वीरभद्रोत्पत्तिकथनम् Skandaproktam Virabhadrotpattikathanam

(शिवरहस्यान्तर्गते ईशाख्ये)स्कन्द उवाच ।दक्षापमाननं चापि हृदापश्यन्महेश्वरः ।महामन्युर्मन्युनैव ववृधेऽत्यन्तदुःखतः ॥ २॥

(śivarahasyāntargate īśākhye)skanda uvāca |dakṣāpamānanaṃ cāpi hṛdāpaśyanmaheśvaraḥ |mahāmanyurmanyunaiva vavṛdhe'tyantaduḥkhataḥ || 2||

दक्षमन्युं तदा देवैर्हन्तुं चक्रे मतिंहरः ।जटाजूटात्समुत्पाद्य जटामेकां महेश्वरः ॥ ३॥

dakṣamanyuṃ tadā devairhantuṃ cakre matiṃharaḥ |jaṭājūṭātsamutpādya jaṭāmekāṃ maheśvaraḥ || 3||

भूमौ सन्ताड्यामास स क्रोधान्धीकृतेक्षणः ।तस्मात्तत्र जटापाताद्बभूवातीव मन्युमान् ॥ ४॥

bhūmau santāḍyāmāsa sa krodhāndhīkṛtekṣaṇaḥ |tasmāttatra jaṭāpātādbabhūvātīva manyumān || 4||

वीरभद्रो ज्वलत्क्रोधो दृष्ट्राक्रूरास्ययुक् तदा ।महागिरिप्रतीकाशवर्ष्मणा समदृश्यत ॥ ५॥

vīrabhadro jvalatkrodho dṛṣṭrākrūrāsyayuk tadā |mahāgiripratīkāśavarṣmaṇā samadṛśyata || 5||

वृत्तदंष्ट्राकरालास्यो जिह्वया सृक्विणी लिहन् ।तं श्मश्रुजटिलं वक्त्रं शूलहस्तं स भैरवम् ॥ ६॥

vṛttadaṃṣṭrākarālāsyo jihvayā sṛkviṇī lihan |taṃ śmaśrujaṭilaṃ vaktraṃ śūlahastaṃ sa bhairavam || 6||

करिवृत्तोरुशुण्डाभबाहुदण्डविराजितम् ।मकुटेनार्कवर्णेन भास्वत्कुण्डलमण्डितम् ॥ ७॥

karivṛttoruśuṇḍābhabāhudaṇḍavirājitam |makuṭenārkavarṇena bhāsvatkuṇḍalamaṇḍitam || 7||

हारकेयूरवलयैर्भूषितं किङ्किणीगणैः ।कचाकचितमध्यस्थखड्गखेटधरं तदा ॥ ८॥

hārakeyūravalayairbhūṣitaṃ kiṅkiṇīgaṇaiḥ |kacākacitamadhyasthakhaḍgakheṭadharaṃ tadā || 8||

सदम्बुजच्छटारक्तव्यावृत्तनयनो मुहुः ।त्रिपुण्ड्रविलसद्भालः करालकरवालधृक् ॥ ९॥

sadambujacchaṭāraktavyāvṛttanayano muhuḥ |tripuṇḍravilasadbhālaḥ karālakaravāladhṛk || 9||

सम्प्रणम्य महादेवमुवाच नतकन्धरः ।भैरवो दारुणाकारो मृगेन्द्रसमविक्रमः ॥ १०॥

sampraṇamya mahādevamuvāca natakandharaḥ |bhairavo dāruṇākāro mṛgendrasamavikramaḥ || 10||

अञ्जनाद्रिप्रतीकाशो भाविभासितदिङ्मुखः ।घनगम्भीरनिर्घोषसमारवभरस्तदा ॥ ११॥

añjanādripratīkāśo bhāvibhāsitadiṅmukhaḥ |ghanagambhīranirghoṣasamāravabharastadā || 11||

॥ इति शिवरहस्यान्तर्गते स्कन्दप्रोक्तं वीरभद्रोत्पत्तिकथनं सम्पूर्णम् ॥॥ श्रीशिवरहस्यम् । ईशाख्यः द्वादशमांशः । अध्यायः ६ वीरभद्रविष्णुयुद्धम् । २११ ॥

|| iti śivarahasyāntargate skandaproktaṃ vīrabhadrotpattikathanaṃ sampūrṇam |||| śrīśivarahasyam | īśākhyaḥ dvādaśamāṃśaḥ | adhyāyaḥ 6 vīrabhadraviṣṇuyuddham | 211 ||

– ॥ श्रीशिवरहस्यम् ।ईशाख्यः द्वादशमांशः ।अध्यायः ६ वीरभद्रविष्णुयुद्धम् ।२-११ ॥

– || śrīśivarahasyam |īśākhyaḥ dvādaśamāṃśaḥ |adhyāyaḥ 6 vīrabhadraviṣṇuyuddham | 2-11 ||