कृष्णस्तोत्रम् (वसुदेवकृतम् ब्रह्मवैवर्तपुराणान्तर्गतम्) Shri Krishna stotra by Vasudeva

श्री गणेशाय नमः ।वसुदेव उवाचत्वामतीन्द्रियमव्यक्तमक्षरं निर्गुणं विभुम् ।ध्यानासाध्यं च सर्वेषां परमात्मानमीश्वरम् ॥ १॥

śrī gaṇeśāya namaḥ |vasudeva uvācatvāmatīndriyamavyaktamakṣaraṃ nirguṇaṃ vibhum |dhyānāsādhyaṃ ca sarveṣāṃ paramātmānamīśvaram || 1||

स्वेच्छामयं सर्वरूपं स्वेच्छारूपधरं परम् ।निर्लिप्तं परमं ब्रह्म बीजरूपं सनातनम् ॥ २॥

svecchāmayaṃ sarvarūpaṃ svecchārūpadharaṃ param |nirliptaṃ paramaṃ brahma bījarūpaṃ sanātanam || 2||

स्थूलात्स्थूलतरं प्राप्तमतिसूक्ष्ममदर्शनम् ।स्थितं सर्वशरीरेषु साक्षिरूपमदृश्यकम् ॥ ३॥

sthūlātsthūlataraṃ prāptamatisūkṣmamadarśanam |sthitaṃ sarvaśarīreṣu sākṣirūpamadṛśyakam || 3||

शरीरवन्तं सगुणमशरीरं गुणोत्करं ।प्रकृतिं प्रकृतीशं च प्राकृतं प्रकृतेः परम् ॥ ४॥

śarīravantaṃ saguṇamaśarīraṃ guṇotkaraṃ |prakṛtiṃ prakṛtīśaṃ ca prākṛtaṃ prakṛteḥ param || 4||

सर्वेशं सर्वरूपं च सर्वान्तकरमव्ययम् ।सर्वाधारं निराधारं निर्व्यूहं स्तौमि किं विभुम् ॥ ५॥

sarveśaṃ sarvarūpaṃ ca sarvāntakaramavyayam |sarvādhāraṃ nirādhāraṃ nirvyūhaṃ staumi kiṃ vibhum || 5||

अनन्तः स्तवनेऽशक्तोऽशक्ता देवी सरस्वती ।यं वा स्तोतुमशक्तश्च पञ्चवक्त्रः षडाननः ॥ ६॥

anantaḥ stavane'śakto'śaktā devī sarasvatī |yaṃ vā stotumaśaktaśca pañcavaktraḥ ṣaḍānanaḥ || 6||

चतुर्मुखो वेदकर्ता यं स्तोतुमक्षमः सदा ।गणेशो न समर्थश्च योगीन्द्राणां गुरोर्गुरुः ॥ ७॥

caturmukho vedakartā yaṃ stotumakṣamaḥ sadā |gaṇeśo na samarthaśca yogīndrāṇāṃ gurorguruḥ || 7||

ऋषयो देवताश्चैव मुनीन्द्रमनुमानवाः ।स्वप्ने तेषामदृश्यं च त्वामेवं किं स्तुवन्ति ते ॥ ८॥

ṛṣayo devatāścaiva munīndramanumānavāḥ |svapne teṣāmadṛśyaṃ ca tvāmevaṃ kiṃ stuvanti te || 8||

श्रुतयः स्तवनेऽशक्ताः किं स्तुवन्ति विपश्चितः ।विहायैवं शरीरं च बालो भवितुमर्हसि ॥ ९॥

śrutayaḥ stavane'śaktāḥ kiṃ stuvanti vipaścitaḥ |vihāyaivaṃ śarīraṃ ca bālo bhavitumarhasi || 9||

वसुदेवकृतं स्तोत्रं त्रिसन्ध्यं यः पठेन्नरः ।भक्तिं दास्यमवाप्नोति श्रीकृष्णचरणाम्बुजे ॥ १०॥

vasudevakṛtaṃ stotraṃ trisandhyaṃ yaḥ paṭhennaraḥ |bhaktiṃ dāsyamavāpnoti śrīkṛṣṇacaraṇāmbuje || 10||

विशिष्टं पुत्रं लभते हरिदासं गुणान्वितम् ।सङ्कटं निस्तरेत्तूर्णं शत्रुभीतेः प्रमुच्यते ॥ ११॥

viśiṣṭaṃ putraṃ labhate haridāsaṃ guṇānvitam |saṅkaṭaṃ nistarettūrṇaṃ śatrubhīteḥ pramucyate || 11||

॥ इति श्री ब्रह्मवैवर्तमहापुराणे वसुदेवकृतंश्रीकृष्णस्तोत्रं सम्पूर्णम् ॥

|| iti śrī brahmavaivartamahāpurāṇe vasudevakṛtaṃśrīkṛṣṇastotraṃ sampūrṇam ||