महापुरुषरूपवर्णनम् Bhishmaproktam Mahapurusharupavarnanam

किञ्चिच्चन्द्रविशुद्धात्मा किञ्चिच्चन्द्राद्विशेषवान् ।कृशानुवर्णः किञ्चिच्च किञ्चिद्धिष्ण्याकृतिः प्रभुः ॥ २॥

kiñciccandraviśuddhātmā kiñciccandrādviśeṣavān |kṛśānuvarṇaḥ kiñcicca kiñciddhiṣṇyākṛtiḥ prabhuḥ || 2||

शुकपत्रवर्णः किञ्चिच्च किञ्चित्स्फटिकसप्रभः ।नीलाञ्जनचयप्रख्यो जातरूपप्रभः क्वचित् ॥ ३॥

śukapatravarṇaḥ kiñcicca kiñcitsphaṭikasaprabhaḥ |nīlāñjanacayaprakhyo jātarūpaprabhaḥ kvacit || 3||

प्रवालाङ्कुरवर्णश्च श्वेतवर्णः क्वचिद्बभौ ।क्वचित्सुवर्णवर्णाभो वैडूर्यसदृशः क्वचित् ॥ ४॥

pravālāṅkuravarṇaśca śvetavarṇaḥ kvacidbabhau |kvacitsuvarṇavarṇābho vaiḍūryasadṛśaḥ kvacit || 4||

नीलवैडूर्यसदृश इन्द्रनीलनिभः क्वचित् ।मयूरग्रीववर्णाभो मुक्ताहारनिभः क्वचित् ॥ ५॥

nīlavaiḍūryasadṛśa indranīlanibhaḥ kvacit |mayūragrīvavarṇābho muktāhāranibhaḥ kvacit || 5||

एतान्वर्णान्बहुविधान् रूपे बिभ्रत्सनातनः ।सहस्रनयनः श्रीमाञ्शतशीर्षः सहस्रपात् ॥ ६॥

etānvarṇānbahuvidhān rūpe bibhratsanātanaḥ |sahasranayanaḥ śrīmāñśataśīrṣaḥ sahasrapāt || 6||

सहस्रोदरबाहुश्च अव्यक्त इति च क्वचित् ।ओङ्कारमुद्गिरन्वक्त्रात्सावित्रीं च तदन्वयाम् ॥ ७॥

sahasrodarabāhuśca avyakta iti ca kvacit |oṅkāramudgiranvaktrātsāvitrīṃ ca tadanvayām || 7||

शेषेभ्यश्चैव वक्त्रेभ्यश्चतुर्वेदोद्गतं वसु ।आरण्यकं जगौ देवो हरिर्नारायणो वशी ॥ ८॥

śeṣebhyaścaiva vaktrebhyaścaturvedodgataṃ vasu |āraṇyakaṃ jagau devo harirnārāyaṇo vaśī || 8||

वेदीं कमण्डलुं दर्भान्मणिरूपानथोपलान् ।अजिनं दण्डकाष्ठं च ज्वलितं च हुताशनम् ।धारयामास देवेशो हस्तैर्यज्ञपतिस्तदा ॥ ९॥

vedīṃ kamaṇḍaluṃ darbhānmaṇirūpānathopalān |ajinaṃ daṇḍakāṣṭhaṃ ca jvalitaṃ ca hutāśanam |dhārayāmāsa deveśo hastairyajñapatistadā || 9||

इति महाभारते शान्तिपर्वणि ३२६ अध्यायान्तर्गतंभीष्मप्रोक्तं नारदाय दर्शितं महापुरुषरूपवर्णनं सम्पूर्णम् ।महाभारत । शान्तिपर्व । अध्याय ३२६/२९॥महाभारत । शान्तिपर्व । अध्याय ३२६/२-९॥

iti mahābhārate śāntiparvaṇi 326 adhyāyāntargataṃbhīṣmaproktaṃ nāradāya darśitaṃ mahāpuruṣarūpavarṇanaṃ sampūrṇam |mahābhārata | śāntiparva | adhyāya 326/29||mahābhārata | śāntiparva | adhyāya 326/2-9||