaghanapaṭalīśobhanavasanāṃ smarāmi harasenām || 81||

कटितटघटितस्फुटरुचिकनकमणीकाञ्चिदलिततटिदाभाम् ।कुटिलेन्दुमकुट मञ्जुलमञ्चां सञ्चिन्तये कलां काञ्चित् ॥ ८२॥

kaṭitaṭaghaṭitasphuṭarucikanakamaṇīkāñcidalitataṭidābhām |kuṭilendumakuṭa mañjulamañcāṃ sañcintaye kalāṃ kāñcit || 82||

हस्तिवरमस्तकविभवजित्वरविस्तारिहारिजघनभराम् ।निस्तुलसौन्दर्यसुधारत्नाकरसम्पदं स्मरेदम्बाम् ॥ ८३॥

hastivaramastakavibhavajitvaravistārihārijaghanabharām |nistulasaundaryasudhāratnākarasampadaṃ smaredambām || 83||

विकटाक्षचित्तमन्मथविकृतिविधानैकतानसुनितम्बाम् ।कलयामि भुवनमण्डलमन्दिरमणिदीपिकां महामायाम् ॥ ८४॥

vikaṭākṣacittamanmathavikṛtividhānaikatānasunitambām |kalayāmi bhuvanamaṇḍalamandiramaṇidīpikāṃ mahāmāyām || 84||

कुम्भिकरराजरम्भासम्भावितसुरुचिरोरुवरकाण्डाम् ।सम्भावये निसुम्भाद्यसुरमहारण्यदवशिखिज्वालाम् ॥ ८५॥

kumbhikararājarambhāsambhāvitasuruciroruvarakāṇḍām |sambhāvaye nisumbhādyasuramahāraṇyadavaśikhijvālām || 85||

जानुमयहेमसम्पुटसंसज्जद्भक्तचित्तमणिमुकुराम् ।भानुहिमभानुकृशानुलोचनसहधर्मिणीं नमस्कुर्मः ॥ ८६॥

jānumayahemasampuṭasaṃsajjadbhaktacittamaṇimukurām |bhānuhimabhānukṛśānulocanasahadharmiṇīṃ namaskurmaḥ || 86||

जङ्घाप्रकाण्डशोभासङ्घास्तमितोच्चकनकदण्डाभाम् ।हुङ्कारभस्मितासुरजृम्भितबलपटलिकां कलां कलये ॥ ८७॥

jaṅghāprakāṇḍaśobhāsaṅghāstamitoccakanakadaṇḍābhām |huṅkārabhasmitāsurajṛmbhitabalapaṭalikāṃ kalāṃ kalaye || 87||

मञ्जुलशिञ्जानमणीमञ्जीरस्फुरणरञ्जितपदाब्जाम् ।कञ्जशरवैरिचेतस्सरसिजकलहंसयोषितमुपासे ॥ ८८॥

mañjulaśiñjānamaṇīmañjīrasphuraṇarañjitapadābjām |kañjaśaravairicetassarasijakalahaṃsayoṣitamupāse || 88||

प्रपदप्रभाप्रकाण्डप्रोत्सारितकच्छपच्छविप्रसराम् ।प्रणुमः प्रालेयगिरिप्रचुरतपःप्रकरनैपुणीश्रेणीम् ॥ ८९॥

prapadaprabhāprakāṇḍaprotsāritakacchapacchaviprasarām |praṇumaḥ prāleyagiripracuratapaḥprakaranaipuṇīśreṇīm || 89||

चरणनमदमरपालीमौलीमाणिक्यरञ्जितनखालीम् ।नखचन्द्रिकानिरस्तप्रणततमोमण्डलीं कलां कलये ॥ ९०॥

caraṇanamadamarapālīmaulīmāṇikyarañjitanakhālīm |nakhacandrikānirastapraṇatatamomaṇḍalīṃ kalāṃ kalaye || 90||

सुरविटपिमृदुललोहितकिसलयवैकल्यकलनपटुचरणाम् ।कलयामि चरणकान्तिप्रसरनिरस्तारुणाम्बुजामम्बाम् ॥ ९१॥

suraviṭapimṛdulalohitakisalayavaikalyakalanapaṭucaraṇām |kalayāmi caraṇakāntiprasaranirastāruṇāmbujāmambām || 91||

मणिमयकिरीकुण्डलकेयूरोदारहारकटकाद्यैः ।रुचिरैर्भूषणसारैर्भूषितवेषां स्मरामि हरयोषाम् ॥ ९२॥

maṇimayakirīkuṇḍalakeyūrodārahārakaṭakādyaiḥ |rucirairbhūṣaṇasārairbhūṣitaveṣāṃ smarāmi harayoṣām || 92||

कलयामि कालयक्षीं करतलविलुठत्कराळकरवाळांकूळीगणैः परिवृतां काळीपरिवारमण्डलीमौलीम् ॥ ९३॥

kalayāmi kālayakṣīṃ karatalaviluṭhatkarāḷakaravāḷāṃkūḷīgaṇaiḥ parivṛtāṃ kāḷīparivāramaṇḍalīmaulīm || 93||

स्फुटरुचिविटपिविशेषैः पटुतरनिनदैः प्लवङ्गमैश्च भृतम् ।कलये शार्ङ्गोध्यानं कार्त्यायन्याः सुखासिकास्थानम् ॥ ९४॥

sphuṭaruciviṭapiviśeṣaiḥ paṭutaraninadaiḥ plavaṅgamaiśca bhṛtam |kalaye śārṅgodhyānaṃ kārtyāyanyāḥ sukhāsikāsthānam || 94||

हारिद्ररुचिसमाभा निर्निद्रा दीनरक्षणे माता ।सौरद्रवीं मयि धुरं दारिद्र्यव्याकुले द्रुतं वहतु ॥ ९५॥

hāridrarucisamābhā nirnidrā dīnarakṣaṇe mātā |sauradravīṃ mayi dhuraṃ dāridryavyākule drutaṃ vahatu || 95||

भूर्यद्रिमौलिनिलया भूरिद्रविणौघवृष्टिभिर्माता ।दारिद्र्यघर्मतप्तं मां रुद्राण्यभिषिञ्चतात् क्षणेनैव ॥ ९६॥

bhūryadrimaulinilayā bhūridraviṇaughavṛṣṭibhirmātā |dāridryagharmataptaṃ māṃ rudrāṇyabhiṣiñcatāt kṣaṇenaiva || 96||

वन्यां दैन्यौघमयीं धन्या निर्मूलयेत् समूलं मे ।कन्या तुषारपर्वतजन्या गुण्या कटाक्षशस्त्रेण ॥ ९७॥

vanyāṃ dainyaughamayīṃ dhanyā nirmūlayet samūlaṃ me |kanyā tuṣāraparvatajanyā guṇyā kaṭākṣaśastreṇa || 97||

सर्गस्थित्यन्तकरी जगतः स्वर्गापवर्गदात्री मे ।दौर्गत्यशिखरिकूटान् दुर्गा भिन्द्यात् कटाक्षकुलिशेन ॥ ९८॥

sargasthityantakarī jagataḥ svargāpavargadātrī me |daurgatyaśikharikūṭān durgā bhindyāt kaṭākṣakuliśena || 98||

शार्ङोद्याननिवासिनि मातः परदेवते महामाये ! ।करुणां कुरु मयि दीने कालविलम्ब सुदुस्सहं न सहे ॥ ९९॥

śārṅodyānanivāsini mātaḥ paradevate mahāmāye ! |karuṇāṃ kuru mayi dīne kālavilamba sudussahaṃ na sahe || 99||

शार्ङोद्याननिवासिनि कार्त्यायनि ! नः कुरुष्व कल्याणम् ।करुणामृतपरिवृष्ट्या भूयो भूयो वयं नमस्कुर्मः ॥ १००॥

śārṅodyānanivāsini kārtyāyani ! naḥ kuruṣva kalyāṇam |karuṇāmṛtaparivṛṣṭyā bhūyo bhūyo vayaṃ namaskurmaḥ || 100||

शार्ङ्गद्याननिवासिनि ! मानसवाक्कायकर्मभिर्विहिताम् ।सर्व मयापराधं मातमें त्वं क्षमस्व कारुण्यात् ॥ १०१॥

śārṅgadyānanivāsini ! mānasavākkāyakarmabhirvihitām |sarva mayāparādhaṃ mātameṃ tvaṃ kṣamasva kāruṇyāt || 101||

शार्ङोद्याननिवासिन्यम्बायाः पठति नुतिशतीमेताम् ।भक्त्या यस्तस्य भवेत् कार्त्यायन्या निरङ्कुशा प्रीतिः ॥ १०२॥

śārṅodyānanivāsinyambāyāḥ paṭhati nutiśatīmetām |bhaktyā yastasya bhavet kārtyāyanyā niraṅkuśā prītiḥ || 102||

इति आर्याशतकं सम्पूर्णम् ।

iti āryāśatakaṃ sampūrṇam |