सूर्यार्यास्तोत्रम् Suryaryastotra

श्री गणेशाय नमः ॥शुकतुण्डच्छविसवितुश्चण्डरुचेः पुण्डरीकवनबन्धोः ।मण्डलमुदितं वन्दे कुण्डलमाखण्डलाशायाः ॥ १॥

śrī gaṇeśāya namaḥ ||śukatuṇḍacchavisavituścaṇḍaruceḥ puṇḍarīkavanabandhoḥ |maṇḍalamuditaṃ vande kuṇḍalamākhaṇḍalāśāyāḥ || 1||

यस्योदयास्तसमये सुरमुकुटनिघृष्टचरणकमलोऽपि ।कुरुतेञ्जलिं त्रिनेत्रः स जयति धाम्नां निधिः सूर्यः ॥ २॥

yasyodayāstasamaye suramukuṭanighṛṣṭacaraṇakamalo'pi |kuruteñjaliṃ trinetraḥ sa jayati dhāmnāṃ nidhiḥ sūryaḥ || 2||

उदयाचलतिलकाय प्रणतोऽस्मि विवस्वते ग्रहेशाय ।अम्बरचूडामणये दिग्वनिताकर्णपूराय ॥ ३॥

udayācalatilakāya praṇato'smi vivasvate graheśāya |ambaracūḍāmaṇaye digvanitākarṇapūrāya || 3||

जयति जनानन्दकरः करनिकरनिरस्ततिमिरसङ्घातः ।लोकालोकालोकः कमलारुणमण्डलः सूर्यः ॥ ४॥

jayati janānandakaraḥ karanikaranirastatimirasaṅghātaḥ |lokālokālokaḥ kamalāruṇamaṇḍalaḥ sūryaḥ || 4||

प्रतिबोधितकमलवनः कृतघटनश्चक्रवाकमिथुनानाम् ।दर्शितसमस्तभुवनः परहितनिरतो रविः सदा जयति ॥ ५॥

pratibodhitakamalavanaḥ kṛtaghaṭanaścakravākamithunānām |darśitasamastabhuvanaḥ parahitanirato raviḥ sadā jayati || 5||

अपनयतु सकलकलिकृतमलपटलं सप्रतप्तकनकाभः ।अरविन्दवृन्दविघटनपटुतरकिरणोत्करः सविता ॥ ६॥

apanayatu sakalakalikṛtamalapaṭalaṃ saprataptakanakābhaḥ |aravindavṛndavighaṭanapaṭutarakiraṇotkaraḥ savitā || 6||

उदयाद्रिचारुचामर हरितहयखुरपरिहितरेणुराग ।हरितहय हरितपरिकर गगनाङ्गनदीपक नमस्तेऽस्तु ॥ ७॥

udayādricārucāmara haritahayakhuraparihitareṇurāga |haritahaya haritaparikara gaganāṅganadīpaka namaste'stu || 7||

उदितवति त्वयि विकसति मुकुलीयति समस्तमस्तमितबिम्बे ।न ह्यन्यस्मिन्दिनकर सकलं कमलायते भुवनम् ॥ ८॥

uditavati tvayi vikasati mukulīyati samastamastamitabimbe |na hyanyasmindinakara sakalaṃ kamalāyate bhuvanam || 8||

जयति रविरुदयसमये बालातपः कनकसन्निभो यस्य ।कुसुमाञ्जलिरिव जलधौ तरन्ति रथसप्तयः सप्त ॥ ९॥

jayati ravirudayasamaye bālātapaḥ kanakasannibho yasya |kusumāñjaliriva jaladhau taranti rathasaptayaḥ sapta || 9||

आर्याः साम्बपुरे सप्त आकाशात्पतिता भुवि ।यस्य कण्ठे गृहे वापि न स लक्ष्म्या वियुज्यते ॥ १०॥

āryāḥ sāmbapure sapta ākāśātpatitā bhuvi |yasya kaṇṭhe gṛhe vāpi na sa lakṣmyā viyujyate || 10||

आर्याः सप्त सदा यस्तु सप्तम्यां सप्तधा जपेत् ।तस्य गेहं च दीपं च पद्मा सत्यं न मुञ्चति ॥ ११॥

āryāḥ sapta sadā yastu saptamyāṃ saptadhā japet |tasya gehaṃ ca dīpaṃ ca padmā satyaṃ na muñcati || 11||

निधिरेश दरिद्राणां रोगिणां परमौषधम् ।सिद्धिः सकलकार्याणां गाथेयं संसृता रवेः ॥ १२॥

nidhireśa daridrāṇāṃ rogiṇāṃ paramauṣadham |siddhiḥ sakalakāryāṇāṃ gātheyaṃ saṃsṛtā raveḥ || 12||

इति श्रीयाज्ञवल्क्यविरचितं सूर्यार्यास्तोत्रं सम्पूर्णम् ।

iti śrīyājñavalkyaviracitaṃ sūryāryāstotraṃ sampūrṇam |