मृत्युञ्जयमानसिकपूजास्तोत्रम् Mrityunjaya Manasa Puja Stotram

कैलासे कमनीयरत्नखचिते कल्पद्रुमूले स्थितंकर्पूरस्फटिकेन्दुसुन्दरतनुं कात्यायनीसेवितम् ।गङ्गातुङ्गतरङ्गरञ्जितजटाभारं कृपासागरंकण्ठालंकृतशेषभूषणममुं मृत्युञ्जयं भावये ॥ १॥

kailāse kamanīyaratnakhacite kalpadrumūle sthitaṃkarpūrasphaṭikendusundaratanuṃ kātyāyanīsevitam |gaṅgātuṅgataraṅgarañjitajaṭābhāraṃ kṛpāsāgaraṃkaṇṭhālaṃkṛtaśeṣabhūṣaṇamamuṃ mṛtyuñjayaṃ bhāvaye || 1||

आगत्य मृत्युञ्जय चन्द्रमौलेव्याघ्राजिनालंकृत शूलपाणे ।स्वभक्तसंरक्षणकामधेनोप्रसीद विश्वेश्वर पार्वतीश ॥ २॥

āgatya mṛtyuñjaya candramaulevyāghrājinālaṃkṛta śūlapāṇe |svabhaktasaṃrakṣaṇakāmadhenoprasīda viśveśvara pārvatīśa || 2||

भास्वन्मौक्तिकतोरणे मरकतस्तम्भायुधालंकृतेसौधे धूपसुवासिते मणिमये माणिक्यदीपाञ्चिते ।ब्रह्मेन्द्रामरयोगिपुङ्गवगणैर्युक्ते च कल्पद्रुमैःश्रीमृत्युञ्जय सुस्थिरो भव विभो माणिक्यसिंहासने ॥ ३॥

bhāsvanmauktikatoraṇe marakatastambhāyudhālaṃkṛtesaudhe dhūpasuvāsite maṇimaye māṇikyadīpāñcite |brahmendrāmarayogipuṅgavagaṇairyukte ca kalpadrumaiḥśrīmṛtyuñjaya susthiro bhava vibho māṇikyasiṃhāsane || 3||

मन्दारमल्लीकरवीरमाधवीपुन्नागनीलोत्पलचम्पकान्वितैः ।कर्पूरपाटीरसुवासितैर्जलैराधत्स्व मृत्युञ्जय पाद्यमुत्तमम् ॥ ४॥

mandāramallīkaravīramādhavīpunnāganīlotpalacampakānvitaiḥ |karpūrapāṭīrasuvāsitairjalairādhatsva mṛtyuñjaya pādyamuttamam || 4||

सुगन्धपुष्पप्रकरैः सुवासितैर्वियन्नदीशीतलवारिभिः शुभैः ।त्रिलोकनाथार्तिहरार्घ्यमादराद्गृहाण मृत्युञ्जय सर्ववन्दित ॥ ५॥

sugandhapuṣpaprakaraiḥ suvāsitairviyannadīśītalavāribhiḥ śubhaiḥ |trilokanāthārtiharārghyamādarādgṛhāṇa mṛtyuñjaya sarvavandita || 5||

हिमाम्बुवासितैस्तोयैः शीतलैरतिपावनैः ।मृत्युञ्जय महादेव शुद्धाचमनमाचर ॥ ६॥

himāmbuvāsitaistoyaiḥ śītalairatipāvanaiḥ |mṛtyuñjaya mahādeva śuddhācamanamācara || 6||

गुडदधिसहितं मधुप्रकीर्णंसुघृतसमन्वितधेनुदुग्धयुक्तम् ।शुभकर मधुपर्कमाहर त्वंत्रिनयन मृत्युहर त्रिलोकवन्द्य ॥ ७॥

guḍadadhisahitaṃ madhuprakīrṇaṃsughṛtasamanvitadhenudugdhayuktam |śubhakara madhuparkamāhara tvaṃtrinayana mṛtyuhara trilokavandya || 7||

पञ्चास्र शान्त पञ्चास्य पञ्चपातकसंहर ।पञ्चामृतस्नानमिदं कुरु मृत्युञ्जय प्रभो ॥ ८॥

pañcāsra śānta pañcāsya pañcapātakasaṃhara |pañcāmṛtasnānamidaṃ kuru mṛtyuñjaya prabho || 8||

जगत्त्रयीख्यात समस्ततीर्थसमाहृतैः कल्मषहारिभिश्च ।स्नानं सुतोयैः समुदाचर त्वंमृत्युञ्जयानन्तगुणाभिराम ॥ ९॥

jagattrayīkhyāta samastatīrthasamāhṛtaiḥ kalmaṣahāribhiśca |snānaṃ sutoyaiḥ samudācara tvaṃmṛtyuñjayānantaguṇābhirāma || 9||

आनीतेनातिशुभ्रेण कौशेयेनामरद्रुमात् ।मार्जयामि जटाभारं शिव मृत्युञ्जय प्रभो ॥ १०॥

ānītenātiśubhreṇa kauśeyenāmaradrumāt |mārjayāmi jaṭābhāraṃ śiva mṛtyuñjaya prabho || 10||

नानाहेमविचित्राणि चीरचीनाम्बराणि च ।विविधानि च दिव्यानि मृत्युञ्जय सुधारय ॥ ११॥

nānāhemavicitrāṇi cīracīnāmbarāṇi ca |vividhāni ca divyāni mṛtyuñjaya sudhāraya || 11||

विशुद्धमुक्ताफलजालरम्यंमनोहरं काञ्चनहेमसूत्रम् ।यज्ञोपवीतं परमं पवित्रमाधत्स्व मृत्युञ्जय भक्तिगम्य ॥ १२॥

viśuddhamuktāphalajālaramyaṃmanoharaṃ kāñcanahemasūtram |yajñopavītaṃ paramaṃ pavitramādhatsva mṛtyuñjaya bhaktigamya || 12||

श्रीगन्धं घनसारकुङ्कुमयुतं कस्तूरिकापूरितंकालेयेन हिमाम्बुना विरचितं मन्दारसंवासितम् ।दिव्यं देवमनोहरं मणिमये पात्रे समारोपितंसर्वाङ्गेषु विलेपयामि सततं मृत्युञ्जय श्रीविभो ॥ १३॥

śrīgandhaṃ ghanasārakuṅkumayutaṃ kastūrikāpūritaṃkāleyena himāmbunā viracitaṃ mandārasaṃvāsitam |divyaṃ devamanoharaṃ maṇimaye pātre samāropitaṃsarvāṅgeṣu vilepayāmi satataṃ mṛtyuñjaya śrīvibho || 13||

अक्षतैर्धवलैर्दिव्यैः सम्यक्तिलसमन्वितैः ।मृत्युञ्जय महादेव पूजयामि वृषध्वज ॥ १४॥

akṣatairdhavalairdivyaiḥ samyaktilasamanvitaiḥ |mṛtyuñjaya mahādeva pūjayāmi vṛṣadhvaja || 14||

चम्पकपङ्कजकुरवककुन्दैः करवीरमल्लिकाकुसुमैः ।विस्तारय निजमकुटं मृत्युञ्जय पुण्डरीकनयनाप्त ॥ १५॥

campakapaṅkajakuravakakundaiḥ karavīramallikākusumaiḥ |vistāraya nijamakuṭaṃ mṛtyuñjaya puṇḍarīkanayanāpta || 15||

माणिक्यपादुकाद्वन्द्वे मौनिहृत्पद्ममन्दिरे ।पादौ सत्पद्मसदृशौ मृत्युञ्जय निवेशय ॥ १६॥

māṇikyapādukādvandve maunihṛtpadmamandire |pādau satpadmasadṛśau mṛtyuñjaya niveśaya || 16||

माणिक्यकेयूरकिरीटहारैःकाञ्चीमणिस्थापितकुण्डलैश्च ।मञ्जीरमुख्याभरणैर्मनोज्ञैरङ्गानि मृत्युञ्जय भूषयामि ॥ १७॥

māṇikyakeyūrakirīṭahāraiḥkāñcīmaṇisthāpitakuṇḍalaiśca |mañjīramukhyābharaṇairmanojñairaṅgāni mṛtyuñjaya bhūṣayāmi || 17||

गजवदनस्कन्दधृतेनातिस्वच्छेन चामरयुगेन ।गलदलकाननपद्मंमृत्युञ्जय भावयामि हृत्पद्मे ॥ १८॥

gajavadanaskandadhṛtenātisvacchena cāmarayugena |galadalakānanapadmaṃmṛtyuñjaya bhāvayāmi hṛtpadme || 18||

मुक्तातपत्रं शशिकोटिशुभ्रंशुभप्रदं काञ्चनदण्डयुक्तम् ।माणिक्यसंस्थापितहेमकुम्भंसुरेश मृत्युञ्जय तेऽर्पयामि ॥ १९॥

muktātapatraṃ śaśikoṭiśubhraṃśubhapradaṃ kāñcanadaṇḍayuktam |māṇikyasaṃsthāpitahemakumbhaṃsureśa mṛtyuñjaya te'rpayāmi || 19||

मणिमुकुरे निष्पटले त्रिजगद्गाढान्धकारसप्ताश्वे ।कन्दर्पकोटिसदृशं मृत्युञ्जय पश्य वदनमात्मीयम् ॥ २०॥

maṇimukure niṣpaṭale trijagadgāḍhāndhakārasaptāśve |kandarpakoṭisadṛśaṃ mṛtyuñjaya paśya vadanamātmīyam || 20||

कर्पूरचूर्णं कपिलाज्यपूतंदास्यामि कालेयसमान्वितैश्च ।समुद्भवं पावनगन्धधूपितंमृत्युञ्जयाङ्गं परिकल्पयामि ॥ २१॥

karpūracūrṇaṃ kapilājyapūtaṃdāsyāmi kāleyasamānvitaiśca |samudbhavaṃ pāvanagandhadhūpitaṃmṛtyuñjayāṅgaṃ parikalpayāmi || 21||

वर्तित्रयोपेतमखण्डदीप्त्यातमोहरं बाह्यमथान्तरं च ।साज्यं समस्तामरवर्गहृद्यंसुरेश मृत्युञ्जय वंशदीपम् ॥ २२॥

vartitrayopetamakhaṇḍadīptyātamoharaṃ bāhyamathāntaraṃ ca |sājyaṃ samastāmaravargahṛdyaṃsureśa mṛtyuñjaya vaṃśadīpam || 22||

राजान्नं मधुरान्वितं च मृदुलं माणिक्यपात्रे स्थितंहिङ्गूजीरकसन्मरीचिमिलितैः शाकैरनेकैः शुभैः ।शाकं सम्यगपूपसूपसहितं सद्योघृतेनाप्लुतंश्रीमृत्युञ्जय पार्वतीप्रिय विभो सापोशनं भुज्यताम् ॥ २३॥

rājānnaṃ madhurānvitaṃ ca mṛdulaṃ māṇikyapātre sthitaṃhiṅgūjīrakasanmarīcimilitaiḥ śākairanekaiḥ śubhaiḥ |śākaṃ samyagapūpasūpasahitaṃ sadyoghṛtenāplutaṃśrīmṛtyuñjaya pārvatīpriya vibho sāpośanaṃ bhujyatām || 23||

कूष्माण्डवार्ताकपटोलिकानांफलानि रम्याणि च कारवल्ल्या ।सुपाकयुक्तानि ससौरभाणिश्रीकण्ठ मृत्युञ्जय भक्षयेश ॥ २४॥

kūṣmāṇḍavārtākapaṭolikānāṃphalāni ramyāṇi ca kāravallyā |supākayuktāni sasaurabhāṇiśrīkaṇṭha mṛtyuñjaya bhakṣayeśa || 24||

शीतलं मधुरं स्वच्छं पावनं वासितं लघु ।मध्ये स्वीकुरु पानीयं शिव मृत्युञ्जय प्रभो ॥ २५॥

śītalaṃ madhuraṃ svacchaṃ pāvanaṃ vāsitaṃ laghu |madhye svīkuru pānīyaṃ śiva mṛtyuñjaya prabho || 25||

शर्करामिलितं स्निग्धं दुग्धान्नं गोघृतान्वितम् ।कदलीफलसंमिश्रं भुज्यतां मृत्युसंहर ॥ २६॥

śarkarāmilitaṃ snigdhaṃ dugdhānnaṃ goghṛtānvitam |kadalīphalasaṃmiśraṃ bhujyatāṃ mṛtyusaṃhara || 26||

केवलमतिमाधुर्यं दुग्धैः स्निग्धैश्च शर्करामिलितैः ।एलामरीचमिलितं मृत्युञ्जय देव भुङ्क्ष्व परमान्नम् ॥ २७॥

kevalamatimādhuryaṃ dugdhaiḥ snigdhaiśca śarkarāmilitaiḥ |elāmarīcamilitaṃ mṛtyuñjaya deva bhuṅkṣva paramānnam || 27||

रम्भाचूतकपित्थकण्ठकफलैर्द्राक्षारसास्वादुमत्खर्जूरैर्मधुरेक्षुखण्डशकलैः सन्नारिकेलाम्बुभिः ।कर्पूरेण सुवासितैर्गुडजलैर्माधुर्ययुक्तैर्विभोश्रीमृत्युञ्जय पूरय त्रिभुवनाधारं विशालोदरम् ॥ २८॥

rambhācūtakapitthakaṇṭhakaphalairdrākṣārasāsvādumatkharjūrairmadhurekṣukhaṇḍaśakalaiḥ sannārikelāmbubhiḥ |karpūreṇa suvāsitairguḍajalairmādhuryayuktairvibhośrīmṛtyuñjaya pūraya tribhuvanādhāraṃ viśālodaram || 28||

मनोज्ञरम्भावनखण्डखण्डितान्रुचिप्रदान्सर्षपजीरकांश्च ।ससौरभान्सैन्धवसेवितांश्चगृहाण मृत्युञ्जय लोकवन्द्य ॥ २९॥

manojñarambhāvanakhaṇḍakhaṇḍitānrucipradānsarṣapajīrakāṃśca |sasaurabhānsaindhavasevitāṃścagṛhāṇa mṛtyuñjaya lokavandya || 29||

हिङ्गूजीरकसहितं विमलामलकं कपित्थमतिमधुरम् ।बिसखण्डाँल्लावणयुतान्मृत्युञ्जय तेऽर्पयामि जगदीश ॥ ३०॥

hiṅgūjīrakasahitaṃ vimalāmalakaṃ kapitthamatimadhuram |bisakhaṇḍām̐llāvaṇayutānmṛtyuñjaya te'rpayāmi jagadīśa || 30||

एलाशुण्ठीसहीतं दध्यन्नं चारुहेमपात्रस्थम् ।अमृतप्रतिनिधिमाढ्यं मृत्युञ्जय भुज्यतां त्रिलोकेश ॥ ३१॥

elāśuṇṭhīsahītaṃ dadhyannaṃ cāruhemapātrastham |amṛtapratinidhimāḍhyaṃ mṛtyuñjaya bhujyatāṃ trilokeśa || 31||

जम्बीरनीराञ्चितशृङ्गबेरंमनोहरानम्लशलाटुखण्डान् ।मृदूपदंशान्सहसोपभुङ्क्ष्वमृत्युञय श्रीकरुणासमुद्र ॥ ३२॥

jambīranīrāñcitaśṛṅgaberaṃmanoharānamlaśalāṭukhaṇḍān |mṛdūpadaṃśānsahasopabhuṅkṣvamṛtyuñaya śrīkaruṇāsamudra || 32||

नागररामठयुक्तं सुललितजम्बीरनीरसम्पूर्णम् ।मथितं सैन्धवसहितं पिब हर मृत्युञ्जय क्रतुध्वंसिन् ॥ ३३॥

nāgararāmaṭhayuktaṃ sulalitajambīranīrasampūrṇam |mathitaṃ saindhavasahitaṃ piba hara mṛtyuñjaya kratudhvaṃsin || 33||

मन्दारहेमाम्बुजगन्धयुक्तैर्मन्दाकिनीनिर्मलपुण्यतोयैः ।गृहाण मृत्युञ्जय पूर्णकामश्रीमत्परापोशनमभ्रकेश ॥ ३४॥

mandārahemāmbujagandhayuktairmandākinīnirmalapuṇyatoyaiḥ |gṛhāṇa mṛtyuñjaya pūrṇakāmaśrīmatparāpośanamabhrakeśa || 34||

गगनधुनीविमलजलैर्मृत्युञ्जय पद्मरागपात्रगतैः ।मृगमदचन्दनपूर्णं प्रक्षालय चारु हस्तपदयुग्मम् ॥ ३५॥

gaganadhunīvimalajalairmṛtyuñjaya padmarāgapātragataiḥ |mṛgamadacandanapūrṇaṃ prakṣālaya cāru hastapadayugmam || 35||

पुंनागमल्लिकाकुन्दवासितैर्जाह्नवीजलैः ।मृत्युञ्जय महादेव पुनराचमनं कुरु ॥ ३६॥

puṃnāgamallikākundavāsitairjāhnavījalaiḥ |mṛtyuñjaya mahādeva punarācamanaṃ kuru || 36||

मौक्तिकचूर्णसमेतैर्मृगमदघनसारवासितैः पूगैः ।पर्णैः स्वर्णसमानैर्मृत्युञ्जय तेऽर्पयामि ताम्बूलम् ॥ ३७॥

mauktikacūrṇasametairmṛgamadaghanasāravāsitaiḥ pūgaiḥ |parṇaiḥ svarṇasamānairmṛtyuñjaya te'rpayāmi tāmbūlam || 37||

नीराजनं निर्मलदीप्तिमद्भिर्दीपाङ्कुरैरुज्ज्वलमुच्छ्रितैश्च ।घण्टानिनादेन समर्पयामिमृत्युञ्जयाय त्रिपुरान्तकाय ॥ ३८॥

nīrājanaṃ nirmaladīptimadbhirdīpāṅkurairujjvalamucchritaiśca |ghaṇṭāninādena samarpayāmimṛtyuñjayāya tripurāntakāya || 38||

विरिञ्चिमुख्यामरवृन्दवन्दितेसरोजमत्स्याङ्कितचक्रचिह्निते ।ददामि मृत्युञ्जय पादपङ्कजेफणीन्द्रभूषे पुनरर्घ्यमीश्वर ॥ ३९॥

viriñcimukhyāmaravṛndavanditesarojamatsyāṅkitacakracihnite |dadāmi mṛtyuñjaya pādapaṅkajephaṇīndrabhūṣe punararghyamīśvara || 39||

पुंनागनीलोत्पलकुन्दजाजीमन्दारमल्लीकरवीरपङ्कजैः ।पुष्पाञ्जलिं बिल्वदलैस्तुलस्यामृत्युञ्जयाङ्घ्रौ विनिवेशयामि ॥ ४०॥

puṃnāganīlotpalakundajājīmandāramallīkaravīrapaṅkajaiḥ |puṣpāñjaliṃ bilvadalaistulasyāmṛtyuñjayāṅghrau viniveśayāmi || 40||

पदे पदे सर्वतमोनिकृन्तनंपदे पदे सर्वशुभप्रदायकम् ।प्रदक्षिणं भक्तियुतेन चेतसाकरोमि मृत्युञ्जय रक्ष रक्ष माम् ॥ ४१॥

pade pade sarvatamonikṛntanaṃpade pade sarvaśubhapradāyakam |pradakṣiṇaṃ bhaktiyutena cetasākaromi mṛtyuñjaya rakṣa rakṣa mām || 41||

नमो गौरीशाय स्फटिकधवलाङ्गाय च नमोनमो लोकेशाय स्तुतविबुधलोकाय च नमः ।नमः श्रीकण्ठाय क्षपितपुरदैत्याय च नमोनमः फालाक्षाय स्मरमदविनाशाय च नमः ॥ ४२॥

namo gaurīśāya sphaṭikadhavalāṅgāya ca namonamo lokeśāya stutavibudhalokāya ca namaḥ |namaḥ śrīkaṇṭhāya kṣapitapuradaityāya ca namonamaḥ phālākṣāya smaramadavināśāya ca namaḥ || 42||

संसारे जनितापरोगसहिते तापत्रयाक्रन्दितेनित्यं पुत्रकलत्रवित्तविलसत्पाशैर्निबद्धं दृढम् ।गर्वान्धं बहुपापवर्गसहितं कारुण्यदृष्ट्या विभोश्रीमृत्युञ्जय पार्वतीप्रिय सदा मां पाहि सर्वेश्वर ॥ ४३॥

saṃsāre janitāparogasahite tāpatrayākranditenityaṃ putrakalatravittavilasatpāśairnibaddhaṃ dṛḍham |garvāndhaṃ bahupāpavargasahitaṃ kāruṇyadṛṣṭyā vibhośrīmṛtyuñjaya pārvatīpriya sadā māṃ pāhi sarveśvara || 43||

सौधे रत्नमये नवोत्पलदलाकीर्णे च तल्पान्तरेकौशेयेन मनोहरेण धवलेनाच्छादिते सर्वशः ।कर्पूराञ्चितदीपदीप्तिमिलिते रम्योपधानद्वयेपार्वत्याः करपद्मलालितपदं मृत्युञ्जयं भावये ॥ ४४॥

saudhe ratnamaye navotpaladalākīrṇe ca talpāntarekauśeyena manohareṇa dhavalenācchādite sarvaśaḥ |karpūrāñcitadīpadīptimilite ramyopadhānadvayepārvatyāḥ karapadmalālitapadaṃ mṛtyuñjayaṃ bhāvaye || 44||

चतुश्चत्वारिंशद्विलसदुपचारैरभिमतैर्मनः पद्मे भक्त्या बहिरपि च पूजां शुभकरीम् ।करोति प्रत्यूषे निशि दिवसमध्येऽपि च पुमान्प्रयाति श्रीमृत्युञ्जयपदमनेकाद्भुतपदम् ॥ ४५॥

catuścatvāriṃśadvilasadupacārairabhimatairmanaḥ padme bhaktyā bahirapi ca pūjāṃ śubhakarīm |karoti pratyūṣe niśi divasamadhye'pi ca pumānprayāti śrīmṛtyuñjayapadamanekādbhutapadam || 45||

प्रातर्लिङ्गमुमापतेरहरहः संदर्शनात्स्वर्गदंमध्याह्ने हयमेधतुल्यफलदं सायंतने मोक्षदम् ।भानोरस्तमये प्रदोषसमये पञ्चाक्षराराधनंतत्कालत्रयतुल्यमिष्टफलदं सद्योऽनवद्यं दृढम् ॥ ४६॥

prātarliṅgamumāpateraharahaḥ saṃdarśanātsvargadaṃmadhyāhne hayamedhatulyaphaladaṃ sāyaṃtane mokṣadam |bhānorastamaye pradoṣasamaye pañcākṣarārādhanaṃtatkālatrayatulyamiṣṭaphaladaṃ sadyo'navadyaṃ dṛḍham || 46||

॥ इति श्रीमच्छङ्करभगवतः कृतौमृत्युञ्जयमानसिकपूजास्तोत्रं सम्पूर्णम् ॥

|| iti śrīmacchaṅkarabhagavataḥ kṛtaumṛtyuñjayamānasikapūjāstotraṃ sampūrṇam ||