सोमनाथलिङ्गार्चनोपदेशः अत्रिप्रोक्त Somanatha Lingarchana Upadeshah by Atri

(शिवगौरीसंवादे)अत्रिःशृणुष्व मे वचो राजन्पुनराप्याययिष्यसि ।शरणं गच्छ देवेशं तपसा शिवपूजया ॥ १॥

(śivagaurīsaṃvāde)atriḥśṛṇuṣva me vaco rājanpunarāpyāyayiṣyasi |śaraṇaṃ gaccha deveśaṃ tapasā śivapūjayā || 1||

मुनिभिः प्रणतं लिङ्गं सौराष्ट्रे संस्थितं शशिन् ।सोमनाथाभिधं लिङ्गं पयोष्णीतीरसंस्थितम् ॥ २॥

munibhiḥ praṇataṃ liṅgaṃ saurāṣṭre saṃsthitaṃ śaśin |somanāthābhidhaṃ liṅgaṃ payoṣṇītīrasaṃsthitam || 2||

ब्रह्मविष्ण्वादिभिर्देवैः सेवितं सर्वकामदम् ।तस्मिन्लिङ्गे महादेवो निवसत्यम्बिकासखः ॥ ३॥

brahmaviṣṇvādibhirdevaiḥ sevitaṃ sarvakāmadam |tasminliṅge mahādevo nivasatyambikāsakhaḥ || 3||

इत्यत्रिवचसा सोमो ज्ञात्वा गत्वा महेश्वरम् ।स्नात्वा नत्वा महादेवं पयोष्ण्यां धूतकिल्बिषः ॥ ४॥

ityatrivacasā somo jñātvā gatvā maheśvaram |snātvā natvā mahādevaṃ payoṣṇyāṃ dhūtakilbiṣaḥ || 4||

भस्मनोद्धूल्य सर्वाङ्गं तताप परमं तपः ।शिवलिङ्गार्चनरतः पञ्चाक्षरपरायणः ॥ ५॥

bhasmanoddhūlya sarvāṅgaṃ tatāpa paramaṃ tapaḥ |śivaliṅgārcanarataḥ pañcākṣaraparāyaṇaḥ || 5||

भस्मस्थण्डिलसंस्थश्च रुद्रमावर्तयन् सदा ।शुश्रूषन्त्या च रोहिण्या कन्दपुष्पफलादिभिः ॥ ६॥

bhasmasthaṇḍilasaṃsthaśca rudramāvartayan sadā |śuśrūṣantyā ca rohiṇyā kandapuṣpaphalādibhiḥ || 6||

अतिष्ठत्स तदा मौनी दशवर्षाण्यथाम्बिके ।तपस्यतोऽथ सोमस्य शक्तिरासीच्छिवाज्ञया ॥ ७॥

atiṣṭhatsa tadā maunī daśavarṣāṇyathāmbike |tapasyato'tha somasya śaktirāsīcchivājñayā || 7||

सोमनाथमहालिङ्गं बिल्वपत्रैः समर्चयन् ।त्रिकालमप्रमादेन सोमार्धकृतशेखरम् ॥ ८॥

somanāthamahāliṅgaṃ bilvapatraiḥ samarcayan |trikālamapramādena somārdhakṛtaśekharam || 8||

एवं संवसतस्तस्य सोमः सोमाय तोषितः ।सोमनाथाह्वयाल्लिङ्गात् तस्मै प्रादुरभूच्छिवः ॥ ९॥

evaṃ saṃvasatastasya somaḥ somāya toṣitaḥ |somanāthāhvayālliṅgāt tasmai prādurabhūcchivaḥ || 9||

गङ्गाचन्द्रकलामैलिर्महोक्षवरवाहनः ।उमासंश्लिष्टवामाङ्गो गणवृन्दनिषेवितः ॥ १०॥

gaṅgācandrakalāmailirmahokṣavaravāhanaḥ |umāsaṃśliṣṭavāmāṅgo gaṇavṛndaniṣevitaḥ || 10||

ब्रह्मविष्ण्वादिभिर्देवैमंहेन्द्राद्यैः सुरोत्तमैः ।कुमारगणनाथैश्च मया च परिसेवितः ॥ ११॥

brahmaviṣṇvādibhirdevaimaṃhendrādyaiḥ surottamaiḥ |kumāragaṇanāthaiśca mayā ca parisevitaḥ || 11||

गजगरुडाखुमयूरहंसयानैः सुरवर्यैरनुयायिभिः पृष्ठतोऽग्रे ।राजताद्रिनिभप्रभाविभाविताङ्गं वृषभं केसरियानयानुयातः ॥ १२॥

gajagaruḍākhumayūrahaṃsayānaiḥ suravaryairanuyāyibhiḥ pṛṣṭhato'gre |rājatādrinibhaprabhāvibhāvitāṅgaṃ vṛṣabhaṃ kesariyānayānuyātaḥ || 12||

अधिरुह्यामरचामरौघवातैर्व्यजनैः छत्रगणैर्विशोभिताङ्ग ।परशुवरकुरङ्गबालपाणिर्भगवानाविरभूत् तदा महेशः ॥ १३॥

adhiruhyāmaracāmaraughavātairvyajanaiḥ chatragaṇairviśobhitāṅga |paraśuvarakuraṅgabālapāṇirbhagavānāvirabhūt tadā maheśaḥ || 13||

ईश्वरःतथाऽऽगतं महादेवं दृष्ट्वा हृष्टतनूरुहः ।प्रणम्य सोमः साष्टाङ्गमष्टमूर्तिं कृपाकरम् ॥ १४॥

īśvaraḥtathā''gataṃ mahādevaṃ dṛṣṭvā hṛṣṭatanūruhaḥ |praṇamya somaḥ sāṣṭāṅgamaṣṭamūrtiṃ kṛpākaram || 14||

तुष्टाव प्राञ्जलिर्धीरो मां साम्बं परमेश्वरि ॥ १५॥

tuṣṭāva prāñjalirdhīro māṃ sāmbaṃ parameśvari || 15||

राजानमस्ते महादेव विश्वधिकेश नमस्ते महेशान लोकेश शम्भो ।नमस्ते गणाधीश वृन्दारवन्द्य नमस्ते हरिब्रह्ममृग्याङ्घ्रिमौले ॥ १६॥

rājānamaste mahādeva viśvadhikeśa namaste maheśāna lokeśa śambho |namaste gaṇādhīśa vṛndāravandya namaste haribrahmamṛgyāṅghrimaule || 16||

नमस्ते महोक्षैकवाह प्रपन्नं सदाऽपाङ्गसङ्गाद्य दृष्ट्याद्य तुष्ट्या । (सङ्गाच्चयाजाद्य)नमस्ते त्वमीशान विश्वैकवन्द्य क्षयार्तिं विनाश्याशु मां तारयाद्य ॥ १७॥

namaste mahokṣaikavāha prapannaṃ sadā'pāṅgasaṅgādya dṛṣṭyādya tuṣṭyā | (saṅgāccayājādya)namaste tvamīśāna viśvaikavandya kṣayārtiṃ vināśyāśu māṃ tārayādya || 17||

नमस्ते भिषग्वर्य भैषज्यचिन्तां वहस्वाद्य मामद्य यक्ष्माघयुक्तम् ।विमुक्तं कुरुष्वाद्य पापौघजालैर्नमस्तेऽस्तु शम्भो प्रसीद प्रसीद ॥ १८॥

namaste bhiṣagvarya bhaiṣajyacintāṃ vahasvādya māmadya yakṣmāghayuktam |vimuktaṃ kuruṣvādya pāpaughajālairnamaste'stu śambho prasīda prasīda || 18||

ईश्वरःइति सम्प्रार्थितो देवः सोमराज्ञाथ संस्तुतः ।दयार्ददृष्ट्या तं वीक्ष्य समालभ्य च पाणिना ॥ १९॥

īśvaraḥiti samprārthito devaḥ somarājñātha saṃstutaḥ |dayārdadṛṣṭyā taṃ vīkṣya samālabhya ca pāṇinā || 19||

पुनः पुष्टिं तस्य गात्रे अमृतैः पूरयत् तदा ।तमाह विनयोपेतं सोमं साम्बस्तदा मुदा ॥ २०॥

punaḥ puṣṭiṃ tasya gātre amṛtaiḥ pūrayat tadā |tamāha vinayopetaṃ somaṃ sāmbastadā mudā || 20||

॥ इति शिवरहस्यान्तर्गते शिवगौरीसंवादे अत्रिप्रोक्तसोमनाथलिङ्गार्चनोपदेशः ॥॥ श्रीशिवरहस्यम् । भर्गाख्यः पञ्चमांशः । अध्यायः १६। २६४५॥

|| iti śivarahasyāntargate śivagaurīsaṃvāde atriproktasomanāthaliṅgārcanopadeśaḥ |||| śrīśivarahasyam | bhargākhyaḥ pañcamāṃśaḥ | adhyāyaḥ 16| 2645||

– ॥ श्रीशिवरहस्यम् ।भर्गाख्यः पन्चमांशः ।अध्यायः १६। २६-४५॥

– || śrīśivarahasyam |bhargākhyaḥ pancamāṃśaḥ |adhyāyaḥ 16| 26-45||