क्रमस्तवः Shrimat Khramastavah

रत्नामृताम्बुनिधिमध्यलसत्प्रवालद्वीपस्फुरत्परमनन्दनकाननान्तः ।श्रीवृक्षमूलतलपश्चिमवक्त्ररत्नगेहान्तराद्भुतमहामणिपीठिकायाम् ॥ १॥

ratnāmṛtāmbunidhimadhyalasatpravāladvīpasphuratparamanandanakānanāntaḥ |śrīvṛkṣamūlatalapaścimavaktraratnagehāntarādbhutamahāmaṇipīṭhikāyām || 1||

बिन्दुत्रिकोणबहिरष्टककोणबाह्याद्दिक्कोणदिक्परचतुर्दशकोणयुक्तम् ।वृत्ताष्टषोडशदलानतवृत्तलोकभूपूश्चतुर्मुखमहं प्रणमामि चक्रम् ॥ २॥

bindutrikoṇabahiraṣṭakakoṇabāhyāddikkoṇadikparacaturdaśakoṇayuktam |vṛttāṣṭaṣoḍaśadalānatavṛttalokabhūpūścaturmukhamahaṃ praṇamāmi cakram || 2||

पाशाङ्कुशामृतकपालसुशूलहस्तंहस्त्याननं विविधभूषणनीलदेहम् ।नित्योत्सवं सकलविघ्नविनाशहेतुंश्रीमद्गणेश्वरमहं प्रणमामि नित्यम् ॥ ३॥

pāśāṅkuśāmṛtakapālasuśūlahastaṃhastyānanaṃ vividhabhūṣaṇanīladeham |nityotsavaṃ sakalavighnavināśahetuṃśrīmadgaṇeśvaramahaṃ praṇamāmi nityam || 3||

पीयूषभाण्डमसिदण्डकपालखण्डचण्डातिचण्डभुजदण्डमतिप्रचण्डम् ।श्रीकुण्डलद्वयविमण्डितगण्डमीडेनीलं वटुं वटुकनाथमहीन्द्रहारम् ॥ ४॥

pīyūṣabhāṇḍamasidaṇḍakapālakhaṇḍacaṇḍāticaṇḍabhujadaṇḍamatipracaṇḍam |śrīkuṇḍaladvayavimaṇḍitagaṇḍamīḍenīlaṃ vaṭuṃ vaṭukanāthamahīndrahāram || 4||

चञ्चत्कपालसुकृपाणसशूलदण्डमुद्यद्डमड्डमरुमण्डितपाणिदण्डम् ।नीलाञ्जनप्रचयपुञ्जमिव प्रसन्नंश्रीक्षेत्रपालकममुं शरणं श्रयामि ॥ ५॥

cañcatkapālasukṛpāṇasaśūladaṇḍamudyadḍamaḍḍamarumaṇḍitapāṇidaṇḍam |nīlāñjanapracayapuñjamiva prasannaṃśrīkṣetrapālakamamuṃ śaraṇaṃ śrayāmi || 5||

चक्रातिचक्रपरिदारितदैत्यचक्रचक्राक्षिकम्बुपरिचुम्बिकरां कुमारीम् ।दुर्गां निसर्गमुनिवन्दितदुर्गदुर्गसिंहासनोपरिगतां सततं श्रयामि ॥ ६॥

cakrāticakraparidāritadaityacakracakrākṣikambuparicumbikarāṃ kumārīm |durgāṃ nisargamunivanditadurgadurgasiṃhāsanoparigatāṃ satataṃ śrayāmi || 6||

पद्मद्वयाभयवरोद्यतपाणिपद्मांपद्मासनेन समलङ्कृतपादपद्माम् ।पद्मां सुपद्मवदनां खलु पद्मनाभहृत्पद्ममध्यवसतिं सततं प्रपद्ये ॥ ७॥

padmadvayābhayavarodyatapāṇipadmāṃpadmāsanena samalaṅkṛtapādapadmām |padmāṃ supadmavadanāṃ khalu padmanābhahṛtpadmamadhyavasatiṃ satataṃ prapadye || 7||

उद्यत्सुधानिधिसहस्रमरीचिगौरींवागीश्वरीं सकलवाङ्मयसागराणाम् ।कण्ठे सदा लुठतु मे स्फटिकाक्षमालाश्रीर्ज्ञानपुस्तकवराभयशस्तहस्ता ॥ ८॥

udyatsudhānidhisahasramarīcigaurīṃvāgīśvarīṃ sakalavāṅmayasāgarāṇām |kaṇṭhe sadā luṭhatu me sphaṭikākṣamālāśrīrjñānapustakavarābhayaśastahastā || 8||

बन्धूकपुष्पवपुषं मदघूर्णमानंपुष्पेषुचापकुसुमेषुकरं वराक्ष्या ।यद्बन्धनात् कनककान्तिसामानकान्त्यास्वालिङ्गितं रतिपतिं सततं स्मरामि ॥ ९॥

bandhūkapuṣpavapuṣaṃ madaghūrṇamānaṃpuṣpeṣucāpakusumeṣukaraṃ varākṣyā |yadbandhanāt kanakakāntisāmānakāntyāsvāliṅgitaṃ ratipatiṃ satataṃ smarāmi || 9||

प्रीत्यावशं भुवि वसन्तमहं भवन्तंनृत्यन्तमद्भुतमहोत्सवदं वसन्तम् ।वन्दे सुनन्दनवने शरबिन्दुकान्तंसन्तानसन्ततिलतासु विकाशयन्तम् ॥ १०॥

prītyāvaśaṃ bhuvi vasantamahaṃ bhavantaṃnṛtyantamadbhutamahotsavadaṃ vasantam |vande sunandanavane śarabindukāntaṃsantānasantatilatāsu vikāśayantam || 10||

भक्त्याश्रिताभयवरोद्यतपाणिपद्मौदेवौ समानरचितासनसन्निविष्टौ ।द्वारे पुरे परमदैवतदेवतायाःश्रीशङ्खपद्मकनिधी निदधामि मूर्ध्नि ॥ ११॥

bhaktyāśritābhayavarodyatapāṇipadmaudevau samānaracitāsanasanniviṣṭau |dvāre pure paramadaivatadevatāyāḥśrīśaṅkhapadmakanidhī nidadhāmi mūrdhni || 11||

चिन्तामणिप्रणयदक्षिणपाण्यभीतिदानोल्लसत्कमलकोमलवामपाणीः ।रक्तद्युतीः शशिधराः प्रकटाणिमाद्यास्त्रैलोक्यमोहनगताः परिपूजयामि ॥ १२॥

cintāmaṇipraṇayadakṣiṇapāṇyabhītidānollasatkamalakomalavāmapāṇīḥ |raktadyutīḥ śaśidharāḥ prakaṭāṇimādyāstrailokyamohanagatāḥ paripūjayāmi || 12||

रक्तोत्पलामृतकपालधराः कराभ्यांवंशीतमालदलकोमलनीलदेहाः ।ब्राह्म्यादिका रुधिरभूषणरक्तवस्त्रामातर्द्वितीयचतुरस्रगता भजामि ॥ १३॥

raktotpalāmṛtakapāladharāḥ karābhyāṃvaṃśītamāladalakomalanīladehāḥ |brāhmyādikā rudhirabhūṣaṇaraktavastrāmātardvitīyacaturasragatā bhajāmi || 13||

पाशाङ्कुशाक्तितयथायथबद्धबद्धमुद्राविमुद्रितकरां तरुणारुणाभाम् ।श्रीमत्तृतीयचतुरस्रगसर्वपूर्वसङ्क्षोभपूर्वदलदैवतमर्चयामि ॥ १४॥

pāśāṅkuśāktitayathāyathabaddhabaddhamudrāvimudritakarāṃ taruṇāruṇābhām |śrīmattṛtīyacaturasragasarvapūrvasaṅkṣobhapūrvadaladaivatamarcayāmi || 14||

शोणाः सपाशशृणिपाणियुगाभिरामाःकामाद्यकर्षणमुखाः सुभगाश्च नित्याः ।गुप्ताः कलानिधिकलाः खलु सर्ववाञ्छासम्पूर्णषोडशदले परिपूजयामि ॥ १५॥

śoṇāḥ sapāśaśṛṇipāṇiyugābhirāmāḥkāmādyakarṣaṇamukhāḥ subhagāśca nityāḥ |guptāḥ kalānidhikalāḥ khalu sarvavāñchāsampūrṇaṣoḍaśadale paripūjayāmi || 15||

श्रीदेव्यचिन्त्यमहिमा अभिदीप्यमानारक्ताः सुगुप्ततरनामधरा दयार्दाः ।शक्तीरनङ्गकुसुमादिकयाष्ट सर्वसङ्क्षोभकेऽष्टदलके परिपूजयामि ॥ १६॥

śrīdevyacintyamahimā abhidīpyamānāraktāḥ suguptataranāmadharā dayārdāḥ |śaktīranaṅgakusumādikayāṣṭa sarvasaṅkṣobhake'ṣṭadalake paripūjayāmi || 16||

शोणाः सबाणधनुषः खलु सर्वपूर्वसङ्क्षोभणादिकचतुर्दशदेवतास्ताः ।सत्सम्प्रदायविधिना परिपूजयामिसौभाग्यदायकचतुर्दशकोणचक्रे ॥ १७॥

śoṇāḥ sabāṇadhanuṣaḥ khalu sarvapūrvasaṅkṣobhaṇādikacaturdaśadevatāstāḥ |satsampradāyavidhinā paripūjayāmisaubhāgyadāyakacaturdaśakoṇacakre || 17||

शुभ्रा वराभयकराः खलु सर्वपूर्वसिद्धिप्रदा दशदिशोद्भुतशक्तिशक्तीः ।सर्वार्थसाधकबहिर्दशकोणचक्रेसम्पूजयामि कुलकौलिकयोगिनीस्ताः ॥ १८॥

śubhrā varābhayakarāḥ khalu sarvapūrvasiddhipradā daśadiśodbhutaśaktiśaktīḥ |sarvārthasādhakabahirdaśakoṇacakresampūjayāmi kulakaulikayoginīstāḥ || 18||

कर्पूरपूररुचिराङ्गधराक्षमालाःश्रीतत्त्वपूजकभृतोऽतिनिगर्भदेवी ।सर्वार्थरक्षणकरे दशकोणचक्रेसर्वज्ञिका प्रमथिका दश पूजयामि ॥ १९॥

karpūrapūrarucirāṅgadharākṣamālāḥśrītattvapūjakabhṛto'tinigarbhadevī |sarvārtharakṣaṇakare daśakoṇacakresarvajñikā pramathikā daśa pūjayāmi || 19||

चापेषुपुस्तकलसत्स्फटिकाक्षमालांबालप्रवालरुचिरां वशिनीप्रधानाम् ।सर्वादिरोगहरचक्रवरे त्रिकोणेवाग्देवताष्टकमहं सरहस्यमीडे ॥ २०॥

cāpeṣupustakalasatsphaṭikākṣamālāṃbālapravālarucirāṃ vaśinīpradhānām |sarvādirogaharacakravare trikoṇevāgdevatāṣṭakamahaṃ sarahasyamīḍe || 20||

रक्ता वराभयकराः शिरसा दधानाःपाशाङ्कुशेषुधनुरायुधभूषणानि ।श्रीमत्त्रिकोणबहिरात्मकदेवतास्तारक्षन्तु सन्ततमनन्तगुणाश्चतस्रः ॥ २१॥

raktā varābhayakarāḥ śirasā dadhānāḥpāśāṅkuśeṣudhanurāyudhabhūṣaṇāni |śrīmattrikoṇabahirātmakadevatāstārakṣantu santatamanantaguṇāścatasraḥ || 21||

श्रीमत्त्रिकोणबहिरात्मकदेवतास्तादेवीः षडङ्गयुवतीः परिपूजयामि ।कुन्देन्दुकज्जलकडारपिशङ्गहव्यवाहश्रियोऽभयवरोद्यतपाणिपद्माः ॥ २२॥

śrīmattrikoṇabahirātmakadevatāstādevīḥ ṣaḍaṅgayuvatīḥ paripūjayāmi |kundendukajjalakaḍārapiśaṅgahavyavāhaśriyo'bhayavarodyatapāṇipadmāḥ || 22||

श्रीमत्त्रिकोणपरमाद्भुतसर्वपूर्वसिद्धिप्रदेति परमामृतहव्यदेव्यः ।कामेश्वरी मम ददातु समस्तकामान्वज्रेश्वरी भगवती भगमालिनी च ॥ २३॥

śrīmattrikoṇaparamādbhutasarvapūrvasiddhipradeti paramāmṛtahavyadevyaḥ |kāmeśvarī mama dadātu samastakāmānvajreśvarī bhagavatī bhagamālinī ca || 23||

श्रीमत्त्रिकोणपुरविस्फुरितां त्रिनेत्रांबालातपारुणतनुं तरुणेन्दुमौलिम् ।पीयूषभाजनधराङ्कुशपाशहस्तांकामेश्वरीं भगवतीं परिपूजयामि ॥ २४॥

śrīmattrikoṇapuravisphuritāṃ trinetrāṃbālātapāruṇatanuṃ taruṇendumaulim |pīyūṣabhājanadharāṅkuśapāśahastāṃkāmeśvarīṃ bhagavatīṃ paripūjayāmi || 24||

पाशाङ्कुशामृतकपालकमातुलङ्गचापेषुसङ्गतकरामरुणां त्रिनेत्राम् ।श्रीमत्त्रिकोणपरदैवतदक्षिणस्थांवज्रेश्वरीं भगवतीं परिपूजयामि ॥ २५॥

pāśāṅkuśāmṛtakapālakamātulaṅgacāpeṣusaṅgatakarāmaruṇāṃ trinetrām |śrīmattrikoṇaparadaivatadakṣiṇasthāṃvajreśvarīṃ bhagavatīṃ paripūjayāmi || 25||

चन्द्राननां त्रिनयनां तरुणेन्दुमस्तांपाशाङ्कुशाक्षगुणपुस्तकशस्तहस्ताम् ।श्रीमत्त्रिकोणपरदैवतवामभागेशुभ्रां भजे भगवतीं भगमालिनीञ्च ॥ २६॥

candrānanāṃ trinayanāṃ taruṇendumastāṃpāśāṅkuśākṣaguṇapustakaśastahastām |śrīmattrikoṇaparadaivatavāmabhāgeśubhrāṃ bhaje bhagavatīṃ bhagamālinīñca || 26||

चक्रातिगुह्यपरमाद्भुतसर्वपूर्वानन्दात्मकेऽतिपरमे नवमेषु पूर्वे ।भक्त्या परापरतरातिरहस्यदेवींसेवे परापरमयीं परमेश्वरीं ताम् ॥ २७॥

cakrātiguhyaparamādbhutasarvapūrvānandātmake'tiparame navameṣu pūrve |bhaktyā parāparatarātirahasyadevīṃseve parāparamayīṃ parameśvarīṃ tām || 27||

प्रत्यग्रजाग्रदरुणाम्बुजवक्त्रबिम्बचुम्बालिकालकुटिलालकपल्लवां ताम् ।आनन्दसाद्रकरुणामयसुप्रसन्ना(न्न)लीलानि(ति)लोलनलिनोत्पललोचनालिम् ॥ २८॥

pratyagrajāgradaruṇāmbujavaktrabimbacumbālikālakuṭilālakapallavāṃ tām |ānandasādrakaruṇāmayasuprasannā(nna)līlāni(ti)lolanalinotpalalocanālim || 28||

सिन्दूरसुन्दरशरीरविराजमानराजीवदाडिमजवानवबन्धुजीवाम् ।श्रीमन्महामुकुटकोटिमहार्घ्यरत्नसब्रह्मचारिपरमामृतचन्द्ररेखाम् ॥ २९॥

sindūrasundaraśarīravirājamānarājīvadāḍimajavānavabandhujīvām |śrīmanmahāmukuṭakoṭimahārghyaratnasabrahmacāriparamāmṛtacandrarekhām || 29||

सुभ्रूतया विजितरूपपिनाकपाणेर्बाणासनर्द्धिविनिवेशितबाणलीलाम् ।तद्विश्वकर्मपरिसूत्रितनासिकाग्रांपद्मासनां त्रिनयनां तरुणेन्दुमस्ताम् ॥ ३०॥

subhrūtayā vijitarūpapinākapāṇerbāṇāsanarddhiviniveśitabāṇalīlām |tadviśvakarmaparisūtritanāsikāgrāṃpadmāsanāṃ trinayanāṃ taruṇendumastām || 30||

ईषद्विकाशितमनोहरहासदन्तवासःश्रिया जितनवोदितचन्द्ररेखाम् ।सौन्दर्यदैवतमहामृगनाभिचित्रपत्रांशुमिन्दुकमनीयललाटपट्टाम् ॥ ३१॥

īṣadvikāśitamanoharahāsadantavāsaḥśriyā jitanavoditacandrarekhām |saundaryadaivatamahāmṛganābhicitrapatrāṃśumindukamanīyalalāṭapaṭṭām || 31||

लावण्यभाण्डशुभगण्डयुगाभिरामानौपम्यकान्तिचिकुराभिविराजमानाम् ।श्रीकुण्डलद्वयविमण्डितगण्डशोभापाण्डित्यखण्डितसुधानिधिमण्डलाभाम् ॥ ३२॥

lāvaṇyabhāṇḍaśubhagaṇḍayugābhirāmānaupamyakānticikurābhivirājamānām |śrīkuṇḍaladvayavimaṇḍitagaṇḍaśobhāpāṇḍityakhaṇḍitasudhānidhimaṇḍalābhām || 32||

कर्पूरपूरपरिपूरितचारुनागवल्लीरसार्द्रखपुराढ्यनिभाधरौष्ठीम् ।ग्रैवेयचुम्बितमणिद्युतिदीप्यमानसच्छायया द्विगुणशोभितकम्बुकण्ठीम् ॥ ३३॥

karpūrapūraparipūritacārunāgavallīrasārdrakhapurāḍhyanibhādharauṣṭhīm |graiveyacumbitamaṇidyutidīpyamānasacchāyayā dviguṇaśobhitakambukaṇṭhīm || 33||

लाक्षारसस्नपितबालमृणालनाललीलालयामलरसाञ्चितबाहुवल्लीम् ।रक्तोत्पलोज्ज्वलदलामलकोमलाभिर्बालप्रवालललिताङ्गुलिपाणिलीलाम् ॥ ३४॥

lākṣārasasnapitabālamṛṇālanālalīlālayāmalarasāñcitabāhuvallīm |raktotpalojjvaladalāmalakomalābhirbālapravālalalitāṅgulipāṇilīlām || 34||

तद्विश्वकर्मपरियत्नविनिर्मितश्रीरत्नाङ्गुरीयकनखद्युतिदीप्यमानाम् ।केनापि कारणवशेन गृहीतबद्धपाशाङ्कुशेषुधनुरायुधभूषणां ताम् ॥ ३५॥

tadviśvakarmapariyatnavinirmitaśrīratnāṅgurīyakanakhadyutidīpyamānām |kenāpi kāraṇavaśena gṛhītabaddhapāśāṅkuśeṣudhanurāyudhabhūṣaṇāṃ tām || 35||

त्रैलोक्यदुर्लभमहामणिनायकश्रीसंसक्तमौक्तिकफलोज्ज्वलहारलक्ष्मीम् ।लावण्यवारिपरिपूर्णसुवर्णकुम्भशोभाभिभाविकुचमण्डलपूर्णकुम्भाम् ॥ ३६॥

trailokyadurlabhamahāmaṇināyakaśrīsaṃsaktamauktikaphalojjvalahāralakṣmīm |lāvaṇyavāriparipūrṇasuvarṇakumbhaśobhābhibhāvikucamaṇḍalapūrṇakumbhām || 36||

लोकत्रयेऽप्यतिसुदुर्लभसाम्यसौम्यशोभाविभाकरवलित्रयशोभिमध्याम् ।लावण्यनाभिगहनाभिगृहप्रविष्टश्रीमन्महाद्युतिमयीं नवलोमराजीम् ॥ ३७॥

lokatraye'pyatisudurlabhasāmyasaumyaśobhāvibhākaravalitrayaśobhimadhyām |lāvaṇyanābhigahanābhigṛhapraviṣṭaśrīmanmahādyutimayīṃ navalomarājīm || 37||

चञ्चन्मरीचिनिचयाञ्चितकाञ्चनाञ्चत्काञ्चीविकाशिरुचिरक्तविचित्रवस्त्राम् ।श्रीकामकाननसमुद्भवरामरम्भास्तम्भाभिभाविसुकुमारतरोरुयुग्माम् ॥ ३८॥

cañcanmarīcinicayāñcitakāñcanāñcatkāñcīvikāśiruciraktavicitravastrām |śrīkāmakānanasamudbhavarāmarambhāstambhābhibhāvisukumārataroruyugmām || 38||

वृत्तानुपूर्वविधिदुर्घटसन्निवेशजङ्घायुगाभिरमणां मणिगूढगुल्फाम् ।वाचस्पतेरपि वचोरचनाभिशोभिसौन्दर्यगोचरमनोहरपादपद्माम् ॥ ३९॥

vṛttānupūrvavidhidurghaṭasanniveśajaṅghāyugābhiramaṇāṃ maṇigūḍhagulphām |vācaspaterapi vacoracanābhiśobhisaundaryagocaramanoharapādapadmām || 39||

श्रीब्रह्मविष्णुशिवमौलिलसद्विमान(अ)मालोक्यमानकरुणारुणपादपद्माम् ।श्रीसाधकाय करुणामयसुप्रसन्नदृष्टातिदिष्टवरदानमधःप्रसन्नाम् ॥ ४०॥

śrībrahmaviṣṇuśivamaulilasadvimāna(a)mālokyamānakaruṇāruṇapādapadmām |śrīsādhakāya karuṇāmayasuprasannadṛṣṭātidiṣṭavaradānamadhaḥprasannām || 40||

त्रैलोक्यमोहनमयीं परमेश्वरीं तांत्रैलोक्यकारणमयीं परमेश्वरीं ताम् ।त्रैलोक्यविस्मयमयीं परमेश्वरीं तांचक्रेश्वरीं शुभकरीं परिपूजयामि ॥ ४१॥

trailokyamohanamayīṃ parameśvarīṃ tāṃtrailokyakāraṇamayīṃ parameśvarīṃ tām |trailokyavismayamayīṃ parameśvarīṃ tāṃcakreśvarīṃ śubhakarīṃ paripūjayāmi || 41||

त्रैलोक्यमोहनमुखाब्जकचक्रमेतत्स्थानेऽणिमादिप्रकटादिकसिद्धिदेवीम् ।श्रीमद्गुरुक्रमसमस्तसमन्त्रमुद्राःपुष्पैः प्रपूज्य परमेश्वरि तेऽर्चयामि ॥ ४२॥

trailokyamohanamukhābjakacakrametatsthāne'ṇimādiprakaṭādikasiddhidevīm |śrīmadgurukramasamastasamantramudrāḥpuṣpaiḥ prapūjya parameśvari te'rcayāmi || 42||

पद्मादिभूतमणिपञ्चदशीर्न यावन्नित्या तिथिक्रममयीं खलु केऽपि धन्याः ।कामेश्वरीप्रभृतिपञ्चदशादिनित्यामन्त्रैः परं परमयीं परिपूजयामि ॥ ४३॥

padmādibhūtamaṇipañcadaśīrna yāvannityā tithikramamayīṃ khalu ke'pi dhanyāḥ |kāmeśvarīprabhṛtipañcadaśādinityāmantraiḥ paraṃ paramayīṃ paripūjayāmi || 43||

त्वं गीयसे प्रथमतस्त्रिपुरेति मातःपश्चाद्।ह्वितीयनवमत्रिपुरेश्वरीति ।तार्तीयके त्रिपुरसुन्दरिकेति तुर्येमातः परा त्रिपुरवासिनिका त्वमेव ॥ ४४॥

tvaṃ gīyase prathamatastripureti mātaḥpaścād|hvitīyanavamatripureśvarīti |tārtīyake tripurasundariketi turyemātaḥ parā tripuravāsinikā tvameva || 44||

त्वं पञ्चमे भगवती त्रिपुरा पराश्रीःषष्ठे परा त्रिपुरमालिनिका त्वमेव ।त्वं सप्तमे भगवती त्रिपुरादिसिद्धात्वञ्चाष्टमे भगवती त्रिपुरात्मकेति ॥ ४५॥

tvaṃ pañcame bhagavatī tripurā parāśrīḥṣaṣṭhe parā tripuramālinikā tvameva |tvaṃ saptame bhagavatī tripurādisiddhātvañcāṣṭame bhagavatī tripurātmaketi || 45||

पूर्णे परापरमये परमेऽतिगुह्येश्रीमन्महात्रिपुरसुन्दरिका त्वमेव ।श्रीमन्महात्मकमहाद्भुतचक्रराजेत्वं गीयसे सुकृतिभिः खलु कैश्च देवी ॥ ४६॥

pūrṇe parāparamaye parame'tiguhyeśrīmanmahātripurasundarikā tvameva |śrīmanmahātmakamahādbhutacakrarājetvaṃ gīyase sukṛtibhiḥ khalu kaiśca devī || 46||

आदौ दशाष्ट दश षोडश चाष्ट चासिपश्चाच्चतुर्दश दशासि ततो दशाष्टौ ।पश्चाच्चतुष्टयमसि त्रितयञ्च षट्कंसप्तोत्तरा शतमयी त्वमसि त्वमेका ॥ ४७॥

ādau daśāṣṭa daśa ṣoḍaśa cāṣṭa cāsipaścāccaturdaśa daśāsi tato daśāṣṭau |paścāccatuṣṭayamasi tritayañca ṣaṭkaṃsaptottarā śatamayī tvamasi tvamekā || 47||

कामेश्वरीति भगमालिनिकेति नित्यक्लिन्नेति तैरुपरताऽपि हिरण्डकेति ।त्वं वह्निवासनिरतेति महादिभूतविद्येश्वरीति च तथा शिवदूतिकेति ॥ ४८॥

kāmeśvarīti bhagamāliniketi nityaklinneti tairuparatā'pi hiraṇḍaketi |tvaṃ vahnivāsanirateti mahādibhūtavidyeśvarīti ca tathā śivadūtiketi || 48||

मातः परा त्वरितिका कुलसुन्दरीतिनित्यातिनित्यपरनीलपताकिनीति ।त्वं सर्वलोकविजयाखिलमालिकेतिज्वालामयीति निगदन्ति विचित्रकेति ॥ ४९॥

mātaḥ parā tvaritikā kulasundarītinityātinityaparanīlapatākinīti |tvaṃ sarvalokavijayākhilamāliketijvālāmayīti nigadanti vicitraketi || 49||

मातस्तवाक्षरमनक्षररूपिकायंसंसाध्य शुद्धमतयो गणयन्ति नैव ।श्रीब्रह्मविष्णुशिवतार्क्ष्यरवीन्द्रचन्द्रयक्षेन्द्रदर्पकगणेश्वरवह्निमुख्यान् ॥ ५०॥

mātastavākṣaramanakṣararūpikāyaṃsaṃsādhya śuddhamatayo gaṇayanti naiva |śrībrahmaviṣṇuśivatārkṣyaravīndracandrayakṣendradarpakagaṇeśvaravahnimukhyān || 50||

सम्पूज्य केऽपि सकलैर्वरणोपचारैर्ग्रन्थिं विभिद्य परमेष्ठिनमुद्वहन्तीम् ।मारात्मिकां मदनधामनि दीपरूपांजिह्वाग्रतः सुकृतिनः परिपालयन्ति ॥ ५१॥

sampūjya ke'pi sakalairvaraṇopacārairgranthiṃ vibhidya parameṣṭhinamudvahantīm |mārātmikāṃ madanadhāmani dīparūpāṃjihvāgrataḥ sukṛtinaḥ paripālayanti || 51||

आधारवारिरुहमध्यलसत्त्रिकोणवामाशिखाग्रजपरां परमाङ्कुराभाम् ।ज्ञानक्रियेष्टमयि शक्तिविनाशनाशश्रीब्रह्मविष्णुगुणशक्तिवरा त्वमेका ॥ ५२॥

ādhāravāriruhamadhyalasattrikoṇavāmāśikhāgrajaparāṃ paramāṅkurābhām |jñānakriyeṣṭamayi śaktivināśanāśaśrībrahmaviṣṇuguṇaśaktivarā tvamekā || 52||

सृष्टिस्थितिप्रलयकारणकर्तृभूतंवेदान्तवेद्यमजमव्ययमप्रमेयम् ।अन्योन्यभेदकलहाकुलमानसास्तेजानन्ति किं जडधियस्तव रूपमम्ब ॥ ५३॥

sṛṣṭisthitipralayakāraṇakartṛbhūtaṃvedāntavedyamajamavyayamaprameyam |anyonyabhedakalahākulamānasāstejānanti kiṃ jaḍadhiyastava rūpamamba || 53||

स्तोत्रं त्वमेव परमेश्वरि गीयसे चेत्स्तोता त्वमेव परमेश्वरि गीयसे चेत् ।स्तुत्यं त्वमेव परमेश्वरि गीयसे चेत्किं स्तूयसे खलु तदा परमेश्वरि त्वम् ॥ ५४॥

stotraṃ tvameva parameśvari gīyase cetstotā tvameva parameśvari gīyase cet |stutyaṃ tvameva parameśvari gīyase cetkiṃ stūyase khalu tadā parameśvari tvam || 54||

यः कालकल्पतरुमेतदनन्यबुद्धिःश्रीमत्क्रमस्तवनृपं पठताह नित्यम् ।मुक्तिः करे वसति सिद्धिभिरष्टभिर्वाकिं तस्य मातरणिमादिभिरल्पिकाभिः ॥ ५५॥

yaḥ kālakalpatarumetadananyabuddhiḥśrīmatkramastavanṛpaṃ paṭhatāha nityam |muktiḥ kare vasati siddhibhiraṣṭabhirvākiṃ tasya mātaraṇimādibhiralpikābhiḥ || 55||

त्वां पूजयेत् क्रमकुलां सकलार्थसिद्धिस्तोत्रं पठिष्यति जनस्त्वयि जातभक्तिः ।तस्मान्मयाऽपि तव भक्तिरसेन देविभक्तार्थसिद्धिकररत्नमिदं व्यधायि ॥ ५६॥

tvāṃ pūjayet kramakulāṃ sakalārthasiddhistotraṃ paṭhiṣyati janastvayi jātabhaktiḥ |tasmānmayā'pi tava bhaktirasena devibhaktārthasiddhikararatnamidaṃ vyadhāyi || 56||

इति श्रीशङ्करभगवत्पादाचार्यविरचितः श्रीमत्क्रमस्तवः सम्पूर्णः ।

iti śrīśaṅkarabhagavatpādācāryaviracitaḥ śrīmatkramastavaḥ sampūrṇaḥ |