देवीस्तोत्रम् ५ Manukritam Devistotram

मनुरुवाच ।नमो नमस्ते देवेशि जगत्कारणकारणे ।शङ्खचक्रगदाहस्ते नारायणहृदाश्रिते ॥ २४॥

manuruvāca |namo namaste deveśi jagatkāraṇakāraṇe |śaṅkhacakragadāhaste nārāyaṇahṛdāśrite || 24||

वेदमूर्त्ते जगन्मातः कारणस्थानरूपिणि ।वेदत्रयप्रमाणज्ञे सर्वदेवनुते शिवे ॥ २५॥

vedamūrtte jaganmātaḥ kāraṇasthānarūpiṇi |vedatrayapramāṇajñe sarvadevanute śive || 25||

माहेश्वरि महाभागे महामाये महोदये ।महादेवप्रियावासे महादेवप्रियङ्करि ॥ २६॥

māheśvari mahābhāge mahāmāye mahodaye |mahādevapriyāvāse mahādevapriyaṅkari || 26||

गोपेन्द्रस्य प्रिये ज्येष्ठे महानन्दे महोत्सवे ।महामारीभयहरे नमो देवादिपूजिते ॥ २७॥

gopendrasya priye jyeṣṭhe mahānande mahotsave |mahāmārībhayahare namo devādipūjite || 27||

सर्वमङ्गलमाङ्गल्ये शिवे सर्वार्थसाधिके ।शरण्ये त्र्यम्बके गौरि नारायणि नमोऽस्तु ते ॥ २८॥

sarvamaṅgalamāṅgalye śive sarvārthasādhike |śaraṇye tryambake gauri nārāyaṇi namo'stu te || 28||

यतश्चेदं यया विश्वमोतं प्रोतं च सर्वदा ।चैतन्यमेकमाद्यन्तरहितं तेजसां निधिम् ॥ २९॥

yataścedaṃ yayā viśvamotaṃ protaṃ ca sarvadā |caitanyamekamādyantarahitaṃ tejasāṃ nidhim || 29||

ब्रह्मा यदीक्षणात्सर्वं करोति च हरिः सदा ।पालयत्यपि विश्वेशः संहर्ता यदनुग्रहात् ॥ ३०॥

brahmā yadīkṣaṇātsarvaṃ karoti ca hariḥ sadā |pālayatyapi viśveśaḥ saṃhartā yadanugrahāt || 30||

मधुकैटभसम्भूतभयार्तः पद्मसम्भवः ।यस्याः स्तवेन मुमुचे घोरदैत्यभवाम्बुधेः ॥ ३१॥

madhukaiṭabhasambhūtabhayārtaḥ padmasambhavaḥ |yasyāḥ stavena mumuce ghoradaityabhavāmbudheḥ || 31||

त्वं ह्रीः कीर्तिः स्मृतिः कान्तिः कमला गिरिजा सती ।दाक्षायणी वेदगर्भा सिद्धिदात्री सदाभया ॥ ३२॥

tvaṃ hrīḥ kīrtiḥ smṛtiḥ kāntiḥ kamalā girijā satī |dākṣāyaṇī vedagarbhā siddhidātrī sadābhayā || 32||

स्तोष्ये त्वां च नमस्यामि पूजयामि जपामि च ।ध्यायामि भावये वीक्षे श्रोष्ये देवि प्रसीद मे ॥ ३३॥

stoṣye tvāṃ ca namasyāmi pūjayāmi japāmi ca |dhyāyāmi bhāvaye vīkṣe śroṣye devi prasīda me || 33||

ब्रह्मा वेदनिधिः कृष्णो लक्ष्म्यावासः पुरन्दरः ।त्रिलोकाधिपतिः पाशी यादसाम्पतिरुत्तमः ॥ ३४॥

brahmā vedanidhiḥ kṛṣṇo lakṣmyāvāsaḥ purandaraḥ |trilokādhipatiḥ pāśī yādasāmpatiruttamaḥ || 34||

कुबेरो निधिनाथोऽभूद्यमो जातः परेतराट् ।नैरृतो रक्षसां नाथः सोमो जातो ह्यपोमयः ॥ ३५॥

kubero nidhinātho'bhūdyamo jātaḥ paretarāṭ |nairṛto rakṣasāṃ nāthaḥ somo jāto hyapomayaḥ || 35||

त्रिलोकवन्द्ये लोकेशि महामाङ्गल्यरूपिणि ।नमस्तेऽस्तु पुनर्भूयो जगन्मातर्नमो नमः ॥ ३६॥

trilokavandye lokeśi mahāmāṅgalyarūpiṇi |namaste'stu punarbhūyo jaganmātarnamo namaḥ || 36||

इति श्रीदेवीभागवतपुराणे अष्टमस्कन्धे प्रथमाध्यायान्तर्गतंमनुकृतं देवीस्तोत्रं सम्पूर्णम् ।

iti śrīdevībhāgavatapurāṇe aṣṭamaskandhe prathamādhyāyāntargataṃmanukṛtaṃ devīstotraṃ sampūrṇam |