छिन्नमस्ताहृदयम् Shri Chinnamasta Hridayam

श्रीगणेशाय नमः ।श्रीपार्वत्युवाच ।श्रुतं पूजादिकं सम्यग्भवद्वक्त्राब्जनिःसृतम् ।हृदयं छिन्नमस्तायाः श्रोतुमिच्छामि साम्प्रतम् ॥ १॥

śrīgaṇeśāya namaḥ |śrīpārvatyuvāca |śrutaṃ pūjādikaṃ samyagbhavadvaktrābjaniḥsṛtam |hṛdayaṃ chinnamastāyāḥ śrotumicchāmi sāmpratam || 1||

ॐ महादेव उवाच ।नाद्यावधि मया प्रोक्तं कस्यापि प्राणवल्लभे ।यत्वया परिपृष्टोऽहं वक्ष्ये प्रीत्यै तव प्रिये ॥ २॥

oṃ mahādeva uvāca |nādyāvadhi mayā proktaṃ kasyāpi prāṇavallabhe |yatvayā paripṛṣṭo'haṃ vakṣye prītyai tava priye || 2||

ॐ अस्य श्रीछिन्नमस्ताहृदयस्तोत्रमन्त्रस्य भैरव ऋषिः \,सम्राट् छन्दः \, छिन्नमस्ता देवता \, हूं बीजम् \,ॐ शक्तिः \, ह्रीं कीलकं \, शत्रुक्षयकरणार्थे पाठे विनियोगः ॥ॐ भैरवऋषये नमः शिरसि ।ॐ सम्राट्छन्दसे नमो मुखे ।ॐ छिन्नमस्तादेवतायै नमो हृदि ।ॐ हूं बीजाय नमो गुह्ये ।ॐ ॐ शक्तये नमः पादयोः ।ॐ ह्रीं कीलकाय नमो नाभौ ।ॐ विनियोगाय नमः सर्वाङ्गे ।इति ऋष्यादिन्यासः ।ॐ ॐ अङ्गुष्ठाभ्यां नमः ।ॐ हूं तर्जनीभ्यां नमः ।ॐ ह्रीं मध्यमाभ्यां नमः ।ॐ ऐं अनामिकाभ्यां नमः ।ॐ क्लीं कनिष्ठिकाभ्यां नमः ।ॐ हूं करतलकरपृष्ठाभ्यां नमः ।इति करन्यासः ।ॐ ॐ हृदयाय नमः ।ॐ हूं शिरसे स्वाहा ।ॐ ह्रीं शिखायै वषट् ।ॐ ऐं कवचाय हुम् ।ॐ क्लीं नेत्रत्रयाय वौषट् ।ॐ हूं अस्त्राय फट् ।इति हृदयादिषडङ्गन्यासः ।रक्ताभां रक्तकेशीं करकमललसत्कर्त्रिकां कालकान्तिंविच्छिन्नात्मीयमुण्डासृगरुणबहुलोदग्रधारां पिबन्तीम् ।विघ्नाभ्रौघप्रचण्डश्वसनसमनिभां सेवितां सिद्धसङ्घैःपद्माक्षीं छिन्नमस्तां छलकरदितिजच्छेदिनीं संस्मरामि ॥इति ध्यानम् ।वन्देऽहं छिन्नमस्तां तां छिन्नमुण्डधरां पराम् ।छिन्नग्रीवोच्छटाच्छन्नां क्षौमवस्त्रपरिच्छदाम् ॥ २॥

oṃ asya śrīchinnamastāhṛdayastotramantrasya bhairava ṛṣiḥ \,samrāṭ chandaḥ \, chinnamastā devatā \, hūṃ bījam \,oṃ śaktiḥ \, hrīṃ kīlakaṃ \, śatrukṣayakaraṇārthe pāṭhe viniyogaḥ ||oṃ bhairavaṛṣaye namaḥ śirasi |oṃ samrāṭchandase namo mukhe |oṃ chinnamastādevatāyai namo hṛdi |oṃ hūṃ bījāya namo guhye |oṃ oṃ śaktaye namaḥ pādayoḥ |oṃ hrīṃ kīlakāya namo nābhau |oṃ viniyogāya namaḥ sarvāṅge |iti ṛṣyādinyāsaḥ |oṃ oṃ aṅguṣṭhābhyāṃ namaḥ |oṃ hūṃ tarjanībhyāṃ namaḥ |oṃ hrīṃ madhyamābhyāṃ namaḥ |oṃ aiṃ anāmikābhyāṃ namaḥ |oṃ klīṃ kaniṣṭhikābhyāṃ namaḥ |oṃ hūṃ karatalakarapṛṣṭhābhyāṃ namaḥ |iti karanyāsaḥ |oṃ oṃ hṛdayāya namaḥ |oṃ hūṃ śirase svāhā |oṃ hrīṃ śikhāyai vaṣaṭ |oṃ aiṃ kavacāya hum |oṃ klīṃ netratrayāya vauṣaṭ |oṃ hūṃ astrāya phaṭ |iti hṛdayādiṣaḍaṅganyāsaḥ |raktābhāṃ raktakeśīṃ karakamalalasatkartrikāṃ kālakāntiṃvicchinnātmīyamuṇḍāsṛgaruṇabahulodagradhārāṃ pibantīm |vighnābhraughapracaṇḍaśvasanasamanibhāṃ sevitāṃ siddhasaṅghaiḥpadmākṣīṃ chinnamastāṃ chalakaraditijacchedinīṃ saṃsmarāmi ||iti dhyānam |vande'haṃ chinnamastāṃ tāṃ chinnamuṇḍadharāṃ parām |chinnagrīvocchaṭācchannāṃ kṣaumavastraparicchadām || 2||

सर्वदा सुरसङ्घेन सेविताङ्घ्रिसरोरुहाम् ।सेवे सकलसम्पत्त्यै छिन्नमस्तां शुभप्रदाम् ॥ ३॥

sarvadā surasaṅghena sevitāṅghrisaroruhām |seve sakalasampattyai chinnamastāṃ śubhapradām || 3||

यज्ञानां योगयज्ञाय या तु जाता युगे युगे ।दानवान्तकरीं देवीं छिन्नमस्तां भजामि ताम् ॥ ४॥

yajñānāṃ yogayajñāya yā tu jātā yuge yuge |dānavāntakarīṃ devīṃ chinnamastāṃ bhajāmi tām || 4||

वैरोचनीं वरारोहां वामदेवविवर्द्धिताम् ।कोटिसूर्य्यप्रभां वन्दे विद्युद्वर्णाक्षिमण्डिताम् ॥ ५॥

vairocanīṃ varārohāṃ vāmadevavivarddhitām |koṭisūryyaprabhāṃ vande vidyudvarṇākṣimaṇḍitām || 5||

निजकण्ठोच्छलद्रक्तधारया या मुहुर्मुहुः ।योगिनीस्तर्पयन्त्युग्रा तस्याश्चरणमाश्रये ॥ ६॥

nijakaṇṭhocchaladraktadhārayā yā muhurmuhuḥ |yoginīstarpayantyugrā tasyāścaraṇamāśraye || 6||

हूमित्येकाक्षरं मन्त्रं यदीयं युक्तमानसः ।यो जपेत्तस्य विद्वेषी भस्मतां याति तां भजे ॥ ७॥

hūmityekākṣaraṃ mantraṃ yadīyaṃ yuktamānasaḥ |yo japettasya vidveṣī bhasmatāṃ yāti tāṃ bhaje || 7||

हूं स्वाहेति मनुं सम्यग्यः स्मरत्यर्तिमान्नरः ।छिनत्ति छिन्नमस्ताया तस्य बाधां नमामि ताम् ॥ ८॥

hūṃ svāheti manuṃ samyagyaḥ smaratyartimānnaraḥ |chinatti chinnamastāyā tasya bādhāṃ namāmi tām || 8||

यस्याः कटाक्षमात्रेण क्रूरभूतादयो द्रुतम् ।दूरतः सम्पलायन्ते छिन्नमस्तां भजामि ताम् ॥ ९॥

yasyāḥ kaṭākṣamātreṇa krūrabhūtādayo drutam |dūrataḥ sampalāyante chinnamastāṃ bhajāmi tām || 9||

क्षितितलपरिरक्षाक्षान्तरोषा सुदक्षाछलयुतखलकक्षाच्छेदने क्षान्तिलक्ष्या ।क्षितिदितिजसुपक्षा क्षोणिपाक्षय्यशिक्षाजयतु जयतु चाक्षा छिन्नमस्तारिभक्षा ॥ १०॥

kṣititalaparirakṣākṣāntaroṣā sudakṣāchalayutakhalakakṣācchedane kṣāntilakṣyā |kṣitiditijasupakṣā kṣoṇipākṣayyaśikṣājayatu jayatu cākṣā chinnamastāribhakṣā || 10||

कलिकलुषकलानां कर्त्तने कर्त्रिहस्तासुरकुवलयकाशा मन्दभानुप्रकाशा ।असुरकुलकलापत्रासिकाऽम्लानमूर्तिजयतु जयतु काली छिन्नमस्ता कराली ॥ ११॥

kalikaluṣakalānāṃ karttane kartrihastāsurakuvalayakāśā mandabhānuprakāśā |asurakulakalāpatrāsikā'mlānamūrtijayatu jayatu kālī chinnamastā karālī || 11||

भुवनभरणभूरिभ्राजमानानुभावाभवभवविभवानां भारणोद्भातभूतिः ।द्विजकुलकमलानां भासिनी भानुमूर्तिभवतु भवतु वाणी छिन्नमस्ता भवानी ॥ १२॥

bhuvanabharaṇabhūribhrājamānānubhāvābhavabhavavibhavānāṃ bhāraṇodbhātabhūtiḥ |dvijakulakamalānāṃ bhāsinī bhānumūrtibhavatu bhavatu vāṇī chinnamastā bhavānī || 12||

मम रिपुगणमाशु च्छेत्तुमुग्रं कृपाणंसपदि जननि तीक्ष्णं छिन्नमुण्डं गृहाण ।भवतु तव यशोऽलं छिन्धि शत्रून्खलान्मेमम च परिदिशेष्टं छिन्नमस्ते क्षमस्व ॥ १३॥

mama ripugaṇamāśu cchettumugraṃ kṛpāṇaṃsapadi janani tīkṣṇaṃ chinnamuṇḍaṃ gṛhāṇa |bhavatu tava yaśo'laṃ chindhi śatrūnkhalānmemama ca paridiśeṣṭaṃ chinnamaste kṣamasva || 13||

छिन्नग्रीवा छिन्नमस्ता छिन्नमुण्डधराऽक्षता ।क्षोदक्षेमकरी स्वक्षा क्षोणीशाच्छादनक्षमा ॥ १४॥

chinnagrīvā chinnamastā chinnamuṇḍadharā'kṣatā |kṣodakṣemakarī svakṣā kṣoṇīśācchādanakṣamā || 14||

वैरोचनी वरारोहा बलिदानप्रहर्षिता ।बलिपूजितपादाब्जा वासुदेवप्रपूजिता ॥ १५॥

vairocanī varārohā balidānapraharṣitā |balipūjitapādābjā vāsudevaprapūjitā || 15||

इति द्वादशनामानि छिन्नमस्ताप्रियाणि यः ।स्मरेत्प्रातः समुत्थाय तस्य नश्यन्ति शत्रवः ॥ १६॥

iti dvādaśanāmāni chinnamastāpriyāṇi yaḥ |smaretprātaḥ samutthāya tasya naśyanti śatravaḥ || 16||

यां स्मृत्वा सन्ति सद्यः सकलसुरगणाः सर्वदा सम्पदाढ्याःशत्रूणां सङ्घमाहत्य विशदवदनाः स्वस्थचित्ताः श्रयन्ति ।तस्याः सङ्कल्पवन्तः सरसिजचरणां सततं संश्रयन्ति साऽऽद्याश्रीशादिसेव्या सुफलतु सुतरं छिन्नमस्ता प्रशस्ता ॥ १७॥

yāṃ smṛtvā santi sadyaḥ sakalasuragaṇāḥ sarvadā sampadāḍhyāḥśatrūṇāṃ saṅghamāhatya viśadavadanāḥ svasthacittāḥ śrayanti |tasyāḥ saṅkalpavantaḥ sarasijacaraṇāṃ satataṃ saṃśrayanti sā''dyāśrīśādisevyā suphalatu sutaraṃ chinnamastā praśastā || 17||

इदं हृदयमज्ञात्वा हन्तुमिच्छति यो द्विषम् ।कथं तस्याचिरं शत्रुर्नाशमेष्यति पार्वति ॥ १८॥

idaṃ hṛdayamajñātvā hantumicchati yo dviṣam |kathaṃ tasyāciraṃ śatrurnāśameṣyati pārvati || 18||

यदीच्छेन्नाशनं शत्रोः शीघ्रमेतत्पठेन्नरः ।छिन्नमस्ता प्रसन्ना हि ददाति फलमीप्सितम् ॥ १९॥

yadīcchennāśanaṃ śatroḥ śīghrametatpaṭhennaraḥ |chinnamastā prasannā hi dadāti phalamīpsitam || 19||

शत्रुप्रशमनं पुण्यं समीप्सितफलप्रदम् ।आयुरारोग्यदं चैव पठतां पुण्यसाधनम् ॥ २०॥

śatrupraśamanaṃ puṇyaṃ samīpsitaphalapradam |āyurārogyadaṃ caiva paṭhatāṃ puṇyasādhanam || 20||

॥ इति श्रीनन्द्यावर्ते महादेवपार्वतीसंवादेश्रीछिन्नमस्ताहृदयस्तोत्रं सम्पूर्णम् ॥

|| iti śrīnandyāvarte mahādevapārvatīsaṃvādeśrīchinnamastāhṛdayastotraṃ sampūrṇam ||