देवीवेदपादस्तवः Devivedapada Stava

(शिवरहस्यान्तर्गते ईशाख्ये)चिदम्बरेश्वरशिवमुखाम्बुजरवित्विषे ।यस्यै जैमिनिरुद्युक्तस्तस्यै वाचे नमोनमः ॥ १॥

(śivarahasyāntargate īśākhye)cidambareśvaraśivamukhāmbujaravitviṣe |yasyai jaiminirudyuktastasyai vāce namonamaḥ || 1||

प्रत्यूहशान्त्यै हेरम्बं प्रत्यूहयति ईश्वरः ।विस्मापयन् स पितरौ अस्माकमस्तु केवलः ॥ २॥

pratyūhaśāntyai herambaṃ pratyūhayati īśvaraḥ |vismāpayan sa pitarau asmākamastu kevalaḥ || 2||

वन्दे श्रीशिवपादाब्जमद्वन्द्वानन्दसाधनम् ।चेतसां सम्प्रदायानां एतदालम्बनं परम् ॥ ३॥

vande śrīśivapādābjamadvandvānandasādhanam |cetasāṃ sampradāyānāṃ etadālambanaṃ param || 3||

पुस्तमुक्तालसद्बाहुरस्तु मे भारती मुखे ।नियोजयन्ती सा देवी धियो विश्वा विराजती ॥ ४॥

pustamuktālasadbāhurastu me bhāratī mukhe |niyojayantī sā devī dhiyo viśvā virājatī || 4||

हृद्यैरष्टोत्तरशतपद्यैरेवं शिवैस्तथा ।प्रह्वा वेदस्तुतौ भूयाज्जिह्वा मे मधुमत्तमा ॥ ५॥

hṛdyairaṣṭottaraśatapadyairevaṃ śivaistathā |prahvā vedastutau bhūyājjihvā me madhumattamā || 5||

काव्यालङ्कारसर्वस्वमाधुरीलहरीमुचा ।वाचा परमकल्याणी(णि) मुखं हि मम शोभया(य) ॥ ६॥

kāvyālaṅkārasarvasvamādhurīlaharīmucā |vācā paramakalyāṇī(ṇi) mukhaṃ hi mama śobhayā(ya) || 6||

मादृशां वैखरीवाचां त्वादृशीं स्तोतुमम्बिके ।यतो बिभेति ललिता ततो नो अभयं कृधि ॥ ७॥

mādṛśāṃ vaikharīvācāṃ tvādṛśīṃ stotumambike |yato bibheti lalitā tato no abhayaṃ kṛdhi || 7||

मदीयकर्मसु शिवे त्वदीयदयया मुहुः ।अवधूतरूषः सन्तु अवधूता अरावयः ॥ ८॥

madīyakarmasu śive tvadīyadayayā muhuḥ |avadhūtarūṣaḥ santu avadhūtā arāvayaḥ || 8||

रवीन्दुदक्षवामोद्यत्ताटङ्कां रुचिरामति ।महाविद्येश्वरीं वन्दे ग्रहनक्षत्रमालिनीम् ॥ ९॥

ravīndudakṣavāmodyattāṭaṅkāṃ rucirāmati |mahāvidyeśvarīṃ vande grahanakṣatramālinīm || 9||

खण्डशर्करयेवाम्ब दययालोकयाशु माम् ।चण्डिके तेन जीवामो मण्डूका उदकादिव ॥ १०॥

khaṇḍaśarkarayevāmba dayayālokayāśu mām |caṇḍike tena jīvāmo maṇḍūkā udakādiva || 10||

गङ्गाद्या अभिषेकार्थं तुङ्गान्ताः सन्निधत्त भोः ।पापोपशान्त्यै मेमातरापोहिष्ठा मयो भुवः ॥ ११॥

gaṅgādyā abhiṣekārthaṃ tuṅgāntāḥ sannidhatta bhoḥ |pāpopaśāntyai memātarāpohiṣṭhā mayo bhuvaḥ || 11||

हृदयस्थेयसी नित्यं सदये मम कालिके ।भूयाद्वितर मे श्रेयः आयुषा सहवर्चसा ॥ १२॥

hṛdayastheyasī nityaṃ sadaye mama kālike |bhūyādvitara me śreyaḥ āyuṣā sahavarcasā || 12||

काल्ये त्वद्भक्तिविमुखाः कालि सन्ति यतोऽधमाः ।अप्रमत्ताःस्म तं देशं मा प्रगाम पथो वयम् ॥ १३॥

kālye tvadbhaktivimukhāḥ kāli santi yato'dhamāḥ |apramattāḥsma taṃ deśaṃ mā pragāma patho vayam || 13||

असमञ्जससंसारादसमञ्जसमेव माम् ।वत्सला भवती त्रातुं वत्सं गौरिव धावतु ॥ १४॥

asamañjasasaṃsārādasamañjasameva mām |vatsalā bhavatī trātuṃ vatsaṃ gauriva dhāvatu || 14||

अर्थिभ्योऽभीतिवरदे मुदे भद्रं ददासि यत् ।लक्ष्मीस्तं भजतां पद्भ्यां लक्ष्मीमनपगामिनीम् (?) ॥ १५॥

arthibhyo'bhītivarade mude bhadraṃ dadāsi yat |lakṣmīstaṃ bhajatāṃ padbhyāṃ lakṣmīmanapagāminīm (?) || 15||

योऽस्मान् द्वेष्टि वयं यं च द्विष्मो दुष्यति यश्च नः ।दुर्गे शूलेन तानेतान् मम शत्रून् विनाशय ॥ १६॥

yo'smān dveṣṭi vayaṃ yaṃ ca dviṣmo duṣyati yaśca naḥ |durge śūlena tānetān mama śatrūn vināśaya || 16||

धीरैकसुलभां देवीं घोरसंसारमोचनीम् ।अहोरात्रं च नः पायादघोरा पापकाशिनी ॥ १७॥

dhīraikasulabhāṃ devīṃ ghorasaṃsāramocanīm |ahorātraṃ ca naḥ pāyādaghorā pāpakāśinī || 17||

ब्रह्मानन्दसमुल्लासे लीलान्दोलितलोचनाम् ।महासौभाग्यजननीं महालक्ष्मीमुपास्महे ॥ १८॥

brahmānandasamullāse līlāndolitalocanām |mahāsaubhāgyajananīṃ mahālakṣmīmupāsmahe || 18||

उग्रपत्नि समग्रान्मे दुर्ग्रहानाग्रहादिकान् ।अनुग्रहादिमान् शिक्ष सर्वग्रहनिवारिणी ॥ १९॥

ugrapatni samagrānme durgrahānāgrahādikān |anugrahādimān śikṣa sarvagrahanivāriṇī || 19||

आर्तिं निवार्य भद्राणि पूर्तिं स्फूर्तिं च पार्वति ।मूर्तिं प्रदर्श्य रुचिरां कीर्तिमृद्धिं ददातु मे ॥ २०॥

ārtiṃ nivārya bhadrāṇi pūrtiṃ sphūrtiṃ ca pārvati |mūrtiṃ pradarśya rucirāṃ kīrtimṛddhiṃ dadātu me || 20||

अधिकारिसमिद्धं मां सन्ध्यानटनसाक्षिणी ।वर्चस्वन्तं धराध्यक्षं आयुष्मन्तं करोतु माम् ॥ २१॥

adhikārisamiddhaṃ māṃ sandhyānaṭanasākṣiṇī |varcasvantaṃ dharādhyakṣaṃ āyuṣmantaṃ karotu mām || 21||

गर्भातिदयिते दुर्गे निसर्गस्त्वं जगत्त्वयि ।आयुस्तत्कृपया नित्यं मयि श्रीः श्रयतां यशः ॥ २२॥

garbhātidayite durge nisargastvaṃ jagattvayi |āyustatkṛpayā nityaṃ mayi śrīḥ śrayatāṃ yaśaḥ || 22||

वेदान् शास्त्राणि यज्ञांश्च मोदाद्भक्तिमपि त्वयि ।प्रियं कीर्ति धृतिं दाक्ष्यं श्रियं वासय मे कुले ॥ २३॥

vedān śāstrāṇi yajñāṃśca modādbhaktimapi tvayi |priyaṃ kīrti dhṛtiṃ dākṣyaṃ śriyaṃ vāsaya me kule || 23||

माता कथं विरुद्धांस्त्वं सहसे सर्वमङ्गले ।सर्वाण्यलक्ष्मीमापत्तिं सर्वां निर्णुद मे गृहात् ॥ २४॥

mātā kathaṃ viruddhāṃstvaṃ sahase sarvamaṅgale |sarvāṇyalakṣmīmāpattiṃ sarvāṃ nirṇuda me gṛhāt || 24||

राजराजेश्वरी माता धत्से त्वं धनमव्ययम् ।दयां कुरु सुतेऽहं त्वां तामिहोपह्वये श्रियम् ॥ २५॥

rājarājeśvarī mātā dhatse tvaṃ dhanamavyayam |dayāṃ kuru sute'haṃ tvāṃ tāmihopahvaye śriyam || 25||

मदीयहृदयाब्जस्थत्वदीयमहसा शिवे ।जहि मे क्रोधलोभादीन् लक्ष्मीमावासयान्वहम् ॥ २६॥

madīyahṛdayābjasthatvadīyamahasā śive |jahi me krodhalobhādīn lakṣmīmāvāsayānvaham || 26||

पवित्रमन्त्रैः सुश्लोकै विचित्ररचनैः शिवाम् ।वाचस्पतिरिव स्तुत्वा वाचस्पत्यमशीमहि ॥ २७॥

pavitramantraiḥ suślokai vicitraracanaiḥ śivām |vācaspatiriva stutvā vācaspatyamaśīmahi || 27||

पुत्रदे पौत्रदे मातर्नष्टदे गजवाजिदे ।ज्ञानदायै नमस्तुभ्यं धनदायै महाधने ॥ २८॥

putrade pautrade mātarnaṣṭade gajavājide |jñānadāyai namastubhyaṃ dhanadāyai mahādhane || 28||

तेजसे यशसे मातरोजसे महसे शिवे ।चर्चिते गन्धपुष्पाद्यैरचेतास्त्वां हवामहे ॥ २९॥

tejase yaśase mātarojase mahase śive |carcite gandhapuṣpādyairacetāstvāṃ havāmahe || 29||

सञ्चितागामिदुःखेभ्यः स्मरतस्त्वामपालयः ।प्रारब्धाच्च महादेवि पुनर्नः पाहि विश्वतः ॥ ३०॥

sañcitāgāmiduḥkhebhyaḥ smaratastvāmapālayaḥ |prārabdhācca mahādevi punarnaḥ pāhi viśvataḥ || 30||

पौण्डरीकान्तयज्ञेभ्यश्चण्डिके प्रीतये तव ।शतानि दशरिक्थानां आसहस्राणि दद्महे ॥ ३१॥

pauṇḍarīkāntayajñebhyaścaṇḍike prītaye tava |śatāni daśarikthānāṃ āsahasrāṇi dadmahe || 31||

जपात्पवित्रकैर्मन्त्रैः शिवायै पायसं धृतम् ।बिल्वपत्रसरोजानां सहस्राणि च दद्महे ॥ ३२॥

japātpavitrakairmantraiḥ śivāyai pāyasaṃ dhṛtam |bilvapatrasarojānāṃ sahasrāṇi ca dadmahe || 32||

पण्डितास्तैरलं धीराः पौण्डरीकान्तकर्मभिः ।उपासितुं महाविद्यां असखाय आनिषीदथ ॥ ३३॥

paṇḍitāstairalaṃ dhīrāḥ pauṇḍarīkāntakarmabhiḥ |upāsituṃ mahāvidyāṃ asakhāya āniṣīdatha || 33||

विपक्षापक्षयक्षारिपक्षग्रहमहर्क्षजम् ।भयशंसीक्ष कामाक्षि रक्षस्व मां पदे पदे ॥ ३४॥

vipakṣāpakṣayakṣāripakṣagrahamaharkṣajam |bhayaśaṃsīkṣa kāmākṣi rakṣasva māṃ pade pade || 34||

प्रचण्डचण्डमुण्डादिखण्डनोद्दण्डवज्रके ।ये मेधनापहर्तास्तांस्ते ददामि जम्भयोः ॥ ३५॥

pracaṇḍacaṇḍamuṇḍādikhaṇḍanoddaṇḍavajrake |ye medhanāpahartāstāṃste dadāmi jambhayoḥ || 35||

प्रारब्धमनिवार्यं चेदीदृशे वरदाभये ।किमर्थं तव देव्यै ते ततो मे श्रियमावह ॥ ३६॥

prārabdhamanivāryaṃ cedīdṛśe varadābhaye |kimarthaṃ tava devyai te tato me śriyamāvaha || 36||

ब्रह्मचक्रलसद्भूपा ब्रह्मविद्याविदेवताः ।ईडनीयास्त्रयीचूडैः षोडशी शर्म यच्छतु ॥ ३७॥

brahmacakralasadbhūpā brahmavidyāvidevatāḥ |īḍanīyāstrayīcūḍaiḥ ṣoḍaśī śarma yacchatu || 37||

महादारिद्र्यशमनीं याभूत्पापविमोचनाम् ।शिवां नुमस्तां कालाग्नौ शिवारुद्रस्य भेषजी ॥ ३८॥

mahādāridryaśamanīṃ yābhūtpāpavimocanām |śivāṃ numastāṃ kālāgnau śivārudrasya bheṣajī || 38||

अन्नपूर्णे दयापूर्णे त्वन्नाम परिकुर्वते(तः) ।सन्निधत्स्व ममोदारे अन्नपाने च सर्वदा ॥ ३९॥

annapūrṇe dayāpūrṇe tvannāma parikurvate(taḥ) |sannidhatsva mamodāre annapāne ca sarvadā || 39||

यदि देवि कटाक्षः स्याद्हृदि शक्रादयः सुराः ।मुहुर्हविर्भिः सोमाद्यैरहं वो जीवनप्रदः ॥ ४०॥

yadi devi kaṭākṣaḥ syādhṛdi śakrādayaḥ surāḥ |muhurhavirbhiḥ somādyairahaṃ vo jīvanapradaḥ || 40||

यत्सान्निध्यं देवि सिद्धं असाध्यं साधयाशु मे ।ईदृशेन महिम्ना त्वां प्रशंसन्ति प्रशस्तिभिः ॥ ४१॥

yatsānnidhyaṃ devi siddhaṃ asādhyaṃ sādhayāśu me |īdṛśena mahimnā tvāṃ praśaṃsanti praśastibhiḥ || 41||

नानन्दयन्ति किं देवि सकृद्वा त्वां गिरो मम ।भक्तिरक्ती न चेद्वेत्सि भुक्तिमुक्ती न दित्ससि ॥ ४२॥

nānandayanti kiṃ devi sakṛdvā tvāṃ giro mama |bhaktiraktī na cedvetsi bhuktimuktī na ditsasi || 42||

अधमर्णत्वमेतत्ते त्वं हि वेत्थ यथातथम् ।आक्षेपं नः समाधेहि तिष्ठन्ती पुरतो मम ॥ ४३॥

adhamarṇatvametatte tvaṃ hi vettha yathātatham |ākṣepaṃ naḥ samādhehi tiṣṭhantī purato mama || 43||

निश्चित्य व्यतिरेकं ते भूरि नाम मनामहे ।तुभ्यं देवि यशस्कामा भक्तस्यैतन्निदर्शनम् ॥ ४४॥

niścitya vyatirekaṃ te bhūri nāma manāmahe |tubhyaṃ devi yaśaskāmā bhaktasyaitannidarśanam || 44||

जिष्णोरपि सखायोऽद्य विष्णोः कर्माणि पश्यत ।कर्मणाभ्यर्णपूर्णा त्वं कर्णिकाकर्णिसन्मुखी ॥ ४५॥

jiṣṇorapi sakhāyo'dya viṣṇoḥ karmāṇi paśyata |karmaṇābhyarṇapūrṇā tvaṃ karṇikākarṇisanmukhī || 45||

अपर्णां वर्णये तूर्णं सुवर्णां हेममालिनीम् ।तुङ्गस्तनीं शर्वसर्वमङ्गलामीश्वरप्रियाम् ॥ ४६॥

aparṇāṃ varṇaye tūrṇaṃ suvarṇāṃ hemamālinīm |tuṅgastanīṃ śarvasarvamaṅgalāmīśvarapriyām || 46||

मङ्गलायतनां(नं)लौमि पिङ्गलां पद्ममालिनीम् ।नन्दनोत्त्थ सुपुष्पाणि चन्दनान्यर्चितुं शिवाम् ॥ ४७॥

maṅgalāyatanāṃ(naṃ)laumi piṅgalāṃ padmamālinīm |nandanotttha supuṣpāṇi candanānyarcituṃ śivām || 47||

स्वयं सम्पाद्य पुरतः श्रियं देवीमुपह्वये ।दयार्द्रहृदये मातः क्रियाशालिनमप्युमे ॥ ४८॥

svayaṃ sampādya purataḥ śriyaṃ devīmupahvaye |dayārdrahṛdaye mātaḥ kriyāśālinamapyume || 48||

त्वं मां भजस्व पद्माक्षि येन सौख्यं लभाम्यहम् ।रक्ष मामम्ब ललिते यक्षराजसमर्चिते ॥ ४९॥

tvaṃ māṃ bhajasva padmākṣi yena saukhyaṃ labhāmyaham |rakṣa māmamba lalite yakṣarājasamarcite || 49||

पूजार्चेह विराजेते प्रजया च धनेन च ।परितः कान्ति धी श्रीभिर्गरिमाणं ययुः शिवे ॥ ५०॥

pūjārceha virājete prajayā ca dhanena ca |paritaḥ kānti dhī śrībhirgarimāṇaṃ yayuḥ śive || 50||

उमे तव दया दृष्ट्या सोम इन्द्र बृहस्पती ।त्वच्चारु चरणं स्मृत्वा सच्चिदानन्दरूपिणि ॥ ५१॥

ume tava dayā dṛṣṭyā soma indra bṛhaspatī |tvaccāru caraṇaṃ smṛtvā saccidānandarūpiṇi || 51||

अच्युतो वाग्भवप्राप्तौ अच्युतां बहुलां प्रियाम् ।हनुमद्वर रामाद्यैर्मनुभृद्भिर्महात्मभिः ॥ ५२॥

acyuto vāgbhavaprāptau acyutāṃ bahulāṃ priyām |hanumadvara rāmādyairmanubhṛdbhirmahātmabhiḥ || 52||

अर्थितासि महादेवि दीर्घायुत्वाय वर्चसे ।गुणाढ्यपाकसरसशय्यालङ्काररीतिभिः ॥ ५३॥

arthitāsi mahādevi dīrghāyutvāya varcase |guṇāḍhyapākasarasaśayyālaṅkārarītibhiḥ || 53||

शोभतां सुसुखं वाणी शोभयन्ती मुखं मम ।दुष्टचित्तं नष्टवित्तं कष्टवृत्तमिमं जनम् ॥ ५४॥

śobhatāṃ susukhaṃ vāṇī śobhayantī mukhaṃ mama |duṣṭacittaṃ naṣṭavittaṃ kaṣṭavṛttamimaṃ janam || 54||

पातुं जननि ते चित्तं यथा वारीव धावतु ।उत्तिष्ठ देवि किं शेषे वरदाभयशोभिते ॥ ५५॥

pātuṃ janani te cittaṃ yathā vārīva dhāvatu |uttiṣṭha devi kiṃ śeṣe varadābhayaśobhite || 55||

पाहि दुर्गेऽतिदुष्टेभ्यो भयं विन्दति मामिह ।दुग्धेति तिले घृतं तैलं मुग्धे घण्टाध्वनिं यथा ॥ ५६॥

pāhi durge'tiduṣṭebhyo bhayaṃ vindati māmiha |dugdheti tile ghṛtaṃ tailaṃ mugdhe ghaṇṭādhvaniṃ yathā || 56||

मुदा त्वां सर्वगां देवीं सदा पश्यन्ति सूरयः ।प्रपञ्चसृष्टेस्त्वं पूर्वं ब्रह्माणी सहिताम्बिके ॥ ५७॥

mudā tvāṃ sarvagāṃ devīṃ sadā paśyanti sūrayaḥ |prapañcasṛṣṭestvaṃ pūrvaṃ brahmāṇī sahitāmbike || 57||

अजीजनस्त्वं धातारं शाश्वतं शिवमच्युतम् ।स्थलीकमलसङ्काशं पादलक्ष्म तवेश्वरि ॥ ५८॥

ajījanastvaṃ dhātāraṃ śāśvataṃ śivamacyutam |sthalīkamalasaṅkāśaṃ pādalakṣma taveśvari || 58||

माहिषे मस्तके भाति विद्युल्लेखेव भास्वरा ।मूढोऽयमिति मा मंस्थास्स्मर्ताहं ताः समागताः (?) ॥ ५९॥

māhiṣe mastake bhāti vidyullekheva bhāsvarā |mūḍho'yamiti mā maṃsthāssmartāhaṃ tāḥ samāgatāḥ (?) || 59||

त्वया विना न किञ्चिञ्च दृश्यन्ते श्रूयतेऽपि वा ।वन्दे विन्ध्याचलकुचां विन्ध्याचलनिवासिनीम् ॥ ६०॥

tvayā vinā na kiñciñca dṛśyante śrūyate'pi vā |vande vindhyācalakucāṃ vindhyācalanivāsinīm || 60||

सन्ध्यासु पूजयसि चेद्धाता गर्भं दधातु ते ।कुरुविन्दमणीन्द्राभमरविन्दलसन्मुखम् ॥ ६१॥

sandhyāsu pūjayasi ceddhātā garbhaṃ dadhātu te |kuruvindamaṇīndrābhamaravindalasanmukham || 61||

अहो तादृक् तवशिवे महो नो राय आभर ।अखण्डवेदवाक्यार्थे अखण्डैकरसे शिवे ॥ ६२॥

aho tādṛk tavaśive maho no rāya ābhara |akhaṇḍavedavākyārthe akhaṇḍaikarase śive || 62||

अभयामद्वयां च त्वां सुभगामहमश्रवम् ।चतुःसाधनसम्पन्न चतुरानुभवात्वियम् ॥ ६३॥

abhayāmadvayāṃ ca tvāṃ subhagāmahamaśravam |catuḥsādhanasampanna caturānubhavātviyam || 63||

परं ब्रह्मेयमेव श्रीर्नह्यस्या अपरं च न ।भवत्पादाम्बुजद्वन्द्वभवन्माध्वीकषट्पदी ॥ ६४॥

paraṃ brahmeyameva śrīrnahyasyā aparaṃ ca na |bhavatpādāmbujadvandvabhavanmādhvīkaṣaṭpadī || 64||

रुद्रभाग्याच्छचीपत्नी इन्द्रपत्नी महीयते ।पापाधिक्याद्व्रजामस्त्वां सापायाऽऽमयवानपि ॥ ६५॥

rudrabhāgyācchacīpatnī indrapatnī mahīyate |pāpādhikyādvrajāmastvāṃ sāpāyā''mayavānapi || 65||

ग्रीवातिगश्वसनवान् जीवाति शरदः शतम् ।साष्टोत्तरशतावृत्त्याभीष्टोदयमहामनुम् ॥ ६६॥

grīvātigaśvasanavān jīvāti śaradaḥ śatam |sāṣṭottaraśatāvṛttyābhīṣṭodayamahāmanum || 66||

विष्णुवज्जायते गौरि भूष्णुरात्मा फलग्रहिः ।जपाकुसुमसङ्काशां कृपाबालमहालताम् ॥ ६७॥

viṣṇuvajjāyate gauri bhūṣṇurātmā phalagrahiḥ |japākusumasaṅkāśāṃ kṛpābālamahālatām || 67||

आर्यां सेवे विनीतायां सूर्याभां श्रियमीश्वरीम् ।ताम्बूलकबलैर्दिव्यैस्ताम्बूलितमुखाम्बुजान् ॥ ६८॥

āryāṃ seve vinītāyāṃ sūryābhāṃ śriyamīśvarīm |tāmbūlakabalairdivyaistāmbūlitamukhāmbujān || 68||

शिवदालिगता यासा शिवा नश्यत्तमा भव ।तथा प्रपद्ये त्वां मातर्यया नद्यः समुद्रागाः ॥ ६९॥

śivadāligatā yāsā śivā naśyattamā bhava |tathā prapadye tvāṃ mātaryayā nadyaḥ samudrāgāḥ || 69||

यथावृतवृतं याति यथा मासा अहर्जरम् ।यत्रानन्दाश्च मोदाश्च मुदप्रमुद आसते ॥ ७०॥

yathāvṛtavṛtaṃ yāti yathā māsā aharjaram |yatrānandāśca modāśca mudapramuda āsate || 70||

मातस्त्वयि दयामूर्तौ तत्रमामृतं कृधि ।जपन्तस्तव विद्यां च यजन्तस्त्वां हवाम च ॥ ७१॥

mātastvayi dayāmūrtau tatramāmṛtaṃ kṛdhi |japantastava vidyāṃ ca yajantastvāṃ havāma ca || 71||

शर्वाणि दयया धीराः सर्वे साकं सरातयः ।आनन्दरूपममृतं परं ब्रह्मैव सा शिवा ॥ ७२॥

śarvāṇi dayayā dhīrāḥ sarve sākaṃ sarātayaḥ |ānandarūpamamṛtaṃ paraṃ brahmaiva sā śivā || 72||

नैव स्त्री न पुमानेष नायमेष नपुंसकः ।जीर्णोऽप्ययं त्वद्दयया पूर्णया तूर्णमिन्द्रियैः ॥ ७३॥

naiva strī na pumāneṣa nāyameṣa napuṃsakaḥ |jīrṇo'pyayaṃ tvaddayayā pūrṇayā tūrṇamindriyaiḥ || 73||

आनन्दं ब्रह्मणो विद्वान् न बिभेति कुतश्चन ।सद्गुरोर्लब्धया ब्रह्मरूपया कश्चिदात्मवान् ॥ ७४॥

ānandaṃ brahmaṇo vidvān na bibheti kutaścana |sadgurorlabdhayā brahmarūpayā kaścidātmavān || 74||

हृद्यया कृपया ते वै विद्ययाऽमृतमश्नुते ।सर्वगा त्वमहं भृत्यः कीदृशःस्थेम मस्तकः ॥ ७५॥

hṛdyayā kṛpayā te vai vidyayā'mṛtamaśnute |sarvagā tvamahaṃ bhṛtyaḥ kīdṛśaḥsthema mastakaḥ || 75||

यतो वाचो निवर्तन्ते अप्राप्यमनसा सह ।ज्ञानादेव तु कैवल्यमित्यादिश्रुतिकोटिभिः ॥ ७६॥

yato vāco nivartante aprāpyamanasā saha |jñānādeva tu kaivalyamityādiśrutikoṭibhiḥ || 76||

जीवन्मुक्तस्ततो मातर्मामा ब्रह्म निराकरोत् ।साक्षात्कृतायामम्बायां सत्यानन्दचिदात्मनि ॥ ७७॥

jīvanmuktastato mātarmāmā brahma nirākarot |sākṣātkṛtāyāmambāyāṃ satyānandacidātmani || 77||

भिद्यते हृदयग्रन्थिश्छिद्यन्ते सर्वसंशयाः ।वर्णाश्रमोचितमतिर्वेदारण्येष्वटंश्च यः ॥ ७८॥

bhidyate hṛdayagranthiśchidyante sarvasaṃśayāḥ |varṇāśramocitamatirvedāraṇyeṣvaṭaṃśca yaḥ || 78||

त्वत्प्रसादादुमे धीरश्चरन् वै मधुविन्दति ।भूष्णुभ्यां कृष्णजिष्णुभ्यां पूज्ये पुष्णासि पार्वति ॥ ७९॥

tvatprasādādume dhīraścaran vai madhuvindati |bhūṣṇubhyāṃ kṛṣṇajiṣṇubhyāṃ pūjye puṣṇāsi pārvati || 79||

त्वत्कृपाबलतो विष्णुरिदं विष्णुर्विचक्रमे ।शारदाब्दमुखी पातु शारदाऽपारदाऽमला ॥ ८०॥

tvatkṛpābalato viṣṇuridaṃ viṣṇurvicakrame |śāradābdamukhī pātu śāradā'pāradā'malā || 80||

त्वत्प्रसादादभून्मातः सुमृकीका सरस्वती ।पद्माक्षीं पद्मगां वन्दे पद्माक्ष्यादिभिरीडिताम् ॥ ८१॥

tvatprasādādabhūnmātaḥ sumṛkīkā sarasvatī |padmākṣīṃ padmagāṃ vande padmākṣyādibhirīḍitām || 81||

त्वत्प्रसादात्पद्महस्तां हस्तिनादप्रमोदिनीम् ।गौरीकल्याणवैभोगं ऊरीचक्रुः स्त्रियोऽप्यथ ॥ ८२॥

tvatprasādātpadmahastāṃ hastinādapramodinīm |gaurīkalyāṇavaibhogaṃ ūrīcakruḥ striyo'pyatha || 82||

जम्भितोग्रकिणैरङ्गैर्नदीनां वितनोषि ते ।सहस्रादिमहास्वेदैः सहस्राणि सहस्रशः ॥ ८३॥

jambhitograkiṇairaṅgairnadīnāṃ vitanoṣi te |sahasrādimahāsvedaiḥ sahasrāṇi sahasraśaḥ || 83||

तत्तत्कालेष्वहल्यायै जारोऽपिखलु यज्वभिः ।इज्यन्ते त्वत्प्रसादात्तैर्विश्वस्मादिन्द्र उत्तरः ॥ ८४॥

tattatkāleṣvahalyāyai jāro'pikhalu yajvabhiḥ |ijyante tvatprasādāttairviśvasmādindra uttaraḥ || 84||

कन्याप्यर्जति भाग्यादिलाभाय शुभकर्मसु ।त्वत्प्रसादातिशुद्धाङ्गी इन्द्राणीमासु नारीषु ॥ ८५॥

kanyāpyarjati bhāgyādilābhāya śubhakarmasu |tvatprasādātiśuddhāṅgī indrāṇīmāsu nārīṣu || 85||

एक द्वित्रिचतुष्पञ्चषट्सप्ताष्टादिरूपकम् ।त्वत्प्रसादान्महातत्वं अग्निमीळे पुरोहितम् ॥ ८६॥

eka dvitricatuṣpañcaṣaṭsaptāṣṭādirūpakam |tvatprasādānmahātatvaṃ agnimīḷe purohitam || 86||

गङ्गां भगीरथायाससङ्गां तुङ्गां त्वदाश्रयात् ।क्रमेण गौरि पश्यामः श्रमेण महता पथि ॥ ८७॥

gaṅgāṃ bhagīrathāyāsasaṅgāṃ tuṅgāṃ tvadāśrayāt |krameṇa gauri paśyāmaḥ śrameṇa mahatā pathi || 87||

दिव्यालङ्ग्रहमात्राष्टभैरवाभयकृन्मुखाः ।यतो देवि भवत्प्रीत्यै अतो देवा अवन्तुनः ॥ ८८॥

divyālaṅgrahamātrāṣṭabhairavābhayakṛnmukhāḥ |yato devi bhavatprītyai ato devā avantunaḥ || 88||

सुगन्ध चर्चितां कुन्दमन्दारकुसुमोज्ज्वलाम् ।स्तुवे दुकूलवसनां सुवर्णरजतस्रजाम् ॥ ८९॥

sugandha carcitāṃ kundamandārakusumojjvalām |stuve dukūlavasanāṃ suvarṇarajatasrajām || 89||

गाङ्गेयानि च रत्नानि गाङ्गेयानि सृजानि ते । (?)शतसाहस्रदशकान् शतनिष्कान् सहस्रशः ॥ ९०॥

gāṅgeyāni ca ratnāni gāṅgeyāni sṛjāni te | (?)śatasāhasradaśakān śataniṣkān sahasraśaḥ || 90||

अस्य द्विपित्साभव रुक्चिचित्सासुपूर्णलिप्सास्तु शिवा सुवत्सा ।श्रीकण्ठलिप्सासदभीष्टलिप्साशालान्तरे गौरिव नष्टवत्सा ॥ ९१॥

asya dvipitsābhava rukcicitsāsupūrṇalipsāstu śivā suvatsā |śrīkaṇṭhalipsāsadabhīṣṭalipsāśālāntare gauriva naṣṭavatsā || 91||

नमो मखेभ्यो मघवन्मखेभ्योमुरवाग्रदृग्भ्यो दृगनद्वयेभ्यः ।दया युतेभ्यः श्रुतिशास्त्रदृग्भ्योनमो युवभ्यो नम अशिनेभ्यः ॥ ९२॥

namo makhebhyo maghavanmakhebhyomuravāgradṛgbhyo dṛganadvayebhyaḥ |dayā yutebhyaḥ śrutiśāstradṛgbhyonamo yuvabhyo nama aśinebhyaḥ || 92||

महामाये सृजसि हिरण्यगर्भप्रभृत्येतद्भुवनमिवोर्णनाभिः ।स्वतस्तन्तून्भगवति देवि पश्चादजीर्णात्वं जरयसि सर्वमेतत् ॥ ९३॥

mahāmāye sṛjasi hiraṇyagarbhaprabhṛtyetadbhuvanamivorṇanābhiḥ |svatastantūnbhagavati devi paścādajīrṇātvaṃ jarayasi sarvametat || 93||

शिवं सुरेभ्यः कृपयाम्ब तेऽद्यशिवे मुनिभ्यः शिवमर्भकेभ्यः ।शिवं द्विजेभ्यः शिवमेव गोभ्यःशिवं प्रजायै शिवमस्तु मह्यम् ॥ ९४॥

śivaṃ surebhyaḥ kṛpayāmba te'dyaśive munibhyaḥ śivamarbhakebhyaḥ |śivaṃ dvijebhyaḥ śivameva gobhyaḥśivaṃ prajāyai śivamastu mahyam || 94||

वेदान्ताद्यैः परितोघोषयित्वाशक्त्याकारा प्रतिजातं महेशि ।सर्वत्रैव रमसेऽस्मिन् प्रपञ्चेपूर्णा पश्चात् उत पूर्णा पुरस्तात् ॥ ९५॥

vedāntādyaiḥ paritoghoṣayitvāśaktyākārā pratijātaṃ maheśi |sarvatraiva ramase'smin prapañcepūrṇā paścāt uta pūrṇā purastāt || 95||

नामानि शम्भुं नतकल्पपादंपरमा पतिस्तुत्य पदाम्बुजद्वयम् ।कुमारविघ्नेशकुतूहलास्पदंउमासहायं परमेश्वरं प्रभुम् ॥ ९६॥

nāmāni śambhuṃ natakalpapādaṃparamā patistutya padāmbujadvayam |kumāravighneśakutūhalāspadaṃumāsahāyaṃ parameśvaraṃ prabhum || 96||

वर्षार्थनियमादस्य हर्षान्प्रजपतोऽभवत् ।वेधोऽङ्गना प्रयच्छन्ति(न्ती) मेधां देवी सरस्वती ॥ ९७॥

varṣārthaniyamādasya harṣānprajapato'bhavat |vedho'ṅganā prayacchanti(ntī) medhāṃ devī sarasvatī || 97||

घोरवृश्चिकदुःस्वप्न चोरसर्पादिशान्तये ।गोत्रात्मजास्तुतिं पुण्यां रात्रौ रात्रौ सदा पठेत् ॥ ९८॥

ghoravṛścikaduḥsvapna corasarpādiśāntaye |gotrātmajāstutiṃ puṇyāṃ rātrau rātrau sadā paṭhet || 98||

स्तुत्या पूजयतां भक्त्याऽमर्त्यां श्रेयः परम्पराम् ।शर्वेण सा ददात्यम्बा सर्वमायुरुपासताम् ॥ ९९॥

stutyā pūjayatāṃ bhaktyā'martyāṃ śreyaḥ paramparām |śarveṇa sā dadātyambā sarvamāyurupāsatām || 99||

सहस्रकृत्वः पुत्रार्थी स घस्रे प्रजपेद्यदि ।वशगस्तस्य तनयो दशमे मासि जायते ॥ १००॥

sahasrakṛtvaḥ putrārthī sa ghasre prajapedyadi |vaśagastasya tanayo daśame māsi jāyate || 100||

शान्त्या मुमुक्षयाथर्वयजुरृक्सामशालिनाम् ।पाहि मुक्तिं शिवे देहि सा हि श्रीरमृता सताम् ॥ १०१॥

śāntyā mumukṣayātharvayajurṛksāmaśālinām |pāhi muktiṃ śive dehi sā hi śrīramṛtā satām || 101||

विश्रुतैः श्रुतिपदैः कमनीयंभव्यमव्ययमिदं भगवत्याः ।(दिव्यचित्र) यः पठेत्प्रिदिनं भजनीयंतस्य नायुषि भवेत्किल सत्यम् ॥ १०२॥

viśrutaiḥ śrutipadaiḥ kamanīyaṃbhavyamavyayamidaṃ bhagavatyāḥ |(divyacitra) yaḥ paṭhetpridinaṃ bhajanīyaṃtasya nāyuṣi bhavetkila satyam || 102||

॥ इति श्रीशिवरहस्यान्तर्गते देवीवेदपादस्तवः सम्पूर्णम् ॥॥ श्रीशिवरहस्यम् । द्वादशांशः । अध्यायः २५ देवीवेदपादस्तवः । ११०२ ॥

|| iti śrīśivarahasyāntargate devīvedapādastavaḥ sampūrṇam |||| śrīśivarahasyam | dvādaśāṃśaḥ | adhyāyaḥ 25 devīvedapādastavaḥ | 1102 ||

– ॥ श्रीशिवरहस्यम् ।द्वादशांशः ।अध्यायः २५ देवीवेदपादस्तवः ।१-१०२ ॥

– || śrīśivarahasyam |dvādaśāṃśaḥ |adhyāyaḥ 25 devīvedapādastavaḥ | 1-102 ||