महात्रिपुरसुन्दर्यष्टोत्तरशतनामस्तोत्रम् त्रिपुरसुन्दर्यष्टोत्तरशतनामस्तोत्रम् Mahatripurasundari Ashtottarashatanama Stotram

(अथ श्रीकालीविलासतन्त्रे एकादशपटलः ।)श्रीदेव्युवाच ।महात्रिपुरसुन्दर्याः शतनामानि साम्प्रतम् ।कथ्यन्तां मे दया नाथ यद्यप्यस्ति तदा मयि ॥ १॥

(atha śrīkālīvilāsatantre ekādaśapaṭalaḥ |)śrīdevyuvāca |mahātripurasundaryāḥ śatanāmāni sāmpratam |kathyantāṃ me dayā nātha yadyapyasti tadā mayi || 1||

श्रीतामस उवाच ।शृणु चार्वङ्गि वक्ष्यामि सावधानाऽवधारय ।यन्त्रोक्तं सर्वतन्त्रेषु अधुना निगदामि ते ॥ २॥

śrītāmasa uvāca |śṛṇu cārvaṅgi vakṣyāmi sāvadhānā'vadhāraya |yantroktaṃ sarvatantreṣu adhunā nigadāmi te || 2||

अस्य श्रीत्रिपुरसुन्दरीशतनामस्तोत्रस्य परंब्रह्मऋषिर्गायत्रीच्छन्दो महात्रिपुरसुन्दरीदेवता धर्मार्थकाममोक्षेषु विनियोगः ॥ॐ महामाया महादेवी मेनका मेघगर्जिनी ।मोहिनी हरिणाक्षी च हारिणी हरवल्लभा ॥ ३॥

asya śrītripurasundarīśatanāmastotrasya paraṃbrahmaṛṣirgāyatrīcchando mahātripurasundarīdevatā dharmārthakāmamokṣeṣu viniyogaḥ ||oṃ mahāmāyā mahādevī menakā meghagarjinī |mohinī hariṇākṣī ca hāriṇī haravallabhā || 3||

हरिपूज्या हराराध्या हेरा हेमवती हरा ।हेमरूपा च हेमा च हेमाभरणभूषिता ॥ ४॥

haripūjyā harārādhyā herā hemavatī harā |hemarūpā ca hemā ca hemābharaṇabhūṣitā || 4||

रङ्गिणीरङ्गरूपा च राधा वृन्दावनेश्वरी ।वलावलवती बाला बालिका वेशधारिणी ॥ ५॥

raṅgiṇīraṅgarūpā ca rādhā vṛndāvaneśvarī |valāvalavatī bālā bālikā veśadhāriṇī || 5||

वयस्था वेशधा चैव विद्या श्रीविष्णुपूजिता ।वियद्गङ्गा व्योमगङ्गा विशाला विश्वमोहिनी ॥ ६॥

vayasthā veśadhā caiva vidyā śrīviṣṇupūjitā |viyadgaṅgā vyomagaṅgā viśālā viśvamohinī || 6||

रङ्गिणी रङ्गणीया च रणभूमिकतालया ।पूता पवित्रा परमा परा पुण्याविभूषण ॥ ७॥

raṅgiṇī raṅgaṇīyā ca raṇabhūmikatālayā |pūtā pavitrā paramā parā puṇyāvibhūṣaṇa || 7||

पुण्यनाम्नी पापहन्त्री पापारिः पापनाशिनी ।पुण्यदा पुण्यकीर्त्तिश्च पुण्यश्लोका च पावनी ॥ ८॥

puṇyanāmnī pāpahantrī pāpāriḥ pāpanāśinī |puṇyadā puṇyakīrttiśca puṇyaślokā ca pāvanī || 8||

रूपमाला रूपवती रसावेशपरिच्छदा ।रक्षणी रक्षणीया च रुक्ममाला विभूषणा ॥ ९॥

rūpamālā rūpavatī rasāveśaparicchadā |rakṣaṇī rakṣaṇīyā ca rukmamālā vibhūṣaṇā || 9||

रसरूपा रसोल्लासा रसानघपरिच्छदा(१) ।रम्भारामा च रम्या च रमणी रामपूजिता ॥ १०॥

rasarūpā rasollāsā rasānaghaparicchadā(1) |rambhārāmā ca ramyā ca ramaṇī rāmapūjitā || 10||

सौभाग्या सुवशासाध्वी सत्यासत्यस्वरूपिणी ।त्रिगुणात्रिगुणाराध्या त्रिवेदी त्रिगुणेश्वरी ॥ ११॥

saubhāgyā suvaśāsādhvī satyāsatyasvarūpiṇī |triguṇātriguṇārādhyā trivedī triguṇeśvarī || 11||

त्रिमूर्तिस्त्रिदशाराध्या त्रयोत्रिदिवसुन्दरी ।सुखदा सुमुखी सुभ्रुः सुवेशी वेशधारिणी ॥ १२॥

trimūrtistridaśārādhyā trayotridivasundarī |sukhadā sumukhī subhruḥ suveśī veśadhāriṇī || 12||

आनन्दा नन्दिनी नन्दा परमानन्दरूपिणी ।ईश्वरी ईश्वराराध्या रक्तपद्मसमप्रभा ॥ १३॥

ānandā nandinī nandā paramānandarūpiṇī |īśvarī īśvarārādhyā raktapadmasamaprabhā || 13||

राकारम्या रक्तदेहा रमणी ब्रह्ममोहिनी ।योगिनीनां स्वरूपा च ब्रह्माण्डजननी परा ॥ १४॥

rākāramyā raktadehā ramaṇī brahmamohinī |yoginīnāṃ svarūpā ca brahmāṇḍajananī parā || 14||

नामाक्षरात् समुद्धृत्य दशनाम इतीरितम् ।चन्दोऽस्य च प्रवक्ष्यामि शृणु पार्वति सारदे(२) ॥ १५॥

nāmākṣarāt samuddhṛtya daśanāma itīritam |cando'sya ca pravakṣyāmi śṛṇu pārvati sārade(2) || 15||

अस्य श्रीत्रिपुरसुन्दरी शतनामस्तोत्रस्य परंब्रह्मऋषिः श्रीमहात्रिपुरसुन्दरीदेवताधर्मार्थकाममोक्षेषु विनियोगः ॥दशधा मन्त्रमुच्चार्य ततश्छन्दः पठेत्सुधीः ।ततः स्तोत्रं पठित्वा तु सर्वसिद्धीश्वरः कलौ ॥ १६॥

asya śrītripurasundarī śatanāmastotrasya paraṃbrahmaṛṣiḥ śrīmahātripurasundarīdevatādharmārthakāmamokṣeṣu viniyogaḥ ||daśadhā mantramuccārya tataśchandaḥ paṭhetsudhīḥ |tataḥ stotraṃ paṭhitvā tu sarvasiddhīśvaraḥ kalau || 16||

भवत्येव न सन्देहः त्रिसन्ध्यं कमलेक्षणे ।लक्षावर्त्तनमात्रेण अष्टैश्वर्यमयो भवेत् ॥ १७॥

bhavatyeva na sandehaḥ trisandhyaṃ kamalekṣaṇe |lakṣāvarttanamātreṇa aṣṭaiśvaryamayo bhavet || 17||

मद्यञ्च मैथुनं भद्रे परयोनौ परित्यजेत् ।परयोनौ महेशानि रेतः पातञ्च वर्ज्जयेत् ॥ १८॥

madyañca maithunaṃ bhadre parayonau parityajet |parayonau maheśāni retaḥ pātañca varjjayet || 18||

रेतः पातान्मद्यपानात् सिद्धिहानिः पदे पदे ॥ १९॥

retaḥ pātānmadyapānāt siddhihāniḥ pade pade || 19||

इति श्रीकालीविलासतन्त्रे त्रिपुरसुन्दरी शतनामस्तोत्रं समाप्तम् ।ॐ तत्सदित्यादि ।इति श्रीकालीविलासतन्त्रे एकादशपटलः समाप्तः ।१\। रसानघपरिच्छदा इत्यव रसालयपरिच्छदाइति पाठः क्वचित पुस्तके ।२\। सारदे इत्यत्र सादर इति क्वचित् पुस्तके पाठः ।

iti śrīkālīvilāsatantre tripurasundarī śatanāmastotraṃ samāptam |oṃ tatsadityādi |iti śrīkālīvilāsatantre ekādaśapaṭalaḥ samāptaḥ | 1\| rasānaghaparicchadā ityava rasālayaparicchadāiti pāṭhaḥ kvacita pustake | 2\| sārade ityatra sādara iti kvacit pustake pāṭhaḥ |