सूर्यस्तोत्रम् ०४ Suryastotram 4

श्रीगणेशाय नमः ॥ॐ सप्ताश्वं समारुह्यारुणसारथिमुत्तमम् ।श्वेतपद्मधरं देवं त्वां सूर्यं प्रणमाम्यहम् ॥ १॥

śrīgaṇeśāya namaḥ ||oṃ saptāśvaṃ samāruhyāruṇasārathimuttamam |śvetapadmadharaṃ devaṃ tvāṃ sūryaṃ praṇamāmyaham || 1||

बन्धूकपुष्पसङ्काशं हारकुण्डलभूषणम् ।एकचक्रधरं देवं त्वां सूर्यं प्रणमाम्यहम् ॥ २॥

bandhūkapuṣpasaṅkāśaṃ hārakuṇḍalabhūṣaṇam |ekacakradharaṃ devaṃ tvāṃ sūryaṃ praṇamāmyaham || 2||

लोहितस्वर्णसङ्काशं सर्वलोकपितामहम् ।सर्वव्याधिहरं देवं त्वां सूर्यं प्रणमाम्यहम् ॥ ३॥

lohitasvarṇasaṅkāśaṃ sarvalokapitāmaham |sarvavyādhiharaṃ devaṃ tvāṃ sūryaṃ praṇamāmyaham || 3||

त्वं देव ईश्वरः शक्रब्रह्मविष्णुमहेशराट् ।परं धर्मं परं ज्ञानं त्वां सूर्यं प्रणमाम्यहम् ॥ ४॥

tvaṃ deva īśvaraḥ śakrabrahmaviṣṇumaheśarāṭ |paraṃ dharmaṃ paraṃ jñānaṃ tvāṃ sūryaṃ praṇamāmyaham || 4||

त्वं देवलोककर्ता च कीर्त्यात्मा करणांशकम् ।तेजो रुद्रधरं दैवं त्वां सूर्यं प्रणमाम्यहम् ॥ ५॥

tvaṃ devalokakartā ca kīrtyātmā karaṇāṃśakam |tejo rudradharaṃ daivaṃ tvāṃ sūryaṃ praṇamāmyaham || 5||

पृथिव्यप्तेजो वायुश्चात्माप्याकाशमेव च ।सर्वज्ञं श्रीजगन्नाथं त्वां सूर्यं प्रणमाम्यहम् ॥ ६॥

pṛthivyaptejo vāyuścātmāpyākāśameva ca |sarvajñaṃ śrījagannāthaṃ tvāṃ sūryaṃ praṇamāmyaham || 6||

अखण्डमण्डलाकारं व्याप्तं येन चराचरम् ।गगनालिङ्गमाराध्यं त्वां सूर्यं प्रणमाम्यहम् ॥ ७॥

akhaṇḍamaṇḍalākāraṃ vyāptaṃ yena carācaram |gaganāliṅgamārādhyaṃ tvāṃ sūryaṃ praṇamāmyaham || 7||

निर्मलं निर्विकल्पं च निर्विकारं निरामयम् ॥जगत्कर्ता जगद्धर्तास्त्वां सूर्यं प्रणमाम्यहम् ॥ ८॥

nirmalaṃ nirvikalpaṃ ca nirvikāraṃ nirāmayam ||jagatkartā jagaddhartāstvāṃ sūryaṃ praṇamāmyaham || 8||

सूर्यस्तोत्रं जपेन्नित्यं ग्रहपीडाविनाशनम् ।धनं धान्यं मनोवाञ्छा श्रियः प्राप्नोति नित्यशः ॥ ९॥

sūryastotraṃ japennityaṃ grahapīḍāvināśanam |dhanaṃ dhānyaṃ manovāñchā śriyaḥ prāpnoti nityaśaḥ || 9||

शिवरात्रिसहस्रेषु कृत्वा जागरणं भवेत् ।यत्फलं लभते सर्वं तद्वै सूर्यस्य दर्शनात् ॥ १०॥

śivarātrisahasreṣu kṛtvā jāgaraṇaṃ bhavet |yatphalaṃ labhate sarvaṃ tadvai sūryasya darśanāt || 10||

एकादशीसहस्राणि सङ्क्रान्त्ययुतमेव च ।सप्तकोडिसु दर्शेषु तत्फलं सूर्यदर्शनात् ॥ ११॥

ekādaśīsahasrāṇi saṅkrāntyayutameva ca |saptakoḍisu darśeṣu tatphalaṃ sūryadarśanāt || 11||

अश्वमेधसहस्राणि वाजपेयशतानि च ।कोटिकन्याप्रदानानि तत्फलं सूर्यदर्शनात् ॥ १२॥

aśvamedhasahasrāṇi vājapeyaśatāni ca |koṭikanyāpradānāni tatphalaṃ sūryadarśanāt || 12||

गयापिण्डः परं दाने पितृणां च समुद्धरम् ।दृष्ट्वा ह्यग्र्येश्वरं देवं तत्फलं समवाप्नुयात् ॥ १३॥

gayāpiṇḍaḥ paraṃ dāne pitṛṇāṃ ca samuddharam |dṛṣṭvā hyagryeśvaraṃ devaṃ tatphalaṃ samavāpnuyāt || 13||

अग्र्येश्वरसमोपेतो सोमनाथस्तथैव च ।कैदारमुदकं पीत्वा पुनर्जन्म न विद्यते ॥ १४॥

agryeśvarasamopeto somanāthastathaiva ca |kaidāramudakaṃ pītvā punarjanma na vidyate || 14||

सूर्यस्तोत्रं पठेन्नित्यमेकचित्तः समाहितः ।दुःखदारिद्र्यनिर्मुक्तः सूर्यलोकं स गच्छति ॥ १५॥

sūryastotraṃ paṭhennityamekacittaḥ samāhitaḥ |duḥkhadāridryanirmuktaḥ sūryalokaṃ sa gacchati || 15||

इति सूर्यस्तोत्रं सम्पूर्णम् ॥

iti sūryastotraṃ sampūrṇam ||