सोमनाथमहिमवर्णनं ईश्वरप्रोक्तम् Somanatha Mahima Varnanam by Ishvara

दक्षशापवशात्सोम क्षयेणार्तिं परां गतः ।पुनराप्यायितश्चासि मया त्वं सुरसत्तम ॥ १॥

dakṣaśāpavaśātsoma kṣayeṇārtiṃ parāṃ gataḥ |punarāpyāyitaścāsi mayā tvaṃ surasattama || 1||

देवानामन्नभूतस्त्वममृतांशुः पुरा किल ।तच्छापं मानयस्वाद्य मासार्धं क्षीणमण्डलः ॥ २॥

devānāmannabhūtastvamamṛtāṃśuḥ purā kila |tacchāpaṃ mānayasvādya māsārdhaṃ kṣīṇamaṇḍalaḥ || 2||

देवानामुपभोग्योऽसि देवाश्चाप्याययन्त्यपि ।पुनस्त्वामोषधीशान पक्षार्धं मद्वरात् सुर ॥ ३॥

devānāmupabhogyo'si devāścāpyāyayantyapi |punastvāmoṣadhīśāna pakṣārdhaṃ madvarāt sura || 3||

सम्पूर्णकलया नित्यं वर्धमानो दिने दिने ।भविता चारुरूपेण मम मौलिकृतास्पदः ॥ ४॥

sampūrṇakalayā nityaṃ vardhamāno dine dine |bhavitā cārurūpeṇa mama maulikṛtāspadaḥ || 4||

अष्टमीसामिसोमाङ्को भविताऽहं सदा शशिन् ।चन्द्रचूड इति ख्यातः संस्तुतः सुरसत्तमैः ॥ ५॥

aṣṭamīsāmisomāṅko bhavitā'haṃ sadā śaśin |candracūḍa iti khyātaḥ saṃstutaḥ surasattamaiḥ || 5||

त्वया सम्पूजितं लिङ्गं सोमनाथाह्वयं शुभम् ।ये पश्यन्ति नरा भक्त्या ते सदा गणपा मम ॥ ६॥

tvayā sampūjitaṃ liṅgaṃ somanāthāhvayaṃ śubham |ye paśyanti narā bhaktyā te sadā gaṇapā mama || 6||

सोमनाथं सकृद्दृष्ट्वा मुच्यते भवबन्धनात् ।पयोष्ण्यां ये सकृत्स्नात्वा दृष्ट्वा सोमेश्वरं नराः ॥ ७॥

somanāthaṃ sakṛddṛṣṭvā mucyate bhavabandhanāt |payoṣṇyāṃ ye sakṛtsnātvā dṛṣṭvā someśvaraṃ narāḥ || 7||

सन्तर्प्य च पितॄन् भक्त्या वसन्ति शिवमन्दिरे ।पौष्यां माघ्यामथाष्टम्यां यो बिल्वैः सोमनाथकम् ॥ ८॥

santarpya ca pitṝn bhaktyā vasanti śivamandire |pauṣyāṃ māghyāmathāṣṭamyāṃ yo bilvaiḥ somanāthakam || 8||

समर्चयेत्स मुक्तो हि नात्र कार्या विचारणा ।इति दत्वा वरं तस्मैं तदा शम्भुस्तिरोदधे ॥ ९॥

samarcayetsa mukto hi nātra kāryā vicāraṇā |iti datvā varaṃ tasmaiṃ tadā śambhustirodadhe || 9||

तस्मिन्लिङ्गे तदाविष्टः शिपिविष्टोऽम्बिकासखः ।तस्मात्त्वमपि भक्त्याद्य सोमेशं पूज्य भक्तितः ॥ १०॥

tasminliṅge tadāviṣṭaḥ śipiviṣṭo'mbikāsakhaḥ |tasmāttvamapi bhaktyādya someśaṃ pūjya bhaktitaḥ || 10||

लभस्व चेप्सितानर्थान्कामारिकृपया नृप ॥ ११॥

labhasva cepsitānarthānkāmārikṛpayā nṛpa || 11||

॥ इति शिवरहस्यान्तर्गते शिवगौरीसंवादे ईश्वरप्रोक्तं सोमनाथमहिमवर्णनं सम्पूर्णम् ॥॥ श्रीशिवरहस्यम् । भर्गाख्यः पञ्चमांशः । अध्यायः १६। ४६५६॥

|| iti śivarahasyāntargate śivagaurīsaṃvāde īśvaraproktaṃ somanāthamahimavarṇanaṃ sampūrṇam |||| śrīśivarahasyam | bhargākhyaḥ pañcamāṃśaḥ | adhyāyaḥ 16| 4656||

– ॥ श्रीशिवरहस्यम् ।भर्गाख्यः पन्चमांशः ।अध्यायः १६। ४६-५६॥

– || śrīśivarahasyam |bhargākhyaḥ pancamāṃśaḥ |adhyāyaḥ 16| 46-56||