लक्ष्मीनृसिंहप्रपत्तिः १ Shri Lakshminrisimha Prapatti

श्री श्रीनिवासाह्वययोगिवर्यं नारायणं योगिवरं तथैव ।श्रीयोगिवर्यं रघुवीरवेदकोटीरसंज्ञं गुरुमाश्रयामि ॥ १॥

śrī śrīnivāsāhvayayogivaryaṃ nārāyaṇaṃ yogivaraṃ tathaiva |śrīyogivaryaṃ raghuvīravedakoṭīrasaṃjñaṃ gurumāśrayāmi || 1||

अहोबिले गारुडशैलमध्ये कृपावशात्कल्पितसन्निधानम् ।लक्ष्म्या समालिङ्गितवामभागं लक्ष्मीनृसिंहं शरणं प्रपद्ये ॥ २॥

ahobile gāruḍaśailamadhye kṛpāvaśātkalpitasannidhānam |lakṣmyā samāliṅgitavāmabhāgaṃ lakṣmīnṛsiṃhaṃ śaraṇaṃ prapadye || 2||

श्रीवण्शठारातियतीन्द्रमाद्यं प्रेम्णा स्वयम्प्रेषमनुप्रदाय । (श्रीमच्छठाराति)स्वाराधने प्रेरयति स्म यस्तं लक्ष्मीनृसिंहं शरणं प्रपद्ये ॥ ३॥

śrīvaṇśaṭhārātiyatīndramādyaṃ premṇā svayampreṣamanupradāya | (śrīmacchaṭhārāti)svārādhane prerayati sma yastaṃ lakṣmīnṛsiṃhaṃ śaraṇaṃ prapadye || 3||

सर्वस्य लोकस्य समीहितानां प्रदानदीक्षावशतः सदैव ।श्रिया समेतं श्रितदोषहन्त्र्या लक्ष्मीनृसिंहं शरणं प्रपद्ये ॥ ४॥

sarvasya lokasya samīhitānāṃ pradānadīkṣāvaśataḥ sadaiva |śriyā sametaṃ śritadoṣahantryā lakṣmīnṛsiṃhaṃ śaraṇaṃ prapadye || 4||

यस्याभवद्भक्तजनार्तिहन्तुः पितृत्वमन्येष्वविचार्य तूर्णम् ।स्तम्भेऽवतारस्तमनन्यलभ्यं लक्ष्मीनृसिंहं शरणं प्रपद्ये ॥ ५॥

yasyābhavadbhaktajanārtihantuḥ pitṛtvamanyeṣvavicārya tūrṇam |stambhe'vatārastamananyalabhyaṃ lakṣmīnṛsiṃhaṃ śaraṇaṃ prapadye || 5||

यमीक्षितुं देवगणोऽतिरुष्टं शत्रौ न शक्नोति चतुर्मुखादिः ।प्रसादितो भक्तजनेन यस्तं लक्ष्मीनृसिंहं शरणं प्रपद्ये ॥ ६॥

yamīkṣituṃ devagaṇo'tiruṣṭaṃ śatrau na śaknoti caturmukhādiḥ |prasādito bhaktajanena yastaṃ lakṣmīnṛsiṃhaṃ śaraṇaṃ prapadye || 6||

वामत्वमद्य त्यज संश्रितेषु नास्तीह कश्चित्किल नापराधी ।लक्ष्म्येति वामाङ्कगयोच्यमानं लक्ष्मीनृसिंहं शरणं प्रपद्ये ॥ ७॥

vāmatvamadya tyaja saṃśriteṣu nāstīha kaścitkila nāparādhī |lakṣmyeti vāmāṅkagayocyamānaṃ lakṣmīnṛsiṃhaṃ śaraṇaṃ prapadye || 7||

श्रीवीरवद्राघववेदमौलिं योगीन्द्रक्लृप्तैश्शुभतापपुण्ड्रैः ।नामादिभिर्मां युतमातनोद्यस्तं श्रीनृसिंहं शरणं प्रपद्ये ॥ ८॥

śrīvīravadrāghavavedamauliṃ yogīndraklṛptaiśśubhatāpapuṇḍraiḥ |nāmādibhirmāṃ yutamātanodyastaṃ śrīnṛsiṃhaṃ śaraṇaṃ prapadye || 8||

श्रीमद्रहस्यत्रयसारपाठप्रारम्भकाले तव सर्वसिद्धिः ।स्यादित्युपश्रुत्यभिधायकं मे लक्ष्मीनृसिंहं शरणं प्रपद्ये ॥ ९॥

śrīmadrahasyatrayasārapāṭhaprārambhakāle tava sarvasiddhiḥ |syādityupaśrutyabhidhāyakaṃ me lakṣmīnṛsiṃhaṃ śaraṇaṃ prapadye || 9||

भास्यप्रदानावसरे तु वीररघूद्वहाम्नायशिखार्यरूपी ।स्वप्नागतो भाष्यमदत्त यो मे लक्ष्मीनृसिंहं शरणं प्रपद्ये ॥ १०॥

bhāsyapradānāvasare tu vīraraghūdvahāmnāyaśikhāryarūpī |svapnāgato bhāṣyamadatta yo me lakṣmīnṛsiṃhaṃ śaraṇaṃ prapadye || 10||

यः श्रीनिवासाख्यमुनीन्द्रतो मां सम्प्राप्तवेदान्तयुगं व्यतानीत् ।तदर्पितं स्वीकृतमद्भरं तं लक्ष्मीनृसिंहं शरणं प्रपद्ये ॥ ११॥

yaḥ śrīnivāsākhyamunīndrato māṃ samprāptavedāntayugaṃ vyatānīt |tadarpitaṃ svīkṛtamadbharaṃ taṃ lakṣmīnṛsiṃhaṃ śaraṇaṃ prapadye || 11||

स्वप्ने रमावासमुनीन्द्ररूपी स्वयं समागत्य ममापि देवः ।त्रिदण्डकाषायमदान्मुदा यस्तं लक्ष्मीनृसिंहं शरणं प्रपद्ये ॥ १२॥

svapne ramāvāsamunīndrarūpī svayaṃ samāgatya mamāpi devaḥ |tridaṇḍakāṣāyamadānmudā yastaṃ lakṣmīnṛsiṃhaṃ śaraṇaṃ prapadye || 12||

आराधनं स्वस्य कथं मयेति भीतं सदा पद्मलतामुखेन ।आश्वास्य मामप्यकरोत्कृतार्थं लक्ष्मीनृसिंहं शरणं प्रपद्ये ॥ १३॥

ārādhanaṃ svasya kathaṃ mayeti bhītaṃ sadā padmalatāmukhena |āśvāsya māmapyakarotkṛtārthaṃ lakṣmīnṛsiṃhaṃ śaraṇaṃ prapadye || 13||

शठारिनारायणयोगिवर्यपराङ्कुशस्वामि पराङ्कुशाद्यैः ।यः पूजितः श्रीनिधियोगिमुख्यैर्लक्ष्मीनृसिंहं शरणं प्रपद्ये ॥ १४॥

śaṭhārinārāyaṇayogivaryaparāṅkuśasvāmi parāṅkuśādyaiḥ |yaḥ pūjitaḥ śrīnidhiyogimukhyairlakṣmīnṛsiṃhaṃ śaraṇaṃ prapadye || 14||

नारायणश्रीरघुवीरवेदकोटीरनारायणरमानिवासैः ।योगीश्वरैरन्वहमर्चितो यस्तं लक्ष्मीनृसिंहं शरणं प्रपद्ये ॥ १५॥

nārāyaṇaśrīraghuvīravedakoṭīranārāyaṇaramānivāsaiḥ |yogīśvarairanvahamarcito yastaṃ lakṣmīnṛsiṃhaṃ śaraṇaṃ prapadye || 15||

त्वद्दत्तवाचा तव किङ्करेण त्वत्प्रीतिकामेन मया कृतेन ।स्तोत्रेण लक्ष्मीनृहरेः स विष्णुः प्रीतो भव त्वं करुणार्द्रदृष्टिः ॥ १६॥

tvaddattavācā tava kiṅkareṇa tvatprītikāmena mayā kṛtena |stotreṇa lakṣmīnṛhareḥ sa viṣṇuḥ prīto bhava tvaṃ karuṇārdradṛṣṭiḥ || 16||

पराङ्कुशाख्येन तपोधनेन लक्ष्मीनृसिंहस्य कृता प्रपत्तिः ।पापठ्यते येन भवेत्स तस्य पूर्णं कृपापूर्णकटाक्षपात्रम् ॥ १७॥

parāṅkuśākhyena tapodhanena lakṣmīnṛsiṃhasya kṛtā prapattiḥ |pāpaṭhyate yena bhavetsa tasya pūrṇaṃ kṛpāpūrṇakaṭākṣapātram || 17||

इति श्रीमद्भिः श्रीवण्शठकोप श्रीवेदान्तदेशिकयतीन्द्रमहादेशिकैरनुगृहिता श्रीलक्ष्मीनृसिंहप्रपत्तिः समाप्ता ॥

iti śrīmadbhiḥ śrīvaṇśaṭhakopa śrīvedāntadeśikayatīndramahādeśikairanugṛhitā śrīlakṣmīnṛsiṃhaprapattiḥ samāptā ||