ईश्वरप्रार्थनास्तोत्रम् Ishvaraprarthanastotram

श्रीगणेशाय नमः ॥ईश्वरं शरणं यामि क्रोधमोहादिपीडितः ।अनाथं पतितं दीनं पाहि मां परमेश्वर ॥ १॥

śrīgaṇeśāya namaḥ ||īśvaraṃ śaraṇaṃ yāmi krodhamohādipīḍitaḥ |anāthaṃ patitaṃ dīnaṃ pāhi māṃ parameśvara || 1||

प्रभुस्त्वं जगतां स्वामिन् वश्यं सर्वं तवास्ति च ।अहमज्ञो विमूढोऽस्मि त्वां न जानामि हे प्रभो ॥ २॥

prabhustvaṃ jagatāṃ svāmin vaśyaṃ sarvaṃ tavāsti ca |ahamajño vimūḍho'smi tvāṃ na jānāmi he prabho || 2||

ब्रह्मा त्वं च तथा विष्णुस्त्वमेव च महेश्वरः ।तव तत्त्वं न जानामि पाहि मां परमेश्वर ॥ ३॥

brahmā tvaṃ ca tathā viṣṇustvameva ca maheśvaraḥ |tava tattvaṃ na jānāmi pāhi māṃ parameśvara || 3||

त्वं पिता त्वं च मे माता त्वं बन्धुः करुणानिधे ।त्वां विना न हि चान्योऽस्ति मम दुःस्वविनाशकः ॥ ४॥

tvaṃ pitā tvaṃ ca me mātā tvaṃ bandhuḥ karuṇānidhe |tvāṃ vinā na hi cānyo'sti mama duḥsvavināśakaḥ || 4||

अन्तकाले त्वमेवासि मम दुःखविनाशकः ।तस्माद्वै शरणोऽहं ते रक्ष मां हे जगत्पते ॥ ५॥

antakāle tvamevāsi mama duḥkhavināśakaḥ |tasmādvai śaraṇo'haṃ te rakṣa māṃ he jagatpate || 5||

पितापुत्रादयः सर्वे संसारे सुखभागिनः ।विपत्तौ परिजातायां कोऽपि वार्तां च पृच्छति ॥ ६॥

pitāputrādayaḥ sarve saṃsāre sukhabhāginaḥ |vipattau parijātāyāṃ ko'pi vārtāṃ ca pṛcchati || 6||

कामक्रोधादिभिर्युक्तो लोभमोहादिकैरपि ।तान्विनश्यात्मनो वैरीन् पाहि मां परमेश्वर ॥ ७॥

kāmakrodhādibhiryukto lobhamohādikairapi |tānvinaśyātmano vairīn pāhi māṃ parameśvara || 7||

अनेके रक्षिताः पूर्वं भवता दुःखपीडिताः ।क्व गता ते दया चाद्य पाहि मां हे जगत्पते ॥ ८॥

aneke rakṣitāḥ pūrvaṃ bhavatā duḥkhapīḍitāḥ |kva gatā te dayā cādya pāhi māṃ he jagatpate || 8||

न त्वां विना कश्चिदस्ति संसारे मम रक्षकः ।शरणं त्वां प्रपन्नोऽहं त्राहि मां परमेश्वर ॥ ९॥

na tvāṃ vinā kaścidasti saṃsāre mama rakṣakaḥ |śaraṇaṃ tvāṃ prapanno'haṃ trāhi māṃ parameśvara || 9||

ईश्वरप्रार्थनास्तोत्रं योगानन्देन निर्मितम् ।यः पठेद्भक्तिसंयुक्तः तस्येशः सम्प्रसीदति ॥ १०॥

īśvaraprārthanāstotraṃ yogānandena nirmitam |yaḥ paṭhedbhaktisaṃyuktaḥ tasyeśaḥ samprasīdati || 10||

इति श्रीयोगानन्दतीर्थविरचितं ईश्वरप्रार्थनास्तोत्रं सम्पूर्णम् ॥

iti śrīyogānandatīrthaviracitaṃ īśvaraprārthanāstotraṃ sampūrṇam ||