देविस्तुतिः देवैः कृता Devistuti by Devas

देवा ऊचुः ।नमस्ये पुण्डरीकाक्षीं देवीं परमदेवताम् ।कालीं त्रिनेत्रां वरदां शाम्भवीं शाङ्करीं शिवाम् ॥ १॥

devā ūcuḥ |namasye puṇḍarīkākṣīṃ devīṃ paramadevatām |kālīṃ trinetrāṃ varadāṃ śāmbhavīṃ śāṅkarīṃ śivām || 1||

भक्तिप्रियां भक्तिरूपां भवानीं भववल्लभाम् ।भैरवीं भीमवदनां भीमां भीमाननां शुभाम् ॥ २॥

bhaktipriyāṃ bhaktirūpāṃ bhavānīṃ bhavavallabhām |bhairavīṃ bhīmavadanāṃ bhīmāṃ bhīmānanāṃ śubhām || 2||

वैष्णवीं विष्णुरूपाञ्च विष्णुकार्यकरीं क्रियाम् ।संहारकारिणीं सृष्टिकारिणीं स्थितिकारिणीम् ॥ ३॥

vaiṣṇavīṃ viṣṇurūpāñca viṣṇukāryakarīṃ kriyām |saṃhārakāriṇīṃ sṛṣṭikāriṇīṃ sthitikāriṇīm || 3||

कपर्द्दिनीं करालाक्षीं चन्द्रशोभितमस्तकाम् ।श्यामां श्वेतां तथा गौरीं विचित्रां चित्रसुन्दरीम् ॥ ४॥

kaparddinīṃ karālākṣīṃ candraśobhitamastakām |śyāmāṃ śvetāṃ tathā gaurīṃ vicitrāṃ citrasundarīm || 4||

कौमारीं शक्तिधात्रीञ्च देवानां शक्तिरूपिणीम् ।चतुर्भुजाञ्च द्विभुजां षड्भुजाष्टभुजान्तथा ॥ ५॥

kaumārīṃ śaktidhātrīñca devānāṃ śaktirūpiṇīm |caturbhujāñca dvibhujāṃ ṣaḍbhujāṣṭabhujāntathā || 5||

देवीं दशभुजां कालीं बाहुषोड़शसंयुताम् ।अष्टादशभुजां कालस्वरूपां लक्षनेत्रिणीम् ॥ ६॥

devīṃ daśabhujāṃ kālīṃ bāhuṣoड़śasaṃyutām |aṣṭādaśabhujāṃ kālasvarūpāṃ lakṣanetriṇīm || 6||

सहस्त्रचरणां कोटिच्छविं निष्फलरूपिणीम् ।स्थूलां शुद्धाञ्च सूक्ष्माञ्च खर्वाञ्चाथ महत्तमाम् ॥ ७॥

sahastracaraṇāṃ koṭicchaviṃ niṣphalarūpiṇīm |sthūlāṃ śuddhāñca sūkṣmāñca kharvāñcātha mahattamām || 7||

दीर्घजिह्वामप्रमेयां स्तवनीयां वृहच्छिलाम् ।कामरूपां कामगमां मन्त्ररूपां जगन्मयीम् ॥ ८॥

dīrghajihvāmaprameyāṃ stavanīyāṃ vṛhacchilām |kāmarūpāṃ kāmagamāṃ mantrarūpāṃ jaganmayīm || 8||

ब्रह्माण्डकोटिजठरां सर्वामाकाशवासिनीम् ।विन्ध्याद्रिनिलयां शैलतनयां लोकपावनीम् ॥ ९॥

brahmāṇḍakoṭijaṭharāṃ sarvāmākāśavāsinīm |vindhyādrinilayāṃ śailatanayāṃ lokapāvanīm || 9||

शिववृक्षस्थितां विल्वलस्थां गिरिवासिनीम् ।श्रीदुर्गां दुर्गतिहरां शान्तां शान्तजनप्रियाम् ॥ १०॥

śivavṛkṣasthitāṃ vilvalasthāṃ girivāsinīm |śrīdurgāṃ durgatiharāṃ śāntāṃ śāntajanapriyām || 10||

पद्मालयाञ्च पद्माक्षीं सहस्त्रदलवासिनीम् ।त्वं स्वाहा त्वं स्वधा त्वं ह्रीस्त्वं बुद्धिस्त्रिविधा प्रसूः ॥ ११॥

padmālayāñca padmākṣīṃ sahastradalavāsinīm |tvaṃ svāhā tvaṃ svadhā tvaṃ hrīstvaṃ buddhistrividhā prasūḥ || 11||

त्वां नमस्यामहे देवीं दयार्द्रहृदयां शिवाम् ।स्त्रीरूपां परमानन्दरूपां ब्रह्मसनातनीम् ।नमामः प्रणमामस्त्वां सन्नमामः सुभक्तितः ॥ १२॥

tvāṃ namasyāmahe devīṃ dayārdrahṛdayāṃ śivām |strīrūpāṃ paramānandarūpāṃ brahmasanātanīm |namāmaḥ praṇamāmastvāṃ sannamāmaḥ subhaktitaḥ || 12||

सर्वस्वरूपां सर्वेशीं सर्वशक्तिसमन्विताम् ।त्वां नमस्यामहे देवी भयेभ्यस्त्राहि नोऽम्बिके ॥ १३॥

sarvasvarūpāṃ sarveśīṃ sarvaśaktisamanvitām |tvāṃ namasyāmahe devī bhayebhyastrāhi no'mbike || 13||

इति बृहद्धर्मपुराणान्तर्गता देवताकृता देविस्तुतिः सम्पूर्णा ॥॥ बृहद्धर्मपुराणम् । पूर्वखण्डः । अध्ययः २१। ५१६१ , ६३६४ ॥

iti bṛhaddharmapurāṇāntargatā devatākṛtā devistutiḥ sampūrṇā |||| bṛhaddharmapurāṇam | pūrvakhaṇḍaḥ | adhyayaḥ 21| 5161 , 6364 ||