छिन्नमस्ताकवचम् Shri Chinnamasta Kavacham

श्रीगणेशाय नमः ।देव्युवाच ।कथिताश्छिन्नमस्ताया या या विद्या सुगोपिताः ।त्वया नाथेन जीवेश श्रुताश्चाधिगता मया ॥ १॥

śrīgaṇeśāya namaḥ |devyuvāca |kathitāśchinnamastāyā yā yā vidyā sugopitāḥ |tvayā nāthena jīveśa śrutāścādhigatā mayā || 1||

इदानीं श्रोतुमिच्छामि कवचं सर्वसूचितम् ।त्रैलोक्यविजयं नाम कृपया कथ्यतां प्रभो ॥ २॥

idānīṃ śrotumicchāmi kavacaṃ sarvasūcitam |trailokyavijayaṃ nāma kṛpayā kathyatāṃ prabho || 2||

भैरव उवाच ।श्रुणु वक्ष्यामि देवेशि सर्वदेवनमस्कृते ।त्रैलोक्यविजयं नाम कवचं सर्वमोहनम् ॥ ३॥

bhairava uvāca |śruṇu vakṣyāmi deveśi sarvadevanamaskṛte |trailokyavijayaṃ nāma kavacaṃ sarvamohanam || 3||

सर्वविद्यामयं साक्षात्सुरात्सुरजयप्रदम् ।धारणात्पठनादीशस्त्रैलोक्यविजयी विभुः ॥ ४॥

sarvavidyāmayaṃ sākṣātsurātsurajayapradam |dhāraṇātpaṭhanādīśastrailokyavijayī vibhuḥ || 4||

ब्रह्मा नारायणो रुद्रो धारणात्पठनाद्यतः ।कर्ता पाता च संहर्ता भुवनानां सुरेश्वरि ॥ ५॥

brahmā nārāyaṇo rudro dhāraṇātpaṭhanādyataḥ |kartā pātā ca saṃhartā bhuvanānāṃ sureśvari || 5||

न देयं परशिष्येभ्योऽभक्तेभ्योऽपि विशेषतः ।देयं शिष्याय भक्ताय प्राणेभ्योऽप्यधिकाय च ॥ ६॥

na deyaṃ paraśiṣyebhyo'bhaktebhyo'pi viśeṣataḥ |deyaṃ śiṣyāya bhaktāya prāṇebhyo'pyadhikāya ca || 6||

देव्याश्च छिन्नमस्तायाः कवचस्य च भैरवः ।ऋषिस्तु स्याद्विराट् छन्दो देवता छिन्नमस्तका ॥ ७॥

devyāśca chinnamastāyāḥ kavacasya ca bhairavaḥ |ṛṣistu syādvirāṭ chando devatā chinnamastakā || 7||

त्रैलोक्यविजये मुक्तौ विनियोगः प्रकीर्तितः ।हुंकारो मे शिरः पातु छिन्नमस्ता बलप्रदा ॥ ८॥

trailokyavijaye muktau viniyogaḥ prakīrtitaḥ |huṃkāro me śiraḥ pātu chinnamastā balapradā || 8||

ह्रां ह्रूं ऐं त्र्यक्षरी पातु भालं वक्त्रं दिगम्बरा ।श्रीं ह्रीं ह्रूं ऐं दृशौ पातु मुण्डं कर्त्रिधरापि सा ॥ ९॥

hrāṃ hrūṃ aiṃ tryakṣarī pātu bhālaṃ vaktraṃ digambarā |śrīṃ hrīṃ hrūṃ aiṃ dṛśau pātu muṇḍaṃ kartridharāpi sā || 9||

सा विद्या प्रणवाद्यन्ता श्रुतियुग्मं सदाऽवतु ।वज्रवैरोचनीये हुं फट् स्वाहा च ध्रुवादिका ॥ १०॥

sā vidyā praṇavādyantā śrutiyugmaṃ sadā'vatu |vajravairocanīye huṃ phaṭ svāhā ca dhruvādikā || 10||

घ्राणं पातु छिन्नमस्ता मुण्डकर्त्रिविधारिणी ।श्रीमायाकूर्चवाग्बीजैर्वज्रवैरोचनीयह्रूम् ॥ ११॥

ghrāṇaṃ pātu chinnamastā muṇḍakartrividhāriṇī |śrīmāyākūrcavāgbījairvajravairocanīyahrūm || 11||

हूं फट् स्वाहा महाविद्या षोडशी ब्रह्मरूपिणी ।स्वपार्श्वे वर्णिनी चासृग्धारां पाययती मुदा ॥ १२॥

hūṃ phaṭ svāhā mahāvidyā ṣoḍaśī brahmarūpiṇī |svapārśve varṇinī cāsṛgdhārāṃ pāyayatī mudā || 12||

वदनं सर्वदा पातु छिन्नमस्ता स्वशक्तिका ।मुण्डकर्त्रिधरा रक्ता साधकाभीष्टदायिनी ॥ १३॥

vadanaṃ sarvadā pātu chinnamastā svaśaktikā |muṇḍakartridharā raktā sādhakābhīṣṭadāyinī || 13||

वर्णिनी डाकिनीयुक्ता सापि मामभितोऽवतु ।रामाद्या पातु जिह्वां च लज्जाद्या पातु कण्ठकम् ॥ १४॥

varṇinī ḍākinīyuktā sāpi māmabhito'vatu |rāmādyā pātu jihvāṃ ca lajjādyā pātu kaṇṭhakam || 14||

कूर्चाद्या हृदयं पातु वागाद्या स्तनयुग्मकम् ।रमया पुटिता विद्या पार्श्वौ पातु सुरेश्वरी ॥ १५॥

kūrcādyā hṛdayaṃ pātu vāgādyā stanayugmakam |ramayā puṭitā vidyā pārśvau pātu sureśvarī || 15||

मायया पुटिता पातु नाभिदेशे दिगम्बरा ।कूर्चेण पुटिता देवी पृष्ठदेशे सदाऽवतु ॥ १६॥

māyayā puṭitā pātu nābhideśe digambarā |kūrceṇa puṭitā devī pṛṣṭhadeśe sadā'vatu || 16||

वाग्बीजपुटिता चैषा मध्यं पातु सशक्तिका ।ईश्वरी कूर्चवाग्बीजैर्वज्रवैरोचनीयह्रूम् ॥ १७॥

vāgbījapuṭitā caiṣā madhyaṃ pātu saśaktikā |īśvarī kūrcavāgbījairvajravairocanīyahrūm || 17||

हूंफट् स्वाहा महाविद्या कोटिसूर्य्यसमप्रभा ।छिन्नमस्ता सदा पायादुरुयुग्मं सशक्तिका ॥ १८॥

hūṃphaṭ svāhā mahāvidyā koṭisūryyasamaprabhā |chinnamastā sadā pāyāduruyugmaṃ saśaktikā || 18||

ह्रीं ह्रूं वर्णिनी जानुं श्रीं ह्रीं च डाकिनी पदम् ।सर्वविद्यास्थिता नित्या सर्वाङ्गं मे सदाऽवतु ॥ १९॥

hrīṃ hrūṃ varṇinī jānuṃ śrīṃ hrīṃ ca ḍākinī padam |sarvavidyāsthitā nityā sarvāṅgaṃ me sadā'vatu || 19||

प्राच्यां पायादेकलिङ्गा योगिनी पावकेऽवतु ।डाकिनी दक्षिणे पातु श्रीमहाभैरवी च माम् ॥ २०॥

prācyāṃ pāyādekaliṅgā yoginī pāvake'vatu |ḍākinī dakṣiṇe pātu śrīmahābhairavī ca mām || 20||

नैरृत्यां सततं पातु भैरवी पश्चिमेऽवतु ।इन्द्राक्षी पातु वायव्येऽसिताङ्गी पातु चोत्तरे ॥ २१॥

nairṛtyāṃ satataṃ pātu bhairavī paścime'vatu |indrākṣī pātu vāyavye'sitāṅgī pātu cottare || 21||

संहारिणी सदा पातु शिवकोणे सकर्त्रिका ।इत्यष्टशक्तयः पान्तु दिग्विदिक्षु सकर्त्रिकाः ॥ २२॥

saṃhāriṇī sadā pātu śivakoṇe sakartrikā |ityaṣṭaśaktayaḥ pāntu digvidikṣu sakartrikāḥ || 22||

क्रीं क्रीं क्रीं पातु सा पूर्वं ह्रीं ह्रीं मां पातु पावके ।ह्रूं ह्रूं मां दक्षिणे पातु दक्षिणे कालिकाऽवतु ॥ २३॥

krīṃ krīṃ krīṃ pātu sā pūrvaṃ hrīṃ hrīṃ māṃ pātu pāvake |hrūṃ hrūṃ māṃ dakṣiṇe pātu dakṣiṇe kālikā'vatu || 23||

क्रीं क्रीं क्रीं चैव नैरृत्यां ह्रीं ह्रीं च पश्चिमेऽवतु ।ह्रूं ह्रूं पातु मरुत्कोणे स्वाहा पातु सदोत्तरे ॥ २४॥

krīṃ krīṃ krīṃ caiva nairṛtyāṃ hrīṃ hrīṃ ca paścime'vatu |hrūṃ hrūṃ pātu marutkoṇe svāhā pātu sadottare || 24||

महाकाली खड्गहस्ता रक्षःकोणे सदाऽवतु ।तारो माया वधूः कूर्चं फट् कारोऽयं महामनुः ॥ २५॥

mahākālī khaḍgahastā rakṣaḥkoṇe sadā'vatu |tāro māyā vadhūḥ kūrcaṃ phaṭ kāro'yaṃ mahāmanuḥ || 25||

खड्गकर्त्रिधरा तारा चोर्ध्वदेशं सदाऽवतु ।ह्रीं स्त्रीं हूं फट् च पाताले मां पातु चैकजटा सती ।तारा तु सहिता खेऽव्यान्महानीलसरस्वती ॥ २६॥

khaḍgakartridharā tārā cordhvadeśaṃ sadā'vatu |hrīṃ strīṃ hūṃ phaṭ ca pātāle māṃ pātu caikajaṭā satī |tārā tu sahitā khe'vyānmahānīlasarasvatī || 26||

इति ते कथितं देव्याः कवचं मन्त्रविग्रहम् ।यद्धृत्वा पठनान्भीमः क्रोधाख्यो भैरवः स्मृतः ॥ २७॥

iti te kathitaṃ devyāḥ kavacaṃ mantravigraham |yaddhṛtvā paṭhanānbhīmaḥ krodhākhyo bhairavaḥ smṛtaḥ || 27||

सुरासुरमुनीन्द्राणां कर्ता हर्ता भवेत्स्वयम् ।यस्याज्ञया मधुमती याति सा साधकालयम् ॥ २८॥

surāsuramunīndrāṇāṃ kartā hartā bhavetsvayam |yasyājñayā madhumatī yāti sā sādhakālayam || 28||

भूतिन्याद्याश्च डाकिन्यो यक्षिण्याद्याश्च खेचराः ।आज्ञां गृह्णंति तास्तस्य कवचस्य प्रसादतः ॥ २९॥

bhūtinyādyāśca ḍākinyo yakṣiṇyādyāśca khecarāḥ |ājñāṃ gṛhṇaṃti tāstasya kavacasya prasādataḥ || 29||

एतदेवं परं ब्रह्मकवचं मन्मुखोदितम् ।देवीमभ्यर्च गन्धाद्यैर्मूलेनैव पठेत्सकृत् ॥ ३०॥

etadevaṃ paraṃ brahmakavacaṃ manmukhoditam |devīmabhyarca gandhādyairmūlenaiva paṭhetsakṛt || 30||

संवत्सरकृतायास्तु पूजायाः फलमाप्नुयात् ।भूर्जे विलिखितं चैतद्गुटिकां काञ्चनस्थिताम् ॥ ३१॥

saṃvatsarakṛtāyāstu pūjāyāḥ phalamāpnuyāt |bhūrje vilikhitaṃ caitadguṭikāṃ kāñcanasthitām || 31||

धारयेद्दक्षिणे बाहौ कण्ठे वा यदि वान्यतः ।सर्वैश्वर्ययुतो भूत्वा त्रैलोक्यं वशमानयेत् ॥ ३२॥

dhārayeddakṣiṇe bāhau kaṇṭhe vā yadi vānyataḥ |sarvaiśvaryayuto bhūtvā trailokyaṃ vaśamānayet || 32||

तस्य गेहे वसेल्लक्ष्मीर्वाणी च वदनाम्बुजे ।ब्रह्मास्त्रादीनि शस्त्राणि तद्गात्रे यान्ति सौम्यताम् ॥ ३३॥

tasya gehe vasellakṣmīrvāṇī ca vadanāmbuje |brahmāstrādīni śastrāṇi tadgātre yānti saumyatām || 33||

इदं कवचमज्ञात्वा यो भजेच्छिन्नमस्तकाम् ।सोऽपि शत्रप्रहारेण मृत्युमाप्नोति सत्वरम् ॥ ३४॥

idaṃ kavacamajñātvā yo bhajecchinnamastakām |so'pi śatraprahāreṇa mṛtyumāpnoti satvaram || 34||

॥ इति श्रीभैरवतन्त्रे भैरवभैरवीसंवादेत्रैलोक्यविजयं नाम छिन्नमस्ताकवचं सम्पूर्णम् ॥

|| iti śrībhairavatantre bhairavabhairavīsaṃvādetrailokyavijayaṃ nāma chinnamastākavacaṃ sampūrṇam ||