महाविद्याकवचम् २ मन्त्रसिद्धिस्तोत्रं कवचं दुर्गाकवचं च Mahavidya Kavacham 2

सदाशिव ऋषि देवि उष्णिक्छन्दः उदीरितम् ।विनियोगश्च देवेशि सततं मन्त्रसिद्धये ॥ १॥

sadāśiva ṛṣi devi uṣṇikchandaḥ udīritam |viniyogaśca deveśi satataṃ mantrasiddhaye || 1||

मस्तकं पार्वतीपातु पातु पञ्चाननप्रिया ।केशं मुखं पातु चण्डी भारती रुधिरप्रिया ॥ २॥

mastakaṃ pārvatīpātu pātu pañcānanapriyā |keśaṃ mukhaṃ pātu caṇḍī bhāratī rudhirapriyā || 2||

कण्ठं पातु स्तनं पातु कपालं पातु चैव हि ।काली करालवदना विचित्राचित्रघण्टिनी ॥ ३॥

kaṇṭhaṃ pātu stanaṃ pātu kapālaṃ pātu caiva hi |kālī karālavadanā vicitrācitraghaṇṭinī || 3||

वक्षःस्थलं नाभिमूलं दुर्गा त्रिपुरसुन्दरी ।दक्षहस्तं पातु तारा सर्वाङ्गी सव्यमेव च ॥ ४॥

vakṣaḥsthalaṃ nābhimūlaṃ durgā tripurasundarī |dakṣahastaṃ pātu tārā sarvāṅgī savyameva ca || 4||

विश्वेश्वरी पृष्ठदेशं नेत्रं पातु महेश्वरी ।हृत्पद्मं कालिका पातु कण्ठं पातु नभोगतम् ॥ ५॥ वर् उग्रतारा नभोगतम्

viśveśvarī pṛṣṭhadeśaṃ netraṃ pātu maheśvarī |hṛtpadmaṃ kālikā pātu kaṇṭhaṃ pātu nabhogatam || 5|| var ugratārā nabhogatam

नारायणी गुह्यदेशं मेढ्रं मेढ्रेश्वरी तथा ।पादयुग्मं जया पातु सुन्दरी चाङ्गुलीषु च ॥ ६॥

nārāyaṇī guhyadeśaṃ meḍhraṃ meḍhreśvarī tathā |pādayugmaṃ jayā pātu sundarī cāṅgulīṣu ca || 6||

षट्पद्मवासिनी पातु सर्वपद्मं निरन्तरम् ।इडा च प्ङ्गला पातु सुषुम्ना पातु सर्वदा ॥ ७॥

ṣaṭpadmavāsinī pātu sarvapadmaṃ nirantaram |iḍā ca pṅgalā pātu suṣumnā pātu sarvadā || 7||

धनं धनेश्वरी पातु अन्नपूर्णा सदावतु ।राज्यं राज्येश्वरी पातु नित्यं मां चण्डिकाऽवतु ॥ ८॥

dhanaṃ dhaneśvarī pātu annapūrṇā sadāvatu |rājyaṃ rājyeśvarī pātu nityaṃ māṃ caṇḍikā'vatu || 8||

जीवं मां पार्वती सम्पातु मातङ्गी पातु सर्वदा ।छिन्ना धूमा च भीमा च भये पातु जले वने ॥ ९॥

jīvaṃ māṃ pārvatī sampātu mātaṅgī pātu sarvadā |chinnā dhūmā ca bhīmā ca bhaye pātu jale vane || 9||

कौमारी चैव वाराही नारसिंही यशो मम ।पातु नित्यं भद्रकाली श्मशानालयवासिनी ॥ १०॥

kaumārī caiva vārāhī nārasiṃhī yaśo mama |pātu nityaṃ bhadrakālī śmaśānālayavāsinī || 10||

उदरे सर्वदा पातु सर्वाणी सर्वमङ्गला ।जगन्माता जयं पातु नित्यं कैलासवासिनी ॥ ११॥

udare sarvadā pātu sarvāṇī sarvamaṅgalā |jaganmātā jayaṃ pātu nityaṃ kailāsavāsinī || 11||

शिवप्रिया सुतं पातु सुतां पर्वतनन्दिनी ।त्रैलोक्यं पातु बगला भुवनं भुवनेश्वरी ॥ १२॥

śivapriyā sutaṃ pātu sutāṃ parvatanandinī |trailokyaṃ pātu bagalā bhuvanaṃ bhuvaneśvarī || 12||

सर्वाङ्गं पातु विजया पातु नित्यञ्च पार्वती । वर् सर्वाङ्गं सर्व निलयाचामुण्डा पातु मे रोमकूपं सर्वार्थसाधिनी ॥ १३॥

sarvāṅgaṃ pātu vijayā pātu nityañca pārvatī | var sarvāṅgaṃ sarva nilayācāmuṇḍā pātu me romakūpaṃ sarvārthasādhinī || 13||

ब्रह्माण्डं मे महाविद्या पातु नित्यं मनोहरा ।लिङ्गं लिङ्गेश्वरी पातु महापीठे महेश्वरी ॥ १४॥

brahmāṇḍaṃ me mahāvidyā pātu nityaṃ manoharā |liṅgaṃ liṅgeśvarī pātu mahāpīṭhe maheśvarī || 14||

सदाशिवप्रिया पातु नित्यं पातु सुरेश्वरी ।गौरी मे सन्धिदेशञ्च पातु वै त्रिपुरेश्वरी ॥ १५॥

sadāśivapriyā pātu nityaṃ pātu sureśvarī |gaurī me sandhideśañca pātu vai tripureśvarī || 15||

सुरेश्वरी सदा पातु श्मशाने च शवेऽवतु ।कुम्भके रेचके चैव पूरके काममन्दिरे ॥ १६॥

sureśvarī sadā pātu śmaśāne ca śave'vatu |kumbhake recake caiva pūrake kāmamandire || 16||

कामाख्या कामनिलयं पातु दुर्गा महेश्वरी ।डाकिनी काकिनी पातु नित्यं च शाकिनी तथा ॥ १७॥

kāmākhyā kāmanilayaṃ pātu durgā maheśvarī |ḍākinī kākinī pātu nityaṃ ca śākinī tathā || 17||

हाकिनी लाकिनी पातु राकिनी पातु सर्वदा ।ज्वालामुखी सदा पातु मुख्यमध्ये शिवाऽवतु ॥ १८॥

hākinī lākinī pātu rākinī pātu sarvadā |jvālāmukhī sadā pātu mukhyamadhye śivā'vatu || 18||

तारिणी विभवे पातु भवानी च भवेऽवतु ।त्रैलोक्यमोहिनी पातु सर्वाङ्गं विजयाऽवतु ॥ १९॥

tāriṇī vibhave pātu bhavānī ca bhave'vatu |trailokyamohinī pātu sarvāṅgaṃ vijayā'vatu || 19||

राजकुले महाद्युते सङ्ग्रामे शत्रुसङ्कटे ।प्रचण्डा साधकं माञ्च पातु भैरवमोहिनी ॥ २०॥

rājakule mahādyute saṅgrāme śatrusaṅkaṭe |pracaṇḍā sādhakaṃ māñca pātu bhairavamohinī || 20||

श्रीराजमोहिनी पातु राजद्वारे विपत्तिषु ।सम्पद्प्रदा भैरवी च पातु बाल बलं मम ॥ २१॥

śrīrājamohinī pātu rājadvāre vipattiṣu |sampadpradā bhairavī ca pātu bāla balaṃ mama || 21||

नित्यं मां शम्भुवनिता पातु मां त्रिपुरान्तका ।इत्येवं कथितं रहस्यं सर्वकालिकम् ॥ २२॥

nityaṃ māṃ śambhuvanitā pātu māṃ tripurāntakā |ityevaṃ kathitaṃ rahasyaṃ sarvakālikam || 22||

भक्तिदं मुक्तिदं सौख्यं सर्व सम्पत्प्रदायकम् ।यः पठेत् प्रातरुत्थाय साधकेन्द्रो भवेद्भुवि ॥ २३॥

bhaktidaṃ muktidaṃ saukhyaṃ sarva sampatpradāyakam |yaḥ paṭhet prātarutthāya sādhakendro bhavedbhuvi || 23||

कुजवारे चतुर्दश्याममायां मन्दवासरे ।यः पठेत् मानवो भक्त्या स याति शिव मन्दिरम् ॥ २४॥

kujavāre caturdaśyāmamāyāṃ mandavāsare |yaḥ paṭhet mānavo bhaktyā sa yāti śiva mandiram || 24||

गुरौ गुरुं समभ्यर्च्य यः पठेत्साधकोत्तमः ।स याति भवनं देव्याः सत्यं सत्यं न संशयः ॥ २५॥

gurau guruṃ samabhyarcya yaḥ paṭhetsādhakottamaḥ |sa yāti bhavanaṃ devyāḥ satyaṃ satyaṃ na saṃśayaḥ || 25||

एवं यदि वरारोहे पठेद्भक्ति परायणः ।मन्त्रसिद्धिर्भवेत्तस्य चाचिरान्नात्र संशयः ॥ २६॥

evaṃ yadi varārohe paṭhedbhakti parāyaṇaḥ |mantrasiddhirbhavettasya cācirānnātra saṃśayaḥ || 26||

सत्यं लक्षपुरश्चर्याफलं प्राप्य शिवां यजेत् ।राजमार्गं शिवमार्गं प्राप्य जीवः शिवो भवेत् ॥ २७॥

satyaṃ lakṣapuraścaryāphalaṃ prāpya śivāṃ yajet |rājamārgaṃ śivamārgaṃ prāpya jīvaḥ śivo bhavet || 27||

पठित्वा कवचं स्तोत्रं मुक्तिमाप्नोति निश्चितम् ।पठित्वा कवचं स्तोत्रं दशविद्यां यजेद्यदि ।विद्यासिद्धिर्मन्त्रसिद्धिर्भवत्येव न संशयः ॥ २८॥

paṭhitvā kavacaṃ stotraṃ muktimāpnoti niścitam |paṭhitvā kavacaṃ stotraṃ daśavidyāṃ yajedyadi |vidyāsiddhirmantrasiddhirbhavatyeva na saṃśayaḥ || 28||

तदैव ताम्बुलैः सिद्धिर्जायते नात्र संशयः ।अशवसिद्धिश्चितासिद्धिर्दुर्लभा धरणीतले ॥ २९॥

tadaiva tāmbulaiḥ siddhirjāyate nātra saṃśayaḥ |aśavasiddhiścitāsiddhirdurlabhā dharaṇītale || 29||

अयत्नसुभगा सिद्धिस्ताम्बूलान्नात्र संशयः ।निशामुखे निशायाञ्च महाकाले निशान्तके ।पठेद्भक्त्या महेशानि गाणपत्यं लभेत् सः ॥ ३०॥

ayatnasubhagā siddhistāmbūlānnātra saṃśayaḥ |niśāmukhe niśāyāñca mahākāle niśāntake |paṭhedbhaktyā maheśāni gāṇapatyaṃ labhet saḥ || 30||

इति श्रीमुण्डमालातन्त्रे दशमपटले पार्वतीश्वरसंवादे मन्त्रसिद्धिस्तोत्रं कवचं अथवा महाविद्याकवचं सम्पूर्णम् ॥मुण्डमालातन्त्रे दशमः पटलः श्लोकाः ५७८६

iti śrīmuṇḍamālātantre daśamapaṭale pārvatīśvarasaṃvāde mantrasiddhistotraṃ kavacaṃ athavā mahāvidyākavacaṃ sampūrṇam ||muṇḍamālātantre daśamaḥ paṭalaḥ ślokāḥ 5786