विष्णोरष्टोत्तरशतनामस्तोत्रम् Vishnorashtottarashatanamastotram

विष्णुर्जिष्णुर्वषट्कारो देवदेवो वृषाकपिः ।दामोदरो दीनबन्धुरादिदेवोऽदितेः सुतः ॥ १॥

viṣṇurjiṣṇurvaṣaṭkāro devadevo vṛṣākapiḥ |dāmodaro dīnabandhurādidevo'diteḥ sutaḥ || 1||

पुण्डरीकः परानन्दः परमात्मा परात्परः ।परशुधारी विश्वात्मा कृष्णः कलिमलापहः ॥ २॥

puṇḍarīkaḥ parānandaḥ paramātmā parātparaḥ |paraśudhārī viśvātmā kṛṣṇaḥ kalimalāpahaḥ || 2||

कौस्तुभोद्भासितोरस्को नरो नारायणो हरिः ।हरो हरप्रियः स्वामी वैकुण्ठो विश्वतोमुखः ॥ ३॥

kaustubhodbhāsitorasko naro nārāyaṇo hariḥ |haro harapriyaḥ svāmī vaikuṇṭho viśvatomukhaḥ || 3||

हृषीकेशोऽप्रमेयात्मा वराहो धरणीधरः ।वामनो वेदवक्ता च वासुदेवः सनातनः ॥ ४॥

hṛṣīkeśo'prameyātmā varāho dharaṇīdharaḥ |vāmano vedavaktā ca vāsudevaḥ sanātanaḥ || 4||

रामो विरामो विरजो रावणारी रमापतिः ।वैकुण्ठवासी वसुमान् धनदो धरणीधरः ॥ ५॥

rāmo virāmo virajo rāvaṇārī ramāpatiḥ |vaikuṇṭhavāsī vasumān dhanado dharaṇīdharaḥ || 5||

धर्मेशो धरणीनाथो ध्येयो धर्मभृतां वरः ।सहस्रशीर्षा पुरुषः सहस्राक्षः सहस्रपात् ॥ ६॥

dharmeśo dharaṇīnātho dhyeyo dharmabhṛtāṃ varaḥ |sahasraśīrṣā puruṣaḥ sahasrākṣaḥ sahasrapāt || 6||

सर्वगः सर्ववित्सर्वः शरण्यः साधुवल्लभः ।कौसल्यानन्दनः श्रीमान् रक्षःकुलविनाशकः ॥ ७॥

sarvagaḥ sarvavitsarvaḥ śaraṇyaḥ sādhuvallabhaḥ |kausalyānandanaḥ śrīmān rakṣaḥkulavināśakaḥ || 7||

जगत्कर्ता जगद्धर्ता जगज्जेता जनार्तिहा ।जानकीवल्लभो देवो जयरूपो जलेश्वरः ॥ ८॥

jagatkartā jagaddhartā jagajjetā janārtihā |jānakīvallabho devo jayarūpo jaleśvaraḥ || 8||

क्षीराब्धिवासी क्षीराब्धितनयावल्लभस्तथा ।शेषशायी पन्नगारिवाहनो विष्टरश्रवाः ॥ ९॥

kṣīrābdhivāsī kṣīrābdhitanayāvallabhastathā |śeṣaśāyī pannagārivāhano viṣṭaraśravāḥ || 9||

माधवो मधुरानाथो मोहदो मोहनाशनः ।दैत्यारिः पुण्डरीकाक्षो ह्यच्युतो मधुसूदनः ॥ १०॥

mādhavo madhurānātho mohado mohanāśanaḥ |daityāriḥ puṇḍarīkākṣo hyacyuto madhusūdanaḥ || 10||

सोमसूर्याग्निनयनो नृसिंहो भक्तवत्सलः ।नित्यो निरामयः शुद्धो नरदेवो जगत्प्रभुः ॥ ११॥

somasūryāgninayano nṛsiṃho bhaktavatsalaḥ |nityo nirāmayaḥ śuddho naradevo jagatprabhuḥ || 11||

हयग्रीवो जितरिपुरुपेन्द्रो रुक्मिणीपतिः ।सर्वदेवमयः श्रीशः सर्वाधारः सनातनः ॥ १२॥

hayagrīvo jitaripurupendro rukmiṇīpatiḥ |sarvadevamayaḥ śrīśaḥ sarvādhāraḥ sanātanaḥ || 12||

साम्यः सौम्यप्रदः स्रष्टा विष्वक्सेनो जनार्दनः ।यशोदातनयो योगी योगशास्त्रपरायणः ॥ १३॥

sāmyaḥ saumyapradaḥ sraṣṭā viṣvakseno janārdanaḥ |yaśodātanayo yogī yogaśāstraparāyaṇaḥ || 13||

रुद्रात्मको रुद्रमूर्तिः राघवो मधुसूदनः ।इति ते कथितं दिव्यं नाम्नामष्टोत्तरं शतम् ॥ १४॥

rudrātmako rudramūrtiḥ rāghavo madhusūdanaḥ |iti te kathitaṃ divyaṃ nāmnāmaṣṭottaraṃ śatam || 14||

सर्वपापहरं पुण्यं विष्णोरमिततेजसः ।दुःखदारिद्र्यदौर्भाग्यनाशनं सुखवर्धनम् ॥ १५॥

sarvapāpaharaṃ puṇyaṃ viṣṇoramitatejasaḥ |duḥkhadāridryadaurbhāgyanāśanaṃ sukhavardhanam || 15||

सर्वसम्पत्करं सौम्यं महापातकनाशनम् ।प्रातरुत्थाय विप्रेन्द्र पठेदेकाग्रमानसः ।तस्य नश्यन्ति विपदां राशयः सिद्धिमाप्नुयात् ॥ १६॥

sarvasampatkaraṃ saumyaṃ mahāpātakanāśanam |prātarutthāya viprendra paṭhedekāgramānasaḥ |tasya naśyanti vipadāṃ rāśayaḥ siddhimāpnuyāt || 16||

इति शाक्तप्रमोदतः विष्णोः अष्टोत्तरशतनामस्तोत्रं सम्पूर्णम् ।

iti śāktapramodataḥ viṣṇoḥ aṣṭottaraśatanāmastotraṃ sampūrṇam |