बुद्धभट्टारकस्तोत्रम् Buddhabhattaraka Stotram

ॐ नमो बुद्धाय ।सम्बुद्धं पुण्डरीकाक्षं सर्वज्ञं करुणात्मकम् ।समन्तभद्रं शास्तारं शाक्यसिंहं नमाम्यहम् ॥ १॥

oṃ namo buddhāya |sambuddhaṃ puṇḍarīkākṣaṃ sarvajñaṃ karuṇātmakam |samantabhadraṃ śāstāraṃ śākyasiṃhaṃ namāmyaham || 1||

श्रीघनं श्रीमतिं श्रेष्ठं शीतराशिं शिवङ्करम् ।श्रीमन्तं श्रीकरं शान्तं शान्तमूर्तिं नमाम्यहम् ॥ २॥

śrīghanaṃ śrīmatiṃ śreṣṭhaṃ śītarāśiṃ śivaṅkaram |śrīmantaṃ śrīkaraṃ śāntaṃ śāntamūrtiṃ namāmyaham || 2||

नैरात्म्यवादिनमिन्दुं निरवद्यं निराश्रयम् ।श्रुतिज्ञं निर्मलात्मानं निस्थूलकं नमाम्यहम् ॥ ३॥

nairātmyavādinaminduṃ niravadyaṃ nirāśrayam |śrutijñaṃ nirmalātmānaṃ nisthūlakaṃ namāmyaham || 3||

निरोधकं नित्यज्ञानं निर्विकल्पं तथागतम् ।नियतं निधिनाकेशं निष्प्रपञ्चं नमाम्यहम् ॥ ४॥

nirodhakaṃ nityajñānaṃ nirvikalpaṃ tathāgatam |niyataṃ nidhinākeśaṃ niṣprapañcaṃ namāmyaham || 4||

विश्वेश्वरं विमुक्तिज्ञं विश्वरूपं विनायकम् ।विश्वब्रह्म सुसम्पन्नं वीतरागं नमाम्यहम् ॥ ५॥

viśveśvaraṃ vimuktijñaṃ viśvarūpaṃ vināyakam |viśvabrahma susampannaṃ vītarāgaṃ namāmyaham || 5||

विद्याचरणसम्पन्नं विश्वेशं विमलप्रभम् ।विनिमज्ञं सविष्टम्भं वीतमोहं नमाम्यहम् ॥ ६॥

vidyācaraṇasampannaṃ viśveśaṃ vimalaprabham |vinimajñaṃ saviṣṭambhaṃ vītamohaṃ namāmyaham || 6||

दुर्दान्तदमकं शान्तं शुद्धं शौद्धोदनिं मुनिम् ।सुगतं सुगतिं सौम्यं शुभ्रकीर्तिं नमाम्यहम् ॥ ७॥

durdāntadamakaṃ śāntaṃ śuddhaṃ śauddhodaniṃ munim |sugataṃ sugatiṃ saumyaṃ śubhrakīrtiṃ namāmyaham || 7||

योगेश्वरं दशबलं लोकज्ञं लोकपूजितम् ।लोकाचार्यं लोकमूर्तिं लोकनाथं नमाम्यहम् ॥ ८॥

yogeśvaraṃ daśabalaṃ lokajñaṃ lokapūjitam |lokācāryaṃ lokamūrtiṃ lokanāthaṃ namāmyaham || 8||

कनकमूर्तिं कर्माब्धिमकलङ्कं कलाधरम् ।कान्तमूर्तिं दयापात्रं कनकाभं नमाम्यहम् ॥ ९॥

kanakamūrtiṃ karmābdhimakalaṅkaṃ kalādharam |kāntamūrtiṃ dayāpātraṃ kanakābhaṃ namāmyaham || 9||

महामतिं महावीर्यं महाविज्ञं महाबलम् ।महामहं महाधैर्यं महाबाहुं नमाम्यहम् ॥ १०॥

mahāmatiṃ mahāvīryaṃ mahāvijñaṃ mahābalam |mahāmahaṃ mahādhairyaṃ mahābāhuṃ namāmyaham || 10||

आद्यं पवित्रं तद्ब्रह्ममपराजितमद्भुतम् ।आर्यं परहितं नाथममिताभं नमाम्यहम् ॥ ११॥

ādyaṃ pavitraṃ tadbrahmamaparājitamadbhutam |āryaṃ parahitaṃ nāthamamitābhaṃ namāmyaham || 11||

देवदेवं महादेवं दिव्यं वन्दितमव्ययम् ।प्रमाणभूतं देवेशं दिव्यरूपं नमाम्यहम् ॥ १२॥

devadevaṃ mahādevaṃ divyaṃ vanditamavyayam |pramāṇabhūtaṃ deveśaṃ divyarūpaṃ namāmyaham || 12||

परमार्थं परज्योतिं परमं परमेश्वरम् ।भावाभावकरं श्रेष्ठं भगवन्तं नमाम्यहम् ॥ १३॥

paramārthaṃ parajyotiṃ paramaṃ parameśvaram |bhāvābhāvakaraṃ śreṣṭhaṃ bhagavantaṃ namāmyaham || 13||

चतुर्मारादिविजितं तत्त्वज्ञं शङ्करं शिवम् ।तत्त्वसारं सदाचारं सार्थवाहं नमाम्यहम् ॥ १४॥

caturmārādivijitaṃ tattvajñaṃ śaṅkaraṃ śivam |tattvasāraṃ sadācāraṃ sārthavāhaṃ namāmyaham || 14||

जितेन्द्रियं जितक्लेशं जिनेन्द्रं पुरुषोत्तमम् ।उत्तमं सत्पदं ब्रह्म पुण्यक्षेत्रं नमाम्यहम् ॥ १५॥

jitendriyaṃ jitakleśaṃ jinendraṃ puruṣottamam |uttamaṃ satpadaṃ brahma puṇyakṣetraṃ namāmyaham || 15||

एतैः स्तुत्वा मुनिश्रेष्ठं नरा विगतकल्मषाः ।प्राप्नुवन्ति पदं मोक्षं दिव्यं त्वथ सनातनम् ॥ १६॥

etaiḥ stutvā muniśreṣṭhaṃ narā vigatakalmaṣāḥ |prāpnuvanti padaṃ mokṣaṃ divyaṃ tvatha sanātanam || 16||

यस्त्विदं पठते नित्यं प्रातरूत्थाय पण्डितः ।नाम्नामष्टोत्तरशतं पवित्रं पापनाशनम् ॥ १७॥

yastvidaṃ paṭhate nityaṃ prātarūtthāya paṇḍitaḥ |nāmnāmaṣṭottaraśataṃ pavitraṃ pāpanāśanam || 17||

लभते चेप्सितान् भोगान् सौमनस्येन वर्णितान् ।व्याधयोऽपि न बाध्यन्ते पातकं च विनश्यति ॥ १८॥

labhate cepsitān bhogān saumanasyena varṇitān |vyādhayo'pi na bādhyante pātakaṃ ca vinaśyati || 18||

आयुरारोग्यमैश्वर्यसर्वमोक्षसमन्वितः ।मेधावी च तथा वाग्मी जायते जन्मजन्मनि ॥ १९॥

āyurārogyamaiśvaryasarvamokṣasamanvitaḥ |medhāvī ca tathā vāgmī jāyate janmajanmani || 19||

इति बुद्धभट्टारकस्य ब्रह्माविरचितं स्तोत्रं सम्पूर्णम् ॥

iti buddhabhaṭṭārakasya brahmāviracitaṃ stotraṃ sampūrṇam ||