कण्ठाष्टकम् Shrikanthashtakam

(श्रीगरलपुरे)श्रीगणेशाय नमः ॥यः पादपपिहिततनुः प्रकाशतां परशुरामेण ।नीतः सोऽव्यात्सततं श्रीकण्ठः पादनम्रकल्पतरुः ॥ १॥

(śrīgaralapure)śrīgaṇeśāya namaḥ ||yaḥ pādapapihitatanuḥ prakāśatāṃ paraśurāmeṇa |nītaḥ so'vyātsatataṃ śrīkaṇṭhaḥ pādanamrakalpataruḥ || 1||

यः कालं जितगर्वं कृत्वा क्षणतो मृकण्डुमुनिसूनुम् ।निर्भयमकरोत्सोऽव्याच्छ्रीकण्ठः पादनम्रकल्पतरुः ॥ २॥

yaḥ kālaṃ jitagarvaṃ kṛtvā kṣaṇato mṛkaṇḍumunisūnum |nirbhayamakarotso'vyācchrīkaṇṭhaḥ pādanamrakalpataruḥ || 2||

कुष्ठापस्मारमुखा रोगा यत्पादसेवनात्सहसा ।प्रशमं प्रयान्ति सोऽव्याच्छ्रीकण्ठः पादनम्रकल्पतरुः ॥ ३॥

kuṣṭhāpasmāramukhā rogā yatpādasevanātsahasā |praśamaṃ prayānti so'vyācchrīkaṇṭhaḥ pādanamrakalpataruḥ || 3||

यदविद्यैव जगदिदमखिलं प्रतिभाति सत्यवत्पूर्वम् ।ज्ञानात्सोऽव्यात्सततं श्रीकण्ठः पादनम्रकल्पतरुः ॥ ४॥

yadavidyaiva jagadidamakhilaṃ pratibhāti satyavatpūrvam |jñānātso'vyātsatataṃ śrīkaṇṭhaḥ pādanamrakalpataruḥ || 4||

यमिवृन्दवन्द्यचरणः कमिता धरणीधरेन्द्रतनयायाः ।श्रीशादिवन्दितोऽव्याच्छ्रीकण्ठः पादनम्रकल्पतरुः ॥ ५॥

yamivṛndavandyacaraṇaḥ kamitā dharaṇīdharendratanayāyāḥ |śrīśādivandito'vyācchrīkaṇṭhaḥ pādanamrakalpataruḥ || 5||

यो दक्षिणास्यरूपं धृत्वा विज्ञानदानकृतदीक्षः ।मुग्धेभ्योऽपि स पायाच्छ्रीकण्ठः पादनम्रकल्पतरुः ॥ ६॥

yo dakṣiṇāsyarūpaṃ dhṛtvā vijñānadānakṛtadīkṣaḥ |mugdhebhyo'pi sa pāyācchrīkaṇṭhaḥ pādanamrakalpataruḥ || 6||

अन्धोऽपि यत्करुणया चक्षुष्मान्भवति सत्वरं लोके ।करुणानिधिः स पायाच्छ्रीकण्ठः पादनम्रकल्पतरुः ॥ ७॥

andho'pi yatkaruṇayā cakṣuṣmānbhavati satvaraṃ loke |karuṇānidhiḥ sa pāyācchrīkaṇṭhaḥ pādanamrakalpataruḥ || 7||

कपिलातटादृतगतिः कपिलादिमुनीन्द्रवन्द्यपदपद्मः ।श्रीदः पायात्सततं श्रीकण्ठः पादनम्रकल्पतरुः ॥ ८॥

kapilātaṭādṛtagatiḥ kapilādimunīndravandyapadapadmaḥ |śrīdaḥ pāyātsatataṃ śrīkaṇṭhaḥ pādanamrakalpataruḥ || 8||

श्रीकण्ठाष्टकमेतत्पठति जनो यः कृतादरः सततम् ।श्रीविद्यासदनं स प्रभवेन्नैवात्र सन्देहः ॥ ९॥

śrīkaṇṭhāṣṭakametatpaṭhati jano yaḥ kṛtādaraḥ satatam |śrīvidyāsadanaṃ sa prabhavennaivātra sandehaḥ || 9||

इति शृङ्गेरि श्रीजगद्गुरु श्रीसच्चिदानन्दशिवाभिनवनृसिंहभारतीस्वामिभिः विरचितं श्रीकण्ठाष्टकं सम्पूर्णम् ।

iti śṛṅgeri śrījagadguru śrīsaccidānandaśivābhinavanṛsiṃhabhāratīsvāmibhiḥ viracitaṃ śrīkaṇṭhāṣṭakaṃ sampūrṇam |