श्रीराधास्तोत्रम् ०९ Ganeshakritam Shri Radha Stotram

गणेश उवाच ।तव पूजा जगन्मातर्लोकशिक्षाकरी शुभे ।ब्रह्मस्वरूपा भवती कृष्णवक्षःस्थलस्थिता ॥ ३॥

gaṇeśa uvāca |tava pūjā jaganmātarlokaśikṣākarī śubhe |brahmasvarūpā bhavatī kṛṣṇavakṣaḥsthalasthitā || 3||

यत्पादपद्ममतुलं ध्यायन्ते ते सुदुर्लभम् ।सुरा ब्रह्मेशशेषाद्या मुनीन्द्राः सनकादयः ॥ ४॥

yatpādapadmamatulaṃ dhyāyante te sudurlabham |surā brahmeśaśeṣādyā munīndrāḥ sanakādayaḥ || 4||

जीवन्मुक्ताश्च भक्ताश्च सिद्धेन्द्राः कपिलादयः ।तस्य प्राणाधिदेवी त्वं प्रिया प्राणाधिका परा ॥ ५॥

jīvanmuktāśca bhaktāśca siddhendrāḥ kapilādayaḥ |tasya prāṇādhidevī tvaṃ priyā prāṇādhikā parā || 5||

वामाङ्गनिर्मिता राधा दक्षिणाङ्गश्च माधवः ।महालक्ष्मीर्जगन्माता तव वामाङ्गनिर्मिता ॥ ६॥

vāmāṅganirmitā rādhā dakṣiṇāṅgaśca mādhavaḥ |mahālakṣmīrjaganmātā tava vāmāṅganirmitā || 6||

वसोः सर्वनिवासस्य प्रसूस्त्वं परमेश्वरी ।वेदानां जगतामेव मूल्प्रकृतिरीश्वरी ॥ ७॥

vasoḥ sarvanivāsasya prasūstvaṃ parameśvarī |vedānāṃ jagatāmeva mūlprakṛtirīśvarī || 7||

सर्वाः प्राकृतिका मातः सृष्ट्यां च त्वद्विभूतयः ।विश्वानि कार्यरूपाणि त्वं च कारणरूपिणी ॥ ८॥

sarvāḥ prākṛtikā mātaḥ sṛṣṭyāṃ ca tvadvibhūtayaḥ |viśvāni kāryarūpāṇi tvaṃ ca kāraṇarūpiṇī || 8||

प्रलये ब्रह्मणः पाते तन्निमेषो हरेरपि ।आदौ राधां समुच्चार्य पश्चात्कृष्णं परात्परम् ॥ ९॥

pralaye brahmaṇaḥ pāte tannimeṣo harerapi |ādau rādhāṃ samuccārya paścātkṛṣṇaṃ parātparam || 9||

स एव पण्डितो योगी गोलोकं याति लीलया ।व्यतिक्रमे महापापी ब्रह्महत्यां लभेद्ध्रुवम् ॥ १०॥

sa eva paṇḍito yogī golokaṃ yāti līlayā |vyatikrame mahāpāpī brahmahatyāṃ labheddhruvam || 10||

जगतां भवती माता परमात्मा पिता हरिः ।पितुरेव गुरुर्माता पूज्या वन्द्या परात्परा ॥ ११॥

jagatāṃ bhavatī mātā paramātmā pitā hariḥ |pitureva gururmātā pūjyā vandyā parātparā || 11||

भजते देवमन्यं वा कृष्णं वा सर्वकारणम् ।पुण्यक्षेत्रे महामूढो यदि निन्दति राधिकाम् ॥ १२॥

bhajate devamanyaṃ vā kṛṣṇaṃ vā sarvakāraṇam |puṇyakṣetre mahāmūḍho yadi nindati rādhikām || 12||

वंशहानिर्भवेत्तस्य दुःखशोकमिहैव च ।पच्यते निरये घोरे यावच्चन्द्रदिवाकरौ ॥ १३॥

vaṃśahānirbhavettasya duḥkhaśokamihaiva ca |pacyate niraye ghore yāvaccandradivākarau || 13||

गुरुश्च ज्ञानोद्गिरणाज्ज्ञानं स्यान्मन्त्रतन्त्रयोः ।स च मन्त्रश्च तत्तन्त्रं भक्तिः स्याद्ध्रुवयोर्यतः ॥ १४॥

guruśca jñānodgiraṇājjñānaṃ syānmantratantrayoḥ |sa ca mantraśca tattantraṃ bhaktiḥ syāddhruvayoryataḥ || 14||

निषेव्य मन्त्रं देवानां जीवा जन्मनि जन्मनि ।भक्ता भवन्ति दुर्गायाः पादपद्मे सुदुर्लभे ॥ १५॥

niṣevya mantraṃ devānāṃ jīvā janmani janmani |bhaktā bhavanti durgāyāḥ pādapadme sudurlabhe || 15||

निषेव्य मन्त्रे शम्भोश्च जगतां कारणस्य च ।तदा प्राप्नोति युवयोः पादपद्मं सुदुर्लभम् ॥ १६॥

niṣevya mantre śambhośca jagatāṃ kāraṇasya ca |tadā prāpnoti yuvayoḥ pādapadmaṃ sudurlabham || 16||

युवयोः पादपद्मं च दुर्लभं प्राप्य पुण्यवान् ।क्षणार्धं षोडशांशं च नहि मुञ्चति दैवतः ॥ १७॥

yuvayoḥ pādapadmaṃ ca durlabhaṃ prāpya puṇyavān |kṣaṇārdhaṃ ṣoḍaśāṃśaṃ ca nahi muñcati daivataḥ || 17||

भक्त्या च युवयोर्मन्त्रं गृहीत्वा वैष्णवादपि ।स्तवं वा कवचं वाऽपि कर्ममूलनिकृन्तनम् ॥ १८॥

bhaktyā ca yuvayormantraṃ gṛhītvā vaiṣṇavādapi |stavaṃ vā kavacaṃ vā'pi karmamūlanikṛntanam || 18||

योजपेत् परया भक्त्या पुण्यक्षेत्रे च भारते ।पुरुषाणां सहस्रं च त्वात्मना सार्धमुद्धरेत् ॥ १९॥

yojapet parayā bhaktyā puṇyakṣetre ca bhārate |puruṣāṇāṃ sahasraṃ ca tvātmanā sārdhamuddharet || 19||

गुरुमभ्यर्च्य विधिवद्वस्त्रालङ्कारचन्दनैः ।कवचं धारयेद्यो हि विष्णुतुल्यो भवेद्ध्रुवम् ॥ २०॥

gurumabhyarcya vidhivadvastrālaṅkāracandanaiḥ |kavacaṃ dhārayedyo hi viṣṇutulyo bhaveddhruvam || 20||

इति ब्रह्मवैवर्तपुराणे श्रीकृष्णजन्मखण्डे पूर्वभागेचतुर्विंशाधिकशततमाध्यायान्तर्गतं गणेशकृतंश्रीराधास्तोत्रं समाप्तम् ।ब्रह्मवैवर्तपुराण । श्रीकृष्णजन्म, उत्तरभाग । अध्याय १२४/३२०॥ब्रह्मवैवर्तपुराण । श्रीकृष्णजन्म, उत्तरभाग । अध्याय १२४/३-२०॥

iti brahmavaivartapurāṇe śrīkṛṣṇajanmakhaṇḍe pūrvabhāgecaturviṃśādhikaśatatamādhyāyāntargataṃ gaṇeśakṛtaṃśrīrādhāstotraṃ samāptam |brahmavaivartapurāṇa | śrīkṛṣṇajanma, uttarabhāga | adhyāya 124/320||brahmavaivartapurāṇa | śrīkṛṣṇajanma, uttarabhāga | adhyāya 124/3-20||