कृष्णस्तुतिर्मङ्गलम् Shri Krishnastutirmangalam

नमः परमकल्याण नमस्ते विश्वमङ्गल ।वासुदेवाय शान्ताय यदूनां पतये नमः ॥ १॥

namaḥ paramakalyāṇa namaste viśvamaṅgala |vāsudevāya śāntāya yadūnāṃ pataye namaḥ || 1||

नमोऽस्तु ते महायोगिन् प्रपन्नमनुशाधि माम् ।यथा त्वच्चरणाम्भोजे रतिः स्यादनपायिनी ॥ २॥

namo'stu te mahāyogin prapannamanuśādhi mām |yathā tvaccaraṇāmbhoje ratiḥ syādanapāyinī || 2||

कृष्णाय वासुदेवाय देवकीनन्दनाय च ।नन्दगोपकुमाराय गोविन्दाय नमो नमः ॥ ३॥

kṛṣṇāya vāsudevāya devakīnandanāya ca |nandagopakumārāya govindāya namo namaḥ || 3||

नमः पङ्कजनाभाय नमः पङ्कजमालिने ।नमः पङ्कजनेत्राय नमस्ते पङ्कजाङ्घ्रये ॥ ४॥

namaḥ paṅkajanābhāya namaḥ paṅkajamāline |namaḥ paṅkajanetrāya namaste paṅkajāṅghraye || 4||

नमो ब्रह्मण्यदेवाय गोब्राह्मणहिताय च ।जगद्धिताय कृष्णाय गोविन्दाय नमो नमः ॥ ५॥

namo brahmaṇyadevāya gobrāhmaṇahitāya ca |jagaddhitāya kṛṣṇāya govindāya namo namaḥ || 5||

राधिकाऽऽलिङ्गिताङ्गाय नमो रासविहारिणे ।राजीवायतनेत्राय रसिकेशाय ते नमः ॥ ६॥

rādhikā''liṅgitāṅgāya namo rāsavihāriṇe |rājīvāyatanetrāya rasikeśāya te namaḥ || 6||

मुग्धगोपवधूत्तुङ्गकुचमण्डलमर्दिने ।मुरलीगानलोलाय मुकुन्दायास्तु मङ्गलम् ॥ ७॥

mugdhagopavadhūttuṅgakucamaṇḍalamardine |muralīgānalolāya mukundāyāstu maṅgalam || 7||

नित्योत्सवो भवेत्तेषां नित्यश्रीर्नित्यमङ्गलम् ।येषां हृदिस्थो भगवान् मङ्गलायतनं हरिः ॥ ८॥

nityotsavo bhavetteṣāṃ nityaśrīrnityamaṅgalam |yeṣāṃ hṛdistho bhagavān maṅgalāyatanaṃ hariḥ || 8||

लाभस्तेषां जयस्तेषां कुतस्तेषां पराभवः ।येषामिन्दीवरश्यामो हृदये सुप्रतिष्ठितः ॥ ९॥

lābhasteṣāṃ jayasteṣāṃ kutasteṣāṃ parābhavaḥ |yeṣāmindīvaraśyāmo hṛdaye supratiṣṭhitaḥ || 9||

नन्दहस्तमवलम्ब्य पाणिना मन्दमन्दमरविन्दलोचनः ।सञ्चरन् क्वणितकिङ्किणीरवः सन्ततं मम तनोतु मङ्गलम् ॥ १०॥

nandahastamavalambya pāṇinā mandamandamaravindalocanaḥ |sañcaran kvaṇitakiṅkiṇīravaḥ santataṃ mama tanotu maṅgalam || 10||

इति श्रीकृष्णस्तुतिः मङ्गलं सम्पूर्णम् ।

iti śrīkṛṣṇastutiḥ maṅgalaṃ sampūrṇam |