सूर्यस्तुतिः १ Suryastutih

ॐ नम आदित्याय ॥श्रीभैरवीभगवन्देवदेवेश भक्तानुग्रहकारक ।देहास्वास्थ्यं परं दुःखं भवेदिति न संशयः ॥ १॥

oṃ nama ādityāya ||śrībhairavībhagavandevadeveśa bhaktānugrahakāraka |dehāsvāsthyaṃ paraṃ duḥkhaṃ bhavediti na saṃśayaḥ || 1||

रोगैर्जीर्णो यदा देहस्तदा कं दैवतं श्रयेत् ।यं स्तुत्वा स्वास्थ्यमाप्नोति तदुपासनमादिश ॥ २॥

rogairjīrṇo yadā dehastadā kaṃ daivataṃ śrayet |yaṃ stutvā svāsthyamāpnoti tadupāsanamādiśa || 2||

श्रीभैरवःशृणु देवि प्रवक्ष्यामि लोकानुग्रहकाम्यया ।रोगाजगरग्रस्तानां जन्तूनां पापचेतसाम् ॥ ३॥

śrībhairavaḥśṛṇu devi pravakṣyāmi lokānugrahakāmyayā |rogājagaragrastānāṃ jantūnāṃ pāpacetasām || 3||

स्मरणं धारणं चैव सूर्यस्यार्चनमेव च ।ज्वरातिसाररोगानां नाशनं स्मरणादपि ॥ ४॥

smaraṇaṃ dhāraṇaṃ caiva sūryasyārcanameva ca |jvarātisārarogānāṃ nāśanaṃ smaraṇādapi || 4||

कुष्ठविचर्चिकादद्रूसन्निपातादि नाशनम् ।सूक्ष्मातिसूक्ष्मं यत्तेजो तं देवं शरणं श्रये ॥ ५॥

kuṣṭhavicarcikādadrūsannipātādi nāśanam |sūkṣmātisūkṣmaṃ yattejo taṃ devaṃ śaraṇaṃ śraye || 5||

वारयेद्विघ्नराशींश्च तमांसि च मुहुर्मुहुः ।अन्तर्वातौधध्वंसी यस्तं देवं शरणं श्रये ॥ ६॥

vārayedvighnarāśīṃśca tamāṃsi ca muhurmuhuḥ |antarvātaudhadhvaṃsī yastaṃ devaṃ śaraṇaṃ śraye || 6||

आकाशरूपो विश्वात्मा देवःप्रमकटितः प्रभुः ।द्योतनात्त्रिषु लोकेषु तं दैवं शरणं श्रये ॥ ७॥

ākāśarūpo viśvātmā devaḥpramakaṭitaḥ prabhuḥ |dyotanāttriṣu lokeṣu taṃ daivaṃ śaraṇaṃ śraye || 7||

ध्यायनात्सर्वलोकेषु चिन्तनादपराजितम् ।बुद्।ह्ध्यात्सर्वसमायुक्तं तं देवं शरणं श्रये ॥ ८॥

dhyāyanātsarvalokeṣu cintanādaparājitam |bud|hdhyātsarvasamāyuktaṃ taṃ devaṃ śaraṇaṃ śraye || 8||

धीप्रेरकं तु यत्तेजः सर्वव्यापकमव्ययम् ।बुद्धेः पारङ्गतं यत्तच्छरण्यं शरणं श्रये ॥ ९॥

dhīprerakaṃ tu yattejaḥ sarvavyāpakamavyayam |buddheḥ pāraṅgataṃ yattaccharaṇyaṃ śaraṇaṃ śraye || 9||

यत्तदादिशते बुद्धिर्भर्गः सदसदात्मकम् ।आर्तो भक्त्या च परमं शरणं तं व्रजाम्यहम् ॥ १०॥

yattadādiśate buddhirbhargaḥ sadasadātmakam |ārto bhaktyā ca paramaṃ śaraṇaṃ taṃ vrajāmyaham || 10||

रक्तपुष्पसमायुक्तं गृहीत्वोद्यन्तमर्चयेत् ।प्रतिश्लोकमर्धपुष्पं दत्त्वा प्राञ्जलिकं स्थितम् ॥ ११॥

raktapuṣpasamāyuktaṃ gṛhītvodyantamarcayet |pratiślokamardhapuṣpaṃ dattvā prāñjalikaṃ sthitam || 11||

सर्वे रोगाः प्रणश्यन्ति लूता विस्फोटकादयः ।भगन्दरशिरोरोगमूत्ररोगाश्मरीयुताः ॥ १२॥

sarve rogāḥ praṇaśyanti lūtā visphoṭakādayaḥ |bhagandaraśirorogamūtrarogāśmarīyutāḥ || 12||

श्वेतकुष्ठाद्यतीसारपायुकुक्षिसमुद्भवाः ।त्वग्रोगा ये क्षुद्ररोगा ये त्वन्ये च महेश्वरि ॥ १३॥

śvetakuṣṭhādyatīsārapāyukukṣisamudbhavāḥ |tvagrogā ye kṣudrarogā ye tvanye ca maheśvari || 13||

ते सर्वे सम्प्रणश्यन्ति स्तोत्रस्यास्यानुकीर्तनात् ।आपन्न आपदो मुच्येद्बद्धो मुच्येत बन्धनात् ॥ १४॥

te sarve sampraṇaśyanti stotrasyāsyānukīrtanāt |āpanna āpado mucyedbaddho mucyeta bandhanāt || 14||

अपुत्रः पुत्रमाप्नोति कन्या विन्दति सत्पतिम् ।भीतो भयात्प्रमुच्येत चेत्याज्ञा पारमेश्वरी ॥ १५॥

aputraḥ putramāpnoti kanyā vindati satpatim |bhīto bhayātpramucyeta cetyājñā pārameśvarī || 15||

इदं रहस्यं परमं नाख्येयं यस्य कस्यचित् ।गुह्यं गुह्यतमं लोके वेदतन्त्रसमुत्थितम् ॥ १६॥

idaṃ rahasyaṃ paramaṃ nākhyeyaṃ yasya kasyacit |guhyaṃ guhyatamaṃ loke vedatantrasamutthitam || 16||

सर्वतः सारमुद्धृत्यतवस्नेहात्प्रकाशितम् ।नातः परतरं स्तोत्रं सूर्यस्याराधनं परम् ॥ १७॥

sarvataḥ sāramuddhṛtyatavasnehātprakāśitam |nātaḥ parataraṃ stotraṃ sūryasyārādhanaṃ param || 17||

अत्र पूज्यो रविर्देवि स्तोत्रेणानेन भक्तितः ।सायं प्रातर्नमस्कृत्य नान्नमद्याज्जलं पिबेत् ॥ १८॥

atra pūjyo ravirdevi stotreṇānena bhaktitaḥ |sāyaṃ prātarnamaskṛtya nānnamadyājjalaṃ pibet || 18||

वर्षेणैव भवेत्सिद्धिरिति सत्यं वरानने ।बद्धपद्मासनो देवः प्रसन्नो भक्तवत्सलः ॥ १९॥

varṣeṇaiva bhavetsiddhiriti satyaṃ varānane |baddhapadmāsano devaḥ prasanno bhaktavatsalaḥ || 19||

सप्ताश्वः सप्तजिह्वश्च द्विभुजः पातु नो रविः ।अकृतानि च पुष्पाणि सलिलारुणचन्दनैः ॥ २०॥

saptāśvaḥ saptajihvaśca dvibhujaḥ pātu no raviḥ |akṛtāni ca puṣpāṇi salilāruṇacandanaiḥ || 20||

अर्घ्यं दत्त्वा प्रयत्नेन सूर्यनामानि कीर्तयेत् ।नमस्ते विश्वरूपाय नमस्ते ब्रह्मरूपिणे ॥ २१॥

arghyaṃ dattvā prayatnena sūryanāmāni kīrtayet |namaste viśvarūpāya namaste brahmarūpiṇe || 21||

सहस्ररश्मये नित्यं नमस्ते सर्वतेजसे ।नमस्ते रुद्रवपुषे नमस्ते भक्तवत्सल ॥ २२॥

sahasraraśmaye nityaṃ namaste sarvatejase |namaste rudravapuṣe namaste bhaktavatsala || 22||

पद्मनाम नमस्तेऽस्तु कुण्डलाङ्गदशोभित ।नमस्ते सर्वलोकेश जगत्सर्वं प्रबोधसे ॥ २३॥

padmanāma namaste'stu kuṇḍalāṅgadaśobhita |namaste sarvalokeśa jagatsarvaṃ prabodhase || 23||

सुकृतं दुष्कृतं चैव सर्वं पश्यसि सर्वग ।सत्यदेव नमस्तेऽस्तु प्रसीद मम भास्कर ॥ २४॥

sukṛtaṃ duṣkṛtaṃ caiva sarvaṃ paśyasi sarvaga |satyadeva namaste'stu prasīda mama bhāskara || 24||

दिवाकर नमस्तेऽस्तु प्रभाकर नमोऽस्तु ते ।आश्रमस्थस्ततः पूजाप्रतिमां चापि पूजयेत् ॥ २५॥

divākara namaste'stu prabhākara namo'stu te |āśramasthastataḥ pūjāpratimāṃ cāpi pūjayet || 25||

उदयंस्तु महाभानुस्तेजसा चाभयङ्करः ।सहस्ररश्मिदीप्तश्च ह्यादित्यः प्रीयतां मम ॥ २६॥

udayaṃstu mahābhānustejasā cābhayaṅkaraḥ |sahasraraśmidīptaśca hyādityaḥ prīyatāṃ mama || 26||

इति सूर्यस्तुतिः समाप्ता ।

iti sūryastutiḥ samāptā |