जगन्मङ्गलकवचस्तोत्रम् Jaganmangalakavachastotram

श्रीगणेशाय नमः ॥श्रीराधारमणाय नमः ॥श्रीसनत्कुमार उवाच ।ब्रूहि मे कवचं ब्रह्मन् जगन्मङ्गलमङ्गलम् ।पूज्यं पुण्यस्वरूपं च कृष्णस्य परमात्मनः ॥ १॥

śrīgaṇeśāya namaḥ ||śrīrādhāramaṇāya namaḥ ||śrīsanatkumāra uvāca |brūhi me kavacaṃ brahman jaganmaṅgalamaṅgalam |pūjyaṃ puṇyasvarūpaṃ ca kṛṣṇasya paramātmanaḥ || 1||

ब्रह्मोवाच ।शृणु वक्ष्यामि विप्रेन्द्र कवचं परमाद्भुतम् ।श्रीकृष्णेनैव कथितं मह्यं च कृपया पुरा ॥ २॥

brahmovāca |śṛṇu vakṣyāmi viprendra kavacaṃ paramādbhutam |śrīkṛṣṇenaiva kathitaṃ mahyaṃ ca kṛpayā purā || 2||

मया दत्तं च धर्माय तेन नारायणर्षये ।ऋषिणा तेन तद्दत्तं सुभद्राय महात्मने ॥ ३॥

mayā dattaṃ ca dharmāya tena nārāyaṇarṣaye |ṛṣiṇā tena taddattaṃ subhadrāya mahātmane || 3||

अतिगुह्यतमं शुद्धं परं स्नेहाद्वदाम्यहम् ।यद्धृत्वा पठनात्सिद्धाः सिद्ध्यादि प्राप्नुवन्ति च ॥ ४॥

atiguhyatamaṃ śuddhaṃ paraṃ snehādvadāmyaham |yaddhṛtvā paṭhanātsiddhāḥ siddhyādi prāpnuvanti ca || 4||

एवमिन्द्रादयः सर्वे सर्वैश्वर्यमवाप्नुयुः ।ऋषिश्छन्दश्च सावित्री देवो नारायणः स्वयम् ॥ ५॥

evamindrādayaḥ sarve sarvaiśvaryamavāpnuyuḥ |ṛṣiśchandaśca sāvitrī devo nārāyaṇaḥ svayam || 5||

धर्मार्थकाममोक्षेषु विनियोगः प्रकीर्तितः ।ओं राधेशो मे शिरः पातु कण्ठं राधेश्वरः स्वयम् ॥ ६॥

dharmārthakāmamokṣeṣu viniyogaḥ prakīrtitaḥ |oṃ rādheśo me śiraḥ pātu kaṇṭhaṃ rādheśvaraḥ svayam || 6||

गोपीशश्चक्षुषी पातु तालुं च भगवान्स्वयम् ।गण्डयुग्मं च गोविन्दः कर्णयुग्मं च केशवः ॥ ७॥

gopīśaścakṣuṣī pātu tāluṃ ca bhagavānsvayam |gaṇḍayugmaṃ ca govindaḥ karṇayugmaṃ ca keśavaḥ || 7||

गलं गदाधरः पातु स्कन्धं कृष्णः स्वयम्प्रभुः ।वक्षःस्थलं वासुदेवश्चोदरं चापि सोऽच्युतः ॥ ८॥

galaṃ gadādharaḥ pātu skandhaṃ kṛṣṇaḥ svayamprabhuḥ |vakṣaḥsthalaṃ vāsudevaścodaraṃ cāpi so'cyutaḥ || 8||

नाभिं पातु पद्मनाभः कङ्कालं कंससूदनः ।पुरुषोत्तमः पातु पृष्ठं नित्यानन्दो नितम्बकम् ॥ ९॥

nābhiṃ pātu padmanābhaḥ kaṅkālaṃ kaṃsasūdanaḥ |puruṣottamaḥ pātu pṛṣṭhaṃ nityānando nitambakam || 9||

पुण्डरीकः पादयुग्मं हस्तयुग्मं हरिः स्वयम् ।नासां च नखरं पातु नरसिंहः स्वयम्प्रभुः ॥ १०॥

puṇḍarīkaḥ pādayugmaṃ hastayugmaṃ hariḥ svayam |nāsāṃ ca nakharaṃ pātu narasiṃhaḥ svayamprabhuḥ || 10||

सर्वेश्वरश्च सर्वाङ्गं सततं मधुसूदनः ।प्राच्यां पातु च रामश्च वह्नौ वंशीधरः स्वयम् ॥ ११॥

sarveśvaraśca sarvāṅgaṃ satataṃ madhusūdanaḥ |prācyāṃ pātu ca rāmaśca vahnau vaṃśīdharaḥ svayam || 11||

पातु दामोदरो दक्षे नैरृत्ये च नरोत्तमः ।पश्चिमे पुण्डरीकाक्षो वायव्यां वामनः स्वयम् ॥ १२॥

pātu dāmodaro dakṣe nairṛtye ca narottamaḥ |paścime puṇḍarīkākṣo vāyavyāṃ vāmanaḥ svayam || 12||

अनन्तश्चोत्तरे पातु ऐशान्यामीश्वरः स्वयम् ।जले स्थले चान्तरिक्षे स्वप्ने जागरणे तथा ॥ १३॥

anantaścottare pātu aiśānyāmīśvaraḥ svayam |jale sthale cāntarikṣe svapne jāgaraṇe tathā || 13||

पातु वृन्दावनेशश्च मां भक्तं शरणागतम् ।इति ते कथितं वत्स कवचं परमाद्भुतम् ॥ १४॥

pātu vṛndāvaneśaśca māṃ bhaktaṃ śaraṇāgatam |iti te kathitaṃ vatsa kavacaṃ paramādbhutam || 14||

सुखदं मोक्षदं सारं सर्वसिद्धिप्रदं सताम् ।इदं कवचमिष्टं च पूजाकाले च यः पठेत् ॥ १५॥

sukhadaṃ mokṣadaṃ sāraṃ sarvasiddhipradaṃ satām |idaṃ kavacamiṣṭaṃ ca pūjākāle ca yaḥ paṭhet || 15||

हरिदास्यमवाप्नोति गोलोके वासमुत्तमम् ।इहैव हरिभक्तिं च जीवन्मुक्तो भवेन्नरः ॥ १६॥

haridāsyamavāpnoti goloke vāsamuttamam |ihaiva haribhaktiṃ ca jīvanmukto bhavennaraḥ || 16||

इति श्रीनारदपञ्चरात्रे ज्ञानामृतसारे प्रथमैकरात्रेब्रह्मनारदसंवादे जगन्मङ्गलकवचं समाप्तम् ।

iti śrīnāradapañcarātre jñānāmṛtasāre prathamaikarātrebrahmanāradasaṃvāde jaganmaṅgalakavacaṃ samāptam |