ईश्वारादिप्रोक्तंशान्त्यध्यायः Ishvaradiproktam Shantyadhyayah

(शिवरहस्यान्तर्गते महादेवाख्ये)

(śivarahasyāntargate mahādevākhye)

शिवपार्वतीसंवादे

śivapārvatīsaṃvāde

ईश्वर उवाच ।

īśvara uvāca |

शान्त्यध्यायान् प्रवक्ष्यामि समाहितमनाः शिवे ।राजचोराग्निपीडासु ग्रहभूतगदादिभिः ॥ ३७\।१॥पीडितानां शिवे शान्त्यै मयैव मनसा कृताः ।तच्छृणुष्व वदाम्यद्य सर्वपापक्षयाय च ॥ ३७\।२॥अतः परमिदं गुह्यं रुद्रोद्गीतं महोदयम् ।महाविघ्नप्रशमनं महाशान्तिकरं शुभम् ॥ ३७\।३॥अकालमृत्युशमनं सर्वव्याधि निवारणम् ।परचक्रप्रमथनं सदा विजयवर्धनम् ॥ ३७\।४॥स्तम्भनं परसैन्यस्य रिपुनाशकरं सदा ।विषग्रहक्षयकरं समस्ताभीष्टदायकम् ॥ ३७\।५॥सर्वशान्त्यधिकाराख्यं धर्मं वक्ष्ये शृणुष्व तम् ।स शान्तिधारकस्त्र्यक्षो नागयज्ञोपवीतवान् ॥ ३७\।६॥

śāntyadhyāyān pravakṣyāmi samāhitamanāḥ śive |rājacorāgnipīḍāsu grahabhūtagadādibhiḥ || 37\|1||pīḍitānāṃ śive śāntyai mayaiva manasā kṛtāḥ |tacchṛṇuṣva vadāmyadya sarvapāpakṣayāya ca || 37\|2||ataḥ paramidaṃ guhyaṃ rudrodgītaṃ mahodayam |mahāvighnapraśamanaṃ mahāśāntikaraṃ śubham || 37\|3||akālamṛtyuśamanaṃ sarvavyādhi nivāraṇam |paracakrapramathanaṃ sadā vijayavardhanam || 37\|4||stambhanaṃ parasainyasya ripunāśakaraṃ sadā |viṣagrahakṣayakaraṃ samastābhīṣṭadāyakam || 37\|5||sarvaśāntyadhikārākhyaṃ dharmaṃ vakṣye śṛṇuṣva tam |sa śāntidhārakastryakṣo nāgayajñopavītavān || 37\|6||

चतुर्मुखश्चतुर्बाहुः सितभस्मावगुण्ठितः ।वरो वरेण्यो वरदो वामदेवो महेश्वरः ॥ ३७\।७॥त्रैलोक्यनमितः श्रीमान् शान्तिमाशु करोतु मे ।सर्वावयवमुख्येन गात्रेण तनुमध्यमा ॥ ३७\।८॥पीतश्यामातिसौम्येन शिवरूपेण शोभिता ।ललाटतिलकोपेता चन्द्ररेखार्धधारिणी ॥ ३७\।९॥दिव्याम्बरधरादेवी सर्वाभरणभूषिता ।वरस्त्री सर्वनारीणां शोभागुणमहास्पदा ॥ ३७\।१०॥भावनामात्रसन्तुष्टा उमा देवी वरप्रदा ।साक्षादागत्य रूपेण शान्तानामिव तेजसा ॥ ३७\।११॥शान्तिं करोतु मे प्रीता भक्तानां भक्तवत्सला ।पद्मरागद्युतिः सौम्यो रक्तमाल्यानुलेपनः ॥ ३७\।१२॥अबालो बालरूपेण षण्मुखः शिखिवाहनः ।पूर्णेन्दुवदनः सौम्यस्त्रिशिखाशक्तिसंयुतः ॥ ३७\।१३॥कृत्तिकोमाग्निरुद्राङ्गगङ्गोद्भूतः सुरार्चितः ।कार्तिकेयो महातेजा वरदानैकतत्परः ॥ ३७\।१४॥शान्तिं करोतु मे प्रीतो बलं सौख्यं च सर्वदा ।महोदरो महाकायः स्निग्धाञ्जनसमप्रभः ॥ ३७\।१५॥एकदंष्ट्रोत्कटो देवो गजवक्त्रो महाबलः ।नागयज्ञोपवीती च नागाभरणभूषितः ॥ ३७\।१६॥सर्वार्थसम्पदाघारो गणाध्यक्षो वरप्रदः ।रुद्रस्य तनयो देवो नायकोऽथ विनायकः ॥ ३७\।१७॥करोतु मे महाशान्तिं कर्मसिद्धिं च सर्वदा ।इन्द्रनीलनिभाक्षोऽग्निपशुशूलायुधोद्यतः ॥ ३७\।१८॥रक्ताम्बरधरः श्रीमान् कृष्णाङ्गो नागभूषणः ।पापापनोदनः शुद्धस्त्वलक्ष्मीमलनाशनः ॥ ३७\।१९॥करोतु मे महाशान्तिं महाकालो महाबलः ।पूतवस्त्रपरीधाना कन्या पुष्पैःस्वलङ्कृता ॥ ३७\।२०॥गणनाथाम्बिका त्र्यक्षा पुण्या गौरी सुरेश्वरी ।सर्वसिद्धिप्रदा देवी प्रसादपरमा परा ॥ ३७\।२१॥शान्तिं करोतु मे शान्ता सिद्धिमाशु प्रयच्छतुस्निग्धा श्यामलवर्णेन महिषासुरमर्दिनी ॥ ३७\।२२॥धनुश्चक्रप्रहरणा शङ्खयष्ट्यसिधारिणी ।अतर्जनोद्यतकरा सर्वोपद्रवनाशिनी ॥ ३७\।२३॥सर्वमङ्गलमाता मे शिवमाशु प्रयच्छतु ।निर्मांसेन शरीरेण सुस्नाय्वस्थिनिबन्धनः ॥ ३७\।२४॥अतिसूक्ष्मोऽतिविक्रान्तस्त्र्यक्षो भृङ्गिरिटिर्महान् ।रुद्रात्मजो रुद्रवीरो रुद्रैकगतमानसः ॥ ३७\।२५॥सोऽपि शान्तात्मभावेन शान्तिमाशु करोतु मे ।प्रचण्डगणसैन्येशो महाकालास्त्रधारकः ॥ ३७\।२६॥अक्षमालार्पितकरस्त्र्यक्षश्चण्डेश्वरः प्रभुः ।प्रचण्डपापहरणो बृहस्पत्यादिशोधकः ॥ ३७\।२७॥करोतु मे महायोगी कल्याणं परमं शुभम् ।पद्मासनः पद्मनिभश्चतुर्वदनपङ्कजः ॥ ३७\।२८॥कमण्डलुधरः श्रीमान् देवगन्धर्वपूजितः ।शिवध्यानैकनिरतः शिवसद्भावभावितः ॥ ३७\।२९॥ब्रह्मशब्देन दिव्येन ब्रह्माशन्तिं करोतु मे ।शङ्खकुन्देन्दुवर्णाभिः कण्ठे मरकतप्रभः ॥ ३७\।३०॥अक्षमालाशिरा उग्रशिवज्ञानव्यवस्थितः ।चतुर्मुखश्चतुष्पादस्त्रिणेत्रः सर्वदोज्जवलः ॥ ३७\।३१॥क्षितेः पतिर्वृषो देवो धर्मो धर्मोत्तमोत्तमः ।ईशं वहति पृष्ठेन तस्माद्धर्मो जगत्प्रभुः ॥ ३७\।३२॥वृषो वृषपतिश्रीमान् देवगन्धर्वपूजितः ।शिवज्ञानैकसम्पन्नः शिवसद्भावभावितः ॥ ३७\।३३॥वृषशब्देन दिव्येन वृषः शान्तिं करोतु मे ।तार्क्ष्यासनश्चतुर्बाहुः शङ्खचक्रगदाधरः ॥ ३७\।३४॥श्यामः पीताम्बरधरो वनमालाविभूषितः ।यज्ञो देवोत्तमो देवो माधवो मधुसूदनः ॥ ३७\।३५॥शिवप्रसाद सम्पन्नः शिवध्यानपरायणः ।शिवार्चनरतो नित्यं विष्णुः शान्तिं करोतु मे ॥ ३७\।३६॥पद्मरागप्रभो देवी चतुर्वदन पङ्कजा ।अक्षमालार्पितकराकमण्डलुधरा शिवा ॥ ३७\।३७॥ब्रह्माणी सौम्यवदना शिवपूजापरायणा ।शान्तिं करोतु मे प्रीता ब्रह्मशब्देन निर्मला ॥ ३७\।२८॥मयूरवाहना देवी सिन्दूरारुणविग्रहा ।शक्तिहस्ता महारूपा सर्वाभरणभूषिता ॥ ३७\।२९॥रुद्रभक्ता महापुण्या रुद्रार्चनरता सदा ।कौमारी वरदा देवी क्षेमारोग्यं ददातु मे ॥ ३७\।३०॥शङ्खचक्रगदाहस्ता श्यामा पीताम्बरप्रिया ।चतुर्भुजा तार्क्ष्यरथा वैष्णवी सुरपूजिता ॥ ३७\।३१॥शिवार्चनरता भक्ता रुद्रैकगतमानसा ।शान्तिं करोतु मे नित्यं सर्वासुरविमर्दिनी ॥ ३७\।३२॥हिमसेतुनिभा देवी महावृषभवाहिनी ।त्रिशूलहस्ता वरदा नानाभरणभूषिता ॥ ३७\।३३॥रुद्रभक्ता महावीर्या रुद्रार्चनरता सदा ।चतुर्भुजा चतुर्वक्त्रा त्रिणेत्रा पापहारिणी ॥ ३७\।३४॥आर्तिं हरतु मे प्रीता माहेशी नित्यमुज्ज्वला ।वराहघोणविकटा वराहवरवाहना ॥ ३७\।३५॥श्यामाङ्गा वरदा देवी शङ्खचक्रगदाधरा ।तर्जयन्ती सदा विघ्नान् अर्चयन्ती सदाशिवम् ॥ ३७\।३६॥वाराही वरदा देवी क्षेमारोग्यं ददातु मे ।ऐरावतगजारूढा वज्रहस्ता महाबला ॥ ३७\।३७॥नेत्राणां च सहस्रेण भूषिता काञ्चनप्रभा ।ऐन्द्रदेवी सदाकालं शान्तिमाशु करोतु मे ॥ ३७\।३८॥ऊर्ध्वकेशोत्कटा क्षामा निर्मांसस्नायुबन्धना ।करालवदना घोरा खड्गखेटायुधोद्यता ॥ ३७\।३९॥कपालमालिनी देवी क्रूरा खट्वाङ्गधारिणी ।आरक्तपिङ्गनयना गजचर्मावगुण्ठिता ॥ ३७\।४०॥नानानागपरीताङ्गी प्रेतोपरि निवासिनी ।शिवरूपेण घोरेण शिवारावभयङ्करी ॥ ३७\।४१॥चामुण्डा चण्डरूपेण चित्रा त्रासयते ननु ।भूतप्रेतपिशाचेभ्यो मम रक्षां करो तु सा ॥ ३७\।४२॥आकाशमातरो देव्यस्तथा भूलोकमातरः ।भूतानां मातरः सर्वास्तथान्याः पितृमातरः ॥ ३७\।४३॥सर्वमातृगणा देव्यः स्वायुधव्यग्रपाणयः ।जगद्व्याप्यावतिष्ठन्त्यो बलिकामा महादयाः ॥ ३७\।४४॥रुद्रभक्ता महावीर्या रुद्रार्चनपरायणाः ।शान्तिं कुर्वन्तु मे नित्यं मातरः सुरपूजिताः ॥ ३७\।४५॥ये रुद्रा रौद्रकर्माणो रुद्रस्थाननिवासिनः ।सौम्याश्चैव तु ये केचित् सौम्यस्थाननिवासिनः ॥ ३७\।४६॥मातरो रुद्ररूपाश्च गणानामधिपाश्च ये ।विघ्नभूतास्तथैवान्ये दशदिक्षु समाचि(श्रि)ताः ॥ ३७\।४७॥सर्वे सुप्रीतमनसः प्रतिगृह्णन्त्विमं बलिम् ॥ ३७\।४८॥ईश्वर उवाच ।

caturmukhaścaturbāhuḥ sitabhasmāvaguṇṭhitaḥ |varo vareṇyo varado vāmadevo maheśvaraḥ || 37\|7||trailokyanamitaḥ śrīmān śāntimāśu karotu me |sarvāvayavamukhyena gātreṇa tanumadhyamā || 37\|8||pītaśyāmātisaumyena śivarūpeṇa śobhitā |lalāṭatilakopetā candrarekhārdhadhāriṇī || 37\|9||divyāmbaradharādevī sarvābharaṇabhūṣitā |varastrī sarvanārīṇāṃ śobhāguṇamahāspadā || 37\|10||bhāvanāmātrasantuṣṭā umā devī varapradā |sākṣādāgatya rūpeṇa śāntānāmiva tejasā || 37\|11||śāntiṃ karotu me prītā bhaktānāṃ bhaktavatsalā |padmarāgadyutiḥ saumyo raktamālyānulepanaḥ || 37\|12||abālo bālarūpeṇa ṣaṇmukhaḥ śikhivāhanaḥ |pūrṇenduvadanaḥ saumyastriśikhāśaktisaṃyutaḥ || 37\|13||kṛttikomāgnirudrāṅgagaṅgodbhūtaḥ surārcitaḥ |kārtikeyo mahātejā varadānaikatatparaḥ || 37\|14||śāntiṃ karotu me prīto balaṃ saukhyaṃ ca sarvadā |mahodaro mahākāyaḥ snigdhāñjanasamaprabhaḥ || 37\|15||ekadaṃṣṭrotkaṭo devo gajavaktro mahābalaḥ |nāgayajñopavītī ca nāgābharaṇabhūṣitaḥ || 37\|16||sarvārthasampadāghāro gaṇādhyakṣo varapradaḥ |rudrasya tanayo devo nāyako'tha vināyakaḥ || 37\|17||karotu me mahāśāntiṃ karmasiddhiṃ ca sarvadā |indranīlanibhākṣo'gnipaśuśūlāyudhodyataḥ || 37\|18||raktāmbaradharaḥ śrīmān kṛṣṇāṅgo nāgabhūṣaṇaḥ |pāpāpanodanaḥ śuddhastvalakṣmīmalanāśanaḥ || 37\|19||karotu me mahāśāntiṃ mahākālo mahābalaḥ |pūtavastraparīdhānā kanyā puṣpaiḥsvalaṅkṛtā || 37\|20||gaṇanāthāmbikā tryakṣā puṇyā gaurī sureśvarī |sarvasiddhipradā devī prasādaparamā parā || 37\|21||śāntiṃ karotu me śāntā siddhimāśu prayacchatusnigdhā śyāmalavarṇena mahiṣāsuramardinī || 37\|22||dhanuścakrapraharaṇā śaṅkhayaṣṭyasidhāriṇī |atarjanodyatakarā sarvopadravanāśinī || 37\|23||sarvamaṅgalamātā me śivamāśu prayacchatu |nirmāṃsena śarīreṇa susnāyvasthinibandhanaḥ || 37\|24||atisūkṣmo'tivikrāntastryakṣo bhṛṅgiriṭirmahān |rudrātmajo rudravīro rudraikagatamānasaḥ || 37\|25||so'pi śāntātmabhāvena śāntimāśu karotu me |pracaṇḍagaṇasainyeśo mahākālāstradhārakaḥ || 37\|26||akṣamālārpitakarastryakṣaścaṇḍeśvaraḥ prabhuḥ |pracaṇḍapāpaharaṇo bṛhaspatyādiśodhakaḥ || 37\|27||karotu me mahāyogī kalyāṇaṃ paramaṃ śubham |padmāsanaḥ padmanibhaścaturvadanapaṅkajaḥ || 37\|28||kamaṇḍaludharaḥ śrīmān devagandharvapūjitaḥ |śivadhyānaikanirataḥ śivasadbhāvabhāvitaḥ || 37\|29||brahmaśabdena divyena brahmāśantiṃ karotu me |śaṅkhakundenduvarṇābhiḥ kaṇṭhe marakataprabhaḥ || 37\|30||akṣamālāśirā ugraśivajñānavyavasthitaḥ |caturmukhaścatuṣpādastriṇetraḥ sarvadojjavalaḥ || 37\|31||kṣiteḥ patirvṛṣo devo dharmo dharmottamottamaḥ |īśaṃ vahati pṛṣṭhena tasmāddharmo jagatprabhuḥ || 37\|32||vṛṣo vṛṣapatiśrīmān devagandharvapūjitaḥ |śivajñānaikasampannaḥ śivasadbhāvabhāvitaḥ || 37\|33||vṛṣaśabdena divyena vṛṣaḥ śāntiṃ karotu me |tārkṣyāsanaścaturbāhuḥ śaṅkhacakragadādharaḥ || 37\|34||śyāmaḥ pītāmbaradharo vanamālāvibhūṣitaḥ |yajño devottamo devo mādhavo madhusūdanaḥ || 37\|35||śivaprasāda sampannaḥ śivadhyānaparāyaṇaḥ |śivārcanarato nityaṃ viṣṇuḥ śāntiṃ karotu me || 37\|36||padmarāgaprabho devī caturvadana paṅkajā |akṣamālārpitakarākamaṇḍaludharā śivā || 37\|37||brahmāṇī saumyavadanā śivapūjāparāyaṇā |śāntiṃ karotu me prītā brahmaśabdena nirmalā || 37\|28||mayūravāhanā devī sindūrāruṇavigrahā |śaktihastā mahārūpā sarvābharaṇabhūṣitā || 37\|29||rudrabhaktā mahāpuṇyā rudrārcanaratā sadā |kaumārī varadā devī kṣemārogyaṃ dadātu me || 37\|30||śaṅkhacakragadāhastā śyāmā pītāmbarapriyā |caturbhujā tārkṣyarathā vaiṣṇavī surapūjitā || 37\|31||śivārcanaratā bhaktā rudraikagatamānasā |śāntiṃ karotu me nityaṃ sarvāsuravimardinī || 37\|32||himasetunibhā devī mahāvṛṣabhavāhinī |triśūlahastā varadā nānābharaṇabhūṣitā || 37\|33||rudrabhaktā mahāvīryā rudrārcanaratā sadā |caturbhujā caturvaktrā triṇetrā pāpahāriṇī || 37\|34||ārtiṃ haratu me prītā māheśī nityamujjvalā |varāhaghoṇavikaṭā varāhavaravāhanā || 37\|35||śyāmāṅgā varadā devī śaṅkhacakragadādharā |tarjayantī sadā vighnān arcayantī sadāśivam || 37\|36||vārāhī varadā devī kṣemārogyaṃ dadātu me |airāvatagajārūḍhā vajrahastā mahābalā || 37\|37||netrāṇāṃ ca sahasreṇa bhūṣitā kāñcanaprabhā |aindradevī sadākālaṃ śāntimāśu karotu me || 37\|38||ūrdhvakeśotkaṭā kṣāmā nirmāṃsasnāyubandhanā |karālavadanā ghorā khaḍgakheṭāyudhodyatā || 37\|39||kapālamālinī devī krūrā khaṭvāṅgadhāriṇī |āraktapiṅganayanā gajacarmāvaguṇṭhitā || 37\|40||nānānāgaparītāṅgī pretopari nivāsinī |śivarūpeṇa ghoreṇa śivārāvabhayaṅkarī || 37\|41||cāmuṇḍā caṇḍarūpeṇa citrā trāsayate nanu |bhūtapretapiśācebhyo mama rakṣāṃ karo tu sā || 37\|42||ākāśamātaro devyastathā bhūlokamātaraḥ |bhūtānāṃ mātaraḥ sarvāstathānyāḥ pitṛmātaraḥ || 37\|43||sarvamātṛgaṇā devyaḥ svāyudhavyagrapāṇayaḥ |jagadvyāpyāvatiṣṭhantyo balikāmā mahādayāḥ || 37\|44||rudrabhaktā mahāvīryā rudrārcanaparāyaṇāḥ |śāntiṃ kurvantu me nityaṃ mātaraḥ surapūjitāḥ || 37\|45||ye rudrā raudrakarmāṇo rudrasthānanivāsinaḥ |saumyāścaiva tu ye kecit saumyasthānanivāsinaḥ || 37\|46||mātaro rudrarūpāśca gaṇānāmadhipāśca ye |vighnabhūtāstathaivānye daśadikṣu samāci(śri)tāḥ || 37\|47||sarve suprītamanasaḥ pratigṛhṇantvimaṃ balim || 37\|48||īśvara uvāca |

माध्यामद्यं च शान्तिं सुत तति धनगो वाजिमातङ्गयूथेराष्ट्रे ग्रामे पुरे वा सुविहितमधुना शान्तिदाः सन्तु सर्वाः ॥ ३७\।४९॥

mādhyāmadyaṃ ca śāntiṃ suta tati dhanago vājimātaṅgayūtherāṣṭre grāme pure vā suvihitamadhunā śāntidāḥ santu sarvāḥ || 37\|49||

॥ इति शान्त्यध्यायः १ ॥

|| iti śāntyadhyāyaḥ 1 ||

(दिशाशान्तिः)

(diśāśāntiḥ)

सिद्धिं पुष्णन्तु मे नित्यं भयेभ्यः पान्तु मां सदा ।ऐन्द्र्यां दिशि गणा ये तु वज्रहस्ता महाबलाः ॥ ३८\।१॥सुपीताक्षा पीतनिभास्तथा वै पीतलोहिताः ।दिव्यान्तरिक्षभौमाश्च पातालतलवासिनः ॥ ३८\।२॥रुद्रार्चनरता नित्यं शान्तिं कुर्वन्तु मे सदा ।आग्नेय्यां ये गणाः सर्वे शक्तिहस्ता निषङ्गिणः ॥ ३८\।३॥शिवप्रणामपरमाः शान्तिं कुर्वन्तु मे सदा ।याम्यां दिशि गणाः ये तु सततं दण्डपाणयः ॥ ३८\।४॥सुकृष्णाक्षाः कृष्णनिभास्तथा वै कृष्णलोहिताः ।दिव्यान्तरिक्षभौमाश्च पातालतलवासिनः ॥ ३८\।५॥परमेशार्चनरताः शान्तिं कुर्वन्तु मे सदा ।निरृत्यां ये गणाः सर्वे राक्षसाः खड्गपाणयः ॥ ३८\।६॥सुनीलाक्षा नीलनिभास्तथा वै नीललोहिताः ।दिव्यान्तरिक्षभौमाश्च पातालतलवासिनः ॥ ३८\।७॥रुद्रैकध्यान निरताः शान्तिं कुर्वन्तु मे सदा ।वारुण्यां ये गणाः सर्वे सततं पाशपाणयः ॥ ३८\।८॥सश्यामाक्षाः श्यामनिभास्तथा वै श्यामलोहिताः ।दिव्यान्तरिक्षभौमाश्च पातालतलवासिनः ॥ ३८\।९॥परमेशार्चनरताः शान्तिं कुर्वन्तु मे सदा ।वायव्यां ये गणाः सर्वे सततं ध्वजपाणयः ॥ ३८\।१०॥सूधूम्राक्षा धूम्रनिभास्तथा वै धूम्रलोचनाः ।दिव्यान्तरिक्षभौमाश्च पातालतलवासिनः ॥ ३८\।११॥शिवभक्तिपराः सर्वे क्षेमं कुर्वन्तु मे सदा ।कौबेर्यां ये गणाः सर्वे सततं निधिपाणयः ॥ ३८\।१२॥सुपीताक्षाः पीतनिभास्तथा वै पीतलोहिताः ।दिव्यान्तरिक्षभौमाश्च पातालतलवासिनः ॥ ३८\।१३॥शिवभक्तिपराः सर्वे क्षेमं कुर्वन्तु मे सदा ।ईशान्यां ये गणाः सर्वे प्रशान्ताः शूलपाणयः ॥ ३८\।१४॥सुसूक्ष्माक्षाः सूक्ष्मनिभास्तथा वै सूक्ष्मलोहिताः ।दिव्यान्तरिक्ष भौमाश्च पातालतलवासिनः ॥ ३८\।१५॥रुद्रप्रणामपरमाः शान्तिं कुर्वन्तु मे सदा ।अधोभागे गणा ये तु सततं चक्रपाणयः ॥ ३८\।१६॥सुधूम्राक्षा धूम्रनिभास्तथा वै धूम्रलोहिताः ।दिव्यान्तरिक्षभौमाश्च पातालतलवसिनः ॥ ३८\।१७॥शिवभक्तिरताः सर्वे शान्तिं कुर्वन्तु मे सदा ।ऊर्ध्व भागे स्थिता ये तु सततं पद्मपाणयः ॥ ३८\।१८॥सुपद्माक्षाः पद्मनिभास्तथा वै पद्मलोहिताः ।दिव्यान्तरिक्षभौमाश्च पातालतलवासिनः ॥ ३८\।१९॥शिवपूजासमायुक्ताः शान्तिं कुर्वन्तु मे सदा ।एते गणा महात्मानो महाबलपराक्रमाः ॥ ३८\।१९॥शिवं सम्पूज्य यत्नेन स्वं स्वं पदमवापिरे ।ततः सुप्रीतमनसः शान्तिमायुर्बलं श्रियम् ॥ ३८\।२१॥प्रयच्छन्त्वाशु मर्त्यानां तद्भक्तानां विशेषतः ।नाम्नाऽमरावती पूज्या पूर्वभागे व्यवस्थिता ॥ ३८\।२२॥विद्याधरगणाकीर्णा सिद्धगन्धर्वसेविता ।रत्नप्राकाररचिता महारत्नोपशोभिता ॥ ३८\।२३॥तत्र देवपतिः श्रीमान् वज्रहस्तो महाबलः ।नेत्राणां तु सहस्रेण शोभनेन विराजितः ॥ ३८\।२४॥ऐरावतगजारूढो हेमवर्णो महाद्युतिः ।देवेन्द्रः परमो हृष्टः परमेशार्चने रतः ॥ ३८\।२५॥शिवध्यानैकसम्पन्नः शिवभक्तिपरायणः ।शिवभक्तैस्तथा चान्यैर्देवैरिह सहानुगैः ॥ ३८\।२६॥शिवप्रणामपरमः करोतु मम शान्तिकम् ।आग्नेय्यास्तु दिशोभागे पुरी तेजोवती शुभा ॥ ३८\।२७॥नानादेवगणाकीर्णा रत्नज्वालासमाकुला ।तत्र ज्वालापरीताङ्गो दीप्त्याङ्गारसमद्युतिः ॥ ३८\।२८॥भूतिकृद्देहिनां देवो ज्वलनः पापनाशनः ।शिवपूजासमायुक्तः शिवध्यानविभावितः ॥ ३८\।२९॥शान्तिं करोतु मे देवस्तथा पापपरिक्षयम् ।वैवस्वतपुरीनाम दक्षिणस्यां व्यवस्थिता ॥ ३८\।३०॥लोहप्राकारसंयुक्ता प्रासादैर्गोपुरैः शुभा ।सुरासुरशतानीकपितृयक्षोरगालयः ॥ ३८\।३१॥तत्रेन्द्रनीलसङ्काशो रत्नस्रग्वस्त्रभूषणः ।खड्गपाणिर्महातेजाः करालवदनोज्जवलः ॥ ३८\।३२॥राक्षसेन्द्रश्च निरृतिः शिवार्चनरतः सदा ।करोतु मे महाशान्तिं शिवभक्तिसमुत्सुकः ॥ ३८\।३३॥पश्चिमे तु दिशो भागे पुरी शुद्धवती (शुद्धिमती) शुभा ।नानारत्नसमाकीर्णा नानाकिन्नरसेविता ॥ ३८\।३४॥तेजः प्राकारसङ्कीर्णा निरौपम्या सदोज्ज्वला ।तत्र मौक्तिकसङ्काशः परिपिङ्गललोचनः ॥ ३८\।३५॥श्वेतवस्त्रपरीधानः पाशहस्तो महाद्युतिः ।वरुणः परया भक्त्या शिवैकाऽऽहितमानसः ॥ ३८\।३६॥रोगशोकार्तिसन्तापं विनाशयतु मे सदा ।वायव्ये तु दिशो भागे पुरीगन्धवती शुभा ॥ ३८\।३७॥ऋषिसिद्धगणाकीर्णा हेमप्राकारतोरणा ।तथा धूम्रेण देहेन कृष्णपिङ्गललोचनः ॥ ३८\।३८॥पटवासान्तरालीनो ध्वजयष्ट्यायुधोज्ज्वलः ।पवनः परमो देवः परमेश्वरभावितः ॥ ३८\।३९॥क्षेमारोग्यबलं शान्तिं करोतु मम सर्वदा ।महोदया नाम पुरी उत्तरेण व्यवस्थिता ॥ ३८\।४०॥अनेकयक्षसङ्कीर्णा नानारत्नोपशोभिता ।तत्र देवो गदाहस्तश्चित्रस्रग्वस्त्रभूषणः ॥ ३८\।४१॥ह्रस्वबाहुर्महातेजाः परिपिङ्गललोचनः ।कुबेरः श्रीमुखः श्रीमान् हरपादार्चने रतः ॥ ३८\।४२॥शान्तिं करोतु मे प्रीतः शमशान्तेन चेतसा ।यशोवती पुरी रम्या ऐशान्यां दिशि संस्थिता ॥ ३८\।४३॥नानागणसमकीर्णा नानाकृतसुरालया ।तेजःप्राकारपर्यन्ता निरौपम्यगुणान्विता ॥ ३८\।४४॥तत्र मौक्तिकसङ्काशः शशाङ्ककृतशेखरः ।त्रिणेत्रः शान्तरूपात्मा ह्यक्षमालाधरो हरः ॥ ३८\।४५॥ईशानः परमो देवः शिवध्यानैकतत्परः ।सोऽपि सर्वात्मभावेन शान्तिमाशु करोतु मे ॥ ३८\।४६॥ईश्वर उवाच ।

siddhiṃ puṣṇantu me nityaṃ bhayebhyaḥ pāntu māṃ sadā |aindryāṃ diśi gaṇā ye tu vajrahastā mahābalāḥ || 38\|1||supītākṣā pītanibhāstathā vai pītalohitāḥ |divyāntarikṣabhaumāśca pātālatalavāsinaḥ || 38\|2||rudrārcanaratā nityaṃ śāntiṃ kurvantu me sadā |āgneyyāṃ ye gaṇāḥ sarve śaktihastā niṣaṅgiṇaḥ || 38\|3||śivapraṇāmaparamāḥ śāntiṃ kurvantu me sadā |yāmyāṃ diśi gaṇāḥ ye tu satataṃ daṇḍapāṇayaḥ || 38\|4||sukṛṣṇākṣāḥ kṛṣṇanibhāstathā vai kṛṣṇalohitāḥ |divyāntarikṣabhaumāśca pātālatalavāsinaḥ || 38\|5||parameśārcanaratāḥ śāntiṃ kurvantu me sadā |nirṛtyāṃ ye gaṇāḥ sarve rākṣasāḥ khaḍgapāṇayaḥ || 38\|6||sunīlākṣā nīlanibhāstathā vai nīlalohitāḥ |divyāntarikṣabhaumāśca pātālatalavāsinaḥ || 38\|7||rudraikadhyāna niratāḥ śāntiṃ kurvantu me sadā |vāruṇyāṃ ye gaṇāḥ sarve satataṃ pāśapāṇayaḥ || 38\|8||saśyāmākṣāḥ śyāmanibhāstathā vai śyāmalohitāḥ |divyāntarikṣabhaumāśca pātālatalavāsinaḥ || 38\|9||parameśārcanaratāḥ śāntiṃ kurvantu me sadā |vāyavyāṃ ye gaṇāḥ sarve satataṃ dhvajapāṇayaḥ || 38\|10||sūdhūmrākṣā dhūmranibhāstathā vai dhūmralocanāḥ |divyāntarikṣabhaumāśca pātālatalavāsinaḥ || 38\|11||śivabhaktiparāḥ sarve kṣemaṃ kurvantu me sadā |kauberyāṃ ye gaṇāḥ sarve satataṃ nidhipāṇayaḥ || 38\|12||supītākṣāḥ pītanibhāstathā vai pītalohitāḥ |divyāntarikṣabhaumāśca pātālatalavāsinaḥ || 38\|13||śivabhaktiparāḥ sarve kṣemaṃ kurvantu me sadā |īśānyāṃ ye gaṇāḥ sarve praśāntāḥ śūlapāṇayaḥ || 38\|14||susūkṣmākṣāḥ sūkṣmanibhāstathā vai sūkṣmalohitāḥ |divyāntarikṣa bhaumāśca pātālatalavāsinaḥ || 38\|15||rudrapraṇāmaparamāḥ śāntiṃ kurvantu me sadā |adhobhāge gaṇā ye tu satataṃ cakrapāṇayaḥ || 38\|16||sudhūmrākṣā dhūmranibhāstathā vai dhūmralohitāḥ |divyāntarikṣabhaumāśca pātālatalavasinaḥ || 38\|17||śivabhaktiratāḥ sarve śāntiṃ kurvantu me sadā |ūrdhva bhāge sthitā ye tu satataṃ padmapāṇayaḥ || 38\|18||supadmākṣāḥ padmanibhāstathā vai padmalohitāḥ |divyāntarikṣabhaumāśca pātālatalavāsinaḥ || 38\|19||śivapūjāsamāyuktāḥ śāntiṃ kurvantu me sadā |ete gaṇā mahātmāno mahābalaparākramāḥ || 38\|19||śivaṃ sampūjya yatnena svaṃ svaṃ padamavāpire |tataḥ suprītamanasaḥ śāntimāyurbalaṃ śriyam || 38\|21||prayacchantvāśu martyānāṃ tadbhaktānāṃ viśeṣataḥ |nāmnā'marāvatī pūjyā pūrvabhāge vyavasthitā || 38\|22||vidyādharagaṇākīrṇā siddhagandharvasevitā |ratnaprākāraracitā mahāratnopaśobhitā || 38\|23||tatra devapatiḥ śrīmān vajrahasto mahābalaḥ |netrāṇāṃ tu sahasreṇa śobhanena virājitaḥ || 38\|24||airāvatagajārūḍho hemavarṇo mahādyutiḥ |devendraḥ paramo hṛṣṭaḥ parameśārcane rataḥ || 38\|25||śivadhyānaikasampannaḥ śivabhaktiparāyaṇaḥ |śivabhaktaistathā cānyairdevairiha sahānugaiḥ || 38\|26||śivapraṇāmaparamaḥ karotu mama śāntikam |āgneyyāstu diśobhāge purī tejovatī śubhā || 38\|27||nānādevagaṇākīrṇā ratnajvālāsamākulā |tatra jvālāparītāṅgo dīptyāṅgārasamadyutiḥ || 38\|28||bhūtikṛddehināṃ devo jvalanaḥ pāpanāśanaḥ |śivapūjāsamāyuktaḥ śivadhyānavibhāvitaḥ || 38\|29||śāntiṃ karotu me devastathā pāpaparikṣayam |vaivasvatapurīnāma dakṣiṇasyāṃ vyavasthitā || 38\|30||lohaprākārasaṃyuktā prāsādairgopuraiḥ śubhā |surāsuraśatānīkapitṛyakṣoragālayaḥ || 38\|31||tatrendranīlasaṅkāśo ratnasragvastrabhūṣaṇaḥ |khaḍgapāṇirmahātejāḥ karālavadanojjavalaḥ || 38\|32||rākṣasendraśca nirṛtiḥ śivārcanarataḥ sadā |karotu me mahāśāntiṃ śivabhaktisamutsukaḥ || 38\|33||paścime tu diśo bhāge purī śuddhavatī (śuddhimatī) śubhā |nānāratnasamākīrṇā nānākinnarasevitā || 38\|34||tejaḥ prākārasaṅkīrṇā niraupamyā sadojjvalā |tatra mauktikasaṅkāśaḥ paripiṅgalalocanaḥ || 38\|35||śvetavastraparīdhānaḥ pāśahasto mahādyutiḥ |varuṇaḥ parayā bhaktyā śivaikā''hitamānasaḥ || 38\|36||rogaśokārtisantāpaṃ vināśayatu me sadā |vāyavye tu diśo bhāge purīgandhavatī śubhā || 38\|37||ṛṣisiddhagaṇākīrṇā hemaprākāratoraṇā |tathā dhūmreṇa dehena kṛṣṇapiṅgalalocanaḥ || 38\|38||paṭavāsāntarālīno dhvajayaṣṭyāyudhojjvalaḥ |pavanaḥ paramo devaḥ parameśvarabhāvitaḥ || 38\|39||kṣemārogyabalaṃ śāntiṃ karotu mama sarvadā |mahodayā nāma purī uttareṇa vyavasthitā || 38\|40||anekayakṣasaṅkīrṇā nānāratnopaśobhitā |tatra devo gadāhastaścitrasragvastrabhūṣaṇaḥ || 38\|41||hrasvabāhurmahātejāḥ paripiṅgalalocanaḥ |kuberaḥ śrīmukhaḥ śrīmān harapādārcane rataḥ || 38\|42||śāntiṃ karotu me prītaḥ śamaśāntena cetasā |yaśovatī purī ramyā aiśānyāṃ diśi saṃsthitā || 38\|43||nānāgaṇasamakīrṇā nānākṛtasurālayā |tejaḥprākāraparyantā niraupamyaguṇānvitā || 38\|44||tatra mauktikasaṅkāśaḥ śaśāṅkakṛtaśekharaḥ |triṇetraḥ śāntarūpātmā hyakṣamālādharo haraḥ || 38\|45||īśānaḥ paramo devaḥ śivadhyānaikatatparaḥ |so'pi sarvātmabhāvena śāntimāśu karotu me || 38\|46||īśvara uvāca |

शान्ताः शिवार्चनरताः शिवपादसक्ताःयुक्ता मखायुतफलैर्वरभस्मभूषाः ।रुद्राक्षवक्षस इमे शिवलिङ्गभक्ताएते मदर्चनफलेन गणातामुपेताः ॥ ३८\।४७॥

śāntāḥ śivārcanaratāḥ śivapādasaktāḥyuktā makhāyutaphalairvarabhasmabhūṣāḥ |rudrākṣavakṣasa ime śivaliṅgabhaktāete madarcanaphalena gaṇātāmupetāḥ || 38\|47||

॥ इति शान्त्यध्यायः २ ॥

|| iti śāntyadhyāyaḥ 2 ||

(लोकशान्तिः)

(lokaśāntiḥ)

भूलोके च भुवर्लोके स्वर्लोके च वसन्ति ये ।देवदिव्यप्रभायुक्ताः शान्तिं कुर्वन्तु मे सदा ॥ ३९\।१॥महर्लोके जनोलोके तपोलोके च संस्थिताः ।ते तु प्रमुदिता देवाः शान्तिं कुर्वन्तु मे सदा ॥ ३९\।२॥सत्यलोके च ये देवाः प्रभाज्वलितविग्राः ।शिवभक्ताः सुमनसः भयार्तिं नाशयन्तु मे ॥ ३९\।३॥तपोलोके च ये देवाः शुद्धाः स्फटिकविग्रहाः ।रुद्रभक्ता महात्मानः शिवं कर्वन्तु मे सदा ॥ ३९\।४॥जनोलोके च ये देवा धौतचामीकरप्रभाः ।ईशानं प्रणता नित्यं शान्तिं कुर्वन्तु मे सदा ॥ ३९\।६॥भुवर्लोके च ये देवा भासयन्तो दिशो दश ।शिवैकशरणा देवाः पापं प्रशमयन्तु मे ॥ ३९\।७॥(गिरिकन्दरादिशान्तिः)गिरिकन्दरदुर्गेषु निवसन्ति च ये नराः ।रुद्रार्चनरता नित्यं शान्तिं कुर्वन्तु मे सदा ॥ ३९\।८॥(देवीभ्यः शान्तिप्रार्थना)शरच्चन्द्रांशुगौरेण देहेनामिततेजसा ।सरस्वती शिवे भक्ता शान्तिमाशु करोतु मे ॥ ३९\।९॥चारुचामीकरप्रख्या सरोजकरपल्लवा ।शिवभक्ता च श्रीदेवी श्रीमद्भुक्तिं ददातु मे ॥ ३९\।१०॥चारुणा मुखचन्द्रेण विचित्रकनकोज्ज्वला ।जया देवी शिवे भक्ता सर्वान् कामान् ददातु मे ॥ ३९\।११॥हारेण सुविचित्रेण भास्वत्कनकमेखला ।अपराजिता रुद्रभक्ता करोतु विजयं मम ॥ ३९\।१२॥(ग्रहशान्तिः)

bhūloke ca bhuvarloke svarloke ca vasanti ye |devadivyaprabhāyuktāḥ śāntiṃ kurvantu me sadā || 39\|1||maharloke janoloke tapoloke ca saṃsthitāḥ |te tu pramuditā devāḥ śāntiṃ kurvantu me sadā || 39\|2||satyaloke ca ye devāḥ prabhājvalitavigrāḥ |śivabhaktāḥ sumanasaḥ bhayārtiṃ nāśayantu me || 39\|3||tapoloke ca ye devāḥ śuddhāḥ sphaṭikavigrahāḥ |rudrabhaktā mahātmānaḥ śivaṃ karvantu me sadā || 39\|4||janoloke ca ye devā dhautacāmīkaraprabhāḥ |īśānaṃ praṇatā nityaṃ śāntiṃ kurvantu me sadā || 39\|6||bhuvarloke ca ye devā bhāsayanto diśo daśa |śivaikaśaraṇā devāḥ pāpaṃ praśamayantu me || 39\|7||(girikandarādiśāntiḥ)girikandaradurgeṣu nivasanti ca ye narāḥ |rudrārcanaratā nityaṃ śāntiṃ kurvantu me sadā || 39\|8||(devībhyaḥ śāntiprārthanā)śaraccandrāṃśugaureṇa dehenāmitatejasā |sarasvatī śive bhaktā śāntimāśu karotu me || 39\|9||cārucāmīkaraprakhyā sarojakarapallavā |śivabhaktā ca śrīdevī śrīmadbhuktiṃ dadātu me || 39\|10||cāruṇā mukhacandreṇa vicitrakanakojjvalā |jayā devī śive bhaktā sarvān kāmān dadātu me || 39\|11||hāreṇa suvicitreṇa bhāsvatkanakamekhalā |aparājitā rudrabhaktā karotu vijayaṃ mama || 39\|12||(grahaśāntiḥ)

सिन्दूरारुणवर्णेन देहेनायतलोचनः ।सहस्रकिरणः श्रीमान् सप्तसप्तिकवाहनः ॥ ३९\।१३॥गभस्तिमाली भगवान् शिवपादार्चने रतः ।करोतु मे महाशान्तिं ग्रहपीडानिवारणम् ॥ ३९\।१४॥जगदाप्यायनकरोऽप्यमृतांशुः सुशीतलः ।सोमः सौम्येन भावेन ग्रहपीडां व्यपोहतु ॥ ३९\।१५॥पद्मरागेण देहेन देवः पिङ्गललोचनः ।अङ्गारकस्तु सततं रुद्रपूजापरायणः ॥ ३९\।१६॥रुद्रसद्भावसम्पन्नो रुद्रध्यानैकतत्परः ।ग्रहपीडाभयं सर्वं विनाशयतु मे सदा ॥ ३९\।१७॥कुङ्कुमछविना श्रीमान् देहेनाऽऽरक्तपिङ्गलः ।बुधोऽपि शिवधामात्मा ग्रहपीडां व्यपोहतु ॥ ३९\।१८॥तप्तचामीकराभो यः सर्वज्ञानसुधालयः ।बृहस्पतिः सदाकालमीश्वरार्चनतत्परः ॥ ३९\।१९॥सोऽपि शान्तात्मचित्तेन परमेण समाधिना ।ग्रहपीडां विनिर्जित्य करोतु विजयं मम ॥ ३९\।२०॥हिमकुन्देन्दुतुल्याभोऽसुरदैत्येन्द्रपूजितः ।शुक्रः शिवार्चको नित्यं ग्रहपीडां व्यपोहतु ॥ ३९\।२१॥भिन्ना(नीला)ञ्जनसमच्छायः सुरक्तनयनद्युतिः ।शनैश्चरः शिवे भक्तः ग्रहपीडां व्यपोहतु ॥ ३९\।२२॥धूम्रायमाणः सततं सर्वोत्पातसमन्वितः ।नीलाञ्जनसमः श्रीमान् सैह्मिकेयो महाद्युतिः ॥ ३९\।२३॥शिवपूजारतो राहुः ग्रहपीडां व्यपोहतु ।धूम्रायमाणः सततं सर्वोत्पातसमन्वितः ॥ ३९\।२४॥शिवार्चनरतः केतुर्ग्रहपीडां व्यपोहतु ।एते ग्रहा महात्मानः शिवार्चनपरायणाः ॥ ३९\।२५॥शान्तिं कुर्वन्तु मे हृष्टाः सदाकालं हितैषिणः ।मुखे यस्य स्थितो नित्यं व्युष्टिर्नाम महाबलः ॥ ३९\।२६॥सुमुख विघ्नकारी च पृष्ठे च विजयङ्करः ।रुद्रप्रणामपरमः शान्तिमाशु करोतु मे ॥ ३९\।२७॥(तिथिशान्तिः)

sindūrāruṇavarṇena dehenāyatalocanaḥ |sahasrakiraṇaḥ śrīmān saptasaptikavāhanaḥ || 39\|13||gabhastimālī bhagavān śivapādārcane rataḥ |karotu me mahāśāntiṃ grahapīḍānivāraṇam || 39\|14||jagadāpyāyanakaro'pyamṛtāṃśuḥ suśītalaḥ |somaḥ saumyena bhāvena grahapīḍāṃ vyapohatu || 39\|15||padmarāgeṇa dehena devaḥ piṅgalalocanaḥ |aṅgārakastu satataṃ rudrapūjāparāyaṇaḥ || 39\|16||rudrasadbhāvasampanno rudradhyānaikatatparaḥ |grahapīḍābhayaṃ sarvaṃ vināśayatu me sadā || 39\|17||kuṅkumachavinā śrīmān dehenā''raktapiṅgalaḥ |budho'pi śivadhāmātmā grahapīḍāṃ vyapohatu || 39\|18||taptacāmīkarābho yaḥ sarvajñānasudhālayaḥ |bṛhaspatiḥ sadākālamīśvarārcanatatparaḥ || 39\|19||so'pi śāntātmacittena parameṇa samādhinā |grahapīḍāṃ vinirjitya karotu vijayaṃ mama || 39\|20||himakundendutulyābho'suradaityendrapūjitaḥ |śukraḥ śivārcako nityaṃ grahapīḍāṃ vyapohatu || 39\|21||bhinnā(nīlā)ñjanasamacchāyaḥ suraktanayanadyutiḥ |śanaiścaraḥ śive bhaktaḥ grahapīḍāṃ vyapohatu || 39\|22||dhūmrāyamāṇaḥ satataṃ sarvotpātasamanvitaḥ |nīlāñjanasamaḥ śrīmān saihmikeyo mahādyutiḥ || 39\|23||śivapūjārato rāhuḥ grahapīḍāṃ vyapohatu |dhūmrāyamāṇaḥ satataṃ sarvotpātasamanvitaḥ || 39\|24||śivārcanarataḥ keturgrahapīḍāṃ vyapohatu |ete grahā mahātmānaḥ śivārcanaparāyaṇāḥ || 39\|25||śāntiṃ kurvantu me hṛṣṭāḥ sadākālaṃ hitaiṣiṇaḥ |mukhe yasya sthito nityaṃ vyuṣṭirnāma mahābalaḥ || 39\|26||sumukha vighnakārī ca pṛṣṭhe ca vijayaṅkaraḥ |rudrapraṇāmaparamaḥ śāntimāśu karotu me || 39\|27||(tithiśāntiḥ)

तृतीया सप्तमी चैव दशमी च चतुर्दशी ।चतुर्थी चाष्टमी चैव एकादशी च पूर्णिमा ॥ ३९\।२८॥एता विघ्नकरा भक्ताः शुक्लकृष्णसमुद्भवाः ।भवन्तु मे श्रियो नित्यं कुर्वन्तु विजयं सदा ॥ ३९\।२९॥अमावास्या महापुण्या पितृदेवसमन्विता ।शिवा ह्येषा तु परमा शिवस्य परमात्मनः ॥ ३९\।३०॥शिवतेजः समायुक्ताः करोतु मम शान्तिकम् ।प्रतिपद्वह्निसंयुक्ता अष्टमी रुद्र(आर्द्रा)संयुता ॥ ३९\।३१॥नवमी तिथिरत्युग्रा दुर्गादेव्यधिदेवता ।दशमी धर्मसंयुक्ता रुद्रेणैकादशीयुता ॥ ३९\।३२॥द्वादशी विष्णुसंयुक्ता मदनेन त्रयोदशी ।चतुर्दशी महेशेन पूर्णिमा तुहिनांशुना ॥ ३९\।३३॥एतस्तु तिथयः सर्वा ईशानार्चनतत्पराः ।शान्तिं कुर्वन्तु मे नित्यं सदाकालं हितैषिणः ॥ ३९\।३४॥(योगशान्तिः)

tṛtīyā saptamī caiva daśamī ca caturdaśī |caturthī cāṣṭamī caiva ekādaśī ca pūrṇimā || 39\|28||etā vighnakarā bhaktāḥ śuklakṛṣṇasamudbhavāḥ |bhavantu me śriyo nityaṃ kurvantu vijayaṃ sadā || 39\|29||amāvāsyā mahāpuṇyā pitṛdevasamanvitā |śivā hyeṣā tu paramā śivasya paramātmanaḥ || 39\|30||śivatejaḥ samāyuktāḥ karotu mama śāntikam |pratipadvahnisaṃyuktā aṣṭamī rudra(ārdrā)saṃyutā || 39\|31||navamī tithiratyugrā durgādevyadhidevatā |daśamī dharmasaṃyuktā rudreṇaikādaśīyutā || 39\|32||dvādaśī viṣṇusaṃyuktā madanena trayodaśī |caturdaśī maheśena pūrṇimā tuhināṃśunā || 39\|33||etastu tithayaḥ sarvā īśānārcanatatparāḥ |śāntiṃ kurvantu me nityaṃ sadākālaṃ hitaiṣiṇaḥ || 39\|34||(yogaśāntiḥ)

विष्कम्भः प्रीतिरायुष्मान् सौभाग्यं शोभनं तथा ।अतिगण्डः सुकर्मा च धृतिः शूलस्तथैव च ॥ ३९\।३५॥गण्डो वृद्धिर्ध्रुवश्चैव व्याघातो हर्षणस्तथा ।वज्रंसिद्धिर्व्यतीपातो वरीयान् परिघः शिवः ॥ ३९\।३६॥सिद्धः साध्यः शुभः शुभ्रो ब्राह्ममाहेन्द्रवैधृताः ।चन्द्रस्य भानोरुत्पन्ना ये ते योगा महाबलाः ॥ ३९\।३७॥शिवशक्तियुताः सर्वे शिवशक्तिविधायिनः ।शान्तिं कुर्वन्तु मे नित्यं शिवध्यानपरायणाः ॥ ३९\।३८॥(नक्षत्रशान्तिः)

viṣkambhaḥ prītirāyuṣmān saubhāgyaṃ śobhanaṃ tathā |atigaṇḍaḥ sukarmā ca dhṛtiḥ śūlastathaiva ca || 39\|35||gaṇḍo vṛddhirdhruvaścaiva vyāghāto harṣaṇastathā |vajraṃsiddhirvyatīpāto varīyān parighaḥ śivaḥ || 39\|36||siddhaḥ sādhyaḥ śubhaḥ śubhro brāhmamāhendravaidhṛtāḥ |candrasya bhānorutpannā ye te yogā mahābalāḥ || 39\|37||śivaśaktiyutāḥ sarve śivaśaktividhāyinaḥ |śāntiṃ kurvantu me nityaṃ śivadhyānaparāyaṇāḥ || 39\|38||(nakṣatraśāntiḥ)

कृत्तिका परमा देवी रोहिणी रुचिरानना ।श्रीमान् मृगशिरा भद्रा आर्द्रा च परमोज्ज्वला ॥ ३९\।३९॥पुनर्वसुस्तथा पुष्य आश्लेषा च महोज्ज्वला ।नक्षत्रमातरो ह्येताः प्रभामालावभासकाः ॥ ३९\।४०॥महादेवार्चनरता महादेवानुभाविताः ।पूर्वभागे स्थिताश्चैताः शान्तिं कुर्वन्तु मे सदा ॥ ३९\।४१॥मघा सर्वगुणोपेता पूर्वा चैव तु फल्गुनी ।उत्तरा फल्गुनी चेष्टा हस्तचित्ररथोत्तमा ॥ ३९\।४२॥स्वाती विशाखा वरदा दक्षिणस्थानसंस्थिता ।अर्चयन्त्यः सदा कालं देवं त्रिणयनं प्रभुम् ॥ ३९\।४३॥ममापि शान्तिं चैवैताः कुर्वन्तु शिवचोदिताः ।अनूराधा तथा ज्येष्ठा मूला बुद्धिसमत्विता ॥ ३९\।४४॥पूर्वाषाढा महावीर्या आषाढात्युत्तरा शुभा ।अभिजिन्नाम नक्षत्रं श्रवणं परमोत्तमम् ॥ ३९\।४५॥एताः पश्चिमतो दीप्ताः राजन्त्यश्चारुमूर्तयः ।ईशानं पूजयन्त्येताः सर्वकालं सुमैः शिवे ॥ ३९\।४६॥प्रशान्तिं मम कुर्वन्तु विभूतिं च समाहिताः ।श्रविष्ठा शतभिषक् चैव पूर्वाभाद्रपदा तथा ॥ ३९\।४७॥उत्तराभाद्ररेवत्यावश्विनी च महर्धिका ।भरणी च महावीर्यां नित्यमुत्तरतः स्थिताः ॥ ३९\।४८॥शिवार्चनरता नित्यं शिवैकगतमानसाः ।शान्तिं कुर्वन्तु मे नित्यं सर्वकालं सुखोदयाः ॥ ३९\।४९॥(राशिशान्तिः)

kṛttikā paramā devī rohiṇī rucirānanā |śrīmān mṛgaśirā bhadrā ārdrā ca paramojjvalā || 39\|39||punarvasustathā puṣya āśleṣā ca mahojjvalā |nakṣatramātaro hyetāḥ prabhāmālāvabhāsakāḥ || 39\|40||mahādevārcanaratā mahādevānubhāvitāḥ |pūrvabhāge sthitāścaitāḥ śāntiṃ kurvantu me sadā || 39\|41||maghā sarvaguṇopetā pūrvā caiva tu phalgunī |uttarā phalgunī ceṣṭā hastacitrarathottamā || 39\|42||svātī viśākhā varadā dakṣiṇasthānasaṃsthitā |arcayantyaḥ sadā kālaṃ devaṃ triṇayanaṃ prabhum || 39\|43||mamāpi śāntiṃ caivaitāḥ kurvantu śivacoditāḥ |anūrādhā tathā jyeṣṭhā mūlā buddhisamatvitā || 39\|44||pūrvāṣāḍhā mahāvīryā āṣāḍhātyuttarā śubhā |abhijinnāma nakṣatraṃ śravaṇaṃ paramottamam || 39\|45||etāḥ paścimato dīptāḥ rājantyaścārumūrtayaḥ |īśānaṃ pūjayantyetāḥ sarvakālaṃ sumaiḥ śive || 39\|46||praśāntiṃ mama kurvantu vibhūtiṃ ca samāhitāḥ |śraviṣṭhā śatabhiṣak caiva pūrvābhādrapadā tathā || 39\|47||uttarābhādrarevatyāvaśvinī ca mahardhikā |bharaṇī ca mahāvīryāṃ nityamuttarataḥ sthitāḥ || 39\|48||śivārcanaratā nityaṃ śivaikagatamānasāḥ |śāntiṃ kurvantu me nityaṃ sarvakālaṃ sukhodayāḥ || 39\|49||(rāśiśāntiḥ)

अथ मेषो मृगाधीशो धनुर्दीप्तिमतां वरः ।पूर्वेण भासयन्त्येते शिवपूजापरायणाः ॥ ३९\।५०॥शान्तिं कुर्वन्तु मे नित्यं बलं सौभाग्यमेव च ।वृषः कन्या च वरदा मकरश्च महार्थकः ॥ ३९\।५१॥हरपादरता नित्यं शिवभावेन भाविताः ।एते दक्षिणदिक्संस्थाः पूजयन्ति सदाशिवम् ॥ ३९\।५२॥भक्त्या च परया नित्यं शान्तिं कुर्वन्तु मे सदा ।मिथुनं च तुलाकुम्भौ पश्चिमस्यां दिशि स्थिताः ॥ ३९\।५३॥शिवपादार्चनरताः शान्तिं कुर्वन्तु मे सदा ।कर्कटो वृश्चिको मीनो ह्येते उत्तरतः स्थिता ॥ ३९\।५४॥यजन्त्येते सदा कालं रुद्रं भुवननायकम् ।शान्तिं कुर्वन्तु मे नित्यं शिवज्ञानविधायिनः ॥ ३९\।५५॥(ऋषिशन्तिः)

atha meṣo mṛgādhīśo dhanurdīptimatāṃ varaḥ |pūrveṇa bhāsayantyete śivapūjāparāyaṇāḥ || 39\|50||śāntiṃ kurvantu me nityaṃ balaṃ saubhāgyameva ca |vṛṣaḥ kanyā ca varadā makaraśca mahārthakaḥ || 39\|51||harapādaratā nityaṃ śivabhāvena bhāvitāḥ |ete dakṣiṇadiksaṃsthāḥ pūjayanti sadāśivam || 39\|52||bhaktyā ca parayā nityaṃ śāntiṃ kurvantu me sadā |mithunaṃ ca tulākumbhau paścimasyāṃ diśi sthitāḥ || 39\|53||śivapādārcanaratāḥ śāntiṃ kurvantu me sadā |karkaṭo vṛściko mīno hyete uttarataḥ sthitā || 39\|54||yajantyete sadā kālaṃ rudraṃ bhuvananāyakam |śāntiṃ kurvantu me nityaṃ śivajñānavidhāyinaḥ || 39\|55||(ṛṣiśantiḥ)

ऋषयः सत्य विख्याता ध्रुवान्ताः परमेज्ज्वलाः ।भस्मरुद्राक्षभूषाढ्या त्रिपुण्ड्रपरिमण्डिताः ॥ ३९\।५६॥शिवलिङ्गार्चनपरास्त्रिकालममितौजसःकश्यपो गालवो गार्ग्यो विश्वामित्रो महामुनि ।भृगुर्दक्षो वसिष्ठश्च मृकण्डुः पुलहः क्रतुःनारदो मुनिरत्रिश्च भरद्वाजोऽङ्गिराः मुनिः ॥ ३९\।५८॥वाल्मीकिः कौशिकः कर्णः शाकल्योऽथ पुनर्वसुः ।शाकलायन(आश्वलायन) इत्याद्या मुनयोऽथ तपस्विनः ॥ ३९\।५९॥शिवध्यानार्चनोद्युक्ताः शान्तिं कुर्वन्तु मे सदा ।ऋषिपत्न्यो महाभागाः ऋषिकन्याः कुमारकाः ॥ ३९\।६०॥शिवार्चनरता नित्यं शान्तिं कुर्वन्तु मे सदा ।कुर्वन्तु शान्तिं विविधां सुरोत्तमाः ।शिवार्चका भस्मत्रिपुण्ड्रभूषिताः ।लिङ्गार्चकाः शाश्वतधर्मयुक्ताःयुक्ता भवन्त्येव शिवप्रसादात् ॥ ३९\।६१॥

ṛṣayaḥ satya vikhyātā dhruvāntāḥ paramejjvalāḥ |bhasmarudrākṣabhūṣāḍhyā tripuṇḍraparimaṇḍitāḥ || 39\|56||śivaliṅgārcanaparāstrikālamamitaujasaḥkaśyapo gālavo gārgyo viśvāmitro mahāmuni |bhṛgurdakṣo vasiṣṭhaśca mṛkaṇḍuḥ pulahaḥ kratuḥnārado muniratriśca bharadvājo'ṅgirāḥ muniḥ || 39\|58||vālmīkiḥ kauśikaḥ karṇaḥ śākalyo'tha punarvasuḥ |śākalāyana(āśvalāyana) ityādyā munayo'tha tapasvinaḥ || 39\|59||śivadhyānārcanodyuktāḥ śāntiṃ kurvantu me sadā |ṛṣipatnyo mahābhāgāḥ ṛṣikanyāḥ kumārakāḥ || 39\|60||śivārcanaratā nityaṃ śāntiṃ kurvantu me sadā |kurvantu śāntiṃ vividhāṃ surottamāḥ |śivārcakā bhasmatripuṇḍrabhūṣitāḥ |liṅgārcakāḥ śāśvatadharmayuktāḥyuktā bhavantyeva śivaprasādāt || 39\|61||

॥ इति शान्त्यध्यायः ३ ॥

|| iti śāntyadhyāyaḥ 3 ||

ईश्वर उवाच ।

īśvara uvāca |

(सिद्धगन्धर्वादि शान्तिः)

(siddhagandharvādi śāntiḥ)

सिद्धाश्च सिद्धतपसो गन्धर्वाप्सरसां गणाः ।विद्याधरा महात्मानो गरुडश्च महार्थकः ॥ ४०\।१॥महेश्वरपरा ह्येते महेश्वरपदार्चकाः ।सिद्धिमाशु प्रयच्छन्तु शिवधर्मपरायणाः ॥ ४०\।२॥नमुचिर्दैत्यराजेन्द्रः शम्भुपूजापरायणः ।महानादोऽपि विख्यातो दैत्यः परमवीर्यवान् ॥ ४०\।३॥हाटकेश्वरदेवस्य नित्यं पूजापरायणः ।बलं वीर्यं च मे क्षिप्रं प्रयच्छन्तु महार्थकाः ॥ ४०\।४॥(दैत्यशान्तिः)

siddhāśca siddhatapaso gandharvāpsarasāṃ gaṇāḥ |vidyādharā mahātmāno garuḍaśca mahārthakaḥ || 40\|1||maheśvaraparā hyete maheśvarapadārcakāḥ |siddhimāśu prayacchantu śivadharmaparāyaṇāḥ || 40\|2||namucirdaityarājendraḥ śambhupūjāparāyaṇaḥ |mahānādo'pi vikhyāto daityaḥ paramavīryavān || 40\|3||hāṭakeśvaradevasya nityaṃ pūjāparāyaṇaḥ |balaṃ vīryaṃ ca me kṣipraṃ prayacchantu mahārthakāḥ || 40\|4||(daityaśāntiḥ)

महाजम्भोहयग्रीवः प्रह्लादो दैत्यपुङ्गवः ।तारकाग्निमुखा दैत्या कालनेमिर्महाबलः ॥ ४०\।५॥एते दैत्या महात्मानः शिवसद्भावभाविताः ।पुष्टिं बलं तथा वीर्यं प्रयच्छन्तु च मे सुखम् ॥ ४०\।६॥वैरोचनो हिरण्याक्षः सुपर्वा च सुलोमकः ।मुचुकुन्दः सुकण्ठश्च दैत्यो रोचनकस्तथा ॥ ४०\।७॥भावेन परमेणाशु यजन्तः सर्वदा शिवम् ।सततं शितभावेन पुष्टिं कुर्वन्तु मे सदा ॥ ४०\।८॥(नागशान्तिः)

mahājambhohayagrīvaḥ prahlādo daityapuṅgavaḥ |tārakāgnimukhā daityā kālanemirmahābalaḥ || 40\|5||ete daityā mahātmānaḥ śivasadbhāvabhāvitāḥ |puṣṭiṃ balaṃ tathā vīryaṃ prayacchantu ca me sukham || 40\|6||vairocano hiraṇyākṣaḥ suparvā ca sulomakaḥ |mucukundaḥ sukaṇṭhaśca daityo rocanakastathā || 40\|7||bhāvena parameṇāśu yajantaḥ sarvadā śivam |satataṃ śitabhāvena puṣṭiṃ kurvantu me sadā || 40\|8||(nāgaśāntiḥ)

आरक्तेन शरीरेण रक्तान्तायतलोचनः ।महाभोगकृताटोपः शङ्खाब्जकृतलाञ्छनः ॥ ४०\।९॥अनलो नागराजेन्द्रः शिवपादार्चने रतः ।महापापविषं हृत्वा शान्तिमाशु करोतु मे ॥ ४०\।१०॥सुखेन सुशरीरेण सुश्वेतोत्पलशेखरः ।चारुभोगकृताटोपश्चारुहारविभूषणः ॥ ४०\।११॥वासुकिर्नागराजेन्द्रः शिवपादार्चने रतः ।सर्वरोगविषं हृत्वा क्षेमारोग्यं ददातु मे ॥ ४०\।१२॥अतिप्रीतेन देहेन प्रस्फुरद्भोगसम्पदा ।तेजसा चातिदीप्तेन कृतस्वस्तिकलक्षणः ॥ ४०\।१३॥नागेन्द्रस्तक्षकः श्रीमान्नागकोट्या समन्वितः ।विषशस्त्रादिसन्तापं हत्वा शान्तिं करोतु मे ॥ ४०\।१४॥पद्मवर्णेन देहेन पद्मपत्रायतेक्षणः ।पद्मबिन्दुकृताभासो ग्रीवायामेकरेखया ॥ ४०\।१५॥ख्यातः पद्मो महानागः शिवपादार्चनेरतः ।करोतु मे महाशान्तिं महापापविषक्षयम् ॥ ४०\।१६॥पुण्डरीकनिभेनापि देहेनामिततेजसा ।शङ्खशूलाब्जरुचिरैर्भूषितो मूर्ध्नि बिन्दुभिः ॥ ४०\।१७॥महापद्मो महानागो हरपादार्चने रतः ।विनिहत्य विषं घोरं शान्तिमाशु करोतु मे ॥ ४०\।१८॥शङ्खपालः श्रिया दीप्तः शिवपादाब्जपूजकः ।महाविषं महाघोरं शान्तिमाशु करोतु मे ॥ ४०\।२०॥अतिगौरेण देहेन चन्द्रार्धकृतशेखरः ।दीप्तभोगः कृताटोपः शम्भुलक्षणलक्षितः ॥ ४०\।२१॥गुलिको नागराजेन्द्रो नित्यं हरपरायणः ।अपहृत्य विषं घोरं करोतु विषशान्तिकम् ॥ ४०\।२२॥अन्तरिक्षे च ये नागा ये नागा भुवि संस्थिताः ।पाताले संस्थिता नागाः सर्वेऽप्यत्र समन्विताः ॥ ४०\।२३॥रुद्रपादार्चनोद्युक्ताः शान्तिं कुर्वन्तु मे सदा ।नागिन्यो नागकन्याश्च तथा नागकुमारिकाः ॥ ४०\।२४॥शिवभक्ताः सुमनसः शान्तिं कुर्वन्तु मे सदा ।य इदं नाग संस्थानं कीर्तयेद्वा शृणोति वा ॥ ४०\।२५॥न तं नागा विहिंसन्ति विषं नाक्रमते सदा ।गङ्गा पुण्या महादेवी यमुना नर्मदा नदी ॥ ४०\।२६॥(नदीशान्तिः)

āraktena śarīreṇa raktāntāyatalocanaḥ |mahābhogakṛtāṭopaḥ śaṅkhābjakṛtalāñchanaḥ || 40\|9||analo nāgarājendraḥ śivapādārcane rataḥ |mahāpāpaviṣaṃ hṛtvā śāntimāśu karotu me || 40\|10||sukhena suśarīreṇa suśvetotpalaśekharaḥ |cārubhogakṛtāṭopaścāruhāravibhūṣaṇaḥ || 40\|11||vāsukirnāgarājendraḥ śivapādārcane rataḥ |sarvarogaviṣaṃ hṛtvā kṣemārogyaṃ dadātu me || 40\|12||atiprītena dehena prasphuradbhogasampadā |tejasā cātidīptena kṛtasvastikalakṣaṇaḥ || 40\|13||nāgendrastakṣakaḥ śrīmānnāgakoṭyā samanvitaḥ |viṣaśastrādisantāpaṃ hatvā śāntiṃ karotu me || 40\|14||padmavarṇena dehena padmapatrāyatekṣaṇaḥ |padmabindukṛtābhāso grīvāyāmekarekhayā || 40\|15||khyātaḥ padmo mahānāgaḥ śivapādārcanerataḥ |karotu me mahāśāntiṃ mahāpāpaviṣakṣayam || 40\|16||puṇḍarīkanibhenāpi dehenāmitatejasā |śaṅkhaśūlābjarucirairbhūṣito mūrdhni bindubhiḥ || 40\|17||mahāpadmo mahānāgo harapādārcane rataḥ |vinihatya viṣaṃ ghoraṃ śāntimāśu karotu me || 40\|18||śaṅkhapālaḥ śriyā dīptaḥ śivapādābjapūjakaḥ |mahāviṣaṃ mahāghoraṃ śāntimāśu karotu me || 40\|20||atigaureṇa dehena candrārdhakṛtaśekharaḥ |dīptabhogaḥ kṛtāṭopaḥ śambhulakṣaṇalakṣitaḥ || 40\|21||guliko nāgarājendro nityaṃ haraparāyaṇaḥ |apahṛtya viṣaṃ ghoraṃ karotu viṣaśāntikam || 40\|22||antarikṣe ca ye nāgā ye nāgā bhuvi saṃsthitāḥ |pātāle saṃsthitā nāgāḥ sarve'pyatra samanvitāḥ || 40\|23||rudrapādārcanodyuktāḥ śāntiṃ kurvantu me sadā |nāginyo nāgakanyāśca tathā nāgakumārikāḥ || 40\|24||śivabhaktāḥ sumanasaḥ śāntiṃ kurvantu me sadā |ya idaṃ nāga saṃsthānaṃ kīrtayedvā śṛṇoti vā || 40\|25||na taṃ nāgā vihiṃsanti viṣaṃ nākramate sadā |gaṅgā puṇyā mahādevī yamunā narmadā nadī || 40\|26||(nadīśāntiḥ)

गोमती चापि कावेरी वरुणा देवकी तथा ।सर्वभूतपतिं देवं परमेशं महेश्वरम् ॥ ४०\।२७॥पूजयन्ति सदा नद्यस्सदा तद्भावभाविताः ।शान्तिं कुर्वन्तु मे नित्यं सदा पापपरीक्षकाः ॥ ४०\।२८॥चन्द्रभागा महापुण्या नदी गोदावरी शुभा ।सरयूः गण्डकी श्रेष्ठा कौशिकी च सरस्वती ॥ ४०\।२९॥पम्पा वेगवती पुण्या श्रेष्ठा विष्णुनदी तथा ।एता नद्यो महाभागाः शिवपादार्चने रताः ॥ ४०\।३०॥शान्तिं कुर्वन्तु मे नित्यं शिवध्यानैकमानसाः ।नैरञ्जना नाम नदी शोणश्चापि महाह्रदः ॥ ४०\।३१॥मन्दाकिनी च परमा सदा सन्निहिता शुभा ।एताश्चान्या महानद्यो भूमिदिव्यन्तरिक्षगाः ॥ ४०\।३२॥रुद्रार्चनपरा नद्यः कुर्वन्तु मम शान्तिकम् ।गुह्यानि यानि तीर्थानि आसमुद्रात्सरांसि च ॥ ४०\।३३॥कुर्वन्तु शान्तिकं तानि कीटकाधिष्ठितानि च ।

gomatī cāpi kāverī varuṇā devakī tathā |sarvabhūtapatiṃ devaṃ parameśaṃ maheśvaram || 40\|27||pūjayanti sadā nadyassadā tadbhāvabhāvitāḥ |śāntiṃ kurvantu me nityaṃ sadā pāpaparīkṣakāḥ || 40\|28||candrabhāgā mahāpuṇyā nadī godāvarī śubhā |sarayūḥ gaṇḍakī śreṣṭhā kauśikī ca sarasvatī || 40\|29||pampā vegavatī puṇyā śreṣṭhā viṣṇunadī tathā |etā nadyo mahābhāgāḥ śivapādārcane ratāḥ || 40\|30||śāntiṃ kurvantu me nityaṃ śivadhyānaikamānasāḥ |nairañjanā nāma nadī śoṇaścāpi mahāhradaḥ || 40\|31||mandākinī ca paramā sadā sannihitā śubhā |etāścānyā mahānadyo bhūmidivyantarikṣagāḥ || 40\|32||rudrārcanaparā nadyaḥ kurvantu mama śāntikam |guhyāni yāni tīrthāni āsamudrātsarāṃsi ca || 40\|33||kurvantu śāntikaṃ tāni kīṭakādhiṣṭhitāni ca |

(यक्षादिशान्तिः)

(yakṣādiśāntiḥ)

महावैश्रवणो देवो यक्षराजो महार्धिकः ॥ ४०\।३४॥यक्षकोटिपरीवारः यक्षाऽसङ्ख्येय संयुतः ।महाविभवसम्पन्नो हरपादार्चने रतः ॥ ४०\।३५॥शान्तिं करोतु मे प्रीतः पद्मपत्रायतेक्षणः ।माणिभद्रो महायक्षो मणिरत्नविभूतः ॥ ४०\।३६॥मनोहरेण हारेण कण्ठलग्नेन राजते ।शिवध्यानपरो नित्यं शिवपादाब्जपूजकः ॥ ४०\।३७॥शान्तिं करोतु मे नित्यं सर्वरोगनिवारणम् ।यक्षिणी यक्षकन्याभिः परिवारितविग्रहा ॥ ४०\।३८॥रुद्रार्चनरता नित्यं करोतु मम शान्तिकम् ।सुवीरो नाम यक्षेन्द्रो मणिकुण्डलभूषणः ॥ ४०\।३९॥ललाटहेमपट्टेन शोभनेन विराजितः ।बहुयक्षसमाकीर्णो यक्षैर्नमितविग्रहः ॥ ४०\।४०॥शिवपूजारतो नित्यं करोतु मम शान्तिकम् ।पञ्चगो नाम यक्षेन्द्रः कर्णिकाकटकोज्ज्वलः ॥ ४०\।४१॥मकुटेन विचित्रेण केयूराभ्यां विराजितः ।यक्षकन्यासमायुक्तो यक्षकोटिसमन्वितः ॥ ४०\।४२॥हरार्चनरतः श्रीमान् करोतु मम शान्तिकम् ।श्रीमान् विभण्डको यक्षो नानारत्नविभूषितः ॥ ४०\।४३॥चारुकुण्डलयुग्मेन कर्णे नित्यं विराजितः ।यक्षेन्द्रो यक्षनमितो यक्षसेनापतिर्बुधः ॥ ४०\।४४॥हरपादार्चनरतः करोतु मम शान्तिकम् ।धृतराष्ट्रो महातेजाः यक्षो यक्षाधिपः प्रभुः ॥ ४०\।४५॥दिव्यपट्टांशुकछन्नो मणिकाञ्चनभूषणः ।शिवप्रसादसमपन्नः करोतु मम शान्तिकम् ॥ ४०\।४६॥शिवप्रसादसम्पन्नः करोतु मम शान्तिकम् ।पूर्णभद्रो महायक्षो सर्वालङ्कारभूषितः ॥ ४०\।४७॥रत्नदीप्तेन देहेन पट्टेनातिविराजितः ।यक्षकोटिसहस्रेण परिवारितविग्रहः ॥ ४०\।४८॥रुद्रप्रणामपरमो रुद्रभक्तिसमन्वितः ।रुद्रार्चनसमायुक्तः करोतु मम शान्तिकम् ॥ ४०\।४९॥विरूपाक्षश्च यक्षेन्द्रः श्वेतवासा महाद्युतिः ।चारुकाञ्चनमालाभिः किङ्किणीरवकाञ्चितः ॥ ४१\।१॥विभूषितः सदाकालं वरदानैकतत्परः ।रुद्रपूजाकरो नित्यं करोतु मम शान्तिकम् ॥ ४१\।२॥अन्तरिक्षे च ये यक्षा ये यक्षाः सर्वसंस्थिताः ।गिरिकन्दरदुर्गेषु ये यक्षा भूतिवासिनः ॥ ४१\।३॥पातालवासिनो यक्षा नानारूपायुधोद्यताः ।शिवभक्ताः सुमनसः शिवपूजासमुत्सुकाः ॥ ४१\।४॥शान्तिं कुर्वन्तु मे हृष्टाः शान्ताः शान्तेन तेजसा ।यक्षिण्यो विविधाकारास्तथा यक्षकुमारकाः ॥ ४१\।५॥यक्षकन्या महाभागाः शिवध्यानैकतत्पराः ।शान्तिं स्वस्त्ययनं क्षेमं बलं कल्याणमेव च ॥ ४१\।६॥शान्तिं कुर्वन्तु सर्वे हरपदकमलोदारभावैक भृङ्गायक्षास्त्र्यक्षपदाम्बुजार्चनरता नागाःसदा पान्तु माम् ।सद्योजातप्रियाभिः गिरिवरजनिता पुण्यनद्योऽपि सद्यःपापं मे प्रविनाशयन्तु सततं शर्वार्चनासूद्यताः ॥ ४०\।५०॥

mahāvaiśravaṇo devo yakṣarājo mahārdhikaḥ || 40\|34||yakṣakoṭiparīvāraḥ yakṣā'saṅkhyeya saṃyutaḥ |mahāvibhavasampanno harapādārcane rataḥ || 40\|35||śāntiṃ karotu me prītaḥ padmapatrāyatekṣaṇaḥ |māṇibhadro mahāyakṣo maṇiratnavibhūtaḥ || 40\|36||manohareṇa hāreṇa kaṇṭhalagnena rājate |śivadhyānaparo nityaṃ śivapādābjapūjakaḥ || 40\|37||śāntiṃ karotu me nityaṃ sarvaroganivāraṇam |yakṣiṇī yakṣakanyābhiḥ parivāritavigrahā || 40\|38||rudrārcanaratā nityaṃ karotu mama śāntikam |suvīro nāma yakṣendro maṇikuṇḍalabhūṣaṇaḥ || 40\|39||lalāṭahemapaṭṭena śobhanena virājitaḥ |bahuyakṣasamākīrṇo yakṣairnamitavigrahaḥ || 40\|40||śivapūjārato nityaṃ karotu mama śāntikam |pañcago nāma yakṣendraḥ karṇikākaṭakojjvalaḥ || 40\|41||makuṭena vicitreṇa keyūrābhyāṃ virājitaḥ |yakṣakanyāsamāyukto yakṣakoṭisamanvitaḥ || 40\|42||harārcanarataḥ śrīmān karotu mama śāntikam |śrīmān vibhaṇḍako yakṣo nānāratnavibhūṣitaḥ || 40\|43||cārukuṇḍalayugmena karṇe nityaṃ virājitaḥ |yakṣendro yakṣanamito yakṣasenāpatirbudhaḥ || 40\|44||harapādārcanarataḥ karotu mama śāntikam |dhṛtarāṣṭro mahātejāḥ yakṣo yakṣādhipaḥ prabhuḥ || 40\|45||divyapaṭṭāṃśukachanno maṇikāñcanabhūṣaṇaḥ |śivaprasādasamapannaḥ karotu mama śāntikam || 40\|46||śivaprasādasampannaḥ karotu mama śāntikam |pūrṇabhadro mahāyakṣo sarvālaṅkārabhūṣitaḥ || 40\|47||ratnadīptena dehena paṭṭenātivirājitaḥ |yakṣakoṭisahasreṇa parivāritavigrahaḥ || 40\|48||rudrapraṇāmaparamo rudrabhaktisamanvitaḥ |rudrārcanasamāyuktaḥ karotu mama śāntikam || 40\|49||virūpākṣaśca yakṣendraḥ śvetavāsā mahādyutiḥ |cārukāñcanamālābhiḥ kiṅkiṇīravakāñcitaḥ || 41\|1||vibhūṣitaḥ sadākālaṃ varadānaikatatparaḥ |rudrapūjākaro nityaṃ karotu mama śāntikam || 41\|2||antarikṣe ca ye yakṣā ye yakṣāḥ sarvasaṃsthitāḥ |girikandaradurgeṣu ye yakṣā bhūtivāsinaḥ || 41\|3||pātālavāsino yakṣā nānārūpāyudhodyatāḥ |śivabhaktāḥ sumanasaḥ śivapūjāsamutsukāḥ || 41\|4||śāntiṃ kurvantu me hṛṣṭāḥ śāntāḥ śāntena tejasā |yakṣiṇyo vividhākārāstathā yakṣakumārakāḥ || 41\|5||yakṣakanyā mahābhāgāḥ śivadhyānaikatatparāḥ |śāntiṃ svastyayanaṃ kṣemaṃ balaṃ kalyāṇameva ca || 41\|6||śāntiṃ kurvantu sarve harapadakamalodārabhāvaika bhṛṅgāyakṣāstryakṣapadāmbujārcanaratā nāgāḥsadā pāntu mām |sadyojātapriyābhiḥ girivarajanitā puṇyanadyo'pi sadyaḥpāpaṃ me pravināśayantu satataṃ śarvārcanāsūdyatāḥ || 40\|50||

॥ इति शान्त्यध्यायः ४ ॥

|| iti śāntyadhyāyaḥ 4 ||

ईश्वर उवाच ।

īśvara uvāca |

(पर्वतसागरौशान्तिः)

(parvatasāgarauśāntiḥ)

सिद्धिमाशु प्रयच्छन्तु नित्यमेव समाहिताः ।पर्वताः सर्वतः सर्वे पर्वत्यश्च महर्धिकाः ॥ ४१\।७॥शिवभक्ताः सुमनसः शान्तिं कुर्वन्तु मे सदा ।समुद्राः सरितः सर्वे सागराश्च महर्धिकाः ॥ ४१\।८॥रत्नगर्भाश्च विविधा ये चान्ये सागरा भुवि ।रुद्रपूजापरा नित्यं कुर्वन्तु मम शान्तिकम् ॥ ४१\।९॥(राक्षसशान्तिः)

siddhimāśu prayacchantu nityameva samāhitāḥ |parvatāḥ sarvataḥ sarve parvatyaśca mahardhikāḥ || 41\|7||śivabhaktāḥ sumanasaḥ śāntiṃ kurvantu me sadā |samudrāḥ saritaḥ sarve sāgarāśca mahardhikāḥ || 41\|8||ratnagarbhāśca vividhā ye cānye sāgarā bhuvi |rudrapūjāparā nityaṃ kurvantu mama śāntikam || 41\|9||(rākṣasaśāntiḥ)

राक्षसाः सर्वतः सर्वे राक्षसा घोरारूपिणः ।राक्षसा ये महावीर्या राक्षसाश्च महाबलाः ॥ ४१\।१०॥स्थलस्था राक्षसा ये च अन्तरिक्षे च राक्षसाः ।पाताले राक्षसा ये तु नित्यं रुद्रार्चने रताः ॥ ४१\।११॥(प्रेतपिशाचादिशन्तिः)

rākṣasāḥ sarvataḥ sarve rākṣasā ghorārūpiṇaḥ |rākṣasā ye mahāvīryā rākṣasāśca mahābalāḥ || 41\|10||sthalasthā rākṣasā ye ca antarikṣe ca rākṣasāḥ |pātāle rākṣasā ye tu nityaṃ rudrārcane ratāḥ || 41\|11||(pretapiśācādiśantiḥ)

भैरवं यस्य रूपं तु प्रेतभस्मावगुण्ठितम् ।अनेकरूपधारिण्यो डाकिन्यश्च महाबलाः ॥ ४१\।१२॥अन्तरिक्षगता याश्च डाकिन्यः स्वर्गसंस्थिताः ।पाताले भूतले याश्च गिरिदुर्गेषु याः स्थिताः ॥ ४१\।१३॥रुद्रप्रणामपरमा रुद्रपूजापराः स्थिताः ।तृतीयं लोचनं खड्गं त्रिशूलं करपल्लवे ॥ ४१\।१४॥तेजसा तस्य देवस्य शान्तिं कुर्वन्तु मे सदा ।सर्वतो भूतरूपाढ्या महाभूता महोज्ज्वलाः ॥ ४१\।१५॥सर्वभूतस्थिताः सौम्याः सर्वे भूता मनोजवाः ।अन्तरिक्षे च ये भूता ये भूता भुवि संस्थिताः ॥ ४१\।१६॥पाताले भूतले भूता ये च भूतास्त्रिघामकाः ।खट्वाङ्गं यस्य विमलं कपालं करपल्लवे ॥ ४१\।१७॥तेजसा तस्य देवस्य शान्तिं कुर्वन्तु मे सदा ।प्रेताः प्रेतगणाः सर्वे सुप्रीताः सर्वतोमुखम् ॥ ४१\।१८॥अन्तरिक्षे च ये प्रेता ये प्रेता दिवि संस्थिताः ।पाताले भूतले चैव ये प्रेताः कामरूपिणः ॥ ४१\।१९॥श्मशानं निलयो यस्य वृषभो यस्य वाहनम् ।तेजसा तस्य देवस्य शान्तिं कुर्वन्तु मे सदा ॥ ४१\।२०॥ये पिशाचा महावीर्या ये पिशाचा महर्धिकाः ।ये पिशाचा भीषणाश्च पिशाचाः कामरूपिणः ॥ ४१\।२१॥नानारूपधराः सर्वे सर्वे सत्त्वगुणोत्तराः ।अन्तरिक्षे पिशाचा ये स्वर्गे ये च पिशाचकाः ॥ ४१\।२२॥भूतले ये पिशाचा ये पातालतलवासिनः ।चन्द्रार्धं मस्तके यस्य यस्य भस्म विभूषणम् ॥ ४१\।२३॥तेजसा तस्य देवस्य शान्तिं कुर्वन्तु मे सदा ।अपस्मारग्रहाः सर्वे सर्वे चापि ज्वरग्रहाः ॥ ४१\।२४॥गर्भबालग्रहा ये तु नानारोगग्रहाश्च ये ।अन्तरिक्षे ग्रहा ये च स्वर्गे ये च ग्रहोत्तराः ॥ ४१\।२५॥पाताले भूतले ये च ये ग्रहाः सर्वतो दिशः ।कण्ठे यस्य महानीलं भूषणं यस्य पन्नगाः ॥ ४१\।२६॥तेजसा तस्य देवस्य शान्तिं कुर्वन्तु मे सदा ।इति देवादयः सर्वे शिवज्ञानविधायिनः ॥ ४१\।२७॥कुर्वन्तु शान्तिं जगतः शिवभक्तेषु सर्वदा ।

bhairavaṃ yasya rūpaṃ tu pretabhasmāvaguṇṭhitam |anekarūpadhāriṇyo ḍākinyaśca mahābalāḥ || 41\|12||antarikṣagatā yāśca ḍākinyaḥ svargasaṃsthitāḥ |pātāle bhūtale yāśca giridurgeṣu yāḥ sthitāḥ || 41\|13||rudrapraṇāmaparamā rudrapūjāparāḥ sthitāḥ |tṛtīyaṃ locanaṃ khaḍgaṃ triśūlaṃ karapallave || 41\|14||tejasā tasya devasya śāntiṃ kurvantu me sadā |sarvato bhūtarūpāḍhyā mahābhūtā mahojjvalāḥ || 41\|15||sarvabhūtasthitāḥ saumyāḥ sarve bhūtā manojavāḥ |antarikṣe ca ye bhūtā ye bhūtā bhuvi saṃsthitāḥ || 41\|16||pātāle bhūtale bhūtā ye ca bhūtāstrighāmakāḥ |khaṭvāṅgaṃ yasya vimalaṃ kapālaṃ karapallave || 41\|17||tejasā tasya devasya śāntiṃ kurvantu me sadā |pretāḥ pretagaṇāḥ sarve suprītāḥ sarvatomukham || 41\|18||antarikṣe ca ye pretā ye pretā divi saṃsthitāḥ |pātāle bhūtale caiva ye pretāḥ kāmarūpiṇaḥ || 41\|19||śmaśānaṃ nilayo yasya vṛṣabho yasya vāhanam |tejasā tasya devasya śāntiṃ kurvantu me sadā || 41\|20||ye piśācā mahāvīryā ye piśācā mahardhikāḥ |ye piśācā bhīṣaṇāśca piśācāḥ kāmarūpiṇaḥ || 41\|21||nānārūpadharāḥ sarve sarve sattvaguṇottarāḥ |antarikṣe piśācā ye svarge ye ca piśācakāḥ || 41\|22||bhūtale ye piśācā ye pātālatalavāsinaḥ |candrārdhaṃ mastake yasya yasya bhasma vibhūṣaṇam || 41\|23||tejasā tasya devasya śāntiṃ kurvantu me sadā |apasmāragrahāḥ sarve sarve cāpi jvaragrahāḥ || 41\|24||garbhabālagrahā ye tu nānārogagrahāśca ye |antarikṣe grahā ye ca svarge ye ca grahottarāḥ || 41\|25||pātāle bhūtale ye ca ye grahāḥ sarvato diśaḥ |kaṇṭhe yasya mahānīlaṃ bhūṣaṇaṃ yasya pannagāḥ || 41\|26||tejasā tasya devasya śāntiṃ kurvantu me sadā |iti devādayaḥ sarve śivajñānavidhāyinaḥ || 41\|27||kurvantu śāntiṃ jagataḥ śivabhakteṣu sarvadā |

शिवज्ञानपरो भूत्वा स्तुत्वैवं शिवभक्तकान् ॥ ४१\।२८॥शिवध्यानपरो भूत्वा एतत्स्तोत्रमुदीरयेत् ।इत्युक्त्वा देवदेवस्य सन्निधौ नन्दिकेश्वरः ॥ ४१\।२९॥कृताञ्जलिपुटो भूत्वा देवं तुष्टाव हृष्टधीः ।

śivajñānaparo bhūtvā stutvaivaṃ śivabhaktakān || 41\|28||śivadhyānaparo bhūtvā etatstotramudīrayet |ityuktvā devadevasya sannidhau nandikeśvaraḥ || 41\|29||kṛtāñjalipuṭo bhūtvā devaṃ tuṣṭāva hṛṣṭadhīḥ |

नन्दिकेश्वर उवाच ।

nandikeśvara uvāca |

जयात्मयोगसंस्थाय जय संशुद्धचेतसे ॥ ४१\।३०॥जयदानेकरूपाय जयेशाय नमोऽस्तु तेजयोत्तमाय देवाय जयकल्याणरूपिणे ॥ ४१\।३१॥जय प्रणष्टमोहाय जयाजय्याय ते नमः ।

jayātmayogasaṃsthāya jaya saṃśuddhacetase || 41\|30||jayadānekarūpāya jayeśāya namo'stu tejayottamāya devāya jayakalyāṇarūpiṇe || 41\|31||jaya praṇaṣṭamohāya jayājayyāya te namaḥ |

जय शर्वाय देवाय सर्वेशाय महात्मने ॥ ४१\।३२॥जयलक्ष्मीविधानाय जय कीर्तिविधायिने ।जय वाक्यविशुद्धाय अतीताय नमो नमः ॥ ४१\।३३॥जय विष्विन्द्रवन्द्याय शिवशान्ताय ते नमः ।

jaya śarvāya devāya sarveśāya mahātmane || 41\|32||jayalakṣmīvidhānāya jaya kīrtividhāyine |jaya vākyaviśuddhāya atītāya namo namaḥ || 41\|33||jaya viṣvindravandyāya śivaśāntāya te namaḥ |

जय विज्ञानशुद्धदाय सर्वव्यापिन्नमो नमः ॥ ४१\।३४॥जय कान्तार्धदेहाय जय चन्द्रार्धधारिणे ।जय देवाधिदेवाय जय रुद्राय ते नमः ॥ ४१\।३५॥जय त्रिभुवनेशाय जय विख्यातमूर्तये ।जयाधाराय शर्वाय जगत्कर्त्रे नमो नमः ॥ ४१\।३६॥जय निर्मलदेहाय जय सर्वार्थदायिने ।जय भर्त्रे च हन्त्रे च जय त्रिपुरभेदिने ॥ ४१\।३७॥जय मन्मथनाशाय सर्वेशाय नमो नमः ॥

jaya vijñānaśuddhadāya sarvavyāpinnamo namaḥ || 41\|34||jaya kāntārdhadehāya jaya candrārdhadhāriṇe |jaya devādhidevāya jaya rudrāya te namaḥ || 41\|35||jaya tribhuvaneśāya jaya vikhyātamūrtaye |jayādhārāya śarvāya jagatkartre namo namaḥ || 41\|36||jaya nirmaladehāya jaya sarvārthadāyine |jaya bhartre ca hantre ca jaya tripurabhedine || 41\|37||jaya manmathanāśāya sarveśāya namo namaḥ ||

॥ इति शान्त्यध्यायः ५ ॥

|| iti śāntyadhyāyaḥ 5 ||

स्कन्द उवाच ।

skanda uvāca |

जैगीषव्य महाभाग शिवप्रोक्ताश्च शान्तयः ॥ ४१\।३०॥सर्वेषां शान्तिकाध्यायान् श्रुत्वा भक्तियुताश्च ये ।इत्येवं शान्तिकाध्यायं यः पठेच्छृणुयादपि ॥ ४१\।३९॥विधूय सर्वपापानि शिवलोके महीयते ।कन्यार्थी लभते कन्यां जयार्थी जयमाप्नुयात् ॥ ४१\।४०॥मोक्षार्थी लभते मोक्षं धनार्थी धनमाप्नुयात् ।अर्थकामो लभेदर्थं पुत्रकामो बहून् सुतान् ॥ ४१\।४१॥विद्यार्थी लभते विद्यां योगार्थी योगमाप्नुयात् ।राज्यार्थी लभते राज्यं ग्रामार्थी ग्राममाप्नुयात् ॥ ४१\।४२॥गर्भिणी लभते पुत्रं कन्या विन्दति सत्पतिम् ।यो यान् कामयते कामान् मानवः श्रवणादिह ॥ ४१\।४३॥तत्सर्वं शीघ्रमाप्नोति देवानां च प्रियो भवेत् ।श्रुत्वाऽध्यायमिमं पुण्यं सङ्ग्रामं प्रविशेन्नृपः ॥ ४१\।४४॥स निर्जित्याशु शत्रून् वै कल्याणैः परिपूर्यते ।अक्षयं मोदते कालमतिरस्कृतशासनः ॥ ४१\।४५॥सर्वव्याधिविनिर्मुक्तः पुत्रपौत्रैः प्रतिष्ठितः ।शान्त्यध्यायमिमं पुण्यमुद्दिश्यापि सकृत्पठेत् ॥ ४१\।४६॥तस्य रोगा न बाधन्ते वातपित्तादिसम्भवाः ।नाऽकालमरणं तस्य सर्वैश्चापि न दश्यते ॥ ४१\।४७॥विषं नाक्रमते देहे न जडत्वं न मूकता ।नोपसर्गभयं तस्य नचोत्पातभयं तथा ॥ ४१\।४८॥नाभिचारकृतैर्दीर्घैर्लिप्यते स कदाचन ।सर्वकामसमृद्धार्थो यः पठेत्तु दिने दिने ॥ ४१\।४९॥नित्यमूर्जितभक्त्या च व्याघातादि विवर्जितः ।(नित्यमूर्जितभक्त्या च दुर्गव्याघातवर्जितः ।)यत्पुण्यं सर्वतीर्थानां गङ्गादीनां विशेषतः ॥ ४१\।५०॥यत्पुण्यं कोटिगुणितं प्राप्नोति श्रवणादिह ।दशानां राजसूयानामग्निष्टोमशतस्य च ॥ ४१\।५१॥श्रवणात्फलमाप्नोति कोटिकोटिगुणोत्तरम् ।कोटिजन्मसु यत्पुण्यं जनार्दनसुपूजया ॥ ४१\।५२॥तत्पुण्यं कोटिगुणितं प्राप्नोति श्रवणादिह ।अवध्यः सर्वभूतानामन्येषां च विशेषतः ॥ ४१\।५३॥जीवेद्वर्षशतं साग्रं सर्वव्याधिविवर्जितः ।गोघ्नश्चैव कृतघ्नश्च भ्रूणहा गुरुतल्पगः ॥ ४१\।५४॥शरणागतघाती च मित्रविश्वासघातकः ।दुष्टपापसमाचारः मातृहा पितृहा तथा ॥ ४१\।५५॥श्रवणादस्य भावेन मुच्यते सर्वपातकैः ।शान्त्यध्यायमिमं पुण्यं न देयं यस्य कस्यचित् ॥ ४१\।५६॥शिवभक्ताय दातव्यं शिवेन कथितं पुरा ।नित्यमूर्जितभक्तिश्च भक्तिव्याघातवर्जितः ॥ ४१\।५७॥सर्वकामसमृद्धार्थो यः पठेत्तु दिने दिने ।तस्माद् भक्त्या पुण्यदोऽयं श्रोतव्यः शिवमिच्छता ॥ ४१\।५८॥ईश्वर उवाच ।

jaigīṣavya mahābhāga śivaproktāśca śāntayaḥ || 41\|30||sarveṣāṃ śāntikādhyāyān śrutvā bhaktiyutāśca ye |ityevaṃ śāntikādhyāyaṃ yaḥ paṭhecchṛṇuyādapi || 41\|39||vidhūya sarvapāpāni śivaloke mahīyate |kanyārthī labhate kanyāṃ jayārthī jayamāpnuyāt || 41\|40||mokṣārthī labhate mokṣaṃ dhanārthī dhanamāpnuyāt |arthakāmo labhedarthaṃ putrakāmo bahūn sutān || 41\|41||vidyārthī labhate vidyāṃ yogārthī yogamāpnuyāt |rājyārthī labhate rājyaṃ grāmārthī grāmamāpnuyāt || 41\|42||garbhiṇī labhate putraṃ kanyā vindati satpatim |yo yān kāmayate kāmān mānavaḥ śravaṇādiha || 41\|43||tatsarvaṃ śīghramāpnoti devānāṃ ca priyo bhavet |śrutvā'dhyāyamimaṃ puṇyaṃ saṅgrāmaṃ praviśennṛpaḥ || 41\|44||sa nirjityāśu śatrūn vai kalyāṇaiḥ paripūryate |akṣayaṃ modate kālamatiraskṛtaśāsanaḥ || 41\|45||sarvavyādhivinirmuktaḥ putrapautraiḥ pratiṣṭhitaḥ |śāntyadhyāyamimaṃ puṇyamuddiśyāpi sakṛtpaṭhet || 41\|46||tasya rogā na bādhante vātapittādisambhavāḥ |nā'kālamaraṇaṃ tasya sarvaiścāpi na daśyate || 41\|47||viṣaṃ nākramate dehe na jaḍatvaṃ na mūkatā |nopasargabhayaṃ tasya nacotpātabhayaṃ tathā || 41\|48||nābhicārakṛtairdīrghairlipyate sa kadācana |sarvakāmasamṛddhārtho yaḥ paṭhettu dine dine || 41\|49||nityamūrjitabhaktyā ca vyāghātādi vivarjitaḥ |(nityamūrjitabhaktyā ca durgavyāghātavarjitaḥ |)yatpuṇyaṃ sarvatīrthānāṃ gaṅgādīnāṃ viśeṣataḥ || 41\|50||yatpuṇyaṃ koṭiguṇitaṃ prāpnoti śravaṇādiha |daśānāṃ rājasūyānāmagniṣṭomaśatasya ca || 41\|51||śravaṇātphalamāpnoti koṭikoṭiguṇottaram |koṭijanmasu yatpuṇyaṃ janārdanasupūjayā || 41\|52||tatpuṇyaṃ koṭiguṇitaṃ prāpnoti śravaṇādiha |avadhyaḥ sarvabhūtānāmanyeṣāṃ ca viśeṣataḥ || 41\|53||jīvedvarṣaśataṃ sāgraṃ sarvavyādhivivarjitaḥ |goghnaścaiva kṛtaghnaśca bhrūṇahā gurutalpagaḥ || 41\|54||śaraṇāgataghātī ca mitraviśvāsaghātakaḥ |duṣṭapāpasamācāraḥ mātṛhā pitṛhā tathā || 41\|55||śravaṇādasya bhāvena mucyate sarvapātakaiḥ |śāntyadhyāyamimaṃ puṇyaṃ na deyaṃ yasya kasyacit || 41\|56||śivabhaktāya dātavyaṃ śivena kathitaṃ purā |nityamūrjitabhaktiśca bhaktivyāghātavarjitaḥ || 41\|57||sarvakāmasamṛddhārtho yaḥ paṭhettu dine dine |tasmād bhaktyā puṇyado'yaṃ śrotavyaḥ śivamicchatā || 41\|58||īśvara uvāca |

शान्त्यध्यायवरान् शिवे हृदि गतान् कुर्वन् स शान्तिं लभेत्रोगाणामयुतात् तथा नृपभयाद्भूपोऽपि मुक्तो भवेत् ।चोरारिप्रभवादथोग्रहभवापस्मारदोषाद् ग्रहैसद्यो मुच्यत एव शान्तिकजपाद्भतोऽथ मुक्तो भवेत् ॥ ४१\।५९॥युक्ता एव भवन्ति शुद्धहृदया मय्येव सक्ताः शिवेशश्वत्ते भुवनावने द्विजवराःस्वालोकने किम्पुनः ।व्यक्ताव्यक्तगतीषु तेषु सुलभो मोक्षोऽक्षताङ्गेषु वैवक्तव्यं किमुमासहाय चरणाम्भोजप्रभावादराः ॥ ४१\।६०॥

śāntyadhyāyavarān śive hṛdi gatān kurvan sa śāntiṃ labhetrogāṇāmayutāt tathā nṛpabhayādbhūpo'pi mukto bhavet |corāriprabhavādathograhabhavāpasmāradoṣād grahaisadyo mucyata eva śāntikajapādbhato'tha mukto bhavet || 41\|59||yuktā eva bhavanti śuddhahṛdayā mayyeva saktāḥ śiveśaśvatte bhuvanāvane dvijavarāḥsvālokane kimpunaḥ |vyaktāvyaktagatīṣu teṣu sulabho mokṣo'kṣatāṅgeṣu vaivaktavyaṃ kimumāsahāya caraṇāmbhojaprabhāvādarāḥ || 41\|60||

॥ इति शान्त्यध्यायफलकथनम् ॥

|| iti śāntyadhyāyaphalakathanam ||

॥ इति शिवरहस्यान्तर्गते ईश्वारादिप्रोक्तं शान्त्यध्यायः सम्पूर्णः ॥

|| iti śivarahasyāntargate īśvārādiproktaṃ śāntyadhyāyaḥ sampūrṇaḥ ||

॥ श्रीशिवरहस्यम् ।महादेवाख्यः एकादशमांशः ।अध्यायः ३७४२॥

|| śrīśivarahasyam |mahādevākhyaḥ ekādaśamāṃśaḥ |adhyāyaḥ 3742||

– ॥ श्रीशिवरहस्यम् ।महादेवाख्यः एकादशमांशः ।अध्यायः ३७-४२॥

– || śrīśivarahasyam |mahādevākhyaḥ ekādaśamāṃśaḥ |adhyāyaḥ 37-42||