विष्णुस्तोत्रम् वसुकृतम् Vasukritam Vishnu Stotram

वसुरुवाचस्तौमि देवमजं नित्यं परिणामविवर्जितम् ।अवृद्धिक्षयमीशानमच्युतं परतः परम् ॥ ५१॥

vasuruvācastaumi devamajaṃ nityaṃ pariṇāmavivarjitam |avṛddhikṣayamīśānamacyutaṃ parataḥ param || 51||

कल्पनाकृतनामानमनिर्देश्यमजं विभुम् ।मूलहेतुमहेतुं त्वां वासुदेवं नमाम्यहम् ॥ ५२॥

kalpanākṛtanāmānamanirdeśyamajaṃ vibhum |mūlahetumahetuṃ tvāṃ vāsudevaṃ namāmyaham || 52||

परमार्थपरैरीशश्चिन्त्यते यः प्रजाकरैः ।तं वासुदेवमीशेशं नमाम्यद्य गुणं परम् ॥ ५३॥

paramārthaparairīśaścintyate yaḥ prajākaraiḥ |taṃ vāsudevamīśeśaṃ namāmyadya guṇaṃ param || 53||

यस्मादिदं यत्र चेदमिदं यो विश्वमव्ययम् ।तं वासुदेवममलं नमामि परमेश्वरम् ॥ ५४॥

yasmādidaṃ yatra cedamidaṃ yo viśvamavyayam |taṃ vāsudevamamalaṃ namāmi parameśvaram || 54||

ज्ञेयं ज्ञातारमजरं भोक्तारं प्रकृतेः प्रभुम् ।पुरुषस्वरूपिणं देवं नतोऽस्मि पुरुषं परम् ॥ ५५॥

jñeyaṃ jñātāramajaraṃ bhoktāraṃ prakṛteḥ prabhum |puruṣasvarūpiṇaṃ devaṃ nato'smi puruṣaṃ param || 55||

प्रधानादिविशेषान्तस्वरूपमजमव्ययम् ।स्थूलसूक्ष्ममयं सर्वव्यापिनं तं नमाम्यहम् ॥ ५६॥

pradhānādiviśeṣāntasvarūpamajamavyayam |sthūlasūkṣmamayaṃ sarvavyāpinaṃ taṃ namāmyaham || 56||

स्रष्टा पालयिता चान्ते यश्च संहारकारकः ।त्रयीमयं तं त्रिगुणं नतोऽस्मि पुरुषोत्तमम् ॥ ५७॥

sraṣṭā pālayitā cānte yaśca saṃhārakārakaḥ |trayīmayaṃ taṃ triguṇaṃ nato'smi puruṣottamam || 57||

आब्रह्मस्थावरान्ते च यो जगत्यत्र संस्थितः ।व्यक्तरूपी च तं देवं नतोऽहं विष्णुमव्ययम् ॥ ५८॥

ābrahmasthāvarānte ca yo jagatyatra saṃsthitaḥ |vyaktarūpī ca taṃ devaṃ nato'haṃ viṣṇumavyayam || 58||

नमो नमोऽस्तु ते देव जगतामीश्वरेश्वर ।परमार्थ पराचिन्त्य विधातः परमेश्वर ॥ ५९॥

namo namo'stu te deva jagatāmīśvareśvara |paramārtha parācintya vidhātaḥ parameśvara || 59||

त्वमादिरन्तो मध्यं च जगतोऽस्य जगत्पते ।जगत्त्वयि जगच्च त्वं जगत्त्वत्तो जगन्मय ॥ ६०॥

tvamādiranto madhyaṃ ca jagato'sya jagatpate |jagattvayi jagacca tvaṃ jagattvatto jaganmaya || 60||

तवाग्निरासं वसुधाङ्घ्रियुग्मं नभः शिरश्चन्द्ररवी च नेत्रे ।समस्तलोका जठरं भुजाश्च दिशश्चतस्रो भगवन्नमस्ते ॥ ६१॥

tavāgnirāsaṃ vasudhāṅghriyugmaṃ nabhaḥ śiraścandraravī ca netre |samastalokā jaṭharaṃ bhujāśca diśaścatasro bhagavannamaste || 61||

यद्भूगतं यद्गगनान्तराले यद्वा नभस्यखिललोकगं च ।यत्स्थूलं सूक्ष्मं परतस्ततोऽपि यदस्ति यन्नास्ति च तत्त्वमीश ॥ ६२॥

yadbhūgataṃ yadgaganāntarāle yadvā nabhasyakhilalokagaṃ ca |yatsthūlaṃ sūkṣmaṃ paratastato'pi yadasti yannāsti ca tattvamīśa || 62||

वेदाश्च वेद्यं च भगवाननन्तो वेदान्तवेद्यश्च समस्तहेतो ।वदन्ति तत्त्वा मुनयः परेशं त्वयि प्रसन्ने परमार्थदृश्ये ॥ ६३॥

vedāśca vedyaṃ ca bhagavānananto vedāntavedyaśca samastaheto |vadanti tattvā munayaḥ pareśaṃ tvayi prasanne paramārthadṛśye || 63||

नमो हृषीकेश तवाप्रमेय नमश्च तुभ्यं परमार्थसार ।विष्णो नमस्तेऽस्तु परापरेश कृष्णाच्युतानन्त जगन्निवास ॥ ६४॥

namo hṛṣīkeśa tavāprameya namaśca tubhyaṃ paramārthasāra |viṣṇo namaste'stu parāpareśa kṛṣṇācyutānanta jagannivāsa || 64||

नमोऽस्तु तुभ्यं परमेश्वराय नमस्तथान्तःकारणस्थिताय ।प्रधानभूताय नमश्च तुभ्यं व्यक्तस्वरूपेण च संस्थिताय ॥ ६५॥

namo'stu tubhyaṃ parameśvarāya namastathāntaḥkāraṇasthitāya |pradhānabhūtāya namaśca tubhyaṃ vyaktasvarūpeṇa ca saṃsthitāya || 65||

संहृत्य विश्वं जलशायिने नमो नमश्च ते कैटभसूदनाय ।स्वनाभिपद्मोदरशायिने च ब्रह्मस्वरूपोपनताय चैव ॥ ६६॥

saṃhṛtya viśvaṃ jalaśāyine namo namaśca te kaiṭabhasūdanāya |svanābhipadmodaraśāyine ca brahmasvarūpopanatāya caiva || 66||

स्रष्ट्रे नमः पालयित्रे स्थितौ च सर्वेश तुभ्यं पुरुषोत्तमाय ।रुद्राय चान्ते क्षयहेतवे ते नतोऽस्मि संहारकराय विष्णो ॥ ६७॥

sraṣṭre namaḥ pālayitre sthitau ca sarveśa tubhyaṃ puruṣottamāya |rudrāya cānte kṣayahetave te nato'smi saṃhārakarāya viṣṇo || 67||

जय प्रपन्नार्तिहराप्रमेय जयाग्निवस्वश्विमय प्रजेश ।रुद्रेन्द्रचन्द्रस्तुत देवदेव जयामराणामरिशातनाय ॥ ६८॥

jaya prapannārtiharāprameya jayāgnivasvaśvimaya prajeśa |rudrendracandrastuta devadeva jayāmarāṇāmariśātanāya || 68||

जितं त्वया सर्वग सर्वसारं सर्वात्मभूताखिल वेदवेद्य ।जितं जिताक्षामलचित्तदृश्य चराचराधार धराधरेड्य ॥ ६९॥

jitaṃ tvayā sarvaga sarvasāraṃ sarvātmabhūtākhila vedavedya |jitaṃ jitākṣāmalacittadṛśya carācarādhāra dharādhareḍya || 69||

यज्ञाश्रयो यज्ञपुमानशेष देवेश मर्त्यासुरयज्ञभोक्तः ।त्वमीड्यमानोऽभिमतं ददासि धराधरेशाच्युत वासुदेव ॥ ७०॥

yajñāśrayo yajñapumānaśeṣa deveśa martyāsurayajñabhoktaḥ |tvamīḍyamāno'bhimataṃ dadāsi dharādhareśācyuta vāsudeva || 70||

नमस्ते देवदेव त्वं यथा पास्यखिलं जगत् ।स्थितौ तथा समस्तेभ्यो दोषेभ्यो मां समुद्धर ॥ ७१॥

namaste devadeva tvaṃ yathā pāsyakhilaṃ jagat |sthitau tathā samastebhyo doṣebhyo māṃ samuddhara || 71||

कृष्णाच्युत हृषीकेश सर्वभूतेश केशव ।महात्मंस्त्राहि मां भक्तं वासुदेव प्रसीद मे ॥ ७२॥

kṛṣṇācyuta hṛṣīkeśa sarvabhūteśa keśava |mahātmaṃstrāhi māṃ bhaktaṃ vāsudeva prasīda me || 72||

इति विष्णुधर्मेषु द्विसप्ततितमोऽध्यायान्तर्गतं वसुकृतंविष्णुस्तोत्रं सम्पूर्णम् ।

iti viṣṇudharmeṣu dvisaptatitamo'dhyāyāntargataṃ vasukṛtaṃviṣṇustotraṃ sampūrṇam |