दुर्गाध्यानम् २ Shri Durga Dhyanam (2)

जटाजूटसमायुक्तामर्द्धेन्दुकृतशेखराम् ।लोचनत्रयसंयुक्तां पूर्णेन्दुसदृशाननाम् ॥ १॥

jaṭājūṭasamāyuktāmarddhendukṛtaśekharām |locanatrayasaṃyuktāṃ pūrṇendusadṛśānanām || 1||

अतसीपुष्पवर्णाभां सुप्रतिष्ठां सुलोचनाम् ।नवयौवनसम्पन्नां सर्वाभरणभूषिताम् ॥ २॥

atasīpuṣpavarṇābhāṃ supratiṣṭhāṃ sulocanām |navayauvanasampannāṃ sarvābharaṇabhūṣitām || 2||

सुचारुदशनां तद्वत् पीनोन्नतपयोधराम् ।त्रिभङ्गस्थानसंस्थानां महिषासुरमर्दिनीम् ॥ ३॥

sucārudaśanāṃ tadvat pīnonnatapayodharām |tribhaṅgasthānasaṃsthānāṃ mahiṣāsuramardinīm || 3||

मृणालायतसंस्पर्शदशबाहुसमन्विताम् ।त्रिशूलं दक्षिणे पाणौ खड्गं चक्रं क्रमादधः ॥ ४॥

mṛṇālāyatasaṃsparśadaśabāhusamanvitām |triśūlaṃ dakṣiṇe pāṇau khaḍgaṃ cakraṃ kramādadhaḥ || 4||

तीक्ष्णबाणं तथा शक्तिं दक्षिणे सन्निवेशयेत् ।खेटकं पूर्णचापञ्च पाशमङ्कुशमेव च ॥ ५॥

tīkṣṇabāṇaṃ tathā śaktiṃ dakṣiṇe sanniveśayet |kheṭakaṃ pūrṇacāpañca pāśamaṅkuśameva ca || 5||

घण्टां वा परशुं वापि वामतः सन्निवेशयेत् ।अधस्तान्महिषं तद्वद्विशिरस्कं प्रदर्शयेत् ॥ ६॥

ghaṇṭāṃ vā paraśuṃ vāpi vāmataḥ sanniveśayet |adhastānmahiṣaṃ tadvadviśiraskaṃ pradarśayet || 6||

शिरश्छेदोद्भवं तद्वद्दानवं खड्गपाणिनम् ।हृदि शूलेन निर्भिन्नं निर्यदन्त्रविभूषितम् ॥ ७॥

śiraśchedodbhavaṃ tadvaddānavaṃ khaḍgapāṇinam |hṛdi śūlena nirbhinnaṃ niryadantravibhūṣitam || 7||

रक्तरक्तीकृताङ्गञ्च रक्तविस्फुरितेक्षणम् ।वेष्टितं नागपाशेन भ्रुकुटीभीषणाननम् ॥ ८॥

raktaraktīkṛtāṅgañca raktavisphuritekṣaṇam |veṣṭitaṃ nāgapāśena bhrukuṭībhīṣaṇānanam || 8||

सपाशवामहस्तेन धृतकेशञ्च दुर्गया ।वमद्रुधिरवक्त्रञ्च देव्याः सिंहं प्रदर्शयेत् ॥ ९॥

sapāśavāmahastena dhṛtakeśañca durgayā |vamadrudhiravaktrañca devyāḥ siṃhaṃ pradarśayet || 9||

देव्यास्तु दक्षिणं पादं समं सिंहोपरिस्थितम् ।किञ्चिदूर्द्ध्वं तथा वाममङ्गुष्ठं महिषोपरि ॥ १०॥

devyāstu dakṣiṇaṃ pādaṃ samaṃ siṃhoparisthitam |kiñcidūrddhvaṃ tathā vāmamaṅguṣṭhaṃ mahiṣopari || 10||

शत्रुक्षयकरीं देवीं दैत्यदानवदर्पहाम् ।प्रसन्नवदनां देवीं सर्व्वकामफलप्रदाम् ।स्तूयमानञ्च तद्रूपममरैः सन्निवेशयेत् ॥ ११॥

śatrukṣayakarīṃ devīṃ daityadānavadarpahām |prasannavadanāṃ devīṃ sarvvakāmaphalapradām |stūyamānañca tadrūpamamaraiḥ sanniveśayet || 11||

उग्रचण्डा प्रचण्डा च चण्डोग्रा चण्डनायिका ।चण्डा चण्डवती चैव चण्डरूपातिचण्डिका ॥ १२॥

ugracaṇḍā pracaṇḍā ca caṇḍogrā caṇḍanāyikā |caṇḍā caṇḍavatī caiva caṇḍarūpāticaṇḍikā || 12||

आभिः शक्तिभिरष्टाभिः सततं परिवेष्टिताम् ।चिन्तयेत् सततं दुर्गां धर्मकामार्थमोक्षदाम् ॥ १३॥

ābhiḥ śaktibhiraṣṭābhiḥ satataṃ pariveṣṭitām |cintayet satataṃ durgāṃ dharmakāmārthamokṣadām || 13||

इति श्रीदुर्गाध्यानं सम्पूर्णम् ।

iti śrīdurgādhyānaṃ sampūrṇam |