विष्णोःमाहात्म्यम् Vishnu Mahatmyam

विष्णोर्हास्यमसौ माया तदाधारा जडाधमाप्रध्वंसोऽस्या अनादेश्च विष्णोः पदविलोचनात् ॥ १॥

viṣṇorhāsyamasau māyā tadādhārā jaḍādhamāpradhvaṃso'syā anādeśca viṣṇoḥ padavilocanāt || 1||

देवानां परमो विष्णुरवमोऽग्निरिति श्रुतेः ।अयं विष्णुरजोऽनादिरनन्तो विश्वकारणः ॥ २॥

devānāṃ paramo viṣṇuravamo'gniriti śruteḥ |ayaṃ viṣṇurajo'nādirananto viśvakāraṇaḥ || 2||

सूरयस्तत्पदं श्रेष्ठं सदा पश्यन्ति नेतरे ।वीर्याणि तस्य कोऽप्यत्र न वेदोरुक्रमस्य च ॥ ३॥

sūrayastatpadaṃ śreṣṭhaṃ sadā paśyanti netare |vīryāṇi tasya ko'pyatra na vedorukramasya ca || 3||

प्रागुत्पाद्य विधिं नाभेर्वेदान्दत्वा ततो जगत् ।उत्पादयत्यसावेव बुद्धिदीपो मुमुक्षुराट् ॥ ४॥

prāgutpādya vidhiṃ nābhervedāndatvā tato jagat |utpādayatyasāveva buddhidīpo mumukṣurāṭ || 4||

भीत्याप्यधिकृता यस्मा उद्वहन्ति बलिं सुराः ।माययाऽश्नन्त्यन्यदत्तं सम्राज्ञ इव भूमिपाः ॥ ५॥

bhītyāpyadhikṛtā yasmā udvahanti baliṃ surāḥ |māyayā'śnantyanyadattaṃ samrājña iva bhūmipāḥ || 5||

यस्य भ्रूभङ्गमात्रेण त्रिलोकी नश्यति क्षणात् ।इच्छामात्रे पुनर्जाते सेश्वरोत्पद्यते च सा ॥ ६॥

yasya bhrūbhaṅgamātreṇa trilokī naśyati kṣaṇāt |icchāmātre punarjāte seśvarotpadyate ca sā || 6||

आत्मभूतस्यास्य शत्रुः स क्रूरो यात्यधोगतिम् ।दुरत्ययामपि घ्नन्ति मायां यद्रूपचिन्तकाः ॥ ७॥

ātmabhūtasyāsya śatruḥ sa krūro yātyadhogatim |duratyayāmapi ghnanti māyāṃ yadrūpacintakāḥ || 7||

अर्वाचीनाः सुराः केऽपि न विदुर्यं तदुद्भवाः ।स सर्वज्ञोऽपि चात्मानं कार्त्स्न्यान्नो वेद वेद वा ॥ ८॥

arvācīnāḥ surāḥ ke'pi na viduryaṃ tadudbhavāḥ |sa sarvajño'pi cātmānaṃ kārtsnyānno veda veda vā || 8||

यस्यैकपादियं माया त्रिपादस्यामृतं दिवि ।स देवदेवदेवेशः कथं नार्च्यस्त्रिविक्रमः ॥ ९॥

yasyaikapādiyaṃ māyā tripādasyāmṛtaṃ divi |sa devadevadeveśaḥ kathaṃ nārcyastrivikramaḥ || 9||

श्रीवैष्णवैशगाणेशसौर्यशाक्त्यादिरूपधृक् ।दत्तात्रेयोऽस्त्वजोऽनन्तः सदा मे हृदि सद्गुरुः ॥ १०॥

śrīvaiṣṇavaiśagāṇeśasauryaśāktyādirūpadhṛk |dattātreyo'stvajo'nantaḥ sadā me hṛdi sadguruḥ || 10||

कृत्वैकदेशभकिन्त ये मात्सर्येण द्विषन्ति च ।अन्यदेवं च तद्भक्तं ते यान्ति नरकं ध्रुवम् ॥ ११॥

kṛtvaikadeśabhakinta ye mātsaryeṇa dviṣanti ca |anyadevaṃ ca tadbhaktaṃ te yānti narakaṃ dhruvam || 11||

विष्णुः शिवो गणेशोऽर्कः शक्तिश्चेति पृथङ् न हि ।एकोऽजः पञ्चधा जातः कुतो भेदोऽस्ति दैवतैः ॥ १२॥

viṣṇuḥ śivo gaṇeśo'rkaḥ śaktiśceti pṛthaṅ na hi |eko'jaḥ pañcadhā jātaḥ kuto bhedo'sti daivataiḥ || 12||

एतानीशाङ्गानि तृप्येदेकस्यापीह तर्पणात् ।यथास्याक्ष्यादितृप्त्याङ्गी चोद्विजेदेकनिन्दया ॥ १३॥

etānīśāṅgāni tṛpyedekasyāpīha tarpaṇāt |yathāsyākṣyāditṛptyāṅgī codvijedekanindayā || 13||

देवद्रोहस्ततस्त्याज्यस्तद्भक्तस्यापि सर्वदा ।यथारुचीश्वरः सेव्यो नान्यथा भेदमाचरेत् ॥ १४॥

devadrohastatastyājyastadbhaktasyāpi sarvadā |yathārucīśvaraḥ sevyo nānyathā bhedamācaret || 14||

इति श्रीवासुदेवानन्दसरस्वतीविरचितं विष्णोः माहात्म्यं सम्पूर्णम् ।

iti śrīvāsudevānandasarasvatīviracitaṃ viṣṇoḥ māhātmyaṃ sampūrṇam |