देवीस्तोत्रम् १ Devistotram 1

श्रीगणेशाय नमः ।नमस्तेऽस्तु दुर्गे सदानन्दरूपे सुरैः स्तूयमाने मुनीनां सुपूज्ये ।नमस्ते जगद्वन्द्यपादारविन्दे नमस्ते भवाम्भोधिसन्तारदक्षे ॥ १॥

śrīgaṇeśāya namaḥ |namaste'stu durge sadānandarūpe suraiḥ stūyamāne munīnāṃ supūjye |namaste jagadvandyapādāravinde namaste bhavāmbhodhisantāradakṣe || 1||

नमस्ते नमस्ते सदा दैवतेज्ये तथा दीनदुःखे दयाक्रान्तचित्ते ।नमस्ते महादेवमान्ये भवानि सुदीनं स्वदासं जनं पाहि शश्वत् ॥ २॥

namaste namaste sadā daivatejye tathā dīnaduḥkhe dayākrāntacitte |namaste mahādevamānye bhavāni sudīnaṃ svadāsaṃ janaṃ pāhi śaśvat || 2||

नमस्ते जगद्व्यापिके विश्वरूपे सदा योगिगम्ये स्वभक्त्यैकलभ्ये ।रमाशारदाशम्भुकान्तास्वरूपे नमस्ते महाकालिके शुद्धरूपे ॥ ३॥

namaste jagadvyāpike viśvarūpe sadā yogigamye svabhaktyaikalabhye |ramāśāradāśambhukāntāsvarūpe namaste mahākālike śuddharūpe || 3||

नमस्तेऽम्बिके भक्तसंसेव्यपादे नमस्तेऽघविध्वंसिके सर्वशक्ते ।जगत्कानने क्रोधकामादिहिंस्रैः परीतोऽस्मि मातः सदा रक्ष रक्ष ॥ ४॥

namaste'mbike bhaktasaṃsevyapāde namaste'ghavidhvaṃsike sarvaśakte |jagatkānane krodhakāmādihiṃsraiḥ parīto'smi mātaḥ sadā rakṣa rakṣa || 4||

नमस्ते जगद्बीजरूपे महेशि स्वभक्तेषु रक्ते शरण्ये त्रिनेत्रे ।त्वदन्या न चास्ते विपन्नाशकारी सुसम्पत्प्रदां त्वां सदा संनतोऽस्मि ॥ ५॥

namaste jagadbījarūpe maheśi svabhakteṣu rakte śaraṇye trinetre |tvadanyā na cāste vipannāśakārī susampatpradāṃ tvāṃ sadā saṃnato'smi || 5||

अहं देवि याचे पदाम्भोजसेवां भवत्यास्तथा भक्तिभावं भवेड्ये ।प्रसीदाम्व दासे सदा शैलपुत्रि शिवां शङ्करीं पार्वतीं त्वां भजामि ॥ ६॥

ahaṃ devi yāce padāmbhojasevāṃ bhavatyāstathā bhaktibhāvaṃ bhaveḍye |prasīdāmva dāse sadā śailaputri śivāṃ śaṅkarīṃ pārvatīṃ tvāṃ bhajāmi || 6||

त्वदन्यो न मान्यो न चान्यश्च गण्यस्त्वमेकाऽसि मातर्जगज्जालहेतुः ।जगन्नाशिका पालिका च त्वमेव गिरेर्बालिकां कालिकां संनतोऽहम् ॥ ७॥

tvadanyo na mānyo na cānyaśca gaṇyastvamekā'si mātarjagajjālahetuḥ |jagannāśikā pālikā ca tvameva girerbālikāṃ kālikāṃ saṃnato'ham || 7||

श्रियं शारदां शम्भुशक्तिं महेशीं त्रिनेत्रां च दुर्गां तथा कालरात्रिम् ।तुषाराद्रिपुत्रीं जगद्दुःखहन्त्रीं स्मरन् दुःखनाशो भवेन्मानवानाम् ॥ ८॥

śriyaṃ śāradāṃ śambhuśaktiṃ maheśīṃ trinetrāṃ ca durgāṃ tathā kālarātrim |tuṣārādriputrīṃ jagadduḥkhahantrīṃ smaran duḥkhanāśo bhavenmānavānām || 8||

इदं स्तोत्रं महादेव्या योगानन्देन निर्मितम् ।यः पठेत्प्रातरुथाय स नरो वाञ्छितं लभेत् ॥ ९॥

idaṃ stotraṃ mahādevyā yogānandena nirmitam |yaḥ paṭhetprātaruthāya sa naro vāñchitaṃ labhet || 9||

इति योगानन्दविरचितं श्रीदेवीस्तोत्रं सम्पूर्णम् ॥

iti yogānandaviracitaṃ śrīdevīstotraṃ sampūrṇam ||