मङ्गलचण्डिकास्तोत्रं अथवा मङ्गलागौरीस्तोत्रम् Mangalachandika or Mangalagauri stotram

ॐ ह्रीं श्रीं क्लीं सर्वपूज्ये देवी मङ्गलचण्डिके ।ऐं क्रूं फट् स्वाहेत्येवं चाप्येकविन्शाक्षरो मनुः ॥ १॥

oṃ hrīṃ śrīṃ klīṃ sarvapūjye devī maṅgalacaṇḍike |aiṃ krūṃ phaṭ svāhetyevaṃ cāpyekavinśākṣaro manuḥ || 1||

पूज्यः कल्पतरुश्चैव भक्तानां सर्वकामदः ।दशलक्षजपेनैव मन्त्रसिद्धिर्भवेन्नृणाम् ॥ २॥

pūjyaḥ kalpataruścaiva bhaktānāṃ sarvakāmadaḥ |daśalakṣajapenaiva mantrasiddhirbhavennṛṇām || 2||

मन्त्रसिद्धिर्भवेद् यस्य स विष्णुः सर्वकामदः ।ध्यानञ्च श्रूयतां ब्रह्मन् वेदोक्तं सर्व सम्मतम् ॥ ३॥

mantrasiddhirbhaved yasya sa viṣṇuḥ sarvakāmadaḥ |dhyānañca śrūyatāṃ brahman vedoktaṃ sarva sammatam || 3||

देवीं षोडशवर्षीयां रम्यां सुस्थिरयौवनाम् ।सर्वरूपगुणाढ्याञ्च कोमलाङ्गीं मनोहराम् ॥ ४॥

devīṃ ṣoḍaśavarṣīyāṃ ramyāṃ susthirayauvanām |sarvarūpaguṇāḍhyāñca komalāṅgīṃ manoharām || 4||

श्वेतचम्पकवर्णाभां चन्द्रकोटिसमप्रभाम् ।वह्निशुद्धांशुकाधानां रत्नभूषणभूषिताम् ॥ ५॥

śvetacampakavarṇābhāṃ candrakoṭisamaprabhām |vahniśuddhāṃśukādhānāṃ ratnabhūṣaṇabhūṣitām || 5||

बिभ्रतीं कबरीभारं मल्लिकामाल्यभूषितम् ।बिम्बोष्टीं सुदतीं शुद्धां शरत्पद्मनिभाननाम् ॥ ६॥

bibhratīṃ kabarībhāraṃ mallikāmālyabhūṣitam |bimboṣṭīṃ sudatīṃ śuddhāṃ śaratpadmanibhānanām || 6||

ईषद्धास्यप्रसन्नास्यां सुनीलोल्पललोचनाम् ।जगद्धात्रीञ्च दात्रीञ्च सर्वेभ्यः सर्वसम्पदाम् ॥ ७॥

īṣaddhāsyaprasannāsyāṃ sunīlolpalalocanām |jagaddhātrīñca dātrīñca sarvebhyaḥ sarvasampadām || 7||

संसारसागरे घोरे पीतरुपां वरां भजे ॥ ८॥

saṃsārasāgare ghore pītarupāṃ varāṃ bhaje || 8||

देव्याश्च ध्यानमित्येवं स्तवनं श्रूयतां मुने ।प्रयतः सङ्कटग्रस्तो येन तुष्टाव शङ्करः ॥ ९॥

devyāśca dhyānamityevaṃ stavanaṃ śrūyatāṃ mune |prayataḥ saṅkaṭagrasto yena tuṣṭāva śaṅkaraḥ || 9||

॥ शङ्कर उवाच ॥रक्ष रक्ष जगन्मातर्देवि मङ्गलचण्डिके ।संहर्त्री(संहर्त्रि) विपदां राशेर्हर्षमङ्गलकारिके ॥ १०॥

|| śaṅkara uvāca ||rakṣa rakṣa jaganmātardevi maṅgalacaṇḍike |saṃhartrī(saṃhartri) vipadāṃ rāśerharṣamaṅgalakārike || 10||

हर्षमङ्गलदक्षे च हर्षमङ्गलचण्डिके ।शुभे मङ्गलदक्षे च शुभमङ्गलचण्डिके ॥ ११॥

harṣamaṅgaladakṣe ca harṣamaṅgalacaṇḍike |śubhe maṅgaladakṣe ca śubhamaṅgalacaṇḍike || 11||

मङ्गले मङ्गलार्हे च सर्वमङ्गलमङ्गले ।सतां मङ्गलदे देवि सर्वेषां मङ्गलालये ॥ १२॥

maṅgale maṅgalārhe ca sarvamaṅgalamaṅgale |satāṃ maṅgalade devi sarveṣāṃ maṅgalālaye || 12||

पूज्या मङ्गलवारे च मङ्गलाभीष्टदैवते ।पूज्ये मङ्गलभूपस्य मनुवंशस्य सन्ततम् ॥ १३॥

pūjyā maṅgalavāre ca maṅgalābhīṣṭadaivate |pūjye maṅgalabhūpasya manuvaṃśasya santatam || 13||

मङ्गलाधिष्ठातृदेवि मङ्गलानां च मङ्गले ।संसार मङ्गलाधारे मोक्षमङ्गलदायिनि ॥ १४॥

maṅgalādhiṣṭhātṛdevi maṅgalānāṃ ca maṅgale |saṃsāra maṅgalādhāre mokṣamaṅgaladāyini || 14||

सारे च मङ्गलाधारे पारेत्वं सर्वकर्मणाम् ।प्रतिमङ्गलवारे च पूज्ये त्वं मङ्गलप्रदे ॥ १५॥

sāre ca maṅgalādhāre pāretvaṃ sarvakarmaṇām |pratimaṅgalavāre ca pūjye tvaṃ maṅgalaprade || 15||

स्तोत्रेणानेन शम्भुश्च स्तुत्वा मङ्गलचण्डिकाम् ।प्रतिमङ्गलवारे च पूजां कृत्वागतः शिवः ॥ १६॥

stotreṇānena śambhuśca stutvā maṅgalacaṇḍikām |pratimaṅgalavāre ca pūjāṃ kṛtvāgataḥ śivaḥ || 16||

देव्याश्च मङ्गलस्तोत्रं यः शृणोति समाहितः ।तन्मङ्गलं भवेच्छश्वन्न भवेत् तदमङ्गलम् ॥ १७॥

devyāśca maṅgalastotraṃ yaḥ śṛṇoti samāhitaḥ |tanmaṅgalaṃ bhavecchaśvanna bhavet tadamaṅgalam || 17||

प्रथमे पूजिता देवी शम्भुना सर्वमङ्गला ।द्वितीये पूजिता देवी मङ्गलेन ग्रहेण च ॥ १८॥

prathame pūjitā devī śambhunā sarvamaṅgalā |dvitīye pūjitā devī maṅgalena graheṇa ca || 18||

तृतीये पूजिता भद्रा मङ्गलेन नृपेण च ।चतुर्थे मङ्गले वारे सुन्दरीभिश्च पूजिता ।पञ्चमे मङ्गलाकाङ्क्षैर्नरैर्मङ्गलचण्डिका ॥ १९॥

tṛtīye pūjitā bhadrā maṅgalena nṛpeṇa ca |caturthe maṅgale vāre sundarībhiśca pūjitā |pañcame maṅgalākāṅkṣairnarairmaṅgalacaṇḍikā || 19||

पूजिता प्रतिविश्वेषु विश्वेशैः पूजिता सदा ।ततः सर्वत्र सम्पूज्य सा बभूव सुरेश्वरी ॥ २०॥

pūjitā prativiśveṣu viśveśaiḥ pūjitā sadā |tataḥ sarvatra sampūjya sā babhūva sureśvarī || 20||

देवादिभिश्च मुनिभिर्मनुभिर्मानवैर्मुने ।देव्याश्च मङ्गलस्तोत्रं यः शृणोति समाहितः ॥ २१॥

devādibhiśca munibhirmanubhirmānavairmune |devyāśca maṅgalastotraṃ yaḥ śṛṇoti samāhitaḥ || 21||

तन्मङ्गलं भवेच्छश्वन्न भवेत्तदमङ्गलम् ।वर्द्धन्ते तत्पुत्रपौत्रा मङ्गलं च दिने दिने ॥ २२॥

tanmaṅgalaṃ bhavecchaśvanna bhavettadamaṅgalam |varddhante tatputrapautrā maṅgalaṃ ca dine dine || 22||

॥ इति श्री ब्रह्मवैवर्ते द्वितीये प्रकृतिखण्डेनारद नारायणसंवादे मङ्गलोपाखाने तत्स्तोत्रादिकथनं नामचतुश्चत्वारिंशत्तमोऽध्याये मङ्गलचण्डिका स्तोत्रं सम्पूर्णम् ॥

|| iti śrī brahmavaivarte dvitīye prakṛtikhaṇḍenārada nārāyaṇasaṃvāde maṅgalopākhāne tatstotrādikathanaṃ nāmacatuścatvāriṃśattamo'dhyāye maṅgalacaṇḍikā stotraṃ sampūrṇam ||