सूर्यकवचस्तोत्रम् २ Suryakavachastotram 2

श्रीगणेशाय नमः ।याज्ञवल्क्य उवाच ।शृणुष्व मुनिशार्दूल सूर्यस्य कवचं शुभम् ।शरीरारोग्यदं दिव्यं सर्वसौभाग्यदायकम् ॥ १॥

śrīgaṇeśāya namaḥ |yājñavalkya uvāca |śṛṇuṣva muniśārdūla sūryasya kavacaṃ śubham |śarīrārogyadaṃ divyaṃ sarvasaubhāgyadāyakam || 1||

देदीप्यमानमुकुटं स्फुरन्मकरकुण्डलम् ।ध्यात्वा सहस्रकिरणं स्तोत्रमेतदुदीरयेत् ॥ २॥

dedīpyamānamukuṭaṃ sphuranmakarakuṇḍalam |dhyātvā sahasrakiraṇaṃ stotrametadudīrayet || 2||

शिरो मे भास्करः पातु ललाटं मेऽमितद्युतिः ।नेत्रे दिनमणिः पातु श्रवणे वासरेश्वरः ॥ ३॥

śiro me bhāskaraḥ pātu lalāṭaṃ me'mitadyutiḥ |netre dinamaṇiḥ pātu śravaṇe vāsareśvaraḥ || 3||

घ्राणं घर्मघृणिः पातु वदनं वेदवाहनः ।जिह्वां मे मानदः पातु कण्ठं मे सुरवन्दितः ॥ ४॥

ghrāṇaṃ gharmaghṛṇiḥ pātu vadanaṃ vedavāhanaḥ |jihvāṃ me mānadaḥ pātu kaṇṭhaṃ me suravanditaḥ || 4||

स्कन्धौ प्रभाकरः पातु वक्षः पातु जनप्रियः ।पातु पादौ द्वादशात्मा सर्वाङ्गं सकलेश्वरः ॥ ५॥

skandhau prabhākaraḥ pātu vakṣaḥ pātu janapriyaḥ |pātu pādau dvādaśātmā sarvāṅgaṃ sakaleśvaraḥ || 5||

सूर्यरक्षात्मकं स्तोत्रं लिखित्वा भूर्जपत्रके ।दधाति यः करे तस्य वशगाः सर्वसिद्धयः ॥ ६॥

sūryarakṣātmakaṃ stotraṃ likhitvā bhūrjapatrake |dadhāti yaḥ kare tasya vaśagāḥ sarvasiddhayaḥ || 6||

सुस्नातो यो जपेत्सम्यग्योऽधीते स्वस्थमानसः ।स रोगमुक्तो दीर्घायुः सुखं पुष्टिं च विन्दति ॥ ७॥

susnāto yo japetsamyagyo'dhīte svasthamānasaḥ |sa rogamukto dīrghāyuḥ sukhaṃ puṣṭiṃ ca vindati || 7||

॥ इति श्रीमद्याज्ञवल्क्यमुनिविरचितं सूर्यकवचस्तोत्रं सम्पूर्णम् ॥

|| iti śrīmadyājñavalkyamuniviracitaṃ sūryakavacastotraṃ sampūrṇam ||