मातङ्गीकवचम् ३ अथवा सुमुखीकवचं Sumukhi or Matangi Kavacham

श्रीगणेशाय नमः ।श्रीपार्वत्युवाच ।देवदेव महादेव सृष्टिसंहारकारक ।मातङ्ग्याः कवचं ब्रूहि यदि स्नेहोऽस्ति ते मयि ॥ १॥

śrīgaṇeśāya namaḥ |śrīpārvatyuvāca |devadeva mahādeva sṛṣṭisaṃhārakāraka |mātaṅgyāḥ kavacaṃ brūhi yadi sneho'sti te mayi || 1||

शिव उवाच ।अत्यन्तगोपनं गुह्यं कवचं सर्वकामदम् ।तव प्रीत्या मयाऽऽख्यातं नान्येषु कथ्यते शुभे ॥ २॥

śiva uvāca |atyantagopanaṃ guhyaṃ kavacaṃ sarvakāmadam |tava prītyā mayā''khyātaṃ nānyeṣu kathyate śubhe || 2||

शपथं कुरु मे देवि यदि किञ्चित्प्रकाशसे ।अनया सदृशी विद्या न भूता न भविष्यति ॥ ३॥

śapathaṃ kuru me devi yadi kiñcitprakāśase |anayā sadṛśī vidyā na bhūtā na bhaviṣyati || 3||

शवासनां रक्तवस्त्रां युवतीं सर्वसिद्धिदाम् ।एवं ध्यात्वा महादेवीं पठेत्कवचमुत्तमम् ॥ ४॥

śavāsanāṃ raktavastrāṃ yuvatīṃ sarvasiddhidām |evaṃ dhyātvā mahādevīṃ paṭhetkavacamuttamam || 4||

उच्छिष्टं रक्षतु शिरः शिखां चण्डालिनी ततः ।सुमुखी कवचं रक्षेद्देवी रक्षतु चक्षुषी ॥ ५॥

ucchiṣṭaṃ rakṣatu śiraḥ śikhāṃ caṇḍālinī tataḥ |sumukhī kavacaṃ rakṣeddevī rakṣatu cakṣuṣī || 5||

महापिशाचिनी पायान्नासिकां ह्रीं सदाऽवतु ।ठः पातु कण्ठदेशं मे ठः पातु हृदयं तथा ॥ ६॥

mahāpiśācinī pāyānnāsikāṃ hrīṃ sadā'vatu |ṭhaḥ pātu kaṇṭhadeśaṃ me ṭhaḥ pātu hṛdayaṃ tathā || 6||

ठो भुजौ बाहुमूले च सदा रक्षतु चण्डिका ।ऐं च रक्षतु पादौ मे सौः कुक्षिं सर्वतः शिवा ॥ ७॥

ṭho bhujau bāhumūle ca sadā rakṣatu caṇḍikā |aiṃ ca rakṣatu pādau me sauḥ kukṣiṃ sarvataḥ śivā || 7||

ऐं ह्रीं कटिदेशं च आं ह्रीं सन्धिषु सर्वदा ।ज्येष्ठमातङ्ग्यङ्गुलिर्मे अङ्गुल्यग्रे नमामि च ॥ ८॥

aiṃ hrīṃ kaṭideśaṃ ca āṃ hrīṃ sandhiṣu sarvadā |jyeṣṭhamātaṅgyaṅgulirme aṅgulyagre namāmi ca || 8||

उच्छिष्टचाण्डालि मां पातु त्रैलोक्यस्य वशङ्करी ।शिवे स्वाहा शरीरं मे सर्वसौभाग्यदायिनी ॥ ९॥

ucchiṣṭacāṇḍāli māṃ pātu trailokyasya vaśaṅkarī |śive svāhā śarīraṃ me sarvasaubhāgyadāyinī || 9||

उच्छिष्टचाण्डालि मातङ्गि सर्ववशङ्करि नमः ।स्वाहा स्तनद्वयं पातु सर्वशत्रुविनाशिनी ॥ १०॥

ucchiṣṭacāṇḍāli mātaṅgi sarvavaśaṅkari namaḥ |svāhā stanadvayaṃ pātu sarvaśatruvināśinī || 10||

अत्यन्तगोपनं देवि देवैरपि सुदुर्लभम् ।भ्रष्टेभ्यः साधकेभ्योऽपि द्रष्टव्यं न कदाचन ॥ ११॥

atyantagopanaṃ devi devairapi sudurlabham |bhraṣṭebhyaḥ sādhakebhyo'pi draṣṭavyaṃ na kadācana || 11||

दत्तेन सिद्धिहानिः स्यात्सर्वथा न प्रकाश्यताम् ।उच्छिष्टेन बलिं दत्वा शनौ वा मङ्गले निशि ॥ १२॥

dattena siddhihāniḥ syātsarvathā na prakāśyatām |ucchiṣṭena baliṃ datvā śanau vā maṅgale niśi || 12||

रजस्वलाभगं स्पृष्ट्वा जपेन्मन्त्रं च साधकः ।रजस्वलाया वस्त्रेण होमं कुर्यात्सदा सुधीः ॥ १३॥

rajasvalābhagaṃ spṛṣṭvā japenmantraṃ ca sādhakaḥ |rajasvalāyā vastreṇa homaṃ kuryātsadā sudhīḥ || 13||

सिद्धविद्या इतो नास्ति नियमो नास्ति कश्चन ।अष्टसहस्रं जपेन्मन्त्रं दशांशं हवनादिकम् ॥ १४॥

siddhavidyā ito nāsti niyamo nāsti kaścana |aṣṭasahasraṃ japenmantraṃ daśāṃśaṃ havanādikam || 14||

भूर्जपत्रे लिखित्वा च रक्तसूत्रेण वेष्टयेत् ।प्राणप्रतिष्ठामन्त्रेण जीवन्यासं समाचरेत् ॥ १५॥

bhūrjapatre likhitvā ca raktasūtreṇa veṣṭayet |prāṇapratiṣṭhāmantreṇa jīvanyāsaṃ samācaret || 15||

स्वर्णमध्ये तु संस्थाप्य धारयेद्दक्षिणे करे ।सर्वसिद्धिर्भवेत्तस्य अचिरात्पुत्रवान्भवेत् ॥ १६॥

svarṇamadhye tu saṃsthāpya dhārayeddakṣiṇe kare |sarvasiddhirbhavettasya acirātputravānbhavet || 16||

स्त्रीभिर्वामकरे धार्यं बहुपुत्रा भवेत्तदा ।वन्द्या वा काकवन्द्या वा मृतवत्सा च साङ्गना ॥ १७॥

strībhirvāmakare dhāryaṃ bahuputrā bhavettadā |vandyā vā kākavandyā vā mṛtavatsā ca sāṅganā || 17||

जीवद्वत्सा भवेत्सापि समृद्धिर्भवति ध्रुवम् ।शक्तिपूजां सदा कुर्याच्छिवाबलिं प्रदापयेत् ॥ १८॥

jīvadvatsā bhavetsāpi samṛddhirbhavati dhruvam |śaktipūjāṃ sadā kuryācchivābaliṃ pradāpayet || 18||

इदं कवचमज्ञात्वा मातङ्गी यो जपेत्सदा ।तस्य सिद्धिर्न भवति पुरश्चरणलक्षतः ॥ १९॥

idaṃ kavacamajñātvā mātaṅgī yo japetsadā |tasya siddhirna bhavati puraścaraṇalakṣataḥ || 19||

॥ इति श्रीरुद्रयामले तन्त्रे मातङ्गीसुमुखीकवचं समाप्तम् ॥

|| iti śrīrudrayāmale tantre mātaṅgīsumukhīkavacaṃ samāptam ||