शिवस्तोत्रम् (अगस्त्यकृतं ०१ ताम्रपर्णीमाहात्म्यान्तर्गतम् नमः कल्याणवेषाय कलिकल्मषनाशिने) Agastyakritam 01 Shiva Stotram

अगस्त्य उवाच ।नमः कल्याणवेषाय कलिकल्मषनाशिने ।नमो विहारिणे विश्वविबुधानां हृदङ्गणे ।नमः स्वान्तनिवासाय शान्तानां समचेतसाम् ॥ ७१॥

agastya uvāca |namaḥ kalyāṇaveṣāya kalikalmaṣanāśine |namo vihāriṇe viśvavibudhānāṃ hṛdaṅgaṇe |namaḥ svāntanivāsāya śāntānāṃ samacetasām || 71||

असाधारणकृत्याय नमस्ते कृत्तिवाससे ।नीलग्रीवाय नित्याय निस्समाप्त्युदयात्मने ॥ ७२॥

asādhāraṇakṛtyāya namaste kṛttivāsase |nīlagrīvāya nityāya nissamāptyudayātmane || 72||

परवामार्धवपुषे नमः क्षेमङ्कराय ते ।अर्धं मरकताकारमर्धं स्फटिकसन्निभम् ॥ ७३॥

paravāmārdhavapuṣe namaḥ kṣemaṅkarāya te |ardhaṃ marakatākāramardhaṃ sphaṭikasannibham || 73||

अद्वैतमपि यत्तेजो द्वैतीभूतं नमो नमः ।कान्तं कल्याणनिलयं कलिताशेषकौतुकम् ॥ ७४॥

advaitamapi yattejo dvaitībhūtaṃ namo namaḥ |kāntaṃ kalyāṇanilayaṃ kalitāśeṣakautukam || 74||

कन्दर्पकोटिलावण्यं युवानं साम्बमीश्वरम् ।मङ्गलाय महस्तोमप्रस्तुताश्चर्यरूपिणे ॥ ७५॥

kandarpakoṭilāvaṇyaṃ yuvānaṃ sāmbamīśvaram |maṅgalāya mahastomaprastutāścaryarūpiṇe || 75||

गौरीनाथाय नाथाय नमस्सोमार्धधारिणे ।शिवाय परिपूर्णाय पूर्णानन्दाय वेधसे ॥ ७६॥

gaurīnāthāya nāthāya namassomārdhadhāriṇe |śivāya paripūrṇāya pūrṇānandāya vedhase || 76||

महावृषभवाहाय महादेवाय ते नमः ।शूलिने नीलकण्ठाय फालचन्द्रावतंसिने ॥ ७७॥

mahāvṛṣabhavāhāya mahādevāya te namaḥ |śūline nīlakaṇṭhāya phālacandrāvataṃsine || 77||

भवाय भवनाशाय पशूनां पतये नमः ।जय नाथ कृपादृष्ट्या वत्सं सेचय मां प्रभो ॥ ७८॥

bhavāya bhavanāśāya paśūnāṃ pataye namaḥ |jaya nātha kṛpādṛṣṭyā vatsaṃ secaya māṃ prabho || 78||

मा मुञ्च पादयुगलादनाथं त्वत्परिग्रहम् ।एकस्मादागसो द्वाभ्यां त्रिभ्यो वा रक्ष मां मुहुः ॥ ७९॥

mā muñca pādayugalādanāthaṃ tvatparigraham |ekasmādāgaso dvābhyāṃ tribhyo vā rakṣa māṃ muhuḥ || 79||

बहुभ्यो हि महादेव मां पाहि करुणानिधे ।त्वत्सन्निधिविधानेन हृष्टोऽस्मि नितरां विभो ॥ ८०॥

bahubhyo hi mahādeva māṃ pāhi karuṇānidhe |tvatsannidhividhānena hṛṣṭo'smi nitarāṃ vibho || 80||

आह्लादय कृपादृष्ट्या वृष्ट्या भुवमिवाम्बुदः ।घर्मतप्तोऽध्वगोध्वानमतीत्य बहुयोजनम् ॥ ८१॥

āhlādaya kṛpādṛṣṭyā vṛṣṭyā bhuvamivāmbudaḥ |gharmatapto'dhvagodhvānamatītya bahuyojanam || 81||

अङ्घ्रिपङ्केरुहच्छायमाप्तं पाहि जगद्गुरो ।न वेद्मि त्वत्पदाम्भोजादपरं दैवतं परम् ॥ ८२॥

aṅghripaṅkeruhacchāyamāptaṃ pāhi jagadguro |na vedmi tvatpadāmbhojādaparaṃ daivataṃ param || 82||

अत एव महादेव त्वामस्मि शरणं गतः ।प्रसीद गौरीनाथ त्वं प्रसीद गिरिजापते ॥ ८३॥

ata eva mahādeva tvāmasmi śaraṇaṃ gataḥ |prasīda gaurīnātha tvaṃ prasīda girijāpate || 83||

प्रसीद सततं मह्यं नाथ कान्तिमतीपते ।नमो वेणुवनेशाय महाकल्याणरूपिणे ॥ ८४॥

prasīda satataṃ mahyaṃ nātha kāntimatīpate |namo veṇuvaneśāya mahākalyāṇarūpiṇe || 84||

हाटकाम्भोजिनीतीरवासिने शूलिने नमः ।ताम्रातरङ्गसङ्क्लिन्नपादाम्भोजाय ते नमः ॥ ८५॥

hāṭakāmbhojinītīravāsine śūline namaḥ |tāmrātaraṅgasaṅklinnapādāmbhojāya te namaḥ || 85||

ब्रह्मवृद्धपुरीशाय पूर्वपूर्वाय ते नमः ।इति ताम्रपर्णीमाहात्म्ये षोडशाध्यायान्तर्गतंअगस्त्यकृतं शिवस्तोत्रं सम्पूर्णम् ।ताम्रपर्णीमाहात्म्य । अध्याय १६/७१८५॥ताम्रपर्णीमाहात्म्य । अध्याय १६/७१-८५॥

brahmavṛddhapurīśāya pūrvapūrvāya te namaḥ |iti tāmraparṇīmāhātmye ṣoḍaśādhyāyāntargataṃagastyakṛtaṃ śivastotraṃ sampūrṇam |tāmraparṇīmāhātmya | adhyāya 16/7185||tāmraparṇīmāhātmya | adhyāya 16/71-85||