वरदराजस्तोत्रम् १ Varadarajastotram

(काञ्च्याम्)श्रीमद्वरदराजेन्द्रः श्रीवत्साङ्कः शुभप्रदः ।तुण्डीरमण्डलोल्लासी तापत्रयनिवारकः ॥ १॥

(kāñcyām)śrīmadvaradarājendraḥ śrīvatsāṅkaḥ śubhapradaḥ |tuṇḍīramaṇḍalollāsī tāpatrayanivārakaḥ || 1||

सत्यव्रतक्षेत्रवासी सत्यवज्जनपोषकः ।सर्गस्थित्युपसंहारकारी सुगुणवारिधिः ॥ २॥

satyavratakṣetravāsī satyavajjanapoṣakaḥ |sargasthityupasaṃhārakārī suguṇavāridhiḥ || 2||

हरिर्हस्तगिरीशानो हृतप्रणतदुष्कृतः ।तत्त्वरूपत्वष्टृकृतकाञ्चीपुरवराश्रितः ॥ ३॥

harirhastagirīśāno hṛtapraṇataduṣkṛtaḥ |tattvarūpatvaṣṭṛkṛtakāñcīpuravarāśritaḥ || 3||

ब्रह्मारब्धाश्वमेधाख्यमहामखसुपूजितः ।वेदवेद्यो वेगवतीवेगभीतात्मभूस्तुतः ॥ ४॥

brahmārabdhāśvamedhākhyamahāmakhasupūjitaḥ |vedavedyo vegavatīvegabhītātmabhūstutaḥ || 4||

विश्वसेतुर्वेगवतीसेतुर्विश्वार्तिकोऽनघः ।यथोक्तकारिनामाढ्यो यज्ञभृद्यज्ञरक्षकः ॥ ५॥

viśvaseturvegavatīseturviśvārtiko'naghaḥ |yathoktakārināmāḍhyo yajñabhṛdyajñarakṣakaḥ || 5||

ब्रह्मकुण्डोत्पन्नदिव्यपुण्यकोटिविमानगः ।वाणीपत्यर्पितहयवपासुरभिलाधरः ॥ ६॥

brahmakuṇḍotpannadivyapuṇyakoṭivimānagaḥ |vāṇīpatyarpitahayavapāsurabhilādharaḥ || 6||

वरदाभयहस्ताब्जो वनमालाविराजितः ।शङ्खचक्रलसत्पाणिश्शरणागतरक्षकः ॥ ७॥

varadābhayahastābjo vanamālāvirājitaḥ |śaṅkhacakralasatpāṇiśśaraṇāgatarakṣakaḥ || 7||

इमं स्तवं तु पापघ्नं पुरुषार्थप्रदायकम् ।पठतां शृण्वतां भक्त्या सर्वसिद्धिर्भवेद्ध्रुवम् ॥ ८॥

imaṃ stavaṃ tu pāpaghnaṃ puruṣārthapradāyakam |paṭhatāṃ śṛṇvatāṃ bhaktyā sarvasiddhirbhaveddhruvam || 8||

इति श्रीनारदपुराणान्तर्गतं वरदराजस्तोत्रं सम्पूर्णम् ।

iti śrīnāradapurāṇāntargataṃ varadarājastotraṃ sampūrṇam |