काशीविश्वेश्वरादिस्तोत्रम् Shrikashivishveshvaradistotram

श्रीगणेशाय नमः ॥नमः श्रीविश्वनाथाय देववन्द्यपदाय ते ।काशीशेशावतारे मे देवदेव ह्युपादिश ॥ १॥

śrīgaṇeśāya namaḥ ||namaḥ śrīviśvanāthāya devavandyapadāya te |kāśīśeśāvatāre me devadeva hyupādiśa || 1||

मायाधीशं महात्मानं सर्वकारणकारणम् ।वन्दे तं माधवं देवं यः काशीं चाधितिष्ठति ॥ २॥

māyādhīśaṃ mahātmānaṃ sarvakāraṇakāraṇam |vande taṃ mādhavaṃ devaṃ yaḥ kāśīṃ cādhitiṣṭhati || 2||

वन्दे तं धर्मगोप्तारं सर्वगुह्यार्थवेदिनम् ।गणदेवं ढुण्ढिराजं तं महान्तं स्वविघ्नहम् ॥ ३॥

vande taṃ dharmagoptāraṃ sarvaguhyārthavedinam |gaṇadevaṃ ḍhuṇḍhirājaṃ taṃ mahāntaṃ svavighnaham || 3||

भारं वोढुं स्वभक्तानां यो योगं प्राप्त उत्तमम् ।तं सढुण्ढिं दण्डपाणिं वन्दे गङ्गातटस्थितम् ॥ ४॥

bhāraṃ voḍhuṃ svabhaktānāṃ yo yogaṃ prāpta uttamam |taṃ saḍhuṇḍhiṃ daṇḍapāṇiṃ vande gaṅgātaṭasthitam || 4||

भैरवं दंष्ट्राकरालं भक्ताभयकरं भजे ।दुष्टदण्डशूलशीर्षधरं वामाध्वचारिणम् ॥ ५॥

bhairavaṃ daṃṣṭrākarālaṃ bhaktābhayakaraṃ bhaje |duṣṭadaṇḍaśūlaśīrṣadharaṃ vāmādhvacāriṇam || 5||

श्रीकाशीं पापशमनीं दमनीं दुष्टचेतसः ।स्वनिःश्रेणिं चाविमुक्तपुरीं मर्त्यहितां भजे ॥ ६॥

śrīkāśīṃ pāpaśamanīṃ damanīṃ duṣṭacetasaḥ |svaniḥśreṇiṃ cāvimuktapurīṃ martyahitāṃ bhaje || 6||

नमामि चतुराराध्यां सदाऽणिम्नि स्थितिं गुहाम् ।श्रीगङ्गे भैरवीं दूरीकुरु कल्याणि यातनाम् ॥ ७॥

namāmi caturārādhyāṃ sadā'ṇimni sthitiṃ guhām |śrīgaṅge bhairavīṃ dūrīkuru kalyāṇi yātanām || 7||

भवानि रक्षान्नपूर्णे सद्वर्णितगुणेऽम्बिके ।देवर्षिवन्द्याम्बुमणिकर्णिकां मोक्षदां भजे ॥ ८॥

bhavāni rakṣānnapūrṇe sadvarṇitaguṇe'mbike |devarṣivandyāmbumaṇikarṇikāṃ mokṣadāṃ bhaje || 8||

इति काशीविश्वेश्वरादिस्तोत्रं सम्पूर्णम् ।

iti kāśīviśveśvarādistotraṃ sampūrṇam |