विष्णुस्तोत्रम् (भीष्मप्रोक्तं महाभारतान्तर्गतम् श‍ृणु चेदं महाराज ब्रह्मभूतस्तवं मम) Bhishmaproktam Vishnu Stotram

भीष्म उवाच ।शृणु चेदं महाराज ब्रह्मभूतस्तवं मम ।ब्रह्मर्षिभिश्च देवैश्च यः पुरा कथितो भुवि ॥ १॥

bhīṣma uvāca |śṛṇu cedaṃ mahārāja brahmabhūtastavaṃ mama |brahmarṣibhiśca devaiśca yaḥ purā kathito bhuvi || 1||

साध्यानामपि देवानां देवदेवेश्वरः प्रभुः ।लोकभावनभावज्ञ इति त्वां नारदोऽब्रवीत् ।भूतं भव्यं भविष्यं च मार्कण्डेयोऽभ्युवाच ह ॥ २॥

sādhyānāmapi devānāṃ devadeveśvaraḥ prabhuḥ |lokabhāvanabhāvajña iti tvāṃ nārado'bravīt |bhūtaṃ bhavyaṃ bhaviṣyaṃ ca mārkaṇḍeyo'bhyuvāca ha || 2||

यज्ञानां चैव यज्ञं त्वां तपश्च तपसामपि ।देवानामपि देवं च त्वामाह भगवान्भृगुः ।पुराणे भैरवं रूपं विष्णो भूतपतेति वै ॥ ३॥

yajñānāṃ caiva yajñaṃ tvāṃ tapaśca tapasāmapi |devānāmapi devaṃ ca tvāmāha bhagavānbhṛguḥ |purāṇe bhairavaṃ rūpaṃ viṣṇo bhūtapateti vai || 3||

वासुदेवो वसूनां त्वं शक्रं स्थापयिता तथा ।देवदेवोऽसि देवानामिति द्वैपायनोऽब्रवीत् ॥ ४॥

vāsudevo vasūnāṃ tvaṃ śakraṃ sthāpayitā tathā |devadevo'si devānāmiti dvaipāyano'bravīt || 4||

पूर्वे प्रजानिसर्गेषु दक्षमाहुः प्रजापतिम् ।स्रष्टारं सर्वभूतानामङ्गिरास्त्वां ततोऽब्रवीत् ॥ ५॥

pūrve prajānisargeṣu dakṣamāhuḥ prajāpatim |sraṣṭāraṃ sarvabhūtānāmaṅgirāstvāṃ tato'bravīt || 5||

अव्यक्तं ते शरीरोत्थं व्यक्तं ते मनसि स्थितम् ।देवा वाक्सम्भवाश्चेति देवलस्त्वसितोऽब्रवीत् ॥ ६॥

avyaktaṃ te śarīrotthaṃ vyaktaṃ te manasi sthitam |devā vāksambhavāśceti devalastvasito'bravīt || 6||

शिरसा ते दिवं व्याप्तं बाहुभ्यां पृथिवी धृता ।जठरं ते त्रयो लोकाः पुरुषोऽसि सनातनः ॥ ७॥

śirasā te divaṃ vyāptaṃ bāhubhyāṃ pṛthivī dhṛtā |jaṭharaṃ te trayo lokāḥ puruṣo'si sanātanaḥ || 7||

एवं त्वामभिजानन्ति तपसा भाविता नराः ।आत्मदर्शनतृप्तानामृषीणां चापि सत्तमः ॥ ८॥

evaṃ tvāmabhijānanti tapasā bhāvitā narāḥ |ātmadarśanatṛptānāmṛṣīṇāṃ cāpi sattamaḥ || 8||

राजर्षीणामुदाराणामाहवेष्वनिवर्तिनाम् ।सर्वधर्मप्रधानानां त्वं गतिर्मधुसूदन ॥ ९॥

rājarṣīṇāmudārāṇāmāhaveṣvanivartinām |sarvadharmapradhānānāṃ tvaṃ gatirmadhusūdana || 9||

एष ते विस्तरस्तात सङ्क्षेपश्च प्रकीर्तितः ।केशवस्य यथातत्त्वं सुप्रीतो भव केशवे ॥ १०॥

eṣa te vistarastāta saṅkṣepaśca prakīrtitaḥ |keśavasya yathātattvaṃ suprīto bhava keśave || 10||

इति महाभारते भीष्मपर्वणि ६४ अध्यायान्तर्गतंभीष्मप्रोक्तं विष्णुस्तोत्रं सम्पूर्णम् ।महाभारत । भीष्मपर्व । अध्याय ६४/२८॥महाभारत । भीष्मपर्व । अध्याय ६४/२-८॥

iti mahābhārate bhīṣmaparvaṇi 64 adhyāyāntargataṃbhīṣmaproktaṃ viṣṇustotraṃ sampūrṇam |mahābhārata | bhīṣmaparva | adhyāya 64/28||mahābhārata | bhīṣmaparva | adhyāya 64/2-8||