वेङ्कटेशविजयस्तोत्रम् Shrivenkateshavijayastotram

दैवतदैवत मङ्गलमङ्गल पावनपावन कारणकारण ।वेङ्कटभूधरमौलिविभूषण माधव भूधव देव जयीभव ॥ १॥

daivatadaivata maṅgalamaṅgala pāvanapāvana kāraṇakāraṇa |veṅkaṭabhūdharamaulivibhūṣaṇa mādhava bhūdhava deva jayībhava || 1||

वारि(दसन्निभ)देह दयाकर शारदनीरजचारुविलोचन ।देवशिरोमणि पादसरोरुह वेङ्कटशैलपते विजयीभव ॥ २॥

vāri(dasannibha)deha dayākara śāradanīrajacāruvilocana |devaśiromaṇi pādasaroruha veṅkaṭaśailapate vijayībhava || 2||

अञ्जनशैलनिवास निरञ्जन रञ्जितसर्वजनाञ्जनमेचक ।मामभिषिञ्च कृपामृतशीतलशीकरवर्षिदृशा जगदीश्वर ॥ ३॥

añjanaśailanivāsa nirañjana rañjitasarvajanāñjanamecaka |māmabhiṣiñca kṛpāmṛtaśītalaśīkaravarṣidṛśā jagadīśvara || 3||

वीतसमाधिक सारगुणाकर केवलसत्त्वतनो पुरुषोत्तम ।भीमभवार्णवतारणकोविद वेङ्कटशैलपते विजयीभव ॥ ४॥

vītasamādhika sāraguṇākara kevalasattvatano puruṣottama |bhīmabhavārṇavatāraṇakovida veṅkaṭaśailapate vijayībhava || 4||

स्वामिसरोवरतीररमाकृतकेलिमहारसलालसमानस ।सारतपोधनचित्तनिकेतन वेङ्कटशैलपते विजयीभव ॥ ५॥

svāmisarovaratīraramākṛtakelimahārasalālasamānasa |sāratapodhanacittaniketana veṅkaṭaśailapate vijayībhava || 5||

आयुधभूषणकोटिनिवेशितशङ्खरथाङ्गजितामतसम्मत ।स्वेतरदुर्घटसङ्घटनक्षम वेङ्कटशैलपते विजयीभव ॥ ६॥

āyudhabhūṣaṇakoṭiniveśitaśaṅkharathāṅgajitāmatasammata |svetaradurghaṭasaṅghaṭanakṣama veṅkaṭaśailapate vijayībhava || 6||

पङ्कजना[नीनिलया]कृतिसौरभवासितशैलवनोपवनान्तर ।मन्द्रमहास्वनमङ्गलनिर्ज्झर वेङ्कटशैलपते विजयीभव ॥ ७॥

paṅkajanā[nīnilayā]kṛtisaurabhavāsitaśailavanopavanāntara |mandramahāsvanamaṅgalanirjjhara veṅkaṭaśailapate vijayībhava || 7||

नन्दकुमारक गोकुलपालक गोपवधूवर कृष्ण [परात्पर] ।श्रीवसुदेव जन्मभयापह वेङ्कटशैलपते विजयीभव ॥ ८॥

nandakumāraka gokulapālaka gopavadhūvara kṛṣṇa [parātpara] |śrīvasudeva janmabhayāpaha veṅkaṭaśailapate vijayībhava || 8||

शैशवपातितपातकिपूतन धेनुककेशिमुखासुरसूदन ।कालियमर्दन कंसनिरासक मोहतमोपह कृष्ण जयीभव ॥ ९॥

śaiśavapātitapātakipūtana dhenukakeśimukhāsurasūdana |kāliyamardana kaṃsanirāsaka mohatamopaha kṛṣṇa jayībhava || 9||

पालितसङ्गर भागवतप्रिय सारथिताहिततोषपृथासुत ।पाण्डवदूत पराकृतभू[भर पाहि] परावरनाथ परायण ॥ १०॥

pālitasaṅgara bhāgavatapriya sārathitāhitatoṣapṛthāsuta |pāṇḍavadūta parākṛtabhū[bhara pāhi] parāvaranātha parāyaṇa || 10||

शातमखासुविभञ्जनपाटव सत्रिशिरःखरदूषणदूषण ।श्रीरघुनायक राम रमासख विश्वजनीन हरे विजयीभव ॥ ११॥

śātamakhāsuvibhañjanapāṭava satriśiraḥkharadūṣaṇadūṣaṇa |śrīraghunāyaka rāma ramāsakha viśvajanīna hare vijayībhava || 11||

राक्षससोदरभीतिनिवारक शारदशीतमयूखमुखाम्बुज ।रावणदारुणवारणदारणकेसरिपुङ्गव देव जयीभव ॥ १२॥

rākṣasasodarabhītinivāraka śāradaśītamayūkhamukhāmbuja |rāvaṇadāruṇavāraṇadāraṇakesaripuṅgava deva jayībhava || 12||

काननवानरवीरवनेचरकुञ्जरसिंहमृगादिषु वत्सल ।[श्रीवर]सूरिनिरस्तभवादर वेङ्कटशैलपते विजयीभव ॥ १३॥

kānanavānaravīravanecarakuñjarasiṃhamṛgādiṣu vatsala |[śrīvara]sūrinirastabhavādara veṅkaṭaśailapate vijayībhava || 13||

वादिसाध्वसकृत्सूरिकथितं स्तवनं महत् ।वृषशैलपतेः श्रेयस्कामो नित्यं पठेत् सुधीः ॥ १४॥

vādisādhvasakṛtsūrikathitaṃ stavanaṃ mahat |vṛṣaśailapateḥ śreyaskāmo nityaṃ paṭhet sudhīḥ || 14||

॥ इति श्रीवेङ्कटेशविजयस्तोत्रम् ॥

|| iti śrīveṅkaṭeśavijayastotram ||