देवीस्तवनम् Devistavanam By Manu

मनुरुवाचजय देवि विशालाक्षि जय सर्वान्तरस्थिते ॥ १॥

manuruvācajaya devi viśālākṣi jaya sarvāntarasthite || 1||

मान्ये पूज्ये जगद्धात्रि सर्वमङ्गलमङ्गले ।त्वत्कटाक्षावलोकेन पद्मभूः सृजते जगत् ॥ २॥

mānye pūjye jagaddhātri sarvamaṅgalamaṅgale |tvatkaṭākṣāvalokena padmabhūḥ sṛjate jagat || 2||

वैकुण्ठः पालयत्येव हरः संहरते क्षणात् ।शचीपतिस्त्रिलोक्याश्च शासको भवदाज्ञया ॥ ३॥

vaikuṇṭhaḥ pālayatyeva haraḥ saṃharate kṣaṇāt |śacīpatistrilokyāśca śāsako bhavadājñayā || 3||

प्राणिनः शिक्षयत्येव दण्डेन च परेतराट् ।यादसामधिपः पाशी पालनं मादृशामपि ॥ ४॥

prāṇinaḥ śikṣayatyeva daṇḍena ca paretarāṭ |yādasāmadhipaḥ pāśī pālanaṃ mādṛśāmapi || 4||

कुरुते स कुबेरोऽपि निधीनां पतिरव्ययः ।हुतभुङ्नैरृतो वायुरीशानः शेष एव च ॥ ५॥

kurute sa kubero'pi nidhīnāṃ patiravyayaḥ |hutabhuṅnairṛto vāyurīśānaḥ śeṣa eva ca || 5||

त्वदंशसम्भवा एव त्वच्छक्तिपरिबृंहिताः ।अथापि यदि मे देवि वरो देयोऽस्ति साम्प्रतम् ॥ ६॥

tvadaṃśasambhavā eva tvacchaktiparibṛṃhitāḥ |athāpi yadi me devi varo deyo'sti sāmpratam || 6||

तदा प्रह्वाः सर्गकार्ये विघ्ना नश्यन्तु मे शिवे ।वाग्भवस्यापि मन्त्रस्य ये केचिदुपसेविनः ॥ ७॥

tadā prahvāḥ sargakārye vighnā naśyantu me śive |vāgbhavasyāpi mantrasya ye kecidupasevinaḥ || 7||

तेषां सिद्धिः सत्वरापि कार्याणां जायतामपि ।ये संवादमिमं देवि पठन्ति श्रावयन्ति च ॥ ८॥

teṣāṃ siddhiḥ satvarāpi kāryāṇāṃ jāyatāmapi |ye saṃvādamimaṃ devi paṭhanti śrāvayanti ca || 8||

तेषां लोके भुक्तिमुक्ती सुलभे भवतां शिवे ।जातिस्मरत्वं भवतु वक्तृत्वं सौष्ठवं तथा ॥ ९॥

teṣāṃ loke bhuktimuktī sulabhe bhavatāṃ śive |jātismaratvaṃ bhavatu vaktṛtvaṃ sauṣṭhavaṃ tathā || 9||

ज्ञानसिद्धिः कर्ममार्गसंसिद्धिरपि चास्तु हि ।पुत्रपौत्रसमृद्धिश्च जायेदित्येव मे वचः ॥ १०॥

jñānasiddhiḥ karmamārgasaṃsiddhirapi cāstu hi |putrapautrasamṛddhiśca jāyedityeva me vacaḥ || 10||

इति श्रीमद्देवीभागवतमहापुराणे दशम स्कन्धान्तरगतम्प्रथमोऽध्याये मनुकृतं देवीस्तवनं सम्पूर्णम् ।

iti śrīmaddevībhāgavatamahāpurāṇe daśama skandhāntaragatamprathamo'dhyāye manukṛtaṃ devīstavanaṃ sampūrṇam |