विष्णुस्तोत्रम् (इन्द्रद्युम्नकृतं कूर्मपुराणान्तर्गतम्) Indradyumnakritam Vishnu Stotram

इन्द्रद्युम्न उवाच ।यज्ञेशाच्युत गोविन्द माधवानन्त केशव ।कृष्ण विष्णो हृषीकेश तुभ्यं विश्वात्मने नमः ॥ १॥

indradyumna uvāca |yajñeśācyuta govinda mādhavānanta keśava |kṛṣṇa viṣṇo hṛṣīkeśa tubhyaṃ viśvātmane namaḥ || 1||

नमोऽस्तु ते पुराणाय हरये विश्वमूर्तये ।सर्गस्थितिविनाशानां हेतवेऽनन्तशक्तये ॥ २॥

namo'stu te purāṇāya haraye viśvamūrtaye |sargasthitivināśānāṃ hetave'nantaśaktaye || 2||

निर्गुणाय नमस्तुभ्यं निष्कलायामलात्मने ।पुरुषाय नमस्तेस्तु विश्वरूपाय ते नमः ॥ ३॥

nirguṇāya namastubhyaṃ niṣkalāyāmalātmane |puruṣāya namastestu viśvarūpāya te namaḥ || 3||

नमस्ते वासुदेवाय विष्णवे विश्वयोनये ।आदिमध्यान्तहीनाय ज्ञानगम्याय ते नमः ॥ ४॥

namaste vāsudevāya viṣṇave viśvayonaye |ādimadhyāntahīnāya jñānagamyāya te namaḥ || 4||

नमस्ते निर्विकाराय निष्प्रपञ्चाय ते नमः ।भेदाभेदविहीनाय नमोऽस्त्वानन्दरूपिणे ॥ ५॥

namaste nirvikārāya niṣprapañcāya te namaḥ |bhedābhedavihīnāya namo'stvānandarūpiṇe || 5||

नमस्ताराय शान्ताय नमोऽप्रतिहतात्मने ।अनन्तमूर्तये तुभ्यममूर्ताय नमो नमः ॥ ६॥

namastārāya śāntāya namo'pratihatātmane |anantamūrtaye tubhyamamūrtāya namo namaḥ || 6||

नमस्ते परमार्थाय मायातीताय ते नमः ।नमस्ते परमेशाय ब्रह्मणे परमात्मने ॥ ७॥

namaste paramārthāya māyātītāya te namaḥ |namaste parameśāya brahmaṇe paramātmane || 7||

नमोऽस्तु ते सुसूक्ष्माय महादेवाय ते नमः ।नमः शिवाय शुद्धाय नमस्ते परमेष्ठिने ॥ ८॥

namo'stu te susūkṣmāya mahādevāya te namaḥ |namaḥ śivāya śuddhāya namaste parameṣṭhine || 8||

त्वयैव सृष्टमखिलं त्वमेव परमा गतिः ।त्वं पिता सर्वभूतानां त्वं माता पुरुषोत्तम ॥ ९॥

tvayaiva sṛṣṭamakhilaṃ tvameva paramā gatiḥ |tvaṃ pitā sarvabhūtānāṃ tvaṃ mātā puruṣottama || 9||

त्वमक्षरं परं धाम चिन्मात्रं व्योम निष्कलम् ।सर्वस्याधारमव्यक्तमनन्तं तमसः परम् ॥ १०॥

tvamakṣaraṃ paraṃ dhāma cinmātraṃ vyoma niṣkalam |sarvasyādhāramavyaktamanantaṃ tamasaḥ param || 10||

प्रपश्यन्ति परात्मानं ज्ञानदीपेन केवलम् ।प्रपद्ये भवतो रूपं तद्विष्णोः परमं पदम् ॥ ११॥

prapaśyanti parātmānaṃ jñānadīpena kevalam |prapadye bhavato rūpaṃ tadviṣṇoḥ paramaṃ padam || 11||

एवं स्तुवन्तं भगवान् भूतात्मा भूतभावनः ।उभाभ्यामथ हस्ताभ्यां पस्पर्श प्रहसन्निव ॥ १२॥

evaṃ stuvantaṃ bhagavān bhūtātmā bhūtabhāvanaḥ |ubhābhyāmatha hastābhyāṃ pasparśa prahasanniva || 12||

स्पृष्टमात्रो भगवता विष्णुना मुनिपुङ्गवः ।यथावत्परमं तत्त्वं ज्ञातवांस्तत्प्रसादतः ॥ १३॥

spṛṣṭamātro bhagavatā viṣṇunā munipuṅgavaḥ |yathāvatparamaṃ tattvaṃ jñātavāṃstatprasādataḥ || 13||

इति कूर्मपुराणे पूर्वभागे प्रथमाध्यायान्तर्गतंइन्द्रद्युम्नकृतं विषणुस्तोत्रं समाप्तम् ।कूर्मपुराणे पूर्वभागे १/६९८१

iti kūrmapurāṇe pūrvabhāge prathamādhyāyāntargataṃindradyumnakṛtaṃ viṣaṇustotraṃ samāptam |kūrmapurāṇe pūrvabhāge 1/6981