राजराजेश्वरीषोडशी Shri Rajarajeshvarishodashi

नौमि ह्रीञ्जपमात्रतुष्टहृदयां श्रीचक्रराजालयांभाग्यायत्तनिजाङ्घ्रिपङ्कजनतिस्तोत्रादिसंसेवनाम् ।स्कन्देभास्यविभासिपार्श्वयुगलां लावण्यपाथोनिधिंभक्तत्राणपरायणां भगवतीं श्रीराजराजेश्वरीम् ॥ १॥

naumi hrīñjapamātratuṣṭahṛdayāṃ śrīcakrarājālayāṃbhāgyāyattanijāṅghripaṅkajanatistotrādisaṃsevanām |skandebhāsyavibhāsipārśvayugalāṃ lāvaṇyapāthonidhiṃbhaktatrāṇaparāyaṇāṃ bhagavatīṃ śrīrājarājeśvarīm || 1||

नौमि ह्रीमत आदधाति सुगिरा वागीश्वरादीन्सुराँल्लक्ष्मीन्द्रप्रमुखांश्च सत्वरमहो यत्पादनम्रो जनः ।कामादींश्च वशीकरोति तरसाऽऽयासं विना तां मुदाभक्तत्राणपरायणां भगवतीं श्रीराजराजेश्वरीम् ॥ २॥

naumi hrīmata ādadhāti sugirā vāgīśvarādīnsurām̐llakṣmīndrapramukhāṃśca satvaramaho yatpādanamro janaḥ |kāmādīṃśca vaśīkaroti tarasā''yāsaṃ vinā tāṃ mudābhaktatrāṇaparāyaṇāṃ bhagavatīṃ śrīrājarājeśvarīm || 2||

नौमि श्रीसुतजीवनप्रदकटाक्षांशां शशाङ्कं रविंकुर्वाणां निजकर्णभूषणपदादानेन तेजस्विनौ ।चाम्पेयं निजनासिकासदृशतादानात्कृतार्थं तथाभक्तत्राणपरायणां भगवतीं श्रीराजराजेश्वरीम् ॥ ३॥

naumi śrīsutajīvanapradakaṭākṣāṃśāṃ śaśāṅkaṃ raviṃkurvāṇāṃ nijakarṇabhūṣaṇapadādānena tejasvinau |cāmpeyaṃ nijanāsikāsadṛśatādānātkṛtārthaṃ tathābhaktatrāṇaparāyaṇāṃ bhagavatīṃ śrīrājarājeśvarīm || 3||

नौमि श्रीविधिभामिनीकरलसत्सच्चामराभ्यां मुदासव्ये दक्षिणके च वीजनवतीमैन्द्र्यात्तसत्पादुकाम् ।वेदैरात्तवपुर्भिरादरभरात्संस्तूयमानां सदाभक्तत्राणपरायणां भगवतीं श्रीराजराजेश्वरीम् ॥ ४॥

naumi śrīvidhibhāminīkaralasatsaccāmarābhyāṃ mudāsavye dakṣiṇake ca vījanavatīmaindryāttasatpādukām |vedairāttavapurbhirādarabharātsaṃstūyamānāṃ sadābhaktatrāṇaparāyaṇāṃ bhagavatīṃ śrīrājarājeśvarīm || 4||

नौमि श्रीमतिधैर्यवीर्यजननीं पादाम्बुजे जातुचिन्नम्राणामपि शान्तिदान्तिसुगुणान्विश्राणयन्तीं जवात् ।श्रीकामेशमनोऽम्बुजस्य दिवसेशानार्भकाणां ततिंभक्तत्राणपरायणां भगवतीं श्रीराजराजेश्वरीम् ॥ ५॥

naumi śrīmatidhairyavīryajananīṃ pādāmbuje jātucinnamrāṇāmapi śāntidāntisuguṇānviśrāṇayantīṃ javāt |śrīkāmeśamano'mbujasya divaseśānārbhakāṇāṃ tatiṃbhaktatrāṇaparāyaṇāṃ bhagavatīṃ śrīrājarājeśvarīm || 5||

नौमि श्रीपतिपद्मयोनिगिरिजानाथैः समाराधितांरम्भास्तम्भसमानसक्थियुगलां कुम्भाभिरामस्तनीम् ।भामिन्यादिविषोपमेयविषयेष्वत्यन्तवैराग्यदांभक्तत्राणपरायणां भगवतीं श्रीराजराजेश्वरीम् ॥ ६॥

naumi śrīpatipadmayonigirijānāthaiḥ samārādhitāṃrambhāstambhasamānasakthiyugalāṃ kumbhābhirāmastanīm |bhāminyādiviṣopameyaviṣayeṣvatyantavairāgyadāṃbhaktatrāṇaparāyaṇāṃ bhagavatīṃ śrīrājarājeśvarīm || 6||

नौमि व्याहृतिनिर्जितामरधुनीगर्वा भवन्त्यञ्जसामूका अप्यवशाद्यदङ्घ्रियुगलीसदर्शनाज्जातुचित् ।हार्दध्वान्तनिवारणं विदधतीं कान्त्या नखानां हि तांभक्तत्राणपरायणां भगवतीं श्रीराजराजेश्वरीम् ॥ ७॥

naumi vyāhṛtinirjitāmaradhunīgarvā bhavantyañjasāmūkā apyavaśādyadaṅghriyugalīsadarśanājjātucit |hārdadhvāntanivāraṇaṃ vidadhatīṃ kāntyā nakhānāṃ hi tāṃbhaktatrāṇaparāyaṇāṃ bhagavatīṃ śrīrājarājeśvarīm || 7||

नौमि ब्रह्मविबोधिनीं नमुचिजिन्मुख्यामराणां ततेर्भण्डाद्याशरखण्डनैकनिपुणां कल्याणशैलालयाम् ।फुल्लेन्दीवरगर्वहारिनयनां मल्लीसुमालङ्कृतांभक्तत्राणपरायणां भगवतीं श्रीराजराजेश्वरीम् ॥ ८॥

naumi brahmavibodhinīṃ namucijinmukhyāmarāṇāṃ taterbhaṇḍādyāśarakhaṇḍanaikanipuṇāṃ kalyāṇaśailālayām |phullendīvaragarvahārinayanāṃ mallīsumālaṅkṛtāṃbhaktatrāṇaparāyaṇāṃ bhagavatīṃ śrīrājarājeśvarīm || 8||

नौमि प्रीतिमतां यदङ्घ्रियुगलार्चायां न बन्धो भवेत्स्याच्चेद्विन्ध्यनगः प्लवेच्चिरमहो नाथे नदीनामिति ।मूकः प्राह महाकविर्हि करुणापात्रं भवान्याः स्तुतिंभक्तत्राणपरायणां भगवतीं श्रीराजराजेश्वरीम् ॥ ९॥

naumi prītimatāṃ yadaṅghriyugalārcāyāṃ na bandho bhavetsyāccedvindhyanagaḥ plavecciramaho nāthe nadīnāmiti |mūkaḥ prāha mahākavirhi karuṇāpātraṃ bhavānyāḥ stutiṃbhaktatrāṇaparāyaṇāṃ bhagavatīṃ śrīrājarājeśvarīm || 9||

नौमि प्राप्तिकृते यदीयपदयोर्विप्राः समस्तेषणास्त्यक्त्वा सद्गुरुमप्युपेत्य निगमान्तार्थं तदास्याम्बुजात् ।श्रुत्वा तं प्रविचिन्त्य युक्तिभिरतो ध्यायन्ति तां सादरंभक्तत्राणपरायणां भगवतीं श्रीराजराजेश्वरीम् ॥ १०॥

naumi prāptikṛte yadīyapadayorviprāḥ samasteṣaṇāstyaktvā sadgurumapyupetya nigamāntārthaṃ tadāsyāmbujāt |śrutvā taṃ pravicintya yuktibhirato dhyāyanti tāṃ sādaraṃbhaktatrāṇaparāyaṇāṃ bhagavatīṃ śrīrājarājeśvarīm || 10||

नौमि प्राणनिरोधसज्जनसमासङ्गात्मविद्यामुखैराचार्याननपङ्कजप्रगलितैश्चेतो विजित्याशु याम् ।आधारादिसरोरुहेषु सुखतो ध्यायन्ति तां सर्वदाभक्तत्राणपरायणां भगवतीं श्रीराजराजेश्वरीम् ॥ ११॥

naumi prāṇanirodhasajjanasamāsaṅgātmavidyāmukhairācāryānanapaṅkajapragalitaiśceto vijityāśu yām |ādhārādisaroruheṣu sukhato dhyāyanti tāṃ sarvadābhaktatrāṇaparāyaṇāṃ bhagavatīṃ śrīrājarājeśvarīm || 11||

नौमि न्यायमुखेषु शास्त्रनिवहेष्वत्यन्तपाण्डित्यदांवेदान्तेष्वपि निश्चलामलधियं संसारबन्धापहाम् ।दास्यन्तीं दयया प्रणम्रविततेः कामारिवामाङ्कगांभक्तत्राणपरायणां भगवतीं श्रीराजराजेश्वरीम् ॥ १२॥

naumi nyāyamukheṣu śāstranivaheṣvatyantapāṇḍityadāṃvedānteṣvapi niścalāmaladhiyaṃ saṃsārabandhāpahām |dāsyantīṃ dayayā praṇamravitateḥ kāmārivāmāṅkagāṃbhaktatrāṇaparāyaṇāṃ bhagavatīṃ śrīrājarājeśvarīm || 12||

नौमि त्वां शुचिसूर्यचन्द्रनयनां ब्रह्माम्बुजाक्षागजेड्रूपाणि प्रतिगृह्य सर्वजगतां रक्षां मुदा सर्वदा ।कुर्वन्तीं गिरिसार्वभौमतनयां क्षिप्रं प्रणम्रेष्टदांभक्तत्राणपरायणां भगवतीं श्रीराजराजेश्वरीम् ॥ १३॥

naumi tvāṃ śucisūryacandranayanāṃ brahmāmbujākṣāgajeḍrūpāṇi pratigṛhya sarvajagatāṃ rakṣāṃ mudā sarvadā |kurvantīṃ girisārvabhaumatanayāṃ kṣipraṃ praṇamreṣṭadāṃbhaktatrāṇaparāyaṇāṃ bhagavatīṃ śrīrājarājeśvarīm || 13||

नौमि त्वां शरदिन्दुसोदरमुखीं देहप्रभानिर्जितप्रोद्यद्वासरनाथसन्ततिमघाम्भोराशिकुम्भोद्भवम् ।पञ्चप्रेतमये सदा स्थितिमतीं दिव्ये मृगेन्द्रासनेभक्तत्राणपरायणां भगवतीं श्रीराजराजेश्वरीम् ॥ १४॥

naumi tvāṃ śaradindusodaramukhīṃ dehaprabhānirjitaprodyadvāsaranāthasantatimaghāmbhorāśikumbhodbhavam |pañcapretamaye sadā sthitimatīṃ divye mṛgendrāsanebhaktatrāṇaparāyaṇāṃ bhagavatīṃ śrīrājarājeśvarīm || 14||

नौमि त्वामनपेक्षकारणकृपारूपेति कीर्तिं गतांनौकां संसृतिनीरधेस्तु सुदृढां प्रज्ञानमात्रात्मिकाम् ।कालाम्भोदसमानकेशनिचयां कालाहितप्रेयसींभक्तत्राणपरायणां भगवतीं श्रीराजराजेश्वरीम् ॥ १५॥

naumi tvāmanapekṣakāraṇakṛpārūpeti kīrtiṃ gatāṃnaukāṃ saṃsṛtinīradhestu sudṛḍhāṃ prajñānamātrātmikām |kālāmbhodasamānakeśanicayāṃ kālāhitapreyasīṃbhaktatrāṇaparāyaṇāṃ bhagavatīṃ śrīrājarājeśvarīm || 15||

नौमि त्वां गणपः शिवो हरिरुमेत्याद्यैर्वचोभिर्जनास्तत्तन्मूर्तिरता वदन्ति परमप्रेम्णा जगत्यां तु याम् ।तां सर्वाशयसंस्थितां सकलदां कारुण्यवारान्निधिंभक्तत्राणपरायणां भगवतीं श्रीराजराजेश्वरीम् ॥ १६॥

naumi tvāṃ gaṇapaḥ śivo harirumetyādyairvacobhirjanāstattanmūrtiratā vadanti paramapremṇā jagatyāṃ tu yām |tāṃ sarvāśayasaṃsthitāṃ sakaladāṃ kāruṇyavārānnidhiṃbhaktatrāṇaparāyaṇāṃ bhagavatīṃ śrīrājarājeśvarīm || 16||

इति शृङ्गेरि श्रीजगद्गुरु श्रीसच्चिदानन्दशिवाभिनवनृसिंहभारतीस्वामिभिः विरचिता श्रीराजराजेश्वरीषोडशी सम्पूर्णा ।

iti śṛṅgeri śrījagadguru śrīsaccidānandaśivābhinavanṛsiṃhabhāratīsvāmibhiḥ viracitā śrīrājarājeśvarīṣoḍaśī sampūrṇā |