चतुर्विंशतिमूर्तिस्तोत्रम् Chaturvimshatimurtistotram

श्रीभगवानुवाचॐरूपः केशवः पद्मशङ्खचक्रगदाधरः ।नारायणः शङ्खपद्मगदाचक्री प्रदक्षिणम् ॥ १॥

śrībhagavānuvācaoṃrūpaḥ keśavaḥ padmaśaṅkhacakragadādharaḥ |nārāyaṇaḥ śaṅkhapadmagadācakrī pradakṣiṇam || 1||

ततो गदी माधवोऽरिशङ्खपद्मी नमामि तम् ।चक्रकौमोदकीपद्मशङ्खी गोविन्द ऊर्जितः ॥ २॥

tato gadī mādhavo'riśaṅkhapadmī namāmi tam |cakrakaumodakīpadmaśaṅkhī govinda ūrjitaḥ || 2||

मोक्षदः श्रीगदी पद्मी शङ्खी विष्णुश्च चक्रधृक् ।शङ्खचक्राब्जगदिनं मधुसूदनमानमे ॥ ३॥

mokṣadaḥ śrīgadī padmī śaṅkhī viṣṇuśca cakradhṛk |śaṅkhacakrābjagadinaṃ madhusūdanamāname || 3||

भक्त्या त्रिविक्रमः पद्मगदी चक्री च शङ्ख्यपि ।शङ्खचक्रगदापद्मी वामनः पातु मां सदा ॥ ४॥

bhaktyā trivikramaḥ padmagadī cakrī ca śaṅkhyapi |śaṅkhacakragadāpadmī vāmanaḥ pātu māṃ sadā || 4||

गदितः श्रीधरः पद्मी चक्रशार्ङ्गी च शङ्ख्यपि ।हृषीकेशो गदा चक्री पद्मी शङ्खी च पातु नः ॥ ५॥

gaditaḥ śrīdharaḥ padmī cakraśārṅgī ca śaṅkhyapi |hṛṣīkeśo gadā cakrī padmī śaṅkhī ca pātu naḥ || 5||

वरदः पद्मनाभस्तु शङ्खाब्जारिगदाधरः ।दामोदरः पद्मशङ्खगदाचक्री नमामि तम् ॥ ६॥

varadaḥ padmanābhastu śaṅkhābjārigadādharaḥ |dāmodaraḥ padmaśaṅkhagadācakrī namāmi tam || 6||

तेने गदी शङ्खचक्री वासुदेवोऽब्जभृज्जगत् ।सङ्कर्षणो गदी शङ्खी पद्मी चक्री च पातु वः ॥ ७॥

tene gadī śaṅkhacakrī vāsudevo'bjabhṛjjagat |saṅkarṣaṇo gadī śaṅkhī padmī cakrī ca pātu vaḥ || 7||

गदी चक्री शङ्खगदी प्रद्युम्नः पद्मभृत्प्रभुः ।अनिरुद्धश्चक्रगदी शङ्खी पद्मी च पातु नः ॥ ८॥

gadī cakrī śaṅkhagadī pradyumnaḥ padmabhṛtprabhuḥ |aniruddhaścakragadī śaṅkhī padmī ca pātu naḥ || 8||

सुरेशोऽर्यब्जशङ्खाढ्यः श्रीगदी पुरुषोत्तमः ।अधोऽक्षजः पद्मगदी शङ्खी चक्री च पातु वः ॥ ९॥

sureśo'ryabjaśaṅkhāḍhyaḥ śrīgadī puruṣottamaḥ |adho'kṣajaḥ padmagadī śaṅkhī cakrī ca pātu vaḥ || 9||

देवो नृसिंहश्चक्राब्जगदी शङ्खी नमामि तम् ।अच्युतः श्रीगदी पद्मी चक्री शङ्खी च पातु वः ॥ १०॥

devo nṛsiṃhaścakrābjagadī śaṅkhī namāmi tam |acyutaḥ śrīgadī padmī cakrī śaṅkhī ca pātu vaḥ || 10||

बालरूपी शङ्खगदी उपेन्द्रश्चक्रपद्म्यपि ।जनार्दनः पद्मचक्री शङ्खधारी गदाधरः ॥ ११॥

bālarūpī śaṅkhagadī upendraścakrapadmyapi |janārdanaḥ padmacakrī śaṅkhadhārī gadādharaḥ || 11||

शङ्खी पद्मी च चक्री च हरिः कौमोदकीधरः ।कृष्णः शङ्खी गदी पद्मी चक्री मे भुक्तिमुक्तिदः ॥ १२॥

śaṅkhī padmī ca cakrī ca hariḥ kaumodakīdharaḥ |kṛṣṇaḥ śaṅkhī gadī padmī cakrī me bhuktimuktidaḥ || 12||

आदिमूर्तिर्वासुदेवस्तस्मात्सङ्कर्षणोऽभवत् ।सङ्कर्षणाच्च प्रद्युम्नः प्रद्युम्नादनिरुद्धकः ॥ १३॥

ādimūrtirvāsudevastasmātsaṅkarṣaṇo'bhavat |saṅkarṣaṇācca pradyumnaḥ pradyumnādaniruddhakaḥ || 13||

केशवादिप्रभेदेन ऐकैकः स्यात्त्रिधा क्रमात् ।द्वादशाक्षरकं स्तोत्रं चतुर्विंशतिमूर्तिमत् ।यः पठेच्छृणुयाद्वापि निर्मलः सर्वमाप्नुयात् ॥ १४॥

keśavādiprabhedena aikaikaḥ syāttridhā kramāt |dvādaśākṣarakaṃ stotraṃ caturviṃśatimūrtimat |yaḥ paṭhecchṛṇuyādvāpi nirmalaḥ sarvamāpnuyāt || 14||

इत्यादिमहापुराणे आग्नेये चतुर्विंशतिमूर्तिस्तोत्रंनाम अष्टाचत्वारिंशोऽध्यायः ॥ ४८॥

ityādimahāpurāṇe āgneye caturviṃśatimūrtistotraṃnāma aṣṭācatvāriṃśo'dhyāyaḥ || 48||